اسمعني
انا لو كنت عاوزة انساك .. ماانا كنت نسيت
او على الاقل ارتحت و خفيت
يبقى ماتعاتبنيش
عشان انا عمري ماحاولت انساك..
وعمري ما سبت ودني لوجعي.. بس انا بتوجع
وكل ما بيشد الوجع بقول عليه زي النسمة
ويسألوا و اقول عادي.. الزمن شال الألم
و انا ولا عارفة الالم ده سكته جواي ازاي
امتى بيهدي و امتى بيعلي؟
مش عارفة
اهو كده بمزاجه.. ينساني يوم و يموتني في يوم
وانت بتعمل زيه
تقرب شوية .. والاقي ايامي بتعدي كلها معاك.. ثانية بثانية
وملامحك قريبة وكلامك في ودني
وتختفي تاني .. ولا كانك كنت هنا يوم جمبي
اناجي اي حاجة فيك و مالاقيش ولو طلة
بس انا بطلت اسأل.. ايه اللي بيقربك و ايه بيبعدك.. امتى حاتيجي و امتى حاتفوتني
لما تغيب بستناك تيجي من غير زن
ولما بتيجي بقول يارب مايجيش معاد مرواحك بسرعة.. وتروح .. واقول مش مهم ما هو بييجي تاني
انا بقيت فحالي صدقني
بقيت فحالي قوي.. آه حتى معاك..
اصلي جربت حاجة طلعت حلوة قوي
اني اسيب كل الدنيا كلها بكل مافيها تعدي
خليها تعدي.. مش حاكدب و اقول ما نيش عاوزة منها حاجة
لأ ده انا اللي فنفسي كتر
بس مانيش ناوية اعافر ولا ادور
فماتعاتبنيش بقى على ابتسامة بقابل بيها حلم وعدى
ولا تعاتبني على امنية رسمتلها خطوط من وهم يخدولهم يومين و يطيروا
ماتعاتبنيش.. انا سبت الدنيا و قعدت على جنب عشان ماحدش يعاتبني
عارف اللي لقى نفسه فبلده وحيد و غريب.. ووجعته الوحدة لحد ما هرب
هرب لبلاد غريبة
وقعد يحكي للناس هناك عن بلده اللي مليانه صحاب و خلان وونس مالي الاوقات
وعن الدفى اللي سابه و اختار غربة فيها ناس عايشة على باب قلبه عمرها ماحاتفوت و تدخل
وعاش معاهم بحكياته عن حلم ماعاشهوش؟
عارفه الراجل ده.. ماتقولش عنه غلبان ... ماحدش غلبان
تعرف .. انا و انت فينا شبه كبير من الراجل ده و بلده
شوف ..
انا اغيرت كتير عن ايام مامشيت
بقيت اعرف كل حاجة
عارفة يعني ايه هروب و جبن
عارفة يعني ايه مسئولية و ضعف
عارفة يعني ايه حب وعشق
ويعني ايه خيانة وكره
عارفة ايه هو الغالي و الرخيص
وعارفة انا مين كويس قوي
وعارفاك.. عارفاك كويس قوي
و كل اللي عارفاه لما بيتعبني بغمض عيني
و ادوب وسط الدنيا و كانها مش بتاعتي و مانيش واحدة من سكانها
ماليش ناس ولا لي ارض
ولا حبيب ولا......
مش حاقولها عشان بتخوف.. انا خايفة قوي.. بقولهالك و انا عارفة انك مش حاتعملي حاجة
ومش بضعف زمان.. أهو كده فجأة لقيتني ساكنة كيان جامد.. مابيتكسرش ماعرفش ليه
و أديني حامسح الدمعتين اياهم و ابتسم من غير مابص في المراية عشان بقت بتنرفزني
هناك 18 تعليقًا:
كنت جايه اشوف الرد على التعليق فى البوست اللى فات واطمئن عليكى
لقيت بوست جديد
(:
ده حتى مش ظهر لسه فى الريدر
هاحجز اول تعليق قبل فاتيما ما تيجى
هههههههههههههههه
واروح اقرا وارجع
أهو كده فجأة لقيتني ساكنة كيان جامد.. مابيتكسرش ماعرفش ليه
***********************
انتى ساكنه كيان جامد وهو ساكن كيانك انتى
بكل معنى الكلمه
انتى حتى رافضه الحياه الا بيه وله
حتى اللى بتعيشيه فهو معاكى وبيشاركك فيه لحظه بلحظه
جميل كلامك قوى
وبيوجع قوى قوى
لانه فكرنى باغلى انسان عندى
اممممممممممم
مش عارفة اقول حاجة
انا سبت الدنيا و قعدت على جنب عشان ماحدش يعاتبني......
