حواديت

فلة

دي قطة من القطط الكتيير اللي عدت علينا

مرة كنا خارجين انا و صحابي .. وأختي الصغيرة كانت معانا.. كانت لسة عندها 12 سنة

وفجأه لفت تحت رجلها قطة صغنووونة طلعت من تحت عربية ووقفلتها .. ساعتها ولاء صرخت..

"اييه ده ده انت فلة"

وشالتها وفرحنا بيها قوي وقررنا ناخدها البيت رغم اعتراضات الاصدقاء وتأففهم

رام

ده كلب لولو.. بنت خالتي طلبت مني آخده البيت عندنا عشان مامتها رافضة وجوده في البيت وده مؤقتا لحد ماتقنعها

أخدته على مضض عشان النجاسة و عشان مابحبش آخد كلب أو قطة وهم كبار

بس كانت أيام حلوة قوي اللي قضيناها في البيت لوحدنا أنا وولاء مع رام و فلة

كنا مابنبطلش ضحك بجد

سبحان الله .. تصرفاتهم كان فيهاقرب كبير من الانسان

كان رام عارف انه اقوى من فلة و كان بيحب يعترض على تصرفاتها بالهوهوة عليها عشان تبطله فيحس انه سيطر و خلاص

وكان بيتعمد ياكل من اكلها حتى لو طبقه مليان

وهي كانت تستناه ينام و تنط فوقه و تطلع تجري

كنا لما ننادي عليها هي ..هو يييجي

ولما ننادي عليه نلاقيها جاية

كان عندي استعداد ايامها ما اخرجش خااالص من البيت و افضل قاعدة معاهم انا وولاء نضحك و نلعب معاهم

ومرة نزلنا انا وولاء من البيت على حديقة السلطان حسين بالليل

لقينا هناك جد و حفيده بيصطادوا ضفادع

كانت اول مرة اشوف ضفادع في حياتي رغم اني كنت كبيرة و في الكلية

وقفنا معاهم و الجد اقنعنا ان الضفدع ما بيخوفش ولا مقرف

واننا عادي لو لمسناه

واستغل احراجي منه و حط واحدة فايدي و كانت مبلولة قوي

قد يشرحلنا حيلها في الدفاع عن نفسها

وعن فوايدها لو أخدنا واحدة البيت و انها ممكن تقضي على اي حشرات ضارة

ماعرفش كان ببيقول كلام صح ولا لأ بس اقنعني

وفرحنا قوي انا وولاء اننا اتشجعنا و قدرنا نصطاد معاهم ضفادع

وأخدنا واحدة منهم و رجعنا بيها البيت

حطناها في صندوق عشان خفنا تخرج منه لما ننام و تيجي علينا

بس فتحنا الصندوق من فوق عشان النفس و مانعرفش انها عندها قدرة على النط لمسافات عالية

ولقيت ولاء في نص الليل و في عز النوم بتصرخ في الظلمة "هننننننننننند" قمت مفزوعة بسألها في ايه و انا مش شايفة حاجة من الظلمة لقيتها بتصرخ بتقول

" كابووووووووريا"

ياعيني من النوم و الفرعة ماعرفتش تجيب اسم الضفدع و طلعت معاها كابوريا

هديتها و قعدنا نضحك قوي

وحشوني رام وفلة

ووحشتني ولاء وهي صغيرة .. متعلقة بي و ماتقدرش تعمل حاجة من غيري

ووحشني الاستقرار في بيت فايدي كل أموره وتفاصيله

اللي سمى رام بالاسم ده حاتم ابن خالتي

كان و مازال مهووس بالكمبيوتر.. وعشان كده سماه رام

حاتم صديق طفولتي كمان وحشني جدا.. بقى اب. وعدى بافراح و احزان كتير واحنا بعيد عنه و عنهم كلهم

يارب يقرب البعيد

الحكاية دي فيها وشوش تانية كتير عدوا امام عيني دلوقتي و انا بحكي

من الوشوش دي صحابي.. بكل طباعهم و ايامي معاهم و علاقتي بيهم اللي كان لكل حد فيهم شكل

وحشوني كلهم

وشايلاهم في قلبي بكل تفاصيلهم اللي بتوحشني

وكل اللي بيوحشني بيونسني.. و بتسعدني الونسة دي ومابيهمنيش خااالص لو جروا كام دمعة معاهم

بحب احكي عنهم قوي .. ومع الحكايات اعيش نفس الاحساس و يمكن بشكل احلى وفيه سحر مختلف

حاجة كده شبه البانوراما لصور عادية قوي في الواقع بس لماا تتركب ورى بعضها مع موسيقى مؤثرة في الخلفية و اضائة خافتة.. فيبقوا زي سحر يملى القلب بالاحساس

