كان أجمل حلم ممكن أحلمه في حياتي
كنا بنتواعد على ميعاد عشان نتقابل.. وروحت أتصل بيه من عند محل صغير حاطط موبايل عند مدخل عمارة فسيدي بشر.. لقيت نفسي بطلب الرقم عن ظهر قلب
حسيت بلهفة شديده قوي فقلبي وقت ماكان الجرس بيرن.. وحسيت بفرحة ما تتوصفش لما رد و فضلنا نتكلم و نتواعد على الزمان و المكان بمرح و بإسلوب مزاولاتنا لبعض...و طلعت جري من المحل عشان أشتريله هدية... وسألت نفسي .. طيب الهدية بمناسبة إيه؟؟.. عيد ميلاده لسة باقيله كتييير.... مش مهم .. من غير مناسبة.. المهم هدية أجيبهاله قبل ما يموت... وفضلت أنقّي الهدية وأنا من جواي عارفة إنه مش حايلحق يستعملها...بس كنت فرحانه.. فرحانة عشان بشتريله.. وعشان سمعت صوته اللي مش حاعرف أسمعه تاني.. وعشان حاقابله كمان دقايق
مالحقتش ألفّ الهدية عشان الميعاد جه.. وواضح إن الميعاد كان في تاكسي.. ووقته كان على قد وقت المشوار اللي رايحينه بالتاكسي
كنّا في مود هزار مش عادي.. كنّا عمالين نغلس على بعض .. كعادتنا أنا أقلس على مخارج ألفاظه العجيبة في الكلام وهو يقلس على حركات إيدي و أنا بتكلم.. وكل مناطق إسكندرية اللي بحبها مرّينا عليها بالتاكسي.. شارع شعراوي و الاقبال و شارع 45 و الساعة و الكورنيش و السلطان حسين.. ما عرفش إيه اللي جاب الشرق للغرب لكنه حلم بقى
كنا أنا وهو عارفين ميعاد موته.. "الجمعة الجاية"... وكنا بنتعامل بمنطق إننا بنشبع من بعض قبل ما ييجي الجمعة. .. كنا عارفين إننا محظوظين.. أكيد ... أصله لما يرجع من موته عشان يعيش معاي لحظات ما لحقنهاش يبقى لازم نفرح...الإحساس ده جربناه بالفعل لما كنا مع بعض في الحقيقة.. جربناه فآخر إسبوع قبل سفري زمان
وبالضبط عشنا في الحلم نفس المود.. مرح شديد جدا.. رفض شديد جدا لأي تفكير في بكرة ولفكرة الفراق.. كان بيحكي بسرعة عن كل تفاصيل يومه كإنه بيحاول يسبق لسانه
وأنا كان كل همي و هو بيحكي إني أبصله وكإني بحفر ملامحه فذاكرتي.. وبنجاح شديد عيني شربت ملامحه.. عينه ... نظّارته.. حركات شفايفه... بروفيل وشه من الجنب
وقلّست على كلامه عشان أستمتع بإسلوبه في الرد على غلاستي و كسوفه من طريقة كلامه المخلوطة بفرحته بإني حافظاه و حافظة إسلوبه
وقلتله"جبتلك هدية".. وشفت نظرته الروعة لما يتفاجئ ويفرح و يبقى مش قادر يداري رغبته في إنه يمد ايده في الشنطة و يطلّع الهدية وماسك نفسه بالعافية زي الأطفال لما يحبّوا يقلدوا عقل الكبار
ولما طلعتها من الشنطة وبقوله معلش .. مالحقتش ألفّها.. ومن جوايا بفكر.. إنه كما مش حايلحق يستعملها... شفت فعينه فرحة كبيرة قوي وهو بيتفرج عليها.. شفت حنيّـته وهو بيشكرني
أنا شفته.. أول مرة من يومها أشوفه بالوضوح و القرب ده.. أول مرة أحس بروحه قريبة قوي كده
