حواديت

فلة

دي قطة من القطط الكتيير اللي عدت علينا

مرة كنا خارجين انا و صحابي .. وأختي الصغيرة كانت معانا.. كانت لسة عندها 12 سنة

وفجأه لفت تحت رجلها قطة صغنووونة طلعت من تحت عربية ووقفلتها .. ساعتها ولاء صرخت..

"اييه ده ده انت فلة"

وشالتها وفرحنا بيها قوي وقررنا ناخدها البيت رغم اعتراضات الاصدقاء وتأففهم

رام

ده كلب لولو.. بنت خالتي طلبت مني آخده البيت عندنا عشان مامتها رافضة وجوده في البيت وده مؤقتا لحد ماتقنعها

أخدته على مضض عشان النجاسة و عشان مابحبش آخد كلب أو قطة وهم كبار

بس كانت أيام حلوة قوي اللي قضيناها في البيت لوحدنا أنا وولاء مع رام و فلة

كنا مابنبطلش ضحك بجد

سبحان الله .. تصرفاتهم كان فيهاقرب كبير من الانسان

كان رام عارف انه اقوى من فلة و كان بيحب يعترض على تصرفاتها بالهوهوة عليها عشان تبطله فيحس انه سيطر و خلاص

وكان بيتعمد ياكل من اكلها حتى لو طبقه مليان

وهي كانت تستناه ينام و تنط فوقه و تطلع تجري

كنا لما ننادي عليها هي ..هو يييجي

ولما ننادي عليه نلاقيها جاية

كان عندي استعداد ايامها ما اخرجش خااالص من البيت و افضل قاعدة معاهم انا وولاء نضحك و نلعب معاهم

ومرة نزلنا انا وولاء من البيت على حديقة السلطان حسين بالليل

لقينا هناك جد و حفيده بيصطادوا ضفادع

كانت اول مرة اشوف ضفادع في حياتي رغم اني كنت كبيرة و في الكلية

وقفنا معاهم و الجد اقنعنا ان الضفدع ما بيخوفش ولا مقرف

واننا عادي لو لمسناه

واستغل احراجي منه و حط واحدة فايدي و كانت مبلولة قوي

قد يشرحلنا حيلها في الدفاع عن نفسها

وعن فوايدها لو أخدنا واحدة البيت و انها ممكن تقضي على اي حشرات ضارة

ماعرفش كان ببيقول كلام صح ولا لأ بس اقنعني

وفرحنا قوي انا وولاء اننا اتشجعنا و قدرنا نصطاد معاهم ضفادع

وأخدنا واحدة منهم و رجعنا بيها البيت

حطناها في صندوق عشان خفنا تخرج منه لما ننام و تيجي علينا

بس فتحنا الصندوق من فوق عشان النفس و مانعرفش انها عندها قدرة على النط لمسافات عالية

ولقيت ولاء في نص الليل و في عز النوم بتصرخ في الظلمة "هننننننننننند" قمت مفزوعة بسألها في ايه و انا مش شايفة حاجة من الظلمة لقيتها بتصرخ بتقول

" كابووووووووريا"

ياعيني من النوم و الفرعة ماعرفتش تجيب اسم الضفدع و طلعت معاها كابوريا

هديتها و قعدنا نضحك قوي

وحشوني رام وفلة

ووحشتني ولاء وهي صغيرة .. متعلقة بي و ماتقدرش تعمل حاجة من غيري

ووحشني الاستقرار في بيت فايدي كل أموره وتفاصيله

اللي سمى رام بالاسم ده حاتم ابن خالتي

كان و مازال مهووس بالكمبيوتر.. وعشان كده سماه رام

حاتم صديق طفولتي كمان وحشني جدا.. بقى اب. وعدى بافراح و احزان كتير واحنا بعيد عنه و عنهم كلهم

يارب يقرب البعيد

الحكاية دي فيها وشوش تانية كتير عدوا امام عيني دلوقتي و انا بحكي

من الوشوش دي صحابي.. بكل طباعهم و ايامي معاهم و علاقتي بيهم اللي كان لكل حد فيهم شكل

وحشوني كلهم

وشايلاهم في قلبي بكل تفاصيلهم اللي بتوحشني

وكل اللي بيوحشني بيونسني.. و بتسعدني الونسة دي ومابيهمنيش خااالص لو جروا كام دمعة معاهم