بس ماكانتش صور عادية.. ولا احساسي بيها كاذب

كانت روعة.. كنت بعيشها و انا مركزة فكل تفاصيلها قوي و بغرسها فوجداني قوي

بحب قوي لما اعمل حاجة بحبها اركز فيها قوي و احفرلها مكان عميق قوي جوايا عشان تتسرب فيه و تستخبى هناك

المهم احبها

وانا بقالي زمان قوي ماعملتش حاجة بحبها

ولا يمكن بحب حاجات بس نسيت ازاي اغرس اللي بحبه فقلبي قوي و اركز فيه قوي

يارب ما نساش الحاجات اللي لحقت و غرستها و بتونس بيها دلوقتي

اعتراف هــام

وانا قاعدة بالليل بتنقل بين معتز الدميرداش و منى الشاذلي

وبين تنقل بين مشاكل كادر المدسين و مشاكل وزارة الصحة و تقارير عن رحلات الحجاج و فرحتهم

قلت ليه بدل ما انا بقالي كتير واجعة قلبكم معاي مرة بقى ألونها شوية على رأي ناس

:)

فقررت أحكيلكم على حاجة بقالي كتيييير مخبياها عنكم يا جماعة

أنا..

أنا..

أنا عندي سلحفتين و قطة

ده القطة

واوعوا حد يقول وحشة.. ده زي القمر
ودول السلحفتين


ماكانش قصدي و الله أخبي عليكم بس معرفش ليه كنت مطنشة حدثين مهمين زي دول وزي حاجات كتير بتحصل ساعات و احكيهالكم أول بأول من غير ما أحط الحكايات بالكيبورد ع المدونة
فأنا حكيتلكم بالتفصيل كل حاجة عنهم من يوميها بس انتوا بقى اللي ماقريتوش

القطة و السلحفتين ليهم حكاية طويلة
السلحفتين كنا بنأكلهم جمبري مخصوص شبه اللي بيستعملوه الصيادين في الصيد
وكانت شغلانة عشان نلاقي منه لحد ما كارفور بطل يجيب منه و بقى بيجيب أكل تاني كده مش بيحبوه فبقت أزمة
***
أما القطة هانم فهي مولوده أصلا جنب محل فطاير
يعني رافضة الفراخ تماما ومش أي الحمة و السردين الرخيص اللي متعودين نأكله للقطط فهي رافضااااه تماما

تخيلو بتاحب ايه
العيش باللبن(عيش فينو مش عربي)
و الكورن فليكس لااااازم يكون بايش في لبن متحلي بسكر

و بما اني مرارتي مابتتحملش حد يتعوج عليّ قلت أجيب أكل من بتاع القطط اللي فكارفور
مش عوجان لكن أكيد عشان أرخص من علب اللبن اللي بتخلصهالنا و الكورن فليكس
قامت برضه اتعوجت عليه و رفضته تماماً
***
يبقى كده عندنا مشكلتين
السلاحف اللي مضربين عن اكلهم
و القطة اللي مش عاجبها أكلها وبتاكل لبن و كورن فليكس
تمام؟

لحد انهاردة بس اتحلت المشكلتين اخيرا
اصل احنا كنّا جربنا نحط للسلحفتين اكل القطة اللي اشتريناه ع الفاضي فأكلوه و عجبهم
أوك؟
انهارده بقى كالعادة القطة انتهزت اننا ناسيين نشيل حوض السلاحف فوق التلفزيون بعد ما نزلناه عشان نحطلهم الاكل
فأفشتها بتحاول تمدّ ايدها عليهم و اول مازعّقت عملت انها بتشمشم جنب الحوض

ودِه عادة القطط انها تعمل عبيطة خااالص لما تتقفش
المهم قلت ألعب شوية و اطلعهم لها و اشوف حايحصل ايه؟؟
لقيتها ما بتعملش اي سلوك عدواني و مهمتمة جدا بالشم
فيه ايه؟ يا ترى؟؟
وشوية لقيتها قعدت جنبهم مهمومة

مالها بس!! .. ولا فهمت حاجة

فقلت خلاص آخد السلحفتين و ادخلهم الحوض تاني.. و أنا مشغولة باللعب معاهم شوية بتدّير كده أبص على القطة فين

لقيتها بتعمل ايه؟؟

لقيتها اكتشفت بالشم اننا أكلنا السلحفتين من أكلها اللي هي أساسا غضبانة عليه و طبعا الغيرة اشتغلت (وحايكون اكيد فيه بوست عن الغيرة بين رام و فلّة) و لقيتها نازلة على الاكل طحن مش طبيعي

و بكده تبقى اتحلت مشكلتنا أخيييرا و بقى نوع واحد بيأكل كل السلحفتين و القطة اللي طلعوا عيني بعوجانهم

آدي اللي كنت مخبياه و أخيرا قلته

أصلها لما ترجع الروح.. مافيش حاجة بتروح

.