.
.
كنت عارفة اني مش في الدنيا لوحدي
لكن مكنتش عارفة مين معايا
ولقيته هنا
حاسة بيك
قلت كل الكلام اللي ماكنتش عارفة اقوله
سمراء
ايه الكلام اللى يفرس ده
يعنى انا اغيب اغيب و ارجع اتفرس
ليه كده؟
بصي الكلام ده لو خواطر مش حقيقي واقعي
حقولك فيه ستات كتيره ضعيفة لاحول لها ولا قوة وجود الراجل فى حياتها يعنى الكثير و بعاده بيديها احساس بالضعف و بتبقى عايشة تعد الساعات و الدقايق على رجوعه
و الايام بتعدى على امل رجوعه و لما يرجع بتيجي معاه مشاكل صدقيني
اما بقا اذا كنتى بتتكلمي عن نفسك
ازعل منك اوي و اقولك بكل صراحة فرستيني
الدنيا عمرها ما حتقف على فكرة حتفضل الايام تعدى بس تعدى ازاي بقا ديه اللى بإيدينا
ايه يعنى لما يسافر و يوحشك و تحسي بوجوده معاكي و صوته فى ودانك ده جميل ده دليل على الحب بس لو هوه كمان بيحس بكده
لكن لو مش بيحس زيك كده يبقى بلاش مبالغة فى المشاعر لأنك ببساطة لو مش لاقيتي تجاوب لمشاعرك حتضايقى
لازم تتعلمى تعتمدى على نفسك و تكونى الراجل و الست فى نفس ذات الوقت و من حين لآخر تتعودى على عدم وجوده و العمل على ان تمسكي بزمام امور حياتك
و فى وجوده اتدلعى و سيبيله الزمام
بس لازم تجدمدى الواحد مش عارف بكره فيه ايه؟
لازم تكوني اجمد من كده
فرستك بكلامي؟ بعتذر
سلام
و أديني حامسح الدمعتين اياهم و ابتسم من غير مابص في المراية عشان بقت بتنرفزني
-------------
ما شاء الله
كلام قلب موجوع وبيتألم بصبر وحنين
ربي يصبر قلبك لو فعلا موجوع
ويرجعك لاسكندريتنا الجميلةولو إنها محتلة من قبل أهالي المدن والقرى المصرية وبعض البلاد العربية ونفسي اروح واسيبهالهم لغاية رمضان ويا خوفي يفضلوا منورينا في رمضان .ههههههههه
ازيك ياهنودة
مش عاجبنى استسلامك لأحزانك و وقوفك عند مرحلة رافضة تتجاوزيها، الحياة مش اختيار و لا فسحة مش هنطلعها غير مع اللى بنحبهم و نختارهم ، الحياة تكليف لازم نكون فيه بكامل و عينا و بكامل قوتنا علشان نقدر نقابل ربنا و قت ما يختار بإنجاز يناسب كل اللى اداهولنا
مينفعش لما ربنا يسلبنا حاجة مهما كانت قريبة أوى مننا اننا نضعف أوى كده و كأن ربنا مدالناش أى حاجة تانية فى الدنيا
حاولى تكتبى نعم ربنا فى ورقة و استرسلى فيها أوى و عاهدى ربنا انك تكملى و انت راضية ، و كمان سعيدة برزق ربنا و أقدراه اللى كتبهالك
متسيبيش الحزن يسرق اللى جاى منك ياهنودة
لو حبيت أكون أمين و زيارتى هنا مش زى عدمها لازم أوقللك انك كده غلط و لازم فورا تركزى فى حياتك ، مقصدش أبدا اننا ننسى لكن الحزن له حد إيجابى و بعد كده بيتحول لنقطة سودا تبتلع كل شئ جميل فى حياتنا
حاولى كتير و اطلبى من ربنا كتير انه يساعدك بس انتِ اللى لازم تبدئى ياهنودة
ربنا معاكِ
سلام عليك يا هند
اخر حاجة كنت عايزة اني اقراها عندك ..انك تكوني تعبانه ...