بحب احكي عنهم قوي .. ومع الحكايات اعيش نفس الاحساس و يمكن بشكل احلى وفيه سحر مختلف

حاجة كده شبه البانوراما لصور عادية قوي في الواقع بس لماا تتركب ورى بعضها مع موسيقى مؤثرة في الخلفية و اضائة خافتة.. فيبقوا زي سحر يملى القلب بالاحساس

بس ماكانتش صور عادية.. ولا احساسي بيها كاذب

كانت روعة.. كنت بعيشها و انا مركزة فكل تفاصيلها قوي و بغرسها فوجداني قوي

بحب قوي لما اعمل حاجة بحبها اركز فيها قوي و احفرلها مكان عميق قوي جوايا عشان تتسرب فيه و تستخبى هناك

المهم احبها

وانا بقالي زمان قوي ماعملتش حاجة بحبها

ولا يمكن بحب حاجات بس نسيت ازاي اغرس اللي بحبه فقلبي قوي و اركز فيه قوي

يارب ما نساش الحاجات اللي لحقت و غرستها و بتونس بيها دلوقتي

مجرد تأكيد

بما ان عالمنا ده عالم افتراضي
ومن كتر الحب و الود اللي فيه عرفنا نسحبه ورانا لواقع متسوّر بجدران من حب و مودة ومراعاه
ده يخليني اتجرأ وأطلب منكم شوية طلبات؟؟

الموضوع يتعلق بالاقتراحات الكتير اللي دارت حول اللقائين الخاصين بمدوني اسكندرية
الحكاية اني تفاجأت وانا بكلم عاشقة الرومانسة ان حرووف عاملة لقاء رابع يوم العيد عشان نلحق انا والمدونة عزة نشوفكم ونشوف بعض قبل ما نسافر ونسيب مصر و ده حايكون قبل 10-10 .. وليها خاالص الشكر
.
واتفاجئت كمان ان هي عاشقة الرومانسية نفسها وحنين القلب عاملين لقاء يوم 10-10 برضه في اسكندرية و حايحضره عدد كبير من المدونين سواء من اسكندرية ولا خارجها.. ولهم خالص الشكر(حنين و عاشقة لفكرتهم)
.
وبسبب تقصيري في متابعة المدونات و اللي بعتذر جدددا عنه اتفاجئت بالخبرين رغم انهم اتنشروا و الغالبية الناس عارفة الكلام ده كله قبلي بكتير و يمكن فيه تفاصيل كتير انا مش فاهماها دارت حول اللقاءات دي
ايه اللي انا عاوزاه دلوقتي؟
.
كل اللي عاوزاها هو اتفاق بينا كلنا كده على عدة أمور أنا عارفة اني مابقولش فيها أي جديد
أولا- لو حد اعتبر ان حرووف عملت اللقاء ده من غير ما تحترم ظروف باقي الناس و من غير ما تحترم موعد اللقاء الثاني فياريت يشيل من تفكيره انه اقتراحها يشوبه اي عدم احترام اساسا و أعتقد ان كل اللي قصدته هو انها تلحق تجمعني بالمدونة عزة قبل ما تغادر مصر قبل موعد اللقاء بتاع 10-10 ... و ده أول طلب
وماقصدش اني اتكلم بلسان حرووف ولا لسان اي حد معين انا بتكلم بلسانا جميعا و ده طبعا اذا سمحتولي
.
كون ان فيه لقاء صغنووون جدا حايتم رابع يوم العيد لهدف صغير جدا و محدود ، دا مايمنعش ان اللي حضره حايحضر اللقاء الجميل اللي حايكون يوم 10-10 و اللي حايكون اوسع و أكبر وفيه نشاط خيري يضفي عليه أهمية أكبر بكتير وكتير من الناس اوضحت ده فعلا
.
وأنا حاعمل جهدي واقاوم بعض الظروف و أحاول أغير حجز العودة اللي هو 7-10 عشان ينوبني من الحب جانب و اللي ماشفتهمش في اللقاء الاول أشوفهم في التاني و احقق امنيتي اني اشارك في عمل خيري وسطكم
.
ده غير اني سمعت ان فيه لقاء في القاهرة يوم 3-10 و أنا باذن الله رايحاه بحيث لو ما قدرتش ااجل سفري يبقى انا كده كسبت لقائي بالناس الغالية اللي يهموني جدا في القاهرة و اللي يمكن ما اعرفش اشوفهم لما ينوروا اسكندرية