.

فيه خبر مفرح جدا بالنسبة لي

.

ما ينفعش حد يستهيفه

ولا حد يعتبره عادي

عشان هو مش عادي

.

.

لدرجة إنه خلاني الساعة 11.30 بالليل و لسة لحد دلوقت قاعدة في سيبر و ماروّحتش البيت

.

الخبر ايه؟ه

.

طيب ثواني

خلّوني أقولكم مقدمة مملة شوية

.

.

أنا كنت مع صاحبتي في خروجة معتاده من خروجاتي مع صحابي و هي غداء في أي مطعم قريب من البحر و بعدين الرجوع مشي على البحر لحد أقرب مكان بين بيتي و بيتها

و بعد ما خلصت الخروجة و سلّمنا و المفروض كل واحده فينا مروحة ع البيت

لقيت رجلي مش راضية تروّح

ولقيت الأغاني اللي فوداني واخداني لمسار كنت دايما أمشيه في سموحة لما كنت أزهق و مش لاقية حد أخرج معاه لحد ما بقى المسار ده نفسه عزيز جدا و إتحول لخروجة مستقلة بنفسها

.

.

فضلت ألف على رجلي في شوارع منطقتنا حولين البيت بفرحة ما تتوصفش و عيني عمالة تعدي على حاجات بتفكرني بحاجات

لحد ما وصلت لميدان المفروض حاعدّي منه

شفت ميييين؟؟؟!!!!ه

.

.

شفت الكلب صاحبي

.

.

كلب كنت فقدت الأمل في إني ألاقيه تاني من الأجازة اللي فاتت

الكلب ده كنا إتصاحبنا عليه في الصيف اللي قبل اللي فات أنا و أحمد في النزهة

وكان عارفنا كويس جدا

آه بجد.. كان عارفنا إحنا بالذات

وأول ما ندخل النزهة و ينده عليه أحمد يجي علينا جري و بفرحة و يبدأ لعب مجنون جدا

.

و الصيف اللي فات رحت للكلب لوحدي

وكان نساني .. فلما ناديت ماحدش في الكلاب عرفني ولا جالي

فا رحت مرة تانية وواخدة معاي أكل.. فإتلم على كلاب كتير شبهه

نفس اللون و الحجم!!ه

أكّلتهم عشان خاطر عيونه.. يمكن يكون حد فيهم هوّ

لكن ماحستش أي حد فيهم

.

حسيته مش وسطهم

ومن يومها فقدت الأمل

والصيف ده لقيتني ما عنديش نفس أروح النزهة عشان عارفة إني مش حلاقيه و لا حالاقي حبّه بتاع زمان

و عشان ما رغيش عليكم كتير كالعاده

.

.

انهارده.. لسة دلوقت و أنا راجعة حالا قابلت كلب في نص الميدان اللي بعدي منه

لقيت مشيته مألوفة .. حسيت فيه حاجة واخداني

وقفت وراقبته و أنا محرجة من إني واقفة في نص الميدان

لقيته بيعرج بنفس الطريقة

.

معقول يكون هو؟؟ه

.

بس إحنا فين و النزهه فين؟ه

.

.

.

بس نفس حركاته المجنونه

نسيت الميدان باللي فيه

وقرّبت شوية و ناديته

لقيتته جي جري و ديله عمال يلعب كعاده الكلاب لما تتودد لحد

حسيت إني عاوزة أحضنه

.

بس أنا في الشارع مش في النزهه

.

وللحظة خفت أمد ايدي و أطبطب عليه عشان اسلوبه في اللعب فيه تهور و يمكن يحس إني بقرب منه قوي فيعضني

لكن إتجرّأت و مديت إيدي على راسه فقعد في الأرض بنفس طريقة الكلب صاحبي

و لما بصيت على جلده و جسمه لقيت فيه نفس التعاوير اللي أحمد كان بيزعقلي لما كنت بقرب ايدي منها

مش معقول كل ده حاجات شبه بعضها في الكلبين

.

.

لأ

.

.

ده أكيد هو

.

رحت جري لأقرب بقال و إشتريتله أكل

ورجعت للميدان و أنا خايفة ليكون مشى

بس لقيته لسة قاعد

وأكلته بإيدي

وسط الميدان

.

.

وايه يعني

مش ده بلدي

مش الناس اللي فيها أهلي ومنّي

ايه يعني لو حد قلّس

ما يقلّس

يعني هو اللي بيقس ده عارف أنا بحبه قد ايه

ولاّ عارف أنا بحب الكلب قد ايه؟

ولاّ كان عارف قيمة إنه يكون بطبيعته في بلده؟؟ه

.

.

