على غير العادة بابا هو اللي وصلني الشغل انهارده عشان السواق اللي بيوصلني في المستشفى.. وطبا هنا فقطر كون ان فيه سواق بيوصلني ده مش رفاهية...!! لكن عشان مافيش مبدأ الموصلات للستات بالذات هنا أبدا
المهم إننا و احنا معدين من نفق كبير لقيت منظر غريب جدا
شفت أربع شباب زي الفل ماشيين على رجليهم تحت النفق
أول حاجة توقعتها إنهم هنود.. لإن الهنود هنا هم الفئة الوحيده اللي ممكن تلاقيهم ماشين على رجليهم رغم الحر الشديد وفقا لمستوى دخلهم و اللي بيخلي كتير منهم معندهوش عربية و هنا اللي ما عندهمش عربية همّ الغلابة قوي
لكن المفاجأه إنهم مصريين
حاتقولوا منين عرفتي و العربية ماشية بسرعة 90 في النفق و همّ أساسا على الجنب العكسي لعربيتنا؟؟
أقولك أنا بعرف المصريين من على بعد شديد جدا و بمهارة مدهشة.. ده غير ان بصراحة المنطقة قريبة جدا من المدرسة المصرية و أكيد هم جايين منها مشي.. يعني مش محتاجة فهلوة
كل ده مش مهم
المهم انهم ولا كان باين على وشهم القرف من الحر أو العصبية من الموقف البايخ اللي أكيد هو السبب في إضطرارهم للمشي في النفق في عز الحر و السخونة
بالعكس.. كانوا واقعين من الضحك و مندمجين في الهزار و الحكايات
من الآخر فهمت الحكاية
هم أربع شبابفي حدود الـ 16 أو 17 سنة و طقت معاهم جنان.. قالوا نخدوها مشي في البلد ده اللي ماحدش فيها يعرف يعني إيه مشي .. نفق بقى و لا عربيات ماشية على سرعة 120 .. طظ
فكروني بيّ أنا وشيرين لما مرة طقت في دماغنا نمشي من تحت نفق قناة السويس في إسكندرية
آه في اسكندرية عادي جدا إن بنات ياخدوها مشي لكن مش من تحت نفق قناه السويس و العربيات صواريخ ...
مكانش غيرنا على رجله في النفق و أنا وهي كنا واقعين من الضحك و ماليانين بروح المغامرة.. قال يعني ده مغامرة!!
وحشني جنان الشباب.. والضحك بصوت عالى و لمة الصحاب والغدا على النجيلة فالمنتزه و الزحلقة ع البلوكات في القلعة
واحشني الكلام و الحكايات و العياط و الفضفضة
واحشني لمة العيلة فبيت عمتي يوم الخميس و الفطار معهام يوم الجمعة بعد الصلاة لما ييجي عموه بالفلافل السخنة
أساسا وحشتني الفلافل
وحشوني ناس مصر.. وشوشهم وتعابيرها واحساس الونسة اللي في الشوارع والجوامع الصغيرة الضيقة ..
