أيام آخر الأجازة

شارع قديم متكوم .. وعمارات بتشب قدام سور
منهم اللي دورين و منهم اللي ثلاثة
ارضه مكسرة وواكل من مساحته لوريهات نايمة جنت السور في ظلامه الكئيب
عمارة بينهم هناك أول عيني ما جت عليها ماقدرتش احوش سيول دموع و غصة حلق
اتمنيت لو يفضىى فجاة و أفضل أنا والعمارة وبس
ولما مافضيش وقفتلها
و اتكلمنا
اتكلمنا عن اللي كانوا فيها و سابوها
شكيتهم للشيش دة اللي كنا بنقعد على كنبة تحته
سالته عن الكنبة و السفرة و السجادة اللي تحتهم
وفكرته بأيام رمضان وتجمعنا حولين طبلية على الآذان و قدام التلفزيزن
و المحل اللي قافل تحت ده.. كانوا صحابه حافظيني
افتكروني بعد أما غبت سنة و جيت أطل ع الشارع
لا لقيت المحل مفتوح ولا لقيت أصحابه ولا أهل البيت
...
كان نفسي الوقت يقف و كل الناس حولي تبعد
و ابكي بصوت و أفتح البيبان للدموع للآخر
ومع كل الحنين و الألم
سألت نفسي يا ترى؟؟
ممكن أتمنى لو اللي كان ده يعود تاني انهاردة
بعد كل اللي عدّى ده؟؟
لقيت نفسي ببقول لأ
مانفسيش

ربنا يهديكِ

اديني براقبك و بتفرج.. ومش عاجبني

مش عارفالك رايحة فين ولا عاوزة ايه

بتتجاهليني أنا عارفة و سايباكي

ضحك ولعب شوية و فرح كداب وغوص في الزحام

عمالة تتداري هنا و هنا و تستخبي

بتهربي بعنيكي مني وكانك مش شايفاني

حتى البيت

مارضتيش نفضل فيه ولو ساعتين زيادة

الكل استغرب لما لقاكي قفلتيه باديكي و رميتي مفاتيحه فقاع الشنطة اللي فايدك طول الايام حتى ماقدرتيش تلغي وجوده و تشيليه بعيد عن عينك

عينك اللي مغمضاها

مغمضاها لا تبكي قدام حد حايسأل ومش حاعرفي تجاوبي

حتى أنا بقيتي تخافي تبكيلي .. بقيتي بتخافي من كل حاجة

ضعفتي قوي وعاملة قدام الكل قوية

واتقفلتي بشكل مخوفني.. مش عارفة أشوف جواكي ولا أي حاجة

بقيتي غريبة و تعبتيني

بتلمي حوليكي القلوب و انا عارفة انك لوحدك..

مش عارة ارضيكي ولا ارضيهم بيكي

مابقاش بيجمعنا غيره هو

وده مخليني ماسكة فيه بكل قوتي لا يضيع مننا فتضيعي معاه

تعبتيني

حاسة اني بجري وراكي ومش عارفة لفين

وانت ولا راضية تقفي ولا راضية تقولي على فين

و أنا عارفة انك مش ناوية على مكان

عارفة انك بتجري و بس

سايبة كل حاجة تقع من حواليكي و بتجري و بس

مش عاوزة حد يحصلك ولا حتى يلحق يقولك مالك

لحد امتى و على فين.. حايجي و قت و تقفي تلاقي نفسك بعيد في الفضى و انا معاكي

لاقادرة اعملك حاجة ولا مستحملاكي

ربنا يهديك

حرية

أشعر أنني موجودة..
أنني انسانة

أنني املك حياتي و يومي

ويسألوني "ما الذي يربطك بمصر لهذا الحد"!!!