كان جوانا رِضا بالقدر.. ماكنّاش زعلانين إننا حانفترق.. كنا عارفين إن اللي عايشينه وقت ربنا أعطاه لنا هدية عشان يصبرنا على واقع مكتوب
كنا عارفين إنه خلاص رحل وإنه بالفعل مات.. بس إنهارده مجرد يوم رجعنا بيه لزمن قديم
كنت فرحانة قوي وهو كمان.. وصحيت شبعانه من صورته.. حسيت إن ربنا عملّي مفاجأه ماكنتش عاملة حسابها
خلاني شفته .. شفته كويس قوي.. حسيته قوي.. سمعت صوته
ياااه .. بقالي زمان مافرحتش بالقوة ده
يارب مانكونش آخر مفاجأة
أصله معاي من يوم ماجيت
وشه في كل منظر تروحله عيني
بتكلم بلسانه.. بقول مصطلحاته في الكلام
باخد رأيه وأنا بتفرج ع اللبس
بنقي حاجات تليقلهوأبقى نفسي أشتريهاله
وحشني قوي
كل اللي يومها فرحته معاك
بيعذبني
منـــير
هناك 29 تعليقًا:
اهو الاخ بتاع اول تعليق قال كل الي كنت عايز اقولة
هنودة مالك بس الاحلام دي والعمق فيها بالشكل دة دليل علي ان العقل الباطن عندك مخزن حجات كتير وكمان تفكير
طيب وبعدين ......... ارجعي للواقع
هرجعلك تاني نتكلم
عادل
تصدق فعلا تعليقه كان مؤثرجدا..ههههه
إن كان على المتخزّن فهو كتيييير
ومابيتمسحش
وبينيو بينك.. أنا إستحليت إني أغيب عن الواقه
الذكريات أجمل بكتير و عارفاني أكتر بكتيييير
أقولك
ما عنديش كلام اقوله
:(:(:(
سلام مؤقت
ولا انا عندي كلام اقوله فضلت حاطط ايدي علي الكيبورد علشان اكتب نعليق معرفتش
حتي حاولت اعرف ليه مش لاقي تعليق برضه معرفتش
انا اسف اعذريني
الخوف ان الاحلام دي تتحول من احلام في المنام الى احلام يقظه
وساعتها قد تفقدين القدره على التمييز بين الامور
نصيحتي تناسي مش تنسي
تناسي الامر برمته
فلتعتبري ما قد مضى تاريخ
لا تذكريه الا وقت الذكريات
ربنا يحرسك ويجعل السعاده دايما طريقك
تحياتي يا محيرانا
loumi
أ،ا حاسة باللي عمله كلامي رغم إ،ك مش لاقية كلام تقوليه
عارفة إني ماخلتكمش تلحقوا تفرحولي .. بس أنا فرحانة لسة يا لومي و حافضل فرحانة .. و ذكراه حتى لو أبكتني فهي بتسعدني
ما تقلقيش علي .. مادمت بشم هوى اسكندراني يبقى أنا أكيد تمام
:)
شكرا على قلبك
sendbad
عذراك يا سندباد عشان أنا عارفة إنكم فرحتولي في البوست اللي فات و إني فاجئتكوا بحالة تحزن
بس هو حلم أنا كنت مستنياه و لما جه جه أطول و أجمل مما إتمنيت و طفى جواي شوق كبير جدا.. عشان كده جؤريت هنا و حكيت
ومش عاوزاكوا تزعلوا... بالعكس
أ،ا أخيرا حلمت بالليغ نفسي فيه
اسكندراني اوي
أتناسى ليه بس .. أنا نفسي مانساش عمرى.. أنا فرحت لما حلمت ولقيت كل التفاصيل قادرة تترسم بسهولة جدا
وأنا و الله ما أقصد أحيركوا
بس هي اسكندرية كده
متخزن فيها كل تفاصيلنا
الحلو منها و الوحساللي يفرح و اللي يحزن
وأ،ا كنت شايلة جواي صخرة و أنا هناك
ولما جيت رجعلي قلبي
مش حاينفع أتناساه
:)
إفرحلي .. بقى
هنوده
.......................
