لو سمحت ...تخيل وانت بتقرا
لو عايش في صحراء واسعة جدا... بعيده عن المدن و العمار و الطرق و المواصلات .. ألوانها أصفر و أزرق الصبح.. وأسود و أسود بالليل
وعندك عامود طويل متثبت في الأرض
وجنبه عمود تاني بس على بعد
قصاد العمود بيتك... فيه انت و اسرتك
وقصاد العامود التاني بيت تاني فيه جارك واسرته
ودول البيتين الوحيدي في الصحرا
بينهم ممر صغير حاطين فيه طرابيزة بشمسية وبيت الكلب والكلبة اللي خلفوا كلاب فقسمتوهم بينكم
والعمودين متوصل بينهم شبكة الفولي
وساعات بينشروا عليه الغسيل
تخيل أيام سهر تكلوا ع الطربيزة مع الكوتشينة و الكاسيت
وتخيل اللعب بالفولي فأيام الصيف المعتدلة
وتخيل لمتكم جنب بعض أيام الشتا قدام زجاج الشباك و انتوا بتتفرجوا ع المطر
وسريرك انت و اخواتك لما تتلموا عليه مع عيال الجيران كإن عندكم نقص سراير
وتخيل
حد جه أخد الجيران و مشى
فقلت معلش.. أهو بيتهم حايفكرنا بيهم
قام جه حد هد البيت..
فقلت خلاص أنا لي أسرتي.. بالدنيا
فجه أخد أسرتك
فقلت معلش... أهو الكلاب من ريحتهم
قام الحد جه أخد كل الكلاب
فقلت خلاص.. أعمل ايه يعني
بيتي أمان... ولينا عشرة كبيرة سوا.. هو مملكتي و كل برواز و سجادة فيه مونساني
فجه أخد البيت
وبقيت في الصحرا لوحدك من غير بيت.. ولا ناس ولا أشياء
ولا منظر تعلق عليه عينك... صحرا مافهاش حتة شوية صخر مجمعين جنب بعض.. أو حبه رمل عملين تل صغير... أو زرعاية تسليك بحركتها مع الهوا
بس استني استنى
العامود أهو.. لسة موجود
فكل يوم تصحي وتشوف ضل العامود فين انهاردة؟؟.. و تسهي نفسك عنه ساعة كده قال يعني مش شايفة
وبعدين تبصله فجأه عشان تقفش الضل اللي بيلف حولينه.. وتفرح قوي أما الدنيا تغيم فيختفي ضل العامود و ضلك انت كمان... تغيير... ويعدين تزعل عشان وحشك... تغيير تاني في المشاعر... وبعدين السحاب يفتح تاني فترجعلك الضلال... فتفرح بحلاوة الرجوع.. تغيير تالت
وتقوم تتمشى شوية و ترجعله .. ماهو الضمان اللي يعرفك ان هي ده أرضك
آه هي فاضية .. بس لأ.. معلش
هي ده اللي لعبت عليها
و هي ده اللي الشتا اللي كنتوا بتتفرجوا عليه كان بينزل عليها
آآآه لو كنت أعرف إنه الوحيد اللي باقيلي
آه لو كنت أعرف أني حاحتاجله كده
كنت خليتهم يكتبوا عليه
وكنت دفنت تحتيه صورهم
وكنا حاولنا نصنع أي ذكريات ليه في أيامنا
انت متخيل؟؟؟
ده عامود!!!... يعني حتى ضله مايكفيكش.. ده حتى عرضه ما يصدش عنك الهوي
ولا تعرف تتسلقه لو حبيت تغير مكان دبة رجلك بدل الرملة
عاااامود
تخيل لما كل اللي يتبقالك في الدنيا عامود
طب تخيل لو حد بعد شهوووور جه أخد العامود
هناك 47 تعليقًا:
الواحد بجد بتنقطع علاقته بالدنيا برحيل الاحباب
واصعب شيئ ان الواحد يعيش علي ذكراهم
الذكري في نظري هيا صدي الزمان الشاكي