واحشني دول:
هناك 53 تعليقًا:
حقيقي إنت بتمثلي تجربة تستحق الدراسة .. لأنك شايفه في بلدنا كل الحاجات الجميلة بس وكأن الحاجات التانية اللي عكس كده مش موجوده خالص
لكنها موجودة بالفعل وما نقدرش نتجاهلها
والله يا هانوده بلدنا جميله جدا
وجمالها ربانى غير مصنوع
مهما علتها الاتربه
ومهما اصابتها الجروح
بلدنا جميلة حتى لو طعنها الغادرون
فالجمال فى نسيجها
ويجرى فى دمها
ومن يريد ان يعرف فليسالك
يسالك عن بلاد فيها ثراء وليس فيها حياة
فيها سيارات وليس فيها مشاعر
فيها شوارع وليس فيها سائرون
فيها رفاهيه وليس فيها مبدعون
ماذا يعيبنا؟
الفقر؟
مشكله مؤقته صنعها لصوصنا
سيذهبون للجحيم وسنعمل ونبنى وسنصيب الثراء عاجلا وليس اجلا ان شاء الله
الاتربه سنزيلها
القمامه سنرفعها
الشوارع سنرصفها
جبال مشاكلنا حقيقتها لا شئ
مجرد اخطاء نصححها
وطريق نهتدى اليه
وتضحيات نقدمها
لكن شعبنا لم يفقد بوصلته ابدا
لم يستورد مستعمريه ابدا
لم يعشق الشياطين ابدا
لم يكره ابدا
لم يخون ابدا
هل رأيتى شعبنا ضاق بزائريه يوما؟
هل رأيته عادى شخصا لم يعادينا لجنسه او دينه؟
هل رايته اذل اخوانه العرب ابدا بكفيل او بتحقير او باذلال حتى وهم فقراء يتلقون الاعانات؟
بل
هل رأيته يسب فريق كوره فى ضيافته ويضربهم ويعتدى عليهم
والله لم بفهم احد شعبنا
الله البوست حلو قوى بجد
تعرفى ان انا برضه بأعرف المصريين من بين الناس واطلعم من وسط مليون
ماتسألينيش ازاى .. من عنيهم والله
ليهم نظرة فى عنيهم خاصة جدا ما تلاقيهاش فى أى حتة فى العالم
هو انتى عايشة فين اصلا دلوقتى يا هنودة؟
هنودا ترجعي لينا بالسلامه
وتعيشي كل الذكؤيات الجميله دي تاني
بس خليني اقلك انك محظوظه انك عيشتي اللحظات الجميله دي في وقت من الأوقات وعملتي جواكي مخزون جميل تهربي ليه لما الدنيا تضيق عليكي
تحياتي :)
هنودة
مع انك قلتيلى قبل كده انك سودانية لكن انا شايف انك مصرية جدا جدا
انا كمان اما بسافر بتوحشنى مصر اوى كل حاجة فيها بتوحشنى حتة زحمة المواصلات بتوحشنى
مصر ديه فيها حاجة عجيبة جدا فيها خاصية بتشد الواحد لمصر دايما مهما حصل
كومنت تحليلي شويه
لإن الهنود هنا ؟
هنا فين يعني مش واخد بالي من مكان الاحداث
ـــــــــــــــــــــــــــــــــــ
قالوا نخدوها مشي
نخدوها دي اسكندراني مش كده
ـــــــــــــــــــــــــــــــــــ
فكروني بيّاأنا وشيرين
اكيد طبعا شيرين دي صاحبتك عرفتها لوحدي
مش محتاجه ذكاء
ـــــــــــــــــــــــــــــــــــ
وحشني جنان الشباب
امال حضرتك عند كام سنه دلوقتي لما بتقولي وحشني الشباب وجنانه
:؟
انا شفت في البروفيل 24 سنه
ـــــــــــــــــــــــــــــــــ
وطبا هنا فقطر كون ان فيه سواق؟
يعني ايه دي مش فاهمها خالص
كلمات غريبه شويه عليا
----------------------------------
بس خلاص
تحياتي
الدبور
ـــــــــــــــــــــــــــــــ
هامش
البوست قصه ظريفه و فيه سرد حلو للاحداث
انا في رايي ان القصص الواقعيه افضل بكتير من القصص التخيليه من خيال الكتاب
مصر بجد جميله يا هنوده
