ناموسة من خلق الله

عملتها في بيتنا كتير

أيام المذاكرة و هي أيام روعة

قرب الامتحانات كانت تيتة تاخد أختي و يروحوا سيدي بشر عند عماتي عشان البيت يفضالي

وأحس ساعتها إني فمملكتي

بيتنا

أنظفه و أرتبه و أخد دش و انتعش و أقعد أذاكر

ووقت الغدا أعمل الأكل اللي على مزاجي و أحضر السفرة بروقان و أحط منير في الكاسيت و أتغدى

و أريح ساعة و أصحى

أذاكرلي كمان ساعتين لحد ماييجي أجمل وقت في اليوم.. قبل المغرب بساعة إلا ربع

أجمل وقت في البلكونة عندنا

تلاقي كل الناي خرجت للبلكونات

وتلاقي نسمة مالهاش حل

حتى العصافير كإنهم في مظاهرات

سباق طيران فوق البيوت قبل إنتهاء اليوم و النوم في الشجر اللي تحت بيتنا

فرحة مالية وش الشارع و السما و البيوت

وييجي الأذان معاه تمثيلية الساعة سبعة ونص

محمد صبحي وونيس والضحك اللي ملفوف بروح جو الأسرة و البيت ولمة الأولاد مع أب و أم

وتيجي مرحلى تانية من المذاكرة .. مرحلة الليل اللي إنتاجها بيكون أضعف و بتيجب معاها الملل و الاحساس بالوحدة و هم الامتحان و الخوف

بس جمالها كان في الهدوء .. وصوت الجيران اللي جاي من المنور

بيت ساكت مع صوت موسيقى هادية و أفكار رايحة جاية

وكتابات كتير مالية مذكرات المواد وكتب الوزارة والنماذج

وتيجي ناموسة من اللي بيملوا بيتنا عشان أنا مابحبش أقفل الشيش أبدا أبدا

وتطير الناموسة و تيجي على دراعي

فأثبت زي تمثال وما اتحركش

و أراقبها بانبهار

لو شفتوا يوم اللي بتعمله كده.. عملي ومباشر حاتحسوا بانبهار بجد كبير

بتمد الدبوس اللي أساسا هو شعرة

وتفتش بيه على الجلد لحد ماتلاقي منطقة مناسبة

فتظبط وقفتها و رجليها و تصدّر قرون استشعارها لففوق إستعدادا للوجبة

فتدخل الدبوس.. قصدي الشعرة بكل هدوء و حرفنة فتلاقيها بتقصر وتقصر لحد ما راأسها توصل للجلد بعد ما كانت بعيدة

ويبدأ الأكلان في الجلد لما تبدأ بطنها تحمر و تتخن وتتخن وتتخن لحد ماتاخد كفايتها وانا مستحملة

شوية وتبدأ تسحب الدبوس.. قصدي الشعرة شوية شوية و تطير

ولما تطير بحس اني زعلت منها

ليه الندالة ده.. ليه ماوقفتش هنا ولا هنا جنبي ما طربيزة السفرة واسعة

وبتتبسط جدا وبحس احساس خاص

احساس ليه علاقة بيّ و بالحاجات اللي بحبها

وللمعاني اللي ربنا خلقنا عارفين نحسها

ونفرح بدوارنها حوالينا

وحشتني إن الحاجات تبقى قريبة و سهل تتصاحب

وحشتني الصحوبية مع كل الحاجات وونسة الاماكن و الجو

وحشني الكون باللي فيه

وحشتني الخصوصية جوة بيت حافظني و حافظاه

كل حاجة فيه شبهي وشبه كل الناس اللي عرفتهم

حتى لو بعدنا برجعله و اشوفهم جواه و أشم ريحيتهم

حتى اللي عمري ماشفتهم جواه.. كلمتهم منه

عشت مشاعر تخصهم فيه بعد أيام قضيتها معاهم براه

عارف هو كل حكاياتي

ووحشني

نسّيني لو حلم وراح

حلمت كتير

وغيرت حلمي ميت مره.. ولقيت حاجات كتير بتضطرني فكل مرة اصغره.. واقص منه حته

وولا مره غيرته فيها حسيت اللي قبله كان احلى

بالعكس كل مرة احس انه لما صغر اكتر بقى احلى و اقرب

بس لحد المرحلة دي وكفاية

مش حاينفع يصغر اكتر من كده

مش حاينفع يبقى اصغر من شقة باوضة وصالة في عمارة على قد حالها

كانت زمان ضروري لو قدام البحر

دلوقت ياريت لو بس تشوف انعكاس زرقانه على السما من بعيد او بتطولها ريحته فايام الشتا