وملت اذني سماع شكوته
وصعب اني اعيش بين اطلال
لناس بحبهم
دا بيعتبر موت بالبطيء
وكمان لما حد يحرمك من اخر حاجه بيقيالك
يعني بيتفنن في تعذيبك
ربنا ينورلك حياتك ودنيتك
ويبعد عنك شبح الزمن الي بيخطف السعاده والسرور من الوجوه
ويصهرهم في الامه
ربنا يسعدك يارب
تحياتي
اختك جيهان
اقولك اية بس انا كنت داخل انام قريت البوست دة مش هقولك المرة دي اي حاجة واقويك انتي وجعتي قلبي انا
لدرجة اني حسيت كل الاحاسيس دي ارتباطنا بالناس شئ غريب بس لوعرفنا انة للكون دة الة بينظم كل شئ فية ومفيش حد بيدة حاجة هنصبر لو عرفنا اننا هنؤجر علي كل شئ هنصبر لو عرفنا اننا مجرد زوار في الحياة وهنمضي هنعيش
بمناسبة الصحراء
احنا كلنا زي واحد ماشي في صحرا كبيرة ولقي شجرة قعد تحتها شوية يستظل بظلها وتركها ليكمل مسيرتة اهو الفترة الي قعدها تحت الشجرة دي حياتة كلها
مش طويلة هي جزء بسيط من المسيرة
ارجوكي استمتعي بالشجرة قبل ما تمشي للمسيرة كلنا هنتقابل في اخر المشوار
واذا كان حد مشي قبلنا فلانة وقت ظلة تحت الشجرة انتهي واحنا كمان هينتهي وقتنا
بس حلو موضوع البيتين دول الي في الصحرا لا ولعب وسهر وكلاب كمان انتي لسة برضو بتحبي الكلاب يالا بقي فكيها واضحكي
شم قادر اقولك انا كنت مستمتع و انا بقرا البوست ده قد ايه
وكنت متخيل كل كلمه قلتيها في دماغي زي مايكون شريط احداث ومتزامن مع الكلام
بس في الاخر دماغي لفت في حكايه العمومد دي مش ركزت فيها اوي علشان كده مش فهمت ايه المقصود منها
تصفيق حاد للبوست الفلفسي الرائع
تحياتي
الدبور
gohayna
ماتقلقيش عليّ يا جميل .. بس أحيانا تعدي عليك لحظات ترسملك صور في خيالك فتجري و تسكبيها هنا
لكنها بتنتهي بأسرع ما تتخيلي
شكرا على تواجدك العزيز عليّ
كراكيب عادل
عارف؟؟... أنا بحمد ربنا إني عارفة قيمة الشجرة قوي
وكل يوم بقعد أتفرج عليها و أشوف فيها مناظر أجمل عن اليوم اللي قبليه
وبرتبط بيها كل يوم أكتر من اللي قبليه
وعموما أنا من محبي سماع الكلام
يعني مدام قلت فكّيها
يبقى خلاص وجب يا فندم :)
العزيز
الدبـور
*******
حاجة تفرحني جدا ان السرد اللي كتبته قدر يجذبك للتخيل
أما العمود فهو رمز لناس كانت مهمشة جدا في حياتك.. وأبعد من انها تكون أحد عناصر حياتك أساسا
بس فجأه تلاقي انهم كل شيء رغم انهم مالهمش فقلبك أي شيء
تقتكر مرافقتك ليهم بعد كده مجرد استسلام لأمر واقع ولاّ أنانية و استغلال منك؟؟؟
أنا عارفة إني توهتك
سؤال بقى مالوش علاقة بالموضوع
أنا ملاحظة في ناس كتير في المدونات و انت منهم بيكتبوا كده:
مش ركزت.... بدل... ماركزتش
أو... مش فهمت... بدل.. مافهمتش
فا أنا مش عارفة ده حاجة جديدة فمصر أنا لسة ماعرفهاش ولا ده اسلوب في المدونات و لا صدفة؟؟؟
:)
تحياتي ليك
الحياة كماء جارى يستطرق ويتخلل