والاجمل انا نشعبها يشوفها جميله
ربنا يرجعك بالسلامه
بس اللى فهمته انك عايشه فى قطر
ده صح ولا؟؟
تحياتى
يا مراكبي
أكيد أنا عارفة إنها موجوده وعيني دايما عليها.. وكتير بحس بحزن عشانها... لا أستحق الدراسة ولا حاجة يا مراكبي بس أنا بعشق البلد ده زينا كلنا.. ومن يوم ما طلعت أنا قررت أسيب قلبي هناك وكل تفاصيل حياتي
حتى صور الكلية و هدايا صحابي سبتهم عشان يفضلوا واحشني و أفضل متعلقة بيها و أفضل عايشة هنا بنص روح.. عشان مارضاش و أقول أبقى أرجع لما ربنا يريد
آه كل شيء بإرادة ربنا ..لكن أنا لازم قرار رجوعي يكون قريب قوي
تحياتي يا باشا :)
هارملس
كالعادة بتصيغ أفكار جوانا بشكل سلس
أنا كتير بقارن بين شعبنا و شعوب تانية شايفاها لإن قطر هنا ملتقى كل جنسيات الوطن العربي و بأعداد كبيرة تكفي لإني أكون فكرة ما بالذات إني مجال شغلي مخليني بتعامل مع الناس 8 ساعات في اليوم من كل الأعمار
شعبنا جواه الحياه كاملة و على أصلها
مش عارفة أقولك إزاي.. لكن إحنا فاهمين الحياه.. فاهمين الناس اللي حولينا و حسينهم.. ف اهمين ربنا و علاقتنا بيه سوية حتى ولو في العصيان
شوارعنا مكسرة و مش نضيفة و مليانة تسول وزحام
بس كلها حياه
عايشين في فقر قهر
لكن جوانا حياه
يا رب نقوم ونعلى ونشوفها في المكان اللي تستحقه
يا سمين
----
طيب انت عارفة إني كتير لما أشوف طفل صغير ياخد عيني من بين كتير في المولات .. وأراهن إنه مصري.. فأمشي وراه هو وأمه و إخواته عشان أسمع أي حوار ففعلا أسمع أمه بتقول "استنى يا زفت"
فأفرح قوي إني عرفته لوحدي : )
أنا حاليا في قطر يا ياسمين .. بس جسم بس .. لكن الحياه كلها سايباها هناك في اسكندرية وبمنتها الرضى.. عشان لو أنا قدري أتغرب فحياتي لازم يكون قدرها هو الوطن
post gameel
2alah yetamenek ana kaman yemken 2asafer we `7ayef men el 2e7saaaas 2ely enty 7asaaah :)
masr hatefdal `3alya 3alaya
ياااه ، فعلاً ... شباب جماااال .. يوووه !!
دلوقتي هتفهميني غلط تاني !! ، تم تصليح الغلط اللي كنتوا فاكرينني عملته ف مدونتي !!! ، أنا أغلط الغلطـة دي برضه ؟.؟؟
.
.
تحيااتي يا هنودة ، ويااارب كل أيامك جمال ، وحلااااوة ههههههه
بوست مميز
الانسان لما بيكون بعيد عن بلدة بيكون جواة شعور بشىء ناقصة عايز يكملة جواة
واحنا مهما لفينا الدنيا زى بلدنا مش هنلقئى
تحياتى
تحية لكل مغترب
شعور الحنين للذكريات دا من اصعب الاشياء في هذه الحياة بالذات لما تكون ذكريات جميلة بس يا هنودة مش كل المغامرات بتكون حلوة ........واللا يمكن بتختلف من شخص لشخص
تحياااااتي وسلام الله عليك
ميرسي يا هانودة
كان واحشني إحساس إني ألاقي حد واحشاه حاجة
فهمتي حاجة ؟
مش عارفة أقولها بطريقة تانية
وانا كمان والله وحشني كل اللي انت بتقولي عليه ده
:)
يمكن مش مستعجب امرك لان غعلا غريب امر اهل مصر ...
على الرغن من مدي المشاكل اللي موجوده فيها من فقر و محسوبية وبطالة ..الخ الخ
الا ان شعبها ودود ليها بشكل غريب ومها عاش حياة الرفاهية في الخارج بيتمني انه يرجعلها تاني....