ول لا ده ولا ده ماشي.. خليني امشيله على رجلي في شارع طوييل يتفتح قلبي فيه مع كل خطوة لحد عنده

كان مهم قوي تكون في وسط البلد بس دلوقت بقول ياريتها لو فالماكس ولا ابوقير ولا حتى العجمي اللي بكره عشوائيتها جدددا

أعتقد الحلم مش ححاينفع يبقى ابسط من كنبتين خشب بمرتبة وشلت قطن و بياضات وتلفزيون صغير بوصلة

آه ده حلم ومش حلم اضطراري ولا متضررة منه وقابلاه متغصبة

بالعكس شايفاه قادر على انه يملى قلبي سكون وراحة واستمتاع

بس حتى حلم زي ده صعب فيكي يابلدنا

محتاج سنين غربة مش قليلة

سنين يعيش الواحد فيهم يصارع الراحة و الرفاهية لا تسلل لجوفه وتسرق منه بساطة الحلم اللي لو كبر حايندفعله سنين أطول

وكل ما تطول السنين توسع دايرة الحلم أكتر

لحد ماتقرب قوي من حلم ضخم تلاقي نفسك بعد ماحققته ماعندكش وقت تعيشه.. أو ماتلاقيش نفسك اساسا عشان تعيشه معاك

.

ده انا نفسي كمان في طفل

امسك ايده والف بيه اسكندرية كلها

ونرجع لبيتنا اللي مش ايجار.. مقتولين تعب وانبساط

اكمل فيه كل اللي ناقص فيّ

حلمي اني اعرف اطلعه جريء من غير وقاحة

وطبيعي من غير اندفاع

وخجول من غير خوف

وهادي من غير انعزال

وطيب من غير سذاجة

اطلعه بيحب اللغة العربية قوي والموسيقى و القرآن

اقراله قصص مكتوبة في كتب اوراقها كبيرة ورسوماتها جذابة واللي بدأت اشتري منها الفترة اللي فاتت عشان ماعتقدش حاقدر عليها فمصر لما ارجع و استقر هناك

ماهو الواقع بيقول ان الوظيفة اللي حاتسمحلي باني اقضي معاه نص اليوم بالكامل اكيد راتبها يادوب يفي مصاريف الحياه اليومية لاتنين زينا

ده اذا كنا اتنين وبس

يمكن حاعلمه غصب عني الوحدة.. يمكن من غير ماحس حاقفل علي انا وهو بابنا وكان الدنيا مافهاش غيرنا

أكيد هي انانية لما اعمل ده لمجرد اني اكون سعيده بغض النظر عنه

بس دا حلمي وموافقة اغيره لو لقيته اناني

نفسي اشوفه بيحب الحيوانات و الشجر وبيعرف يرسم و يعزف وبيقدر يشوف جوف الحاجات مهما كانت مقفولة قوي

نفسي اعلمه يفهم الناس باحساسه مش باللي باين منهم.. ويحب يقرب منهم قوي من غير مايعتمد عليهم ولا ترتبط حياته بوجودهم

واشوفه قدامي بيكبر يوم بيوم..

مهم قوي يكون ابني.. لكن قابلة بصدر رحب جدا لو اضطريت أصغر حلمي حبتين و اتبناه

حافرح برضه و حاستمتع

والله أعلم .. مش يمكن يبقى للحلم طعم مختلف ساعتها

...

يمكن لو هبة ورباب و سارة هنا معاي كان قلقي قل بكتير

كان خوفي من نفسي كمان قل بكتير

كان زمان اوقاتنا اللي بتضيع في التسوق و الفرجة على كماليات الحياه حاتكون اقل

كان زماني قضيت وقت اكتر بنتكلم فيه عن الحياه

والاقي صوت يقولي هند انتي فده غلطانة

هند انت كده بالغتي..