اذا اغلقتى منفذ امامه وجد منفذا موازيا
واذا اغلقتى المنفذ الموازى ارتد لاتجاه جديد فى منفذ جديد
واذا اغلقتى المنافذ الافقيه غاص فى الارض وتخللها
واذا سددت الارض تبخر فى الجو وتحرر
والانسان هكذا
اذا سددتى ابواب رزق امامه وجد غيرها
ولو ضاقت به الارض هاجر لغيرها
واذا قد احبابه صنع احباب غيرهم
ولا يسقط من البشر فى ظلام الاكتئاب والحزن واليأس (الدائم) الا الضعيف الخائر اليائس من رحمة الله
ودائما رحمه الله واضحه
ولطفه بالعباد ظاهر
ورزقه لا يعدم اسباب
وسكينته لا تخطئ القلوب
انتظرى وسترى
شعور صعب قوي
بس انا اية يسكتني
لازم يكون لي وقفة
و لا اية
تعالي
والله لو ده قدر ربنا ان ياخد منك كل حاجه ويتبقي لك العامود
متقدريش تقولي حاجه
ولازم ترضي بالواقع ده اي كان طبيعته
وبرده تقولي لعله خير
ايه البلطجة دي
ده رخم اوي اللي غاوي ياخد كل حاجة ده
بس بجد لو ده مافيش مفر منه
يبقي لازم نعيش الواقع
هانعمل ايه بقي
هارملس
بقالي 3 بوستات مستنية ردك بلهفة لاني بحب جدا اللفتات اللي بترمي عليها الضوء و بتوجه نظري لها دايما
وبتفرق كتيرمعاي
وفعلا مثلما قلت
دائما تجد الحياه مخرجا أو خيطا تبدأ منه
فلسفة مرضية جدا زاحت عني بعض الإحساس بالذنب
فتخل لو العامود ده انسان مهمّش في حياتك
ثم بدأت الحياه تفقد أولوياتها.. ثم كمالياتها
ثم تبقى هذا الإنسان
هو وحده الذي يمكن أن يعاونك رغم نسيانك له و رغم عدم احتياجك له في السابق و رغم افتقاره لكل ما تحتاجه
حينها... لجوءك له أنانية و استغلال
أم كما قلت.. خيط تلقائي لبدء الحياه بشكل جديد؟؟
أنا بطبيعتي كانسان ألجأ للخيار الثاني
فطبيعتي كإنسان تفرض علي أن أجمّل عيوبي و نواقصي
فأطلق عليها "طبيعة الحياه"... بدلا من المسميات الأخري
هل وصلت ؟؟؟
طهقانة
وأنا بكتب البوست خطرلي نفس التساؤل ..ايه الاستسلام ده
ليه سايبة كل حاجة تتاخد بالسهولة ده؟؟
هي تفرق لو اللي أخدهم قدر
أو اللي أخدهم معتدي
أو أخدهم سلبيتي و عجزي عن الحفاظ عليهم
وأكيد المفروض دلوقت أقول مين فيهم هو السبب
بس لو قلت حاتكون قاسية عليّ قوي
عشان كده حاسكت
3lool
فعلا.. لعله خير
لعل ده حصل عشان أتعلم اني أهتم بكل تفاصيل الحياه المهمشة
أصل مش لازم القيمة تكون ظاهرة قوي وباينة و بتصرخ قدامنا عشان نحسها
تحياتي ليك وبتمنى تكرار الزيارة
*****************************
Amr Ahmed
:))
تصدق هي فعلا بلطجة؟؟؟
بس يمكن البلطجي ده جالك عشان انت تستاهل انك تقابله
ومدام أستاهله يبقى حاعرف أتحمل النتائج بشكل مريح
ولو مااستاهلهوش حاتبقى صعبة قوي
لكن
لو العامود طيب و انسان
برضه حاقدر اتحمل
انت فاهم حاجة؟؟؟
أسعدتني زيارتك
احساس صعب اوى
بصرحه مقدرش اعيش كده
تحياتى
الصورة الأولانية اللي رسمتيها دافية قوي..