ودهاللي بيسموه الانتماء يا هنودة
تحياتي لكل مصري مغترب عن وطنه الغالي
rosa
إنت عارفة لما بتشد لمصر قوي بعمل بالضبط زي ما بتقولي
بفتكر كل أيامي مع حبايبي كلهم.. وأشوفها فخيالي زي شريط السينما و أقول الحمد لله إني عشت الأيام ده اللي قادرة دلوقت ترسملي ابتسامة فوقت الدنيا فيه فاضية قوي
سعيده بمرورك:)
مصر هي أمي
طبعا مصرية و اسكندرانيةأباَ عن جد
:))
الوطن زي ما قلتلك.. بالخير و الذكريات و التاريخ و التربية .. مش بجواز السفر
مش انت اسمك (مصرهي أمي)... بس خلاص يبقى الحاجة الغريبة اللي بتشدنا ليها انت كاتبها فإسمك
:)
الدبور
بقالي يومين شايفة الكومنت و مش عارفة أرد عليه بسبب الجهاز وحاتجن
:)
1- هنا فين يعني؟؟؟
هنـا فقطر
_______________
2- .. نخدوها... آه اسكندراني جداً.. ايه بيقفّشوا الإسكندرانية ولاّ ايه؟؟
:))
______________
3- عرفتها لوحدك
________
4- وحشني جنان الشباب عشان الشباب ده بالنسبة لي روح مش سن.. وأنا سبت روحي هناك فبيتي و بين ناسي .. لما أرجع بى إنشاء الله ترجعلي روحي وشبابي معاها حتى لو حارجع وعندي 40 سنة
_________
5- تفسير الجملة: هنا في دولة قطر... كون إن يكون لديك سائق يقوم بتوصيلك هذا لا يعني الرفاهية
وصلك المعني يا صديقي؟؟
______________
والله تعليقك عسل و أمتعتني
شكرا ع الاهتمام
reemoo
أعتقد أي إنسان عنده إنتماء بيحس بنفس المشاعر لبلده
وفمصر سهل أوي تحسي بالانتماء ليها رغم كل اللي بنشوفه
أما عنّي.. فأنا في قطر صح
:))
dr_lazeez s
أولا آسفة جدا على التأخير ... وشرفتني زيارتك جدا
كنت زيك كده وكنت خايفة أفقد شعوري بالارتباط بمصر و أرضى بالغربة ومميزاتها و أقول زي كتير
أنا ربة أحسنلي ومش حاعرف أرجع تاني
لكن لأ .. الحكاية حكاية استعداد و اصرار
كل ماتصر ان قلبك مايبردش عمره ما
حايبرد
أتنى دوام زيارتك
إبـراهيم ... معـايــا
أنا رحت شفت التصحيح
كتر خيرك يا ابراهيم و الله... ريحت قلبي .. كنت فاكراك نسيت مين اللي خيره علينا من ساسنا لراسنا
خلاااااص
آخر مرة أفهمك غلط
:))
Tamer Nabil
فعلا يا تامر
أصل انت برة بلدك بتكون من غير جدر
آه ممكن تعرف تعيش بس لازم ترجع تمد جدورك فأرضك عشان تعيش
اقولك حاجة وفي منتهي الصراحة الي زيك كدة حرام يتغرب من اصلة انتي بتحتفظي بكل التفاصيل وعندك وفاء غريب للتفاصيل دي تعرفي انا مش بعرف انتقد مصر ولا الحجات الوحشة لاني باختصار شديد ببقي وانا في الغربة برضو مشتاق لها الناس البسيطة والتلقائية وحتي الحجات البسيطة جدااا حجات كتير جدااا بس مش عايز اتفضح هنا
هانوده
ااااااااااااااااااه