.
أمااانة عليكم
لو حد فينا اتضايق من تنظيم أحد اللقاءات دون الرجوع اليه يقبل دعوتي لانه يشيل من قلبه اي ضيق او عتاب على حد
ولو حد زعل من عتاب حد ينسى زعله ده خاااالص من غير عتاب جديد و من غير اي تحفظات
يا جماعة
كون ان فيه 3 لقاءات في الفترة القريبة جدا دي ده خير جدا.. ومعناه تواصل أكتر وحايؤدي لان اي حد ماسمحتلوش ظروفه لواحد منهم انه يحظى بالتاني

وأعتقد اننا كلنا متفقين ان المحرك الوحييييد لأي فكرة بتُطرح و لأي مجهود بيُبذل هو الحب بينا
وحتى اللي اختلفوا و زعلوا من بعض (سنة زعل صغنووونة) مافيش فقلبهم أي مبرر لدة غير الحب
واعتقد كمان اللي المجتمع اللي اتبنى خلال الفترة اللي فاتت ده بين المدونين يستاهل نتخض عليه قوي
ونجري بسرعة نطفي اي فتيل ضئيييييل جدا ناوي يشتعل
ونغطيه بسرعة و ماحدش يفتح عليه بقى ولا يحاول يفصص تفاصيله.. ده تاني طلب
اتمنى ان تعليقات اللبوست ده ماتكونش ولا عتاب و هجوم
ولا تبريرات
ولا ايضاح تفاصيل
انما تكون تأكيد من كل الناس ان مافيش ذرة زعل جوة أي حد من أي حد وده شيء انا عن نفسي واثقة منه و اقدر اراهن عليه كمان
وان النية المخلصة اللي حركتنا جميعا ولا حد عنده ذرة شك فيها ولا فيه أي حاجة ممكن تسوقها لأي شائبة
ده الطلب الثالث

بحبكم قوي

ناموسة من خلق الله

عملتها في بيتنا كتير

أيام المذاكرة و هي أيام روعة

قرب الامتحانات كانت تيتة تاخد أختي و يروحوا سيدي بشر عند عماتي عشان البيت يفضالي

وأحس ساعتها إني فمملكتي

بيتنا

أنظفه و أرتبه و أخد دش و انتعش و أقعد أذاكر

ووقت الغدا أعمل الأكل اللي على مزاجي و أحضر السفرة بروقان و أحط منير في الكاسيت و أتغدى

و أريح ساعة و أصحى

أذاكرلي كمان ساعتين لحد ماييجي أجمل وقت في اليوم.. قبل المغرب بساعة إلا ربع

أجمل وقت في البلكونة عندنا

تلاقي كل الناي خرجت للبلكونات

وتلاقي نسمة مالهاش حل

حتى العصافير كإنهم في مظاهرات

سباق طيران فوق البيوت قبل إنتهاء اليوم و النوم في الشجر اللي تحت بيتنا

فرحة مالية وش الشارع و السما و البيوت

وييجي الأذان معاه تمثيلية الساعة سبعة ونص

محمد صبحي وونيس والضحك اللي ملفوف بروح جو الأسرة و البيت ولمة الأولاد مع أب و أم

وتيجي مرحلى تانية من المذاكرة .. مرحلة الليل اللي إنتاجها بيكون أضعف و بتيجب معاها الملل و الاحساس بالوحدة و هم الامتحان و الخوف