البوست اكبر من اي كلام يليق للتعليق عليه
وتقوليلي بتحسي انك صغيره قدامنا و بتحسي انك صخره قدام مشاعرنا!!!!!!! امال الحلم دا ايه
هنوده بجدمش عارفه اقول والله ماقدره اتكلم
ماعنديش حاجه اقلها غير ربنا يفرح قلبك بدعيهالك بجد من قلبي ربنا يفرح قلبكيا حبيبتي
دا الي حلمتي بية .ولا الي كنتي عاوزة تحلمي بية؟
مش عارف لية مش مصدق ان الدنيا ممكن تدي حد الي هو عاوزة حتي لوكان حلم
هو المفروض ان البوست ده ميتعلقش عليه غير بدمعة وبسمة
بس انا حسيته قوي
مملكة الاحلام هي فس نظري
اجمل واكرم نعم ربنا على الانسان
يمكن ساعات بحسها اكتر من نعم تانية لا غنى عنها
لن اجادل
لا اتمنى لكى ألا احلام اطول
واجمل
وليكن ما يكون
ana fr7analk awi fr7ana beki w fr7ana liki.....
mesh 3rfa a2olk 7ga tania ...
saso
وماذا يبقى لنا غير الاحلام..؟؟
نحلم بمن احببنا
وبما احببنا ونحن معهم
نحلم
ولا يبقى لنا غير ان نحلم
تحياتى لصديقتى العزيزة
ولحلمها الجميل
انا بعتقد ان الانسان اللي بيحب حاجه ومش طايلها ويحلم بيها ربنا بيحبه وبيخفف عنه شويه بالحلم ده وبيصبره لان مش معقول ان الاحلام كمان ها تكون متحرمه علينا
كلام جميل
كلام معقول
مقدرش اقول حاجة عنو
بجد مقدرش اقول حاجة عنو
عارفة خليتيني احلم معاك وانا مفتحة عيناي
هايل يا هنودة
حمد الله علي السلامه أولا يا هند
ولو إنها جت متأخره
أما حلمك فمش عارفه أقولك إيه
بجد مش لاقيه كلام
أصل حلمك عمل فيا حالة شجن عجيبه
سلامي ليكي
Hannoda
ولا يهمك صعب تضيعنى الاحلام انا بابا توفى من فترة كبيرة وكل ما اكون فى ازمة احلم بيه بيطمنى لما اشوفه فى الحلم ولو كنت فى مشكلة اتخيل ممكن يكلمنى يقولى ايه وحاسة انه معايا واكبر دليل انى بحلم به بإستمرار - ده شىء خارج عن قدرتنا اننا نتحكم فى احلام الليل اللى بتيجى لوحدها او احلام اليقظة اللى بتريح احيانا
احاسيس رائعة ولك تحياتى
كلامك حلو اوى
و الفكره لذيذه
يا رب دايما تبقي تمام
وتحققي كل اللى بتتمنيه
تحياتي يا انسانه
هنوده
لو قلتلك اني بجد بكيت ياهند
بكيت عشان انا حاسه بيكي وعارفه بتتكلمي عن مين
وعارفه انه مكنش حلم
دا كان هديه من السما ليكي عشان يغفرح قلبك ويسعدك للحظات البسيطه دي
اصعب شيء لما نكون عارفين اننا بنحلم وعمر حلمنا دا ما هيتحقق ابدا
انت ي وانتي بتوصفي الحلم كنت عارفه انك في الحلم
وكنتي عارفه انه رحمه الله عليه جايلك للحظات بسيطه عشان يسعدك بيها
بجد ربنا يرحمه ويسكنه فسيح جناته يارب
معظم الي دخلو فاكرينه حلم
وبيقولولك فوقي
بس انا عارفه انه حقيقه
وهيفضل حقيقه في عمرك ومش ممكن تهربي منها ابدا
يارب تبققي بالف خير وصحه وسلامه يا هند
خدي بالك من نفسك وطمنيني عليكي يا قمر
تحياتي ليكي
مؤلم قوي البوست ده يا هند .. وهيفهمه أكتر بس اللي كان متابع موضوعاتك من زمان ويقدر يفتكر هو كان مين
قلبتي علينا وعليكي المواجع .. كلنا عندنا حالات مرت علينا زي كده وما تخطتش مرحلة الحلم
حقيقى مش عارفة ليه لقيت نفسى بأغنى اغنية انغام الجديدة
ولا اقولك مش مهم الجاى ايه
احنا نتعب روحنا من دلوقتى ليه
لو حتى فرقنا الوداع
لو حتى ضعنا فى الهوا
مش برضه يا حبيبى الضياع
احساس هيجمعنا سوا
تحياتى
المدونين حبايبي
************
أنا مش لاقية وقت كفاية أرد على كل حد لوحده بسبب جريان الوقت في مص ر المحروسة..