قد ايه بيبقى صعب الفراغ بعد الدفا
لكن حتى لو مكنش فاضل غير العمود .. ليه متبنيش جنبه عواميد صغيرة تونسك ..بعد فترة شوية عواميد ممكن يعملوا بيت تاني
انا شفتها من ناحيه تانيه غير فراق الأحبه
تعرفي يا هند
هما فعلا خدوا العمود
مش لسه هيخدوه
يا تري انتي فهمتي انا فهمتي كلامك ايه ؟؟؟
تحياتي
نعم يا عزيزتى وصلت
واكرر لكى اخر جمله فى التعليق الماضى
انتظرى وسترى
لا تدعى نفسك تخدعك وتجمل لكى العامود وتزين لكى وقفته وتوهمك انه قادر على حمايتك وان ظله سيظللك ويحميكى
استفتى عقلك الان واستفتى قلبك الان
وانتظرى وسترين جوائز وتعويضات من السماء
انتى تستحقينها
رائع جدا يا هند البوست ده الخيال فيه جميل جدا
بس اكيد مش اجمل من الي كتبته
:))))
بيحرك تخيلات كتيره وبيخلي كل واحد يفكر فيه من ناحيته مين الصحراء و مين الجيران ومين العمود واخيرا مين الي خد منه كل حاجه
بس دايما الحياة عباره عن مجموعة من التخيلات لاشكال بتمر بينا عاوزين نشوفها فاضيه هنلاقيها فاضيه و لو اقنعنا نفسنا ان كل حاجه زي ما هي حتي لو مش زي ما هي هنعتقد بكده و هتستمر الحياة دايما
سوري هند الكاش سيرفر كالعاده مكنش جايب اخر نسخه من المدونه عندك بقالي كام بوست مش شوفتهم لسه شايفهم البقاء لله في احمد ربنا يرحمه برحمته ان شاء الله و يصبر اهله
تحياتي
كلما تخيلت
استيقظت على واقعنا الاليم
فخيالى لم يعتد يحتمل الا الصور المشرقة
لا الكوابيس
تحياتي لقلمك المبدع
يا ساتر يا رب ليه مضلماها كده
بس انا استفدت حاجة من الموضوع ده.......ان لو حواليا ناس حبايبي كتير امسك فيهم بايدي وسناني كمان لانهم نعمة حسيت بالنعمة دي وانا بتخيل كلامك فعلا حاجة تبقي صعب اوي
تحياااااااااااااتي يا هنودة
طبعا واتباعا للقاعده اللي بتقول
" قرد يسليني و لا غزال شارد"
فبدلا من مشاهده البقايا و اطلال من غادروا
افضل الاتجاة الي العمود اهو قرد يسلي
و الفضا وحش برضو
النقطه تانيه يا هنوده
مش ركزت او مركزتش
دي بتبقي لهجه بلاد مش اكتر يعني في محافظات القناة هتلاقي كلمه ايجه يعني جه او أتي بالفصحي و لو دروتي علي كل بلد هتلاقي ليها مجموعه من الكلمات او الحروف المميزة في النطق
بس عندنا بتتقال مركزتش او ملعبتش انا بس اللي فصلت التش في الاخر علشان الكلام يبقي سهل قرايته
شكرا للتدقيق في الرد
تحياتي
الدبور
ابني بيت من تاني
واتجوزي و كوني اسرة جديدة
و حاييجي جيران يسكنوا جنبك
صاحبيهم و العبي معاهم
واتشاركوا في الاكل واللعب و كل شيء
اعملي شبكة فولي و بيت كلب و جنينة
اللي اتهد نقدر نبنية من تاني
بس الإرادة
انا كنت محتار اية هو رمز العامود في قصتك