بس جمالها كان في الهدوء .. وصوت الجيران اللي جاي من المنور

بيت ساكت مع صوت موسيقى هادية و أفكار رايحة جاية

وكتابات كتير مالية مذكرات المواد وكتب الوزارة والنماذج

وتيجي ناموسة من اللي بيملوا بيتنا عشان أنا مابحبش أقفل الشيش أبدا أبدا

وتطير الناموسة و تيجي على دراعي

فأثبت زي تمثال وما اتحركش

و أراقبها بانبهار

لو شفتوا يوم اللي بتعمله كده.. عملي ومباشر حاتحسوا بانبهار بجد كبير

بتمد الدبوس اللي أساسا هو شعرة

وتفتش بيه على الجلد لحد ماتلاقي منطقة مناسبة

فتظبط وقفتها و رجليها و تصدّر قرون استشعارها لففوق إستعدادا للوجبة

فتدخل الدبوس.. قصدي الشعرة بكل هدوء و حرفنة فتلاقيها بتقصر وتقصر لحد ما راأسها توصل للجلد بعد ما كانت بعيدة

ويبدأ الأكلان في الجلد لما تبدأ بطنها تحمر و تتخن وتتخن وتتخن لحد ماتاخد كفايتها وانا مستحملة

شوية وتبدأ تسحب الدبوس.. قصدي الشعرة شوية شوية و تطير

ولما تطير بحس اني زعلت منها

ليه الندالة ده.. ليه ماوقفتش هنا ولا هنا جنبي ما طربيزة السفرة واسعة

وبتتبسط جدا وبحس احساس خاص

احساس ليه علاقة بيّ و بالحاجات اللي بحبها

وللمعاني اللي ربنا خلقنا عارفين نحسها

ونفرح بدوارنها حوالينا

وحشتني إن الحاجات تبقى قريبة و سهل تتصاحب

وحشتني الصحوبية مع كل الحاجات وونسة الاماكن و الجو

وحشني الكون باللي فيه

وحشتني الخصوصية جوة بيت حافظني و حافظاه

كل حاجة فيه شبهي وشبه كل الناس اللي عرفتهم

حتى لو بعدنا برجعله و اشوفهم جواه و أشم ريحيتهم

حتى اللي عمري ماشفتهم جواه.. كلمتهم منه

عشت مشاعر تخصهم فيه بعد أيام قضيتها معاهم براه

عارف هو كل حكاياتي

ووحشني

نسّيني لو حلم وراح

حلمت كتير

وغيرت حلمي ميت مره.. ولقيت حاجات كتير بتضطرني فكل مرة اصغره.. واقص منه حته

وولا مره غيرته فيها حسيت اللي قبله كان احلى

بالعكس كل مرة احس انه لما صغر اكتر بقى احلى و اقرب

بس لحد المرحلة دي وكفاية

مش حاينفع يصغر اكتر من كده

مش حاينفع يبقى اصغر من شقة باوضة وصالة في عمارة على قد حالها

كانت زمان ضروري لو قدام البحر

دلوقت ياريت لو بس تشوف انعكاس زرقانه على السما من بعيد او بتطولها ريحته فايام الشتا

ول لا ده ولا ده ماشي.. خليني امشيله على رجلي في شارع طوييل يتفتح قلبي فيه مع كل خطوة لحد عنده

كان مهم قوي تكون في وسط البلد بس دلوقت بقول ياريتها لو فالماكس ولا ابوقير ولا حتى العجمي اللي بكره عشوائيتها جدددا

أعتقد الحلم مش ححاينفع يبقى ابسط من كنبتين خشب بمرتبة وشلت قطن و بياضات وتلفزيون صغير بوصلة

آه ده حلم ومش حلم اضطراري ولا متضررة منه وقابلاه متغصبة

بالعكس شايفاه قادر على انه يملى قلبي سكون وراحة واستمتاع

بس حتى حلم زي ده صعب فيكي يابلدنا

محتاج سنين غربة مش قليلة

سنين يعيش الواحد فيهم يصارع الراحة و الرفاهية لا تسلل لجوفه وتسرق منه بساطة الحلم اللي لو كبر حايندفعله سنين أطول

وكل ما تطول السنين توسع دايرة الحلم أكتر

لحد ماتقرب قوي من حلم ضخم تلاقي نفسك بعد ماحققته ماعندكش وقت تعيشه.. أو ماتلاقيش نفسك اساسا عشان تعيشه معاك

.