يربطني بها "أنا" التي تلتصق بي فورا ما أن تطأ قدمي بها

وتفارقني مع اول خطوة الى خارجها

يربطني بها بيت لم و لن يخرج من قلبي ابدا

يربطني بها شعور بالاستقرار أشعر معه اني امتلك شيئا ما

لا اعرف ما هو هذا الشئ

لعله ليس شيئا ماديا

لعله وجوه أعرف ماتحمله تعبيراتها في كل الشوارع

لعلها شوارع و طرق وواجهات محلات احفظها عن ظهر قلب

بل أحفظ وجوه بعض اصحاب تلك المحلات و أعرف الكثير عن تاريخ هولاء الاشخاص

أمتلك هنا الكثير

امتلك وطن يسعني و يسع أحزاني .. وأفراحي

لعلها "الحرية"

حرية الاحساس و البوح والتشارك

هنا.. التشارك قرار.. و الوحدة قرار

الاندماج قرار.. و التأمل قرار

هنا في بلدي.. قد تصعب جدا الحياه ولكن هناك شيء ما يجعل الصعب سهلا

الحرية

ها أنا من جديد عندك يا بلدي

ها أنا أمسك بيداكي مرة أخرى فخذيني لأين ما تحبين

عليك سعادتي وها أنا أنتظر ما عندك بلهفة

تعرفيني أنت و تعرفي كيف تسعديني

أدام الله علينا ودنا

وحماكي لي

حواديت

فلة

دي قطة من القطط الكتيير اللي عدت علينا

مرة كنا خارجين انا و صحابي .. وأختي الصغيرة كانت معانا.. كانت لسة عندها 12 سنة

وفجأه لفت تحت رجلها قطة صغنووونة طلعت من تحت عربية ووقفلتها .. ساعتها ولاء صرخت..

"اييه ده ده انت فلة"

وشالتها وفرحنا بيها قوي وقررنا ناخدها البيت رغم اعتراضات الاصدقاء وتأففهم

رام

ده كلب لولو.. بنت خالتي طلبت مني آخده البيت عندنا عشان مامتها رافضة وجوده في البيت وده مؤقتا لحد ماتقنعها

أخدته على مضض عشان النجاسة و عشان مابحبش آخد كلب أو قطة وهم كبار

بس كانت أيام حلوة قوي اللي قضيناها في البيت لوحدنا أنا وولاء مع رام و فلة

كنا مابنبطلش ضحك بجد

سبحان الله .. تصرفاتهم كان فيهاقرب كبير من الانسان

كان رام عارف انه اقوى من فلة و كان بيحب يعترض على تصرفاتها بالهوهوة عليها عشان تبطله فيحس انه سيطر و خلاص

وكان بيتعمد ياكل من اكلها حتى لو طبقه مليان

وهي كانت تستناه ينام و تنط فوقه و تطلع تجري

كنا لما ننادي عليها هي ..هو يييجي

ولما ننادي عليه نلاقيها جاية

كان عندي استعداد ايامها ما اخرجش خااالص من البيت و افضل قاعدة معاهم انا وولاء نضحك و نلعب معاهم

ومرة نزلنا انا وولاء من البيت على حديقة السلطان حسين بالليل

لقينا هناك جد و حفيده بيصطادوا ضفادع

كانت اول مرة اشوف ضفادع في حياتي رغم اني كنت كبيرة و في الكلية

وقفنا معاهم و الجد اقنعنا ان الضفدع ما بيخوفش ولا مقرف

واننا عادي لو لمسناه

واستغل احراجي منه و حط واحدة فايدي و كانت مبلولة قوي

قد يشرحلنا حيلها في الدفاع عن نفسها

وعن فوايدها لو أخدنا واحدة البيت و انها ممكن تقضي على اي حشرات ضارة

ماعرفش كان ببيقول كلام صح ولا لأ بس اقنعني

وفرحنا قوي انا وولاء اننا اتشجعنا و قدرنا نصطاد معاهم ضفادع

وأخدنا واحدة منهم و رجعنا بيها البيت

حطناها في صندوق عشان خفنا تخرج منه لما ننام و تيجي علينا

بس فتحنا الصندوق من فوق عشان النفس و مانعرفش انها عندها قدرة على النط لمسافات عالية

