دموعنا تكفّي تسقي أرضها....ه
فتملاها بالخير و الجمال
*****
يا ناس يا طيبين...ه
ده عمره ما يقدّمنا البكا ع الحال
الدموع تقدر تهد جبال
أما اللي يرضيها إنها تشوفنا رجال
*****
تعرفوا إيه الحكاية و ما فيها؟؟
ده مكتوبه فكتابنا و باللي فيه حانغيّروا الأحوال
أخلاق وأمانة ودين .. وطول البال
بيهم نشوفوا الجنيه راكب الدرهم و الريال
*****
عارف إنت لو تسيبك من البانجو
وتصحصح كده و تلم حواليك العيال؟
وتفكك من الحكومة والأحزاب و الدستور اللي بقى موال
وتعلّملكوا كام شاب غلبان
تروحولهم في غيطان وجه بحري وفي الصعيد و في الجبال
*********
ولاّ عارفة إنت لو تفهمي إن همّك هو الأجيال
فيبقى هدفك إن يخرج منك رجال
عشانهم إتعلمي و إتثقفي و فكّي الحبال
*********
مش بيوضع سره فأضعف خلقه؟؟
خلاص خليهم يكلوها .. ماهمّ اللي معاهم السلطة و المال
وهمّ اللي مبعترين لنا الحشيش و البانجو
ولولا الملامة كانوا وفروهم لنا عند البقال
أو يضيفوه ع التموين
مع السكر و الزيت ياخده كل شهر أبو العيال
*******
فنعملوا البطالة والسياسة نكت
وتاخدنا الكرامة و نقول "أنا أشتغل سباك ولاّ زبال؟؟؟"
ويبقى هم شبابنا إزاي يطلع إفتكاسة
عرض ايه و شرف ايه؟؟.. بلى كلام عيال
و البنات يعدّوا التلاتين .. عشان ايه؟؟
كنب أمريكان و كاسات كريستال
*****
يا جماعة ...ه
خلونا نشتغل بمايرضي الله
قادر يخلينا زي النمل .. يا كل السو لما يبقى رمال
فتتهد على روسهم و تنضف بقى...ه
ويبقى النمل هو اللي عمل الرجال
ونرجعوا تاني شعب العزة.. مش الجوزة و الموال
ويتوب علينا بقى من همنا اللي شالته هي على مر أجيال
هناك 32 تعليقًا:
جميل يا هنوده
نحتاج الى هذا التفكير بالظبط
كانك تقرأين افكارى
نعم يا اخوانا
آمنا واقتنعنا وعرفنا وفهمنا
اننا فى اسفل سافلين
وان الفقر اصاب كل الطبقات
وان الجهل يسكن فى نص عددنا
وان المرض يفتك باجسادنا
سرطان وفيروس سى اعلى نسب العالم
نعم يا اخوانا لا يوجد مثيلنا
لا فى العرب ولا فى العجم
لا نتتج شئ
لا مأكول ولا مركوب ولا ملبوس
ونعيش فى تهريج وتمثيليات
يحكمنا لصوص وافاقون
ويبرر لهم رجال اذكياء وهم العن من العاهرات
خلاص با اخوانا
عرفنا اننا فى الحضيض ولا حضيض اكثر من هذا
بكاء وبكينا
حزن زحزنا
اكتئاب واكتئبنا
انتحار وانتحرنا
صوات وصوتنا
لطم ولطمنا
ماذا بعد؟
لنفكر اذا كيف نبنى انفسنا
فما نحن فيه لم يكن الا بسببنا
وما ربك بظلام للعبيد
هند
احييكي علي البوست الجميل ده حاسس انه فعلاا طالع من قلبك ومش عارف هنعمل ايه كل حاجه غلط حتي حياتنا انا لو اتكلمت هتكلم يامه واقول انا عاوزك عندي علشان في كام سوال كده عاوزك تجوبي عليهم
اول مره ليا عندك عجبنى البوست اوى بس مين بيفكر كده قليلين قوى كمان ممكن الناس تعتبرهم شواذ نظريه المجانين اللى بيبصوا للعاقلين على انهم هما اللى مجانين فتتجن وتبقى فى نظرهم عاقل ولا تعيش عاقل بس فى نظرهم مجنون تحياتى وانا سوف اتابع ان شاء الله
وحشتني مدونتـك قووووي يا هنوووووده ، يمكن عشان اسمها غربة ، يمكن عشان فيها بلااااقي أجزاااء مني . .. . . الـ متغرب !!! ... يمكن عشان بتكتبي كلام بيوصلني قوي ! . . . .
بس أكيد مش عشان الخط عندك صغنووون كـــده :)
معًا نحو تكبييير الخط ف المدونات
. . . . . .
حلوةو مجموعة المقولات دي .......