ده انا نفسي كمان في طفل

امسك ايده والف بيه اسكندرية كلها

ونرجع لبيتنا اللي مش ايجار.. مقتولين تعب وانبساط

اكمل فيه كل اللي ناقص فيّ

حلمي اني اعرف اطلعه جريء من غير وقاحة

وطبيعي من غير اندفاع

وخجول من غير خوف

وهادي من غير انعزال

وطيب من غير سذاجة

اطلعه بيحب اللغة العربية قوي والموسيقى و القرآن

اقراله قصص مكتوبة في كتب اوراقها كبيرة ورسوماتها جذابة واللي بدأت اشتري منها الفترة اللي فاتت عشان ماعتقدش حاقدر عليها فمصر لما ارجع و استقر هناك

ماهو الواقع بيقول ان الوظيفة اللي حاتسمحلي باني اقضي معاه نص اليوم بالكامل اكيد راتبها يادوب يفي مصاريف الحياه اليومية لاتنين زينا

ده اذا كنا اتنين وبس

يمكن حاعلمه غصب عني الوحدة.. يمكن من غير ماحس حاقفل علي انا وهو بابنا وكان الدنيا مافهاش غيرنا

أكيد هي انانية لما اعمل ده لمجرد اني اكون سعيده بغض النظر عنه

بس دا حلمي وموافقة اغيره لو لقيته اناني

نفسي اشوفه بيحب الحيوانات و الشجر وبيعرف يرسم و يعزف وبيقدر يشوف جوف الحاجات مهما كانت مقفولة قوي

نفسي اعلمه يفهم الناس باحساسه مش باللي باين منهم.. ويحب يقرب منهم قوي من غير مايعتمد عليهم ولا ترتبط حياته بوجودهم

واشوفه قدامي بيكبر يوم بيوم..

مهم قوي يكون ابني.. لكن قابلة بصدر رحب جدا لو اضطريت أصغر حلمي حبتين و اتبناه

حافرح برضه و حاستمتع

والله أعلم .. مش يمكن يبقى للحلم طعم مختلف ساعتها

...

يمكن لو هبة ورباب و سارة هنا معاي كان قلقي قل بكتير

كان خوفي من نفسي كمان قل بكتير

كان زمان اوقاتنا اللي بتضيع في التسوق و الفرجة على كماليات الحياه حاتكون اقل

كان زماني قضيت وقت اكتر بنتكلم فيه عن الحياه

والاقي صوت يقولي هند انتي فده غلطانة

هند انت كده بالغتي..

انت كده انانية

يمكن كنت استوعبت حاجات لسة ماستوعبتهاش

يمكن كان ضميري مابعدش قوي كده

يمكن ماكنتش حافقد كل وسائلي لاسعاد اللي حولي بدل ما أنا مش متبقيلي منها غير شوية هدايا

بجيبها لناسي و اضحك على نفسي لما أشوف فرحتهم بيها عشان اصدق اني قادرة افرحهم

بس عادي

لسة عني امل ان كل ده ممكن يرجع

حاسة اني لو اختصرت سنين الغربة يادوب على قد تمن الشقة ورجعت حاعرف أرجّع اللي اتجمد جواي

حاقدر اعيش بمصروف على القد.. وانسى كماليات مالفتتش نظري غير مع الفضى اللي عشته هنا

كماليات شفت كتير اتحبسوا جواها و ماعرفوش يرجعوا وكانها هي دي الحياه

والحياه في نظري هي مجموعة قدرات

لو راحوا تبقى الحياه مجرد ايام المطلوب منها تعدي وبس

القدرات دي هي الحب و الرضا والسعادة والمشاركة وضبط النفس

قدرات مالهاش علاقة بالفلوس انما بالراحة

...

أديكِ شفتي ازاي صغرت حلمي على قد ما قدرت

ولو الايام فتحتلي عني على حلم اصغر حارحب بيه جدا ومن غير زعل

بس المهم ماتصعبهاش انت يا مصر

ولا تجبرينا نلغيه خالص ونلاقي نفسنا مالناش مكان فيكي ولا لقمة

على الله ماتجيش يوم تقوليلنا بيتكم وفرشتكم هناك.. وعمر ما الضيف ماحايبقى صاحب بيت

...

انا حطاكي حلمي وماتسألنيش ازاي بقيتي انت بلدي و حلمي في نفس الوقت

بس اوعي بعد ما اقطع نفسي لحد ما أوصلك تطرديني.. وتقوليلي "انت بتحلمي"

مشيني على كفوف الراح

نسيني لو حلم وراح

يمكن...