ولقيت ولاء في نص الليل و في عز النوم بتصرخ في الظلمة "هننننننننننند" قمت مفزوعة بسألها في ايه و انا مش شايفة حاجة من الظلمة لقيتها بتصرخ بتقول

" كابووووووووريا"

ياعيني من النوم و الفرعة ماعرفتش تجيب اسم الضفدع و طلعت معاها كابوريا

هديتها و قعدنا نضحك قوي

وحشوني رام وفلة

ووحشتني ولاء وهي صغيرة .. متعلقة بي و ماتقدرش تعمل حاجة من غيري

ووحشني الاستقرار في بيت فايدي كل أموره وتفاصيله

اللي سمى رام بالاسم ده حاتم ابن خالتي

كان و مازال مهووس بالكمبيوتر.. وعشان كده سماه رام

حاتم صديق طفولتي كمان وحشني جدا.. بقى اب. وعدى بافراح و احزان كتير واحنا بعيد عنه و عنهم كلهم

يارب يقرب البعيد

الحكاية دي فيها وشوش تانية كتير عدوا امام عيني دلوقتي و انا بحكي

من الوشوش دي صحابي.. بكل طباعهم و ايامي معاهم و علاقتي بيهم اللي كان لكل حد فيهم شكل

وحشوني كلهم

وشايلاهم في قلبي بكل تفاصيلهم اللي بتوحشني

وكل اللي بيوحشني بيونسني.. و بتسعدني الونسة دي ومابيهمنيش خااالص لو جروا كام دمعة معاهم

بحب احكي عنهم قوي .. ومع الحكايات اعيش نفس الاحساس و يمكن بشكل احلى وفيه سحر مختلف

حاجة كده شبه البانوراما لصور عادية قوي في الواقع بس لماا تتركب ورى بعضها مع موسيقى مؤثرة في الخلفية و اضائة خافتة.. فيبقوا زي سحر يملى القلب بالاحساس

بس ماكانتش صور عادية.. ولا احساسي بيها كاذب

كانت روعة.. كنت بعيشها و انا مركزة فكل تفاصيلها قوي و بغرسها فوجداني قوي

بحب قوي لما اعمل حاجة بحبها اركز فيها قوي و احفرلها مكان عميق قوي جوايا عشان تتسرب فيه و تستخبى هناك

المهم احبها

وانا بقالي زمان قوي ماعملتش حاجة بحبها

ولا يمكن بحب حاجات بس نسيت ازاي اغرس اللي بحبه فقلبي قوي و اركز فيه قوي

يارب ما نساش الحاجات اللي لحقت و غرستها و بتونس بيها دلوقتي

مجرد تأكيد

بما ان عالمنا ده عالم افتراضي
ومن كتر الحب و الود اللي فيه عرفنا نسحبه ورانا لواقع متسوّر بجدران من حب و مودة ومراعاه
ده يخليني اتجرأ وأطلب منكم شوية طلبات؟؟