هرجع لها تاني
وتحيااااااتي
تدوينة رائعة
ومعاني عظيمة
وتحياااااااتي ليكي
هنوده كلامك جميل
بس مش عارفه ليه حاساه خيال
دموعنا هتستمر
والبانجو والحشيش بكره يبقى فى البقالات
وهنفضل فى الانحدار الى ما لا نهايه
لان البانجو لحس العقول
والدموع كفت بحور
فاهمه حاجه منى:)))
بوست رائع
تحياتى
تسلم ايدك يا هنوده
المشكله اننا لم ندرك بعد اننا امام ابواب مستقبل
ومفاهيم اخري زي العولمه وحوار الحضارات والكون
والقريه الذكيه
وعالم يسابق الريح
ونحن نحبو ونتعلم كيف نقف؟
وضاع الطريق وسط مجموعه نهبت موارد الدوله
وحتل جيل واحد مسيره الحياه
لا يريد ان يفرط في شيئ منها
وباقي الاجيال تقتات علي الفتات في طابور طويل تنتظر احلاما لا تجيء وطال الانتظار ولم يبقي غير الاحباط والحزن والكأبه
ولازم تغير في شتي الجوانب
وتغير بجد ونبدأبأنفسنا
ونحول الطاقات والمفاهيم السلبيه
الي شيء ايجابي تستفيد بيه البلد
ونستفيد بيه احنا
ونحس اننا لسه لينا قيمه
تسلم ايدك بجد
كالعادة تتنقلين وتقطفين من كل بستان زهرة وزهرة اليوم داكنة موجعة ولنها تريد ان تعيش كزهرة
جميل يا هنودة
تفتكري الكلام هينفع؟
الناس بقي عندها احباط و لا مبالاة
الله الله الله
سيدى يا سيدى
هو دة الشغل يااسكندرانية
بجد روعة
تسلم ايدك يا غالية
تحياتى
هارملس
فعلا إحنا لازم نشوفلنا إتجاه تاني غير السياسة لتعديل أوضاعنا
لازم نبدأ باللي يخرج سياسيين جيدين ..
أعتقد إن مجتمع التدوين نفسه قادر على إنه يعمل جداول عمل وينفذها بإشراف مجموعة مننا .. بأقل مصاريف ممكنة نتشارك برضه فيها
ليه ما نتعلمش اللي يأهلنا لتعليم الناس
كل واحد ومجاله
اسعافات أولية ..كمبيوتر.. محو أمية
الأفكار السهلة كتير ومنها ممكن نتدرج للأصعب
ما تيجوا نفكر فيها ونشوف الحكاي حاتاخدنا لفين
ابراهيم معايا
أنا اللي وحشتني زيارتك
وبعدين البوست ده خطه كبير مش صغير ولا حاجة
شكلك متأثر من البوستين اللي قبله... عموما عُلم يا فندم و ينفذ في التو و اللحظة
:))
عزيزتي
المشكلة اننا تربينا على ثقافى الاستهلاك لا الانتاج ..
الاخذ لا العطاء ...
الراحة لا العمل ....
كلها ثقافات موبوئة جعلتنا للخلف در
ولاكن الامل دائما موجود
تحياتي لك
فارس
أنا معاك ان كل حاجة غلط في حياتنا و عشان كده لازم نبدأ نغيرها
معلش لو خطواتنا تكون بطييييئة في البداية بس شوية شوية احتزيد سرعة لاتغيير
احنا محتاجين شوية جدية
شوف عمرو خالد بدأها ازاي مع الناس في حكاية التدين
لو فاكر... هو بدأ بالأخلاق و مسكها معنى معنى
الأمانة
الصدق
الحياء....
احنا كمان يا ريتنا نمسكها كده شوية شوية... جدية.. إلتزام... ثقافة
ونسيبنا من الحكومة و الرياسة والأحزاب .. محدش ف يالناس ده ناوي يسمعلنا
وطول ما احنلا زي ما احنا الناس لالي طالعين بعدهم حايكونوا زيهم
حلوة قوي المقولات دي .. وخصوصا اللهجة الإسكندرانية الأصيلة اللي فيها
ونرجع ونقول .. إن الله لا يغير ما بقوم حتى يغيروا ما بأنفسهم
فلنغير أنفسنا أولا
عندك حق
احنا اللي بايدينا نبني نفسنا او بادينا نهدها
تحياتي
westtewest
أولا شرفتني زيارتك جدا و بجد آسفة على تأخير الرد
ثانيا... مبدأك كلنا لاحظناه فعلا ... بس أقولك؟؟
نعيش مجانين أحسن
وشوية شوية الناس تاخد على جناننا و يزيدوا المجانين و بالتدرج يتفهم الجنان و يصدقوا انه عقل
أتمنى دوام زيارتك
تحياتي
لو كل من بدأ بنفسه، لو كل مناأصلح من ذاته، أدي عمله بما يرضي الله ، أقل حاجه ممكن نعملها نقفل الحنفية جيدا نوفر الماء و الكهرباء لاجيال بعدنا.