لا ما يعرفش

وأنا موافقة يقلس مادام ما يعرفش

.

.

.

أنا فرحانة قوي يا جماعة

معقول أكون لقيت الكلب صاحبي بعد سنتين؟؟ه

أنا طبعا مش حاسرح بقى و أبالغ و أقول إنه فاكرني

بس هو كلب عشري

بياخد على الناس بسرعة

وكفاية إنه كان صاحبنا أنا و أحمد

وأحمد سألني الصيف اللي فات "روحتِ للكلب النزهة؟؟".. وكذبت.. قلتله لأ

ماكنتش عاوزاه يعرف إني لسة بدور على ذكرياتنا

.

.

عارفين فرحانة ليه كمان دلوقت ؟؟ه

عشان حاسة إنكم فرحانين عشاني

و النبي إفرحولي قوي

عشان ده حدث رائع و قيمته كبيرة قوي عندي

بس هو لو روحت الميدان تاني ممكن ألاقيه تاني هناك؟؟ه

حاحاول بكرة أروح تاني و آخد أكل في نفس الميعاد

لو لقيته تاني بكرة يبقى ضمنت كده الصيف ده إنه يحفظ المكان و الميعاد

.

.

مش كفاية بقى كده عشان أنا كده تخطيت معادي بكتير

وسامحوني على الرغي الكتير

.

.

بس أنا فرحانة

كلب صاحبي

سألت نفسي كتييير قوي

ليه ربنا خلّى الكلب نجس فإتحرمنا من تربيته جوة بيوتنا

ليه حرمنا من المتعة الرائعة في تربيه الكلاب

الكلاب زي الأصدقاء .. بتحس بضيق و فرح صاحبها و دايما تتوددله وتطيعه و تخلصله مهما كان صاحبها فقير ولاّ غني و لاّ منبوذ ولا دمه تقيل و لاّ حتى قاسي أو ندل

وكنت بخاف أفكر كتير في الحكاية أحسن أقع في المحظور و أزعل من ربنا

أستغفر الله

واللي فتح عقلي لمبرر معقول و مناسب هو كلب

آه كلب

كلب رائع و بموت فيه

كلب شفته مرة في حديقة أنطونيادس لما كنت في إسكندرية.. رحت أقرا هناك كالعاده ولقيته من بعيد معدّي وكالعاده برضه لما أشوف قطة أو كلب في أي حته بسبسله .. و المتوقع من لكلاب دايما هي إنها تكبر عليّ على عكس القطط.. لكن ده جالي.. وأنا لقيت قلبي حاينط من الفرح لما جالي.. كان نفسي أطبطب عليه بس خفت عشان الصلاة..

بس هو قرب مني و كان عاوز يلعب أو يتمسح .. مش عارفة... بس صوتي وحركاتي حسسوه إني ببعده فعمل الصوت اللي الكلاب بتعمله لما تكون زعلانة فقطع قلبي و ناديته و طبطبت عليه و نسيت القراية و قضيتها لعب و جري معاه ..

وكان يوم روعة.. وحكيت عنه لإسكندرية كلها.. وبقيت أروحله دايما و كان بيعرفني من بعيد و من غير ما أناديه أصلا.. وييجي عليّ جري ... كانت أول مرة فحياتي كلب يتعلق بي كده

ساعتها فكرت إن يمكن عشان كده ربنا حط فيه عيب يعمل بينه و بين الإنسان حاجز.. لإن ممكن الإنسان يكتفي بصداقته و حب الحيوان ده ويستغني عن اللي ربنا فرضه عليه من إختلاط بالناس و عمل أسرة..

أنا حسيت بكده لإني حلمت إني أعيش فبيت لوحدي ومعاي الكلب العسل ده و قطتين و عصافير و كمبيوتر

حسيت إن الدنيا كلها ما تزمنيش لو دول عندي

مش عارفة ده مبرر صح ولاّ لأ.. بس أقنعني جدا و فرحت إن ربنا هداني ليه .. وإداني سبب أقتنع بيه إني لازم أبعد عن تربية الكلاب مادام ماعنديش مكان برة البيت.. وإنه ما سابنيش أشطح بخيالي لحاجة تغضبه مني

بس الكلب ده بموت فيه.. لما رجعت من السفر الأجازة اللي فاتت رحت أزوره بس لقيت من 3 نفس الشكل و الليون فماعرفتش هو واحد منهم ولاّ لأ... أصل كلهم جولي عشان كان معاي كبده إشتريتهالهم

فرحت برضه بيهم بس كان نفسي أعرف كان حد منهم هو كلبي ولاّ لأ

وبعدين كان دمهم تقيل و مش بتوع لعب

وحشني قوي

ساعات أحب حاجات .. مايحبهاش غيري

في الجاية و الرايحات .. بغني مع طيري