يا هنوده
بجد جيتي علي الجرح
تفتكري صدفه اني اقرء الكلام دا قبل اسبوع من سفري
الله يسامحك يا بنتي
عايزه اقولك اني عشت كل الي انتي حكتيه دا واكتر منه طوال 17 سنه في الكويت
عشنا ايام وليالي التلفون فيها مش بيرن غير والدي ووالدتي بيطمنو علينا لما نرجع من مدارسنا
حتي جرس الباب كنا سعات بننسا صوته من قله الي بيخبطوا علينا
الغربه والحياه الاجتماعيه اعداء علي طول الخط
يمكن فعلا الي بيتغرب بيكي فلوس وبيعيش مرتاح في نواحي معينه
لكن الناحيه الاجتماعيه او العاطفيه بتكون شبه معدومه
مفيش لمه وصحبه ابدا
مفيش احساسك انك ماشيه في شوارع بلدك وحواريها
حتي وسط الزحمه والخناقات
بتونليها طعم تاني لما الواحد يكون بعيد عن بلده
انا مش عارفه انا بعيط ليه دلوقتي مع اني كنت متماسكه جدا بقالي فتره
يمكن احساسي اني رايحه لحياه تانيه جديده وسايبه حياه هنا كنت بدأت اتعود عليها
جايز
بس الموضوع يا هنوده وجعني اوي بجد
ربنا يرجعك بالسلامه وتلاقي كل الي بتتمنيه
وبجد والله وحشتيني
تحياتي
اسكندرية دية بجد احسن حاجة في الدنيا
قاعدة في بحري او محطة الرمل تساوي الدنيا دية كلها
انا كنت براهن اني لما اسافر مش حفكر في مصر ولا اسكندرية تاني الا عشان اهلي لاني مسافر كارة كل حاجة فيكي يا بلد
بس بجد وحشتني الشوارع والكورنيش والناس والمطاعم والسهر واني اكون الساعة 3 بالليل علي الكورنيش مع صحابي
صحيح قطر حر من دلوقتي لية الكويت كل ساعة بحال شوية تشتي وشوية عواصف وشوية حر رهيب
بنشوف الفصول الاربعة في ساعة واحدة
M.F.A
نسيت اقولك حاجتين
اولا انا عكسك صعب جدا اعرف المصري لما اشوفة - غير لو صعيدي بلبسة المميز - لكن المصري مميز جدا بصوتة ومستحيل تتلخبطي فية
ثانياغلط انك تمشي تحت كوبري قناة السويس علي رجلك لان في حتة بتبقي جاية بلفة والرصيف صغير قوي والطبيعي ان العربية تشيلك ياما تضحي بصحبتك
والاختيارين صعبيين قوي الا لو انتي ندلة ومفيش اسكندراني ندل صح
M.F.A
وصل المعني وكله تمام يا افندم
وسلامي الي الشيخ حمد بن خليفة آل ثاني
والساده الوزراء و ولي العهد
ادام الله ظلهم وحفظهم واي حاجه في اي بتاع وشوفي ليا عقد عندك و مش هنساكي بالحلاوة
والسلام عليكم ورحمه الله و بركاته
بوست جميل يا هنود
نظرات الشباب وجنانهم وحياتهم حاجه تانيه و دي كله ذكريات البلد الي بعدنا عتها ليها دايما مكان في القلب مهما الي فيها حاولوا يكرهونا فيها بس برضه هنعمل ايه هي بلدنا وبنحبها
تحياتي
noda
ana msh adra a2olek enty kolek shabah sa7bty ely esmha hannady
heya kman 3aysha fel saudia w nefsaha terg3!!