اقل حاجه ممكن نعملها ان نتبسم في وجه من نعرفهم.. نحب للغير كم نحب لانفسنا ، نترك شغل الفهلوة و البهلونات ، ناس كتير واقفه طابور و يجي واحد فهلوي عايز يسبق و يتشطر ...
لو عايزين نعلا بجد...لازم نغير من أنفسنا، لازم كل منا يبدأ...و ان شاء الله الكل ها يتبع...
تحياتي
برافو عليكي....فعلا جميل و يا رب نقدر نطبقه
مصراوي أوي
شكرا على متابعتك و تشجيعك يا مصراوي
تحياتي :)
---------------------------
reemoo
لا و الله ما خيال ولا حاجة
صدقيني كل ما بيزيد الانحدار كل ما بتقرب لحظة الصعود تاني
تحياتي ليك و معلش ع التأخير
------------------------
جهينة
بالضبط ده قصدي... الأمل في تغيير مفاهيم الحكومة الحالية منعدم .. مافيش شعب بيعلم حكومته الكرامة و الأمانة و الإخلاص للوطن
عندنا حق نيأس منهم.. بس ماعندناش أي حق نيأس من نفسنا
والله الأمل فينا
وحشتيني
كراكيب عادل
عارف لما حسيت إني مسئولة و إني بإيدي أعمل حاجة لقيت نفسي لأول مرة مبحسهاش داكنة.. حسيت بخيط نور ولازم أمسك فيه
ولازم كل حد فينا يدور على خيط و يمسك فيه برضه
الدبور
عارف
عندهم حق يكون عندهم إحباط ولا مبالاه لإنهم شايفين بس كلام
كل الناس بتتكلم
وكل الناس بتتألم
وماحدش بيعمل حاجة
سؤالك صح قوي... الكلام حاينفع؟؟؟
لأ طبعا مش حاينفع
لكن الفعل حاينفع و حايغير الناس و يحركهم و يخليهم يضطروا لهجر الإحباط و اللامبلاه
نبض اسكندرية
:)
واحشاني.. وكل ما بشوفك عندي بحس بحاجة من الإتنين
يا اما أنا رجعت مصر .. يا اما اسكندرية سابت مصر و جت
أحمد طاهر
لكن الأمل دائما موجود
أكيد لازم أتوقع الجملة ده من حد قال:
هلا بحثت يوما عن الجمال؟ اليوم جئت اليكم مساعدا لنجعل الحياةاكثر جمالا. لماذا لا تكون جميلا
يا ريت كل الناس تصدق ان الأمل موجود
شرفتني و أتمنى دوام الزيارة
-------------------------------
يا مراكبي
ياااه.. حاسة اني ماشفتكش من زماااان ... وده يمكن يكون مجرد إحساس و بس
أما اللهجة فأنا فرحانة ع الآخر انك لاحظتها و اتكلمت عنها لإني اسكندرانية منحازة جدا لاللهجة الاسكندراني
و الكلام فسرك.. هي اللهجة طلعت مني تلقائيا في كلمة واحده بس بس أنا اللي استحليتها و عممتها على باقي الكلمات
باركلي .. قررت أبدأ بنفسي
يامن
ربنا يقدرنا و نبني نفسنا و نبني بلدنا
----------------------------------
الربان
أهو ده الكلام
يمكن التفاصيل صغيرة قوي لكنها بداية و دايما البدايات بتوصل لأفعال مؤثرة.. ده حتى أصغر التفاصيل مؤثرة
شرفتني
-------------------------
يعقوب
عارف لو احنا المدونين بدأنا بنفسنا زي عهد بنتعاهد عليه؟؟
تخيل عددنا
طيب ضم لعددنا عيلين لكل واحد فينا حايخلفهم "ان شاء الله" ويطلعهم ايجابيين
تخيل العدد
تفتكر مش حايأثر؟؟
-------------------------
دي اول زيارة ليا هنا احييكي بشدة تحياتي
والله ينفع منشور يتوزع على الناس عشان يفهموا ويتعلموا
كلامك والله دليل للنجاح
ابدأ بنفسك شعار جميل لازم كلنا نلتزم بيه
تحية للبوست القوى
يااه يا هنوده بجد مش لاقيه كلام اعلق بيه بعد كلامك
مش قادره اقول غير انك حد مميز قوي قوي
جزاك الله خير على المدونه الجميله دي
تحياتي
ياسمين
و الله بحس اني حاجة جامدة جدا لما ألاقيك عندي
وكمان عاجبك كلامي
ربنا يوفقنا كلنا عشان البلد ده تفوق بقى
rosa
بجد شرفتيني وأسعدتيني بكلامك لإن الحمد لله ان لاواحد بيعرف يقول حاجة بتوصل
ياريت تزوريني دايما
إرسال تعليق