بس أ،ا بجد فرحانة بيكم جدا
حاسة بحب الي علي قوي
حب بحب أهرب من حاجات جواي ليه .. وآجي هنا وسطكوا وأرتاااح من حاجات كتير برضه
بجد شكرا على كل كلمة عزيزة جدا
و الرد كده كده جاي عشاتن أنا إتعودت إني أرغي معاكم و مش بيهدالي بال إلا لما كل كلامي يطلع لكل حد بعزه هنا
بجد بحبكم قوي
هنوووووووووووووده
بجد بجد مش عرافه اقولك ايه بجد
مش لاقيه اى كلام اقوله
بجد كتبتى حاجات كتير اووووووووووووى بحس بيها اوووووى
يعنى انى بحس انه الذكرايات الى مرت فى حياتى بتبقى احلى كتير من اللى بيحصلى دلوقتى
او يعنى ايام زمان كانت اجمل
يمكن لانه قلبى كان مجنون بيه وانى كنت بحب اوى
وكان ليا اصدقاء كانوا اقرب بجد ليا من الاخوات
وكان عندى كلام عارفه اكتبه واحسه واقوله
وكان عندى احلام اجمل من الكوابيس الى بتهاجمنى اوووووى
بجد بجد مش عارفه اقولك ايه فعلا
ربنا يصبرك
ويا رب بجد كل اللى جاى فى حياتك يبقى اجمل
ويبقى فى يوم من ايام المسقبل ذكرى جميله تفتكريها وتتمنى الايام تكررها تانى
ربنا يوفقك ويكتب لك كل خير
واحشانى موووووووووووووووت انتى
خلى بالك من نفسك
:)
حلوة قوي عيش الحياة حتى في المنام
حلو بجد ما كتب ..
اقسم الله ببعض مخلوقاته من نبات وجماد
والله ادرى بمخلوقاته ومواطن الاعجاز بها التى يتيح لنا علمنا ان ندرك بعضها
وعلمنا الرسول الكريم ان نقسم بالله خالق الاشياء فهو المعنى المطلق فى مالانهاية الخير والكمال والابداع
ولانى اتابع كتاباتك واعرف خلفيات هذا البوست واشعر بمشاعرك واعيش احاسيسك واتخيل ما يمتلأ به قلبك الجميل الرقيق فاجد نفسى اقسم بخالق هذا القلب انك رائعه وانك دائما تعيدى لنا الثقه فى الانسانية
الانسانية
قصتك جميله جدا ,حاسس ان هذه القصه كانت واقع عشتيه
كلماتك جميله واحساسك اجمل واسلوبك بديع
كل سطر في قصتك كان بيدفعني الي السطر اللي بعده
تحياتي لكي
انا عيطت
متابعة الردود من كل حتة بروحها .. أفتح و أقرا و أجري تاني لإسكندرية
تعرفوا إني كتير ببقى نفسي ألاقي وقت طوييل زي بتاع قطر يكون بالي رايق و فاضي فيه و ألاقي ذهني صافي لإستقبال كل ماعندكم و لإفصاح كل ما عندي
و لما أضبط نفسي و أنا بشتاق للوقت الفاضي و النظام و البال الفاضي أعترض بشده.. حد يشتاق للغربة
بس أنا ما بشتاقش للغربة يا جماعة
أنا بشتاق لمعنى الإستقرار و التواصل و الروتين
بس بشتاقله هنا
فبلدي
فمصر المحروسة .. أو على رأي هارملس
نصر المهروسة
:)
متابعاكم بحب كبير أكتر من اللازم
يعني حب يخوف
بس عزيز قوي
بس أنا لازم أحط بوست حالا عن حدث روعة حيجنني من الفرحة
هنوده
إرسال تعليق