مش عارفة ااقولك ايه يا هند ..ساعات بحس احساسك ده ..لما اكون تعبانه و حاسة اني عايزة اهرب من كل الناس و اهرب منهم فيهم و انا ماشية في الطريق عايزة اضيع وسطهم منهم و فيهم ..
غريب كلامي و ردي كالعاده
طب انا عايزة اسالك انتي ليه زعلانه منه
مكنش بايده يا هند متزعلش منه عشان ميتعبش في المكان اللي هو فيه دلوقتي
..
غمضي عنيكي و فكري في كل لحظة كنتوا فيها سوا و افتكري صوته لما كان بيقولك اجمل كلمه بتحبيها منه ..
لو بدات عنيكي تبكي سبيها هترتاحي ..
لما تحسي انك هديت اكتبي بوست جديد و حتي ممكن متنزليهوش ..بس اكتبي فيه الاحساس الي جالك بعد ما عيطي و انتي سامعه صوته بيكلمك
..
ربنا يريح قلبك يا رب
طمنيني عليكي يا هند
سلام يا جميله النفس و الروح
مها
هنودة حببتي كلامك وجعني اوي اوي وحسيتك اوي اوي اوي
مش لاقيه كلامة اقولة
يارب تكوني بخير دايما وسعادة
ده كلام كله حقيقي .. كل كلمة وكل حرف .. وانا فاهم انه مش موجه لحد .. يمكن موجه للزمان .. موجه لأي حد لمحتي في عينه نظرة عتاب .. لكن هي الغربة كده
والمهم .. هو ازاي مع وجود كل ده .. نقدر نخرج منه .. ونلاقي الطريقة اللي نستمتع بيها بالحياة .. رغم الغربة وألمها
يا حبيبة قلبى يا هنودتى ى ى ى ى
أنا بسجل تاييدى التام الكامل لكل حاجة من اللى قولتيها
كل سطر
و جملة
و كلمة
و حرف
و الفواصل و الهوامش
و اللى متقلش لأن نفسك إتسدت أصلاً خلاص و مش هتقوليه
أنا معاكى يا حبيبتى
معاكى بكل قلبى
و وحشتينى قوى
قوى
قوى
السلام عليكم
ما تعاتبنيش
يمكن بقيت غريب في وسط بلادي
حالة من اليأس
الخوف
ضياع
وكاني هأعيش كده مجرد ممثل علي مسرح الحياة
هنوده ممكن طلب؟
عايزه الايميل بتاعك
بقالى كتير باسئل وادور عليه وسئلت معظم اللى كانوا فى اللقاء
لو ممكن تسيبيهولى فى تعليق
عندى او عندك
انا باجى هنا كتير
عاشقة الرومانسيية
مش عارفة ان كلامي فكرك بيه ده تبقى حاجة كويسة ولا لأ
بس رغم الوجع اعتقد انها حاجة جميلة انك تفتكريه ولو الغاليين مابيتنسوش
تسلم ايد و متابعتك الغالية و طببببعا أهو الاميل
hend_ys@hotmail
:)
تحياتي
-----------------------------
Somaya Kamal El Din
مش مهم تقولي حاجة المهم اني اتشرفت بزيارتك
:))
تحياتي
------------------------------
انا حرة
:)
وبرضه ما فيش فايدة
حتى لو ماحدش عاتب
تلاقي صوتك من جوة مالي الدنيا زعيق
طيب و بعديييييييييييين
:)
واحشاني
--------------------------------
سمراء
تعليقك هزني قوي
وبشرفني جدا اني اعرف اني ممكن اوصف احساس انت ممكن تكوني مش قادرة توصفيه لإني أساسا بنبهر باسلوبك و عمري ما كنت اتخيل ان ممكن أوصل بكلامي ليه
أسعدني جدددا تعليقك
-----------------------------
واحدة مفروسة
:))
انا معاكي جدا ان اللي بيبعد وبايده مش من حقنا نضعف و تهون علينا حياتنا عشانه
الحب يستاهل الحزن عليه لما بيضيع
ويستاهل الهزة القوية وراه وبس كده . مش أكتر من دول
وتعدي التجربة و تخلص و تكمل الحياه و تمشي.. وتفضل الذكرى أو تتمسح .. براحتها و على حسب قوى الاحساس اللي كان
ده لو كان بعد بايده
ماتتفرسييييش بس استني