بس حكاية ناس مهمشين دي مش عارف
حاسس ان العامود بالنسبة لك شيء مادي ملموس مش نكراء
بس عجبني اسلوبك و كلامك كلة مشاعر و احاسيس
ربنا يديم عليكي العامود يارب
ويعوضك عن اللي ضاعوا بأحسن منهم
تحياتي
متغيرة شوية
زي ماقلت بالضبط
الفراغ صعب بعد الدفى و اللمة
والصعب أكيد بياخد وقته.. و اللي اكتشته انك لازم تديله وقته عشان يرضى
وبعدين تخليه يعدي و تكملى الحياه بشكل طبيعي
تحياتي
CrAzY-bOy
:)
أكيد هو صعب ويا رب ما تضطر تعيش كده أبدا
شرفتني زيارتك
•«ρяoιd»•™
شفتها غير فراق الأحبة؟؟
ممكن يكون فراق جدورك
ممكن فراق الشيء اللي بتحبه جواك
أما بالنسبة للعمود فأنا مافهمتش إزاي أخدوه بس عاوزة أعرف
لازم تيجي تقول .. ماشي؟؟
هارملس
كم اتمنى أن أكون بالقوة التي تمنكني من إتباع قلبي
فعندما نكون ببراءتنا نتبع دوما قلوبنا
وعندما نفقدها فيكون لاقلب هو آخر ما نلقي النظر عليه
تحياتي لك يا هارملس
عبدالله
ونعم بالله و يا رب يستجيبلك ويرحمه ويرحم المسلمين كلهم
و فعلا زي ما قلت
الحياه مجموعه تخيلات.. يعني ممكن اللي تتخيله انهاردة تنساه بكرة
ولو دونته وبعدين قريته بكرة تستغرب... معقول هي ده نظرتي للحياه؟؟؟
وبعدين ترجع تقراها بعد سنة تقول يااااه لو كانت نظرتي دلوقت بالصورة السهلة ده كنت ارتحت
وهكذا
الحياه فوق و تحت و قاسية و سهلة و مظلمة و منورة
جميلة الحياه يا عبدالله بجد
صاحب البوابــة
أولا و قبل أي شيء.. حلو الاسم جدا
ثانيا.. بتقول شكرا لقلمك؟؟
عارف الكلمة ده نبهتني لشوق جامد جواي للقلم
حسيت ان ياااه.. فين أيام ما كنت بمسك قلم و اكتب اللي جواي على الورق زي ما بكتبه دلوقت ع الكيبورد
القلم له معزة فعلا و طعم تاني
بس برضه دلوقت فيه طعم جديد أجمل بكتير
لأ مش عاوزة أقول أجمل عشان بغير على الحاجات اللي بحبها
لكن اني ألاقي لخواطري ردود و انتقاد أو مديح
ده طعم جميل قوي حاسة ناحيته بعرفان شديد
شرفتني قوي زيارتك و اسعدتني كلماتك
تحياتي :)
الحصان الأسود
ياااه واحشاني قوي ردودك يااخي.ز فينك؟؟
عارف حسستني بتطور سريع ونشيط
بناء و جواز و خلفة ولعب و أكل وفولي
حسيت مع كلامك اني عشت كل ده فجأه دلوقت
قد ايه جميلة الصورة اللي خليتها تترسم جواي دلوقت
الإرادة.............. حاجيبها.. مش حاسيبها ما تخافش
مصراوي أوي
آه يعني القرش الأبيض ينفع في اليوم الإسود.. :)))
لا و الله يا مصراوي
لا مضلماها ولا حاجة.. ولا الألم معناه ضلام
يمكن يكون نور يشاورلك على نقطة كانت غايبة عنك
ولما بتضلم قوي
بتفتح تاني و تخليق تقبل عليها بلهفة تعوض بيها الضلام
الحكاية كلها مود..