انت كده انانية

يمكن كنت استوعبت حاجات لسة ماستوعبتهاش

يمكن كان ضميري مابعدش قوي كده

يمكن ماكنتش حافقد كل وسائلي لاسعاد اللي حولي بدل ما أنا مش متبقيلي منها غير شوية هدايا

بجيبها لناسي و اضحك على نفسي لما أشوف فرحتهم بيها عشان اصدق اني قادرة افرحهم

بس عادي

لسة عني امل ان كل ده ممكن يرجع

حاسة اني لو اختصرت سنين الغربة يادوب على قد تمن الشقة ورجعت حاعرف أرجّع اللي اتجمد جواي

حاقدر اعيش بمصروف على القد.. وانسى كماليات مالفتتش نظري غير مع الفضى اللي عشته هنا

كماليات شفت كتير اتحبسوا جواها و ماعرفوش يرجعوا وكانها هي دي الحياه

والحياه في نظري هي مجموعة قدرات

لو راحوا تبقى الحياه مجرد ايام المطلوب منها تعدي وبس

القدرات دي هي الحب و الرضا والسعادة والمشاركة وضبط النفس

قدرات مالهاش علاقة بالفلوس انما بالراحة

...

أديكِ شفتي ازاي صغرت حلمي على قد ما قدرت

ولو الايام فتحتلي عني على حلم اصغر حارحب بيه جدا ومن غير زعل

بس المهم ماتصعبهاش انت يا مصر

ولا تجبرينا نلغيه خالص ونلاقي نفسنا مالناش مكان فيكي ولا لقمة

على الله ماتجيش يوم تقوليلنا بيتكم وفرشتكم هناك.. وعمر ما الضيف ماحايبقى صاحب بيت

...

انا حطاكي حلمي وماتسألنيش ازاي بقيتي انت بلدي و حلمي في نفس الوقت

بس اوعي بعد ما اقطع نفسي لحد ما أوصلك تطرديني.. وتقوليلي "انت بتحلمي"

مشيني على كفوف الراح

نسيني لو حلم وراح

يمكن...

حلاوة الــرد

أجمل إحساس ان حد يرد عليك.. مش أي رد لان كل الناس بترد على كل الناس

بس الرائع انك تنادي من غير صوت فيرد حد عليك

يعني لما ترفع راسك و تغمض عنيك و ترمي آهه في الهوي فيرد عليك حد...

ياااه على جمال الإحساس

عارفين؟؟.. كتير لما كنت زمان في بيتنا لوحدي كان يضيييق عليّ قوي,, فأطلع البكونة و قلبي بيقول آآآه.. فيخرج في ساعتها جارنا في العمارة اللي قدامنا... فأحسه رد عليّ.. فأرتاح .. و أتونس بيه رغم ان المسافة حتى ماتسمحليش أعرف ولو ملامحه.. بس بحسه رد عليّ.. وكإنه ملى البيت عندي ناس وزحمة

وساعات الحال كان يضييييق عليّ قوي و بابا مابيبعتش المصروف وأدخل للبقال و أنا بحسبها بالقرش عشان ماجيبش أكتر من اللي فجيبي.. وأحاسبه وأنا هم بكرة ماليني ...فيقوللي بالهنا والشفى يا آنسة.. وعلى وشه حتته إبتسامة زي العسل..فأحسه رد عليّ.. وكإنه أكّلني لبكرة و بعده

وساعات أعمل لعبة جميلة ع الكمبيوتر

أحط أغاني كتير في الليست .. وأتعمد ما أركزش أنا بحط ايه.. وألخبط الترتيب كمان وأسمع.. أسرح مع الأفكار .. وأتحاور مع ده وأعاتب ده وأتأسف لده وأتخانق مع ده وأزور أماكن و ناس و أتفرج على رد فعلهم لما يشوفوني

ووسط كل ده أكيد في ناس بتعيّطني.. فتطلعلي أغنية ترد عليّ فجأه بأبلغ كلام.. ولما أبتسم أفوق على أغنية بتطبطب عليّ

وبما إني محظوظة جدا.. فمع كل الردود اللي بتحوم دايما حوليّ.. ظهرت في حياتي ردود تانية جميلة

أتكلم فألاقي ردود.. مش اي ردود

لأ رد يثبتلك إن اللي رد موجود .. يعني ملموس ... يعني واقع.. وإنه حاسس .. و إنك بتعرف تحس.. وإن الناس ليها قلوب وليها عقول... وإن القلوب جواها إستعداد

والرد ممكن يكون نظرة.. ابتسامة.. سلام.. هزار مالوش علاقة بكلام انا كاتباه..