الموضوع يتعلق بالاقتراحات الكتير اللي دارت حول اللقائين الخاصين بمدوني اسكندرية
الحكاية اني تفاجأت وانا بكلم عاشقة الرومانسة ان حرووف عاملة لقاء رابع يوم العيد عشان نلحق انا والمدونة عزة نشوفكم ونشوف بعض قبل ما نسافر ونسيب مصر و ده حايكون قبل 10-10 .. وليها خاالص الشكر
.
واتفاجئت كمان ان هي عاشقة الرومانسية نفسها وحنين القلب عاملين لقاء يوم 10-10 برضه في اسكندرية و حايحضره عدد كبير من المدونين سواء من اسكندرية ولا خارجها.. ولهم خالص الشكر(حنين و عاشقة لفكرتهم)
.
وبسبب تقصيري في متابعة المدونات و اللي بعتذر جدددا عنه اتفاجئت بالخبرين رغم انهم اتنشروا و الغالبية الناس عارفة الكلام ده كله قبلي بكتير و يمكن فيه تفاصيل كتير انا مش فاهماها دارت حول اللقاءات دي
ايه اللي انا عاوزاه دلوقتي؟
.
كل اللي عاوزاها هو اتفاق بينا كلنا كده على عدة أمور أنا عارفة اني مابقولش فيها أي جديد
أولا- لو حد اعتبر ان حرووف عملت اللقاء ده من غير ما تحترم ظروف باقي الناس و من غير ما تحترم موعد اللقاء الثاني فياريت يشيل من تفكيره انه اقتراحها يشوبه اي عدم احترام اساسا و أعتقد ان كل اللي قصدته هو انها تلحق تجمعني بالمدونة عزة قبل ما تغادر مصر قبل موعد اللقاء بتاع 10-10 ... و ده أول طلب
وماقصدش اني اتكلم بلسان حرووف ولا لسان اي حد معين انا بتكلم بلسانا جميعا و ده طبعا اذا سمحتولي
.
كون ان فيه لقاء صغنووون جدا حايتم رابع يوم العيد لهدف صغير جدا و محدود ، دا مايمنعش ان اللي حضره حايحضر اللقاء الجميل اللي حايكون يوم 10-10 و اللي حايكون اوسع و أكبر وفيه نشاط خيري يضفي عليه أهمية أكبر بكتير وكتير من الناس اوضحت ده فعلا
.
وأنا حاعمل جهدي واقاوم بعض الظروف و أحاول أغير حجز العودة اللي هو 7-10 عشان ينوبني من الحب جانب و اللي ماشفتهمش في اللقاء الاول أشوفهم في التاني و احقق امنيتي اني اشارك في عمل خيري وسطكم
.
ده غير اني سمعت ان فيه لقاء في القاهرة يوم 3-10 و أنا باذن الله رايحاه بحيث لو ما قدرتش ااجل سفري يبقى انا كده كسبت لقائي بالناس الغالية اللي يهموني جدا في القاهرة و اللي يمكن ما اعرفش اشوفهم لما ينوروا اسكندرية

.
أمااانة عليكم
لو حد فينا اتضايق من تنظيم أحد اللقاءات دون الرجوع اليه يقبل دعوتي لانه يشيل من قلبه اي ضيق او عتاب على حد
ولو حد زعل من عتاب حد ينسى زعله ده خاااالص من غير عتاب جديد و من غير اي تحفظات
يا جماعة
كون ان فيه 3 لقاءات في الفترة القريبة جدا دي ده خير جدا.. ومعناه تواصل أكتر وحايؤدي لان اي حد ماسمحتلوش ظروفه لواحد منهم انه يحظى بالتاني

وأعتقد اننا كلنا متفقين ان المحرك الوحييييد لأي فكرة بتُطرح و لأي مجهود بيُبذل هو الحب بينا
وحتى اللي اختلفوا و زعلوا من بعض (سنة زعل صغنووونة) مافيش فقلبهم أي مبرر لدة غير الحب
واعتقد كمان اللي المجتمع اللي اتبنى خلال الفترة اللي فاتت ده بين المدونين يستاهل نتخض عليه قوي
ونجري بسرعة نطفي اي فتيل ضئيييييل جدا ناوي يشتعل
ونغطيه بسرعة و ماحدش يفتح عليه بقى ولا يحاول يفصص تفاصيله.. ده تاني طلب
اتمنى ان تعليقات اللبوست ده ماتكونش ولا عتاب و هجوم
ولا تبريرات
ولا ايضاح تفاصيل
انما تكون تأكيد من كل الناس ان مافيش ذرة زعل جوة أي حد من أي حد وده شيء انا عن نفسي واثقة منه و اقدر اراهن عليه كمان
وان النية المخلصة اللي حركتنا جميعا ولا حد عنده ذرة شك فيها ولا فيه أي حاجة ممكن تسوقها لأي شائبة
ده الطلب الثالث

بحبكم قوي