طبعا أنا كنت بهزر في الأول... الناس زي ماقلت نعمة... قيمة النعمة ده رغم اننا عارفنها قوي على قد ما بنحس اننا ولا عارفين حاجة لما تروح
تحياتي ليك
وحتى اصحابي كانو بيتريقو عليا عشان كنت بكلم الماجات وانا قاعد لوحدي
انتو مالكم
انا بحب ماجاتي وفناجيني
وياسلام لو واحد ودنه اتكسرت
ممكن اقعد اسبوع باخد فيه العزا
في ناس كده وفي الناس كده والدنيا يا اما كده يا اما كده
حدش فاهم حاجه كده ولا كده
طب ممكن يفهمني ليه كل ده
---------------------
اه يا هنوده تقريبا تايه ومش عارف اروح
عجبني المصطلح دا قوي
تخيل بقا لو صاحبي عامود
انا حبيت امسي واسلم واصبح وكل الحجات الحلوه
ازيك يا جميله اخبارك ايه؟
تحياتي يا قمر
أحمد سلامة
مج... رف.. مفرش على طربيزة السفرة
فيه حاجات محدش يتصورلها معنى
لكن احنا بس اللي حاسينها
فعلا أنا بحس ان جمال الحياه هي فحبك للأشياء
ساعات بلاقي فيها متعة أكبر من الناس
بس انت قلقتني عليك... ايه التوهان ده؟؟ :))
*************************
طهقان
بس كده.. انت جبت اللي عاوزة أقوله
تخيل نفسك و العامود صاحبك
تخيل أنانيتك!!
تخيل كمية العطاء اللي بيدهولك حتى لو كان عطاؤه ده مش هو أحلامك
بس بيديك كل اللي عنده
وانت وجودك جنبه مجرد اضطرار
تخيلها
جهينة
عرفتي ازاي إني قمر؟؟؟
:))
حلو قوي ان ألاقيك جاية تمسي عليّ و أكيد بالطلّه الجميلة ده أنا تمام
بشكرك على احساس الصداقة القريّب من قلبي اللي حسستهولي دلوقت
مساء الخير
:)
hannoda
إزيّك الأول
مش عارفة ليه كلامك فكّرني برواية قريتها زماااان
إسمها
Cyrano de Bergerac
سيرانو دي بيرجيراك
يعني
على قد مافهمت كده
إن العامود ده زمان كان مهم
كان ليه إستخدامات مهمة لمّا كانت الظروف مختلفة
ماكانش زي ما بتقولي مُجـرد عامود
مش ذنبه بقى إن الظروف الحالية مخليّاه ضعيف الفايدة قوي كده
عارفة ياهانودة
أجمل حاجة في الدنيا إننا نعامل أي حد وأي حاجة
على إنها مهمة في حد ذاتها
مش نقيّم أهميتها على حسب فايدتها أو وجودها داخل منظومة كاملة على بعضها
يعني
إما إني أرفض من الأساس
أو أقبل من الأساس
مش أقبل لمّا الظروف تجبرني على ده
فاهماني ؟
يارب أكون أنا اللي فاهمة أساساً
عموماً
اللي إنتي كاتباه حلو قوي
شغلتيني بكلامك
تحياتي ليكي
انا شفت العامود ده علي انه كرامة الشعب المسلم و العربي
و فعلاً هو اتاخد مننا إلا من رحم ربي
و إن شاء الله يرجع عن قريب
تحياتي
صعب قوى الى انتى كاتباه دة
لأ مش اللى انتى كاتباه
اللى خلاكى تكتبى الكلام دة هو اللى صعب
متخيلة احساسك وانتى بتكتبيه
شايفة دموعك وانتى بتكتبيه
حاسة بإديكى بتترعش على الكيبوورد
قلبك مفطور من الألم والغربة والوحدة
قلبى معك رغم انى مش فاهمة قوى بس حاساكى قوى
O dia 25 de Abril de 1974 foi o dia do derrube da ditadura fascista em Portugal, a chamada REVOLUÇÃO DOS CRAVOS, e a queda do (poder) dos inimigos do povo. 25 de Abril, sempre.
Day 25 of April of 1974 was the day of it knocks down of the dictatorship fascist in Portugal, the call REVOLUTION OF the flowers, and the fall of the power of the enemies of the people. 25 of April, forever!
يوم 25 نيسان 1974 كان يوم تقرع عليها من الديكتاتوريه الفاشيه في البرتغال والدعوة للثورة الزهور ، وسقوط سلطة أعداء الشعب. 25 نيسان ، الى الابد!
День 25 апреля 1974 года, в день он постучит в воздухе фашистской диктатуры в Португалии слово О РЕВОЛЮЦИИ цветы, и падение власти враги народа. 25 апреля, навсегда!
