صفحة بيضا و فتحتها عشان اتكلم
لاني لو ما اتكلمتش حانفجر من الضغط اللي بتضغطه علي افكاري
من اتهاماتي لنفسي
من وجودك فيها
طول الوقت انت موجود في افكاري بشكل غريب
وجودك الأول كان بيونسني.. بيطمني.. بيدفيني
دلوقتي وجودك بينرفزني .. بيشتتني... بيخليني أضعف و استعدادي اكبر للحزن و الجرح و الوحدة
عشان خاطري ما تبتدي بالزعل من كلامي بدري كده .. انا لسة عندي كلام كتير يزعل
وماقدميش غيرك اقولهولك.. او بمعنى اصح ماقدميش غير الصفحة اللي قدامي دلوقتي
زمان كان كلامي فيه شوية جمال.. شياكة
دلوقتي ما عنديش
بقول الحمد لله لو طلعت مني كلمة وتطلع زي كا تطلع حتى لو طوب
الحمد لله انك مش موجود معاي لحد انهاردة ولحد الحال اللي انا بقيت فيها دلوقتي
وعلى العموم لو كنت موجود انا كان زماني بعدت عنك و اختفيت
زي ما بعدت عن ناس تانيين غاليين
كنت حاتحس انك قصاد انسانة غريبة جدا غير اللي تعرفها
اللي جواها يخوف ومش فاهم ايه مكانك انت فحياتها
زي ما فيه ناس واقفين دلوقتي قصادي مستغربين
تعرف؟
انا نفسي اتولد من جديد في مكان تاني جديد.. أو اختفي خالص
بسأل نفسي هو ليه انت بس اللي فضلت جواي؟.. اناكف فيك فيك و تناكفني
ايه الي بيمزك يعني عن باقي الناس كلها
على فكرة انا بطلت اتخض عليك
بس فجأة دلوقتي تخيلت لو انت واقف قدامي فعلا و بقولك كل ده و انا شايفة تعبيرات وشك قدامي
زي ما انا شافية حد غالي علي دلوقتي و بعامله باسلوب قاسي جدا هو مش فاهمله سبب
مش عارفة بعمل كده ليه
وحتى لو فيه سبب.. طيب مش بعاتبهم ليه و اريحهم و ارتاح
حتى انت ماعاتبتكش
لما جيت علي انا سكت و فضلت اتعذب و انا مدارية.. لحد ما اختفيت انت فجأة
كنت على امل اني حاييجي يوم و اعاتبك بس انت فاجئتني باختفاء ماينفعش معاه عتاب ولا حتى بيني و بين نفسي
اختفاء سببه ممنوع معاه العتاب
فبلعت عتابي وافتكرت انه اتمسح.. وزعلانة من نفسي قوي انه ما اتمسحش
بيقولوا عن اللي زي قلبهم اسود.. ياخوفي لاكون فعلا مخبية جواي قلب اسود مغطياه بابتسامة انا اكتر حد مش داري ايه اللي وراها
تعبت انا و عاوزة حد يرد علي
حد ياخدني من نفسي عشان بقت وحشه قوي
وتعبتني قوي
خلتني بقيت حاسة اني عايشة حياه حد تاني مش انا
كل ده وانت موجود في خلفية كل الاحداث
انا مابقتش اعرفك
مش عارفة انت مين وامتى قابلتك و ايه اللي حصل بينا
انا نسيت شكلك و صوتك و طباعك
ونسيت حلمت بايه معاك
انا آسفة على كلامي البايخ ده .. بس أهو على قد الوجع اعمل ايه
انا عاوزة ابعد عنك بس المشكلة انك بتتحرك معاي كل ما ابعد
لحد ما بعدت عن كل حاجة عرفتها و عرفتني و برضه انت لسة بتتحرك معاي
ابعد بقى
ابـــعـد