ممكن يكون أي حاجة بسيطة .. بس بيشيل جواه الاحساس من القلب للقلب و بسهولة مدهشة

بعتذر عن غيابي و اللي كان لاسباب كتير

اولهم ضغط الشغل الكتير جدا و اللي لسة زي ما هو

بس مش هو لوحده لاني ياما كان الشغل بيزيد زي كده و كنت بسرق ولو نصلف ساعة في اليوم جري اطل بيها عليكم

لكن كمان كانت نفسي معاندة و قلبي مقفول

عاندت نفسي ورفضت اشوف اللي جواها و غمضت عيني عنه بالعافية

قال يعني عشان أعرف أكمل بروح الأجازة اللي نزلتها

بس انا كنت تعبانة

وماعرفش مالي

ولاني بعدت و حرمت نفسي من الكتابة

فدة كان سبب اني ماعرفتش مالي اكتر واتغربت عنها

عشان انا مابعرفش انا مالي ولا عاوزة ايه غير و ان هنا

بقى كلامكم هو انعكاس اللي جواي

لما أحب اعرفه بعرفه من هنا

غيابي كان غباء

بس مش اختياري

لكن لما رجعت و قريت التعليقات كلها على يعضها انهاردة و تعليقات قديمة كمان

وافتكرت كل لحظة قرب حسيتها مع كل حد قريب مني قوي

كنت بقرأ تعليقاتكم أول بأول من الموبايل

وكنت بفرح قوي بيه

و احس بان الرد لمسني .. وطبطب علي

وكنت ببعت شكر عميق من قلبي لصاحب الرد

بس ماكنتش بقدر المس الحروف

ولا لاقية ترجمة للي بحسه فبسكت و أكتفي بارسال الامتنان في الهوى لعله يوصل

واليومين اللي فاتوا لما رجعت أتابع شوية شوية

حسيت ان الدنيا اللي كنت شايفاها الفترة اللي فاتت جافة و فاضية وصلبة .. لقيتها مش كده

بشكركم كلكم على الروح الغالية اللي كنتم بتجروا بيها على اي بوست بحطه رغم تقصيري عن مدوناتكم و تقصيري كمان في الرد على تعليقاتكم السابقة

فبوست من اللي فاتوا فوجئت بناس من اول المدونين اللي عرفتهم من بدايات تدويني و منهم كانوا غايبين و سابولي تعليقات خليتني أحس بفرحة كبيرة جدددا

و لقيت ناس لسة يادوب عرفتهم من قريب جدا و رغم اني مدعمتش معرفتي القصيرة بيهم بتواصل قوي رايح جي من عندي لعندهم لكن لقيت منهم متابعة من القلب ومش واجب ولا روتين.. مجرد ما أنزل بوست ألاقي اسماءهم منورة التعليقات .. كلمات بتقول ان حولي قلوب جميلة قوي

التدوين

عالم رائع جدا ذبت فيه بقالي 3 سنين الا شوية.. الغياب عنه فرق كتير معاي

شدني كام خطوة لوراء

وغربني غربة جوة غربة

معلش.. يمكن تلاقوا كلامي سطحي شويتين

التعبير مش مرن معاي زي زمان لاني بقالي كتير جامده و ساكتة

وأديني أهو بحبي واحدة واحدة تاني يمكن قلبي يفك ومشاعري تلين

بعتذر عن غيابي عنكم

و اتمنى أقدر الفترة الجاية أعوض غيابي و أعرف اتابع كل اللي فاتني

شكرا لكل حد جه و زار مدونتي

عارفة ان فيه كتير جم و ماعلقوش

شكرا ليكم جدا

شكرا على القرب.. على الفهم.. على التشجيع.. على الحنية

ويااارب ما يحرمني منكم