Le jour 25 d'avril de 1974 était le jour de lui frappe vers le bas du fasciste de dictature au Portugal, de la RÉVOLUTION d'appel des fleurs, et de la chute de la puissance des ennemis du peuple. 25 d'avril, pour toujours !
Tag 25 von April von 1974 war der Tag von ihm klopft unten vom Diktaturfaschisten in Portugal, von der Anruf REVOLUTION der Blumen und vom Fall der Energie der Feinde von den Leuten. 25 von April, für immer
25天41974年的一天,它拍下來的法西斯獨裁政權,葡萄牙 號召革命的鮮花,秋天的權力得到人民的敵人. 25日,永不停息
ياسمين
كإنك شايفاني وعارفة الحال اللي بكون عليها لما بكتب
بس عارفة لما تبكي بكل حتة فيك؟؟
كإن ظلوعك حاتطلع من عنيك مع الدموع
عارفى لما تمر فخيالك كل الصور البشعة و المظلمة و القاسية
فجأة كل حاجة بتبرد وتنام و تبقى زي البحر بعد يوم نوة..
الحمد لله .. ربنا عارف قدراتنا ع الاحتمال رايحة لحد فين
وبيسبش الألم فينا يعديها
مش عارفة أقولك قد ايه فرق معاي كلامك.. بس واضح انك بتحسي بسهولة من غير كلام
أميرة
فعلا.. كتير بنندم عشان ماركزناش.. وعشان ما فكرناش و لا أخدنا مواقف صحيحة
الشيء العادي كان لا بد أن يكون لا شيء أو شيء غير عادي
ده قصدك
صح؟
لو ده قصدك يبقى انت كده فهمتي ايه العمود
العمود هو شيء أو انسان.. كان صغير قوي في مجمل الصورة اللي انت عايشاها
وفجأه بقى هو عنصر الصورة الوحيد
كده
عافية
مش منه.. لكن من القدر
لو حد خد منى العمود اللى فاضلي يبقي ادفن نفسي احسن
ماهى مش هتنفع اكمل من غير اى حاجة ولا اى مساعدة على المعيشة
بس حلو اوى القصة وتفاصيلها بجد روعة
تحياتى الشديدة
كلام جميل فيه اشارة ضمنية
انا اول ما قريت البوست جه فى بالى فلسطين
وفقك الله
منذ ان دخلت مدونتك وانا لا اعرف اين ابدأ بكتابة تعليقى.....وهذا دليل على مدى تأثيرى بما تكتبيه ...والان اعود لأعلق على تلك القصة الجميلة
كثيرا ما مررت بهذا الموقف...شيىء لا تعريه اى انتباه..فجأة يصير هو محور حياتك...دفعتكى الظروف لذلك..ام كان اختياراً منكى؟؟
لا فرق فى نظرى...فدائماً ما يكون امامنا خيار...فكان من الممكن ان تتركى انتى ايضاً تلك الأرض...وتبدأى من جديد...بأرض غير الأرض...وبيت بلا ذكريات
لكنك فضلتى البقاء...حتى حين لم يبقى لكى إلا هذا العمود الذى هو جزاءً بسيطاً من صورة اختفت سرعان ما ستكتمل بأذن الله
فتحيتى لكى على ثباتك..وتأكدى...ان بثباتك...ستعمر تلك الأرض من جديد
وسيعود يوما من تركها..وهو يدعوا الله ان يجد له مكاناً فيها
فكم منا عاد الى ارضه...ولم يجد حتى ذلك العمود...تحياتى لكى على خيالك...فالخيال هو ابرع الطرق لتوصيل الفكرة
صديق
سلام عليكي يا Hannoda
مش عارفة ليه مفكرتش في الاحباب اللي راحوا و لا الذكريات اللي بتفضلنا بعد ما بيختفوا من حياتنا
فكرت بس في العامود
اد ايه خفت لو العامود في يوم اتشال من مكانة
لو ضاع مني او ضعت منه
لو تهت في يوم و معرفتش ارجع له