enty gamila w eskndrya gamila beeky :)
f3lan masr feha 7aga ghareeba ,, zay ma sydna mohmed 2al "enhom fe rebat ela yawm el deen" f3ln t7sy mahma kan fe mashakel aw khelafat el masryeen ged3an awy!! masr fe3ln 7lwa awy
ربنا يرجعك بالسلامه وترجعى لكل حاجه بتحبيها
كتير مش بنحس بمدى حبنا لمكان ما وقوه ذكرياتنا بيه الا اما نبعد عنه
عارفة
انا خفت
كلامك خوفنى..واكدلى ان خوفى من الغربة حقيقى..وان حاجات كتيرة جوايا هتموت لما اسيب البلد دى
على قد ما انا متوتر لتأخر الفيزا
على قد ما بتمنى تتاخر كمان
خايف من بلد المفروض انه مهد الإسلام
بس لو انتى اتخنقتى هناك..يبقى انا كمان هتخنق
أه فكرتي الواحد بالذي مضى..مع اني مبأليش كتير في البلد ده النتي بتقولي عليها بس كلامك فكرني بمصر و ايام الروقان و الفضى...أنا برضه قررت اعمل حاجة في البلد ده المحدش يعرف فيها يعني ايه مشي ولا رياضة شارع...اشتريت عجلة سبورتيف و عدة الرياضة من خوذة و بروتيكتور لللرجلين و الايدين و قلت اعمل رياضة بأه بليل في الشوارع..ههههه حسيت كأني و احد ماشي عريان في الشارع..كل الناس مستغرباني...بس ولا يهمني بكرة هتلاقي البلد ماشية ورايا بالعجل
مصراوي أوي
الحنين بيكون لكل الذكريات.. حتى الذكريات الحزينه لما يعدي عليها زمن طويييل لما تفتكرها بتفقد حزنها و تبقى ذكرى جميلة
أما عن المغامرات فأكيد فيها كتير بيكون طيش و تتكسف منه بعدين لما تكبر
بس بتفضل فقلبك ذكرى جميلة شايلة روحك وروح صحابك اللي الزمن غير روحهم وسرق منهاالتلقائية و الضحكة اللي بتتفجر من أقل حاجة
تحياتي ليك :)
amira
طب ايه رأيك أخمن
حاسة ان الناس بقت سطحية... حياتهم لاهياهم عن كل حاجة حوليهم
حاسة ان فيه حاجات كبيرة قوي جواك و شداك وهمّ الطبيعي يكونوا زيك لكن بتبصي فعيونهم و مش لاقية حاجة تدل على ان اللي جواك جواهم؟؟؟
هو ده اللي تقصديه؟؟
يمكن؟؟
بس أنا عاوزة أقولك ميرسي على ميرسي اللي قولتيها عشان فرحتني بجد
شادي فاااايد
ياااه.. فينك من زمان
وبعدين واحشك ازاي يعني؟؟
طيب بما انت فيها!!... ولا أنا كده فيه حاجة واقعة مني؟
Ahmed taher
فعلا الانتماء معنى قوي جدا مش كلمة عادية
الانتماء ده عبارة عن دنيا كاملة عايشة فقلبك
ريحة الهوى وملامح الناس و أصوات الشوارع و لون السما و الشمس..... كتير قوي
دنيا طول ما انت عايش بعيد عنها بتفضل بترج قلبك و تقولك .. "حاترجع امتى بقى؟؟" .. تحياتي
كراكيب عادل
مش كده برضه؟؟... أنا غلبت أقولهم كده بس كإني بدن فمالطا
:))
عارف أجمل حاجة لما تتفضح.. وتتكلم و لأ و ايه.. لما تلاقي دموعك نازلة تسيحلك أدام الناس و إنت عامل فيها واقعي و جامد
ربنا يصبرنا يا عادل و يحافظلنا على مصر كده جوانا على طول
وتفضل تشد فينا كل يوم و تقسملنا ميت يمين إننا ما حانرتاح إلا لما نرجع