:))
بمكن الدنيا وقفت معاي فعلا عند فكرة بس انا مش مقتنعة بكده و مش موافقة و مش ناوية اسكت
وبزق و بعافر لحد ما أعدي
عدم وجوده اتعودت عليه من زمان بس الحمد لله مبرر عدم وجوده مش مبرر يزعلني منه
انا بس بتكلم كاني زعلانة منه عشان مش لاقية حد أزعل منه
:)
شكرا لتعليقك جدا
تحياتي
----------------------------
كلمات من نور
ههههههه
ماعتقدش ان فيه حد من مصيفي اسكندرية حمل مصاريف رمضان و المصيف في وقت واحد.. اطمني
وتسلم ايدك على كلماتك و دعوتك الغالية جدددا
اسعدتني زيارتك جدددا و اتمنى تكرارها
تحياتي
أحمد عبد العدل
أخ عزيز جدا
ده أول إحساس حسيته لما قريت تعليقك من كام يوم و سعدت بيه بحق
تصدقني لو قلتلك اني مش رافضة ولا حاجة بالعكس بتمنى جدا .. بس متهاونة كتير
كل ألاقي صعوبت بستسلم و ازهق
صح قوي تشبيهك بان الحياه مش فسحة ومدركاه قوي
عارف؟.. تطمن قوي لما تلاقي اللي ماشي غلط ماشي في اللي هو فيه عشان مش فاهم
بسيطة .. نفهمة فايمشي صح
لكن اللي فاهم ده صعب قوي و يقلق
لازم ابدأ
بقولها كل يوم و بجددها مع كل أجازة وانفذها شوية بعد الاجازة و تطير تاني
بس وعد
مش حاسكت
:)
بجد شكرا ليك
تحياتي
---------------------------
maha
لا مش غريب كلامك لاني عارفة يعني ايه.. عاوزة أهرب من الناس وفيهم.. وشايفة ميت علاقة بين الجملة دي و بين كلامي و احساسي اللي كتبت بيه
يمكن ساعتها كنت زعلانه منه
وساعات كده ازعل منه لما مالاقيش جوايا قوي اتحمل بيها عتابي لنفسي فارمي الذنب عليه
لحظات و خلاص اريح بيها نفسي و اعتذرله بعدها ونصفى تاني ماتخافيش
بحب احساسك باللي بيني و بينه قوي و بستغربه قوي وبفرح بيه
واحشاني يا مها و بجد تعليقك ده جميل قوي.. حسسني براحة مش عادية
--------------------------
حررروووف
تسلملي دعوتك يا جميل
مش مهم الكلام قد مامهم ان الاحساس يوصل و أهو وصلني
:)
وآسفة على الوجع
تحياتي
---------------------------
يا مراكبي
توقعت منك شدة ودان و نقد.. ماعرفش ليه
وفرحت جدددا لما فاجئتني بقولك انه كلام حقيقي
مش لانه غير كده
لكن عشان كنت بتهم نفسي كتير بالضعف وكلامك حسسني ان مش كلي ضعف
الاستمتاع بالحياه بيجي من أمل تحطه قدامك و تسعى وراه
و اللي يكسف بقى انك تحطه قدامك من غير ماتمسك فيه كويس فتوه و تبقى شايفه طشاش و يمكن مش شايفه خالص
انشاء الله ده مش حايحصل
تحياتي
---------------------------
فاتيما
أغيب أغيب و أرجع ألاقي كلام بيقولي اني خسرانة كتير بغيابي.. وان ماكنش فيه حل لوجعي غير هنا
وان يمكن الأمور ماكانتش حاتوصل للمرحلة ده لو كنت هنا كل يوم و مع كل احساس و فكرة
يسلملي قلبك الطيب و القريب اي فاتيما
hasona
وعليكم السلام
بلادي نفسها بقت غريبة
ويمكن تفاقم الضياع يكون انذار بتغير حقيقي
قلبي بيقول كده
يسعدني جدا التعارف و شكرا على الزيارة
تحياتي
كلماتك توحى بإحساس تعب صعب وصفه،أدعو الله أن يخفف عنكى،ولكنها ألام الحياة لأسبابها المختلفة تكون دائما بداخلنا،نسهو عنا ولكنها موجودة دائما..تستقظ كل حين لنتألم من جديد
يا رب تكون فترة مع الذكرى