يمكن لانه هو اللي فاضلي
يمكن لاني ححس ساعتها اني ضعت لما ضاع مني
حاسة ان العامود ده رمز كبير لحاجة جوايا و معايا لو ضاعت مني او فقدتها باي طريقة ممكن مقدرش اعيش بعدها ...لا ده مؤكد اني مش هعرف حتي اتنفس و لا احس اني عايشة
يمكن يكون العامود ده رمز للحاجة الوحيدة الحلوة في حياه كل واحد منا
يا رب محدش يفقد اجمل ما عنده من بشر و ذكريات
يا رب
سلام و جميلة جدا كلماتك يا Hannoda
سلام
مها
عجبتنى فكره الموضوع قوى
قبل مااخلص الموضوع قلت طيب والله الراجل اللى بيجى ياخد الحاجات فيه الخير وسابلى عمود برضو
مكملتش لقيته فى الاخر طمع فيه واخده
خلانى عندى امل انه يجى ياخدنى بعد شهووور انا كمان
بس تعرفى ان العمود ده حسيته بيجسد حاجات كتير قوى
الحاجه اللى تحسى ان ملهاش اهميه فى حياتك لان حاجات تانيه بتلهيكى عنها وتلاقيها فى الاخر هى اللى فضلت معاكى ونتمنى يرجع الوقت ونحاول نقدملها حاجه بدل التجاهل اللى كنا بنقابلها دايما بيه
وكمان وصلنى احساس حب للعامود ده وارتباط بيه من مجرد التخيل
تسلمى على الموضوع الرائع
طريقتك فى السرد كمان سلسه
عاشقة الوطن
يكن رد فعلك هو رد الفعل الأول... يعني أول حاجة تيجي فبالك وقت حدوث الموقف
بس الحياه جوانا و التمسك بيها ضخم جدا وأكتر من ما أي حد فينا يتصور
لازم نلاقي خيط منه الحياه تاني.. حتى لو على حساب حاججات بنحبها
تحياتي ليك
---------------
khaled
يمكن تقصد ان أهلل فلسطسن مابقالهومش غير الكرامة.. راحت الأرض.. راح أملهم في العرب.. شهداءهم يوم ورى يوم بيزيدوا
يمكن العامود بتاعهم هي الكرامة وغلاوة الأرض؟؟؟
أعتقد ده قصدك
وفقنا الله جميعا
-----------------------------
Van Gogh
ردك لفت نظري فعلا لحاجة ايجابية وبما إني بتلكك عشان ألاقي فنفسي أي شيء إيجابي.. فاأنا كلبشت قوي في المعنى اللي قلته
وهو بما إني اخترت البقاء جنبه.. يبقى أنا متمسكة بذكرياتي و جدوري
فعلا الإنسان بلا ذكريت زي شجرة ماتت جدورها ممكن أضعف رياح تقدر تقلعها
سعيده بتواجدك
---------------------------------
مها
أولا شكرا على اهتمامك الجميل و اللي فرق معاي كتير
ثانيا.. ل كل شيء هام حوليك لازم يهمك؟؟
ولاّ اللي لازم يهمك هو اللي بيأثر فيك و فحياتك وقادر يعيش جواك و فوجدانك؟؟
الشيءده ممكن يكون جماد ..انسان.. فكر.. علم..
طب لو إختارتي مجموعة من الناس عشان يكونوا ناسك. ومجموعة أفكار عشان تكون أفكارك.. وعلم ما عشان تهتمي به.. وهواية عشان تكون هوايتك
واتعمقتي في كل دول... وادتيهم كل اهتمامك لإنهم عالمك اللي كزنتيه
وتركتي الباقي على السطح
تمري عليه مرور لاكرام.. وتؤدي واجبك نحوه على قد ما يسمح و قتك و قدراتك المتبقية
ثم... يزول و يضيع كل ما إختارتيه... ويبقى السطح الذي لا يهمك ولكنك تهميه
ده العامود اللي بتكلم
عنه
تهتي؟؟؟
لك كامل الحق في التوهان.. فهي دائما المشاعر في لحظات هياجها تصبح كالمتاهة لامتشبكة
يمكن بعد الهدوء تتضح الصورة
تحياتي ليك
إرسال تعليق