تحياتي
جهينة
أولا أنا زعلانة إني جيت ع الجرح و فالوقت ده بالذات
بس ماتخليهوش يبقى جرح يا جي جي
اعمليه تحدي أو رهان على ان كل اللي انت قلبك مش جايبك تسبيه حاترجعيله باللي يعوضك عن غيابك عنه و يعوض مصر كمان
مش حانصحك بولا حاجة من اللي عملتها عشان أسافر بكل اللي معيشني فمصرلا عشان اللي عملته فنفسي ما أنصحش حد بيه
وأقولك على حاجة حقيقية قوي و انت عارفة كده أكيد
ان العالم اللي احنا عايشين فيه ده (المدونات يعني) حايعوض جزء كبير من معاني المشاركة و الحياه الاجتماعية و دفي أهل بلدك
فرق معايا كتير
فرق معاي فحاجات أساسية فحياتي
هون علي أحزان كتير و قرب مسافات كتير و كشفلي حاجات كتير بتغطيها الغربة جوى الواحد بالغصب
قلبي معاك يا جيجي.. وبجد عندي احساس قوي بإني مش عاوزة أكون بقلبي وبس معاك
كل أمنياتي ليك بالنجاح و التصالح مع كل إحساس جواك سواء كان غربة أو حزن أو فرح أو حتى فشل
يااااارب
:)
moh
ايييه ده!!اسكندراني عندي هنا؟؟
طبعا شرفتني و أنا حاليا مزقططة
:)
أنا كنت زيك.. كنت فاكرة ان اللي حايفرق معاي صحابي و أهلى بس.. يمكن كمان غرفتي في البيت
لكن المفاجأة اللي لقيتها.. ان لو شوقي للناس كانت 100%
فشوقى لكل اللي قلت عليه 500%
وبيزيييييد بعد كل أجازة مش العكس
أما عن الحر فبعيد عنك قطر على نفس خظ عرض أسوان.. يعني مناخ صحراوي مع استوائي
وبعدين التعليق بتاعك كان من يومين يعني زمان الحر وصلكوا خلاص
*******
أما عن ثانيا
فأنا طبعا مش بشجع أبدا على المشي تحت نفق قناه السويس.. آه كانت مغامرة جميلة و طيش لذيذ بس ماكانش صح و ناس كتير ماقدرش أسيح قدامهم على الي عملناه أنا وشيرين
بس لسعان الشباب مهما بيكون فيه حاجا تكسف برضه بيفضل فيه مع الوقت ابتسامة شوق
وبعدين احنا كنا ماشيين ورى بعض .. يعني اتصرفنا من غير ندالة
أكبر سلام للأسكندرية
:))
الدبور
أهو أنا كنت لسة حابعتلك العقد وانت اللي ضيته دلوقت بالسلامات ده؟؟
طب قول سلامي للجالية المصرية عمةَ و الاسكندرانية خاصةَ
كان زمانك فقطر بكرة الصبح
:))))
عبدالله
قبل أي حاجة انت فينك؟؟
وحشتني تعليقاتك و بوستاتك
ثانيا.. البلد ده حاجة كبيره قوي في القلب بيقرص قوي لما تبعد عنها
يا رب نرجع قريب
عبدالله
قبل أي حاجة انت فينك؟؟
وحشتني تعليقاتك و بوستاتك
ثانيا.. البلد ده حاجة كبيره قوي في القلب بيقرص قوي لما تبعد عنها
يا رب نرجع قريب
~ Bato0ot ~
ايه الفرحة اللي بحسها ده لما بلاقيك سايبة عندي كومنت؟؟
أولا دلعك ليّ بـ
noda
خلاني اعيط.. بس من الفرحة
ثانيا أنا فرحانة اني بفكرك بهنادي و يارب ترجع قريب لإن بعد الصحاب بيكون قاسي جدا
لإن الصاحب الارتياط بيه بيكون أقوى من ارتباط الاهل
وده لا هو جفا من الواحد ولا حاجة لكن ده طبيعي
الصاحب انت اللي اخترتيه بنفسك و بارادتك و بيعيشك بكل اللي فيك
حبك ليه انت وهو اللي عملتوه بايدكوا
غير الأهل.. حبك ليهم فطرة و قدر
ربنا يرجع هنادي بالسلامة
عالمى ازرق
فعلا اللي قلت عليه.. أنا كنت فاكرة إني عارفة قيمة مصر فقلبي كويس و أنا بودع كل حاجة بحبها و لما كنت بحس فأيام قبل السفر إني بقطع كل شارع و شجرة و محل و كوبري من لحمي
بس لما بعدت لقيت نفسي ولا عارفة حاجة و إن قيمة مصر جواي أضعاف أضعاف اللي كنت فاكراه
حاضيف لدعوتك:
ربنا يرجعك بالسلامة + بسررررعة
:))
تحياتي ليك وبجد شكرا على مرورك
Van Gogh
أولا مساء الخير
ثانيا.. هو مال الناس كلها مسافر ليه؟؟
ثالثا وده اللي أنا عمالة أأخّره بأولا و ثانيا
هو إني مش قادرة أقولك إطمن... ماتخافش .. كلها أول شهرين و حاتتأقلم
بالعكس كلها شهرين و حاتبدأ تتشد بقوة..و... لأ أنا مش حاقولك
بس لأ مش قادرة ماأنصحكش نصيحة متعبة أوى... عارف إوعى تسيب نفسك تتأقلم.. إوعي تخلي حياتك فمصر تغيب عن عينك يوم
يعقــــوب ....
طيب انت حسيت بالاحساس اللي بتقول عليه لما ركبت عجلة في الشارع بلبس رياضي
يعني ممكن يكون فيه مبرر ضئيييل للاستغرابهم
لكن تخيل نفس الإستغراب لما يكون لمجرد ان بنت ماشية في الشارع بلبس غير العباية السودة!!!!
الحياه هنا يا يعقوب واخده مفردات تانية خالص غير مفرداتنا
يمكن تناسب أصحابها لكن إحنا حاسينها مكتفانا
هانودة
من ساعة ما دخلت في موضوع التدوين
وأنا عمري ما علقت أو صرّحت إني بكيت من تدوينة أو تعليق
ممكن أقول إني إتأثرت أو إرتبكت مثلاً
لكن دلوقتي ... مش لاقية حاجة تمنعني أقولك إني بابكي
غالباً علشان مطمنّة باقولها فين ولمين
اللي إنتي قولتيه هوه بالظبط اللي كنت أقصده
انا اصلا دخلت عندك عشان لقيتك من اسكندريه وانا مع اني مش عايش فيها الا اني بموت في كلمة اسكندريه البلد المسحور اللي مش عارف مين اللي سحره ومين اللي حط فيها كل الغموض والجمال ده
تقومي تطلعي مسافره بره اكيد ليكي حق توحشك اسكندريه ده انا اللي بعشقها وواخد على بعدها هاتجنن عليها امال انتي يا مسكينه ياللي اتعودتي عليها وحضنتك طول عمرك تعملي ايه في بعدها انتي صعبتي عليه قوي
بس انتي هايله في اسلوبك كاني ماشي معاكي قصدي راكب معاكي مادمتي مبتمشيش في الشارع وكأني شايفك وانتي بتضحكي قدام المدرسه وشايفك طفله بتلعب جنب القلعه والكورنيش
وعمو جايب الفلافل السخنه والعيش الأبيض
خلاص كفايه لحسن انا تعبت
ابقى تعالي زوريني
سلاااااااااااااااااااااااااااام
لالا
فى مصر اسمها طعمية
فلافل دي هنا عند قطر بس
D:
آه في مصر اسمها طعمية بس الاسكندرانية بيقولوا فلافل
عشان كده لما جيت هنا و لقيت كله بيقول فلافل فرحت قوي
:))
ايه رايك في المعلومات الجديدة؟؟
:)
انا انهاردة فرحانة قوياكيد عارفة مين السبب
:)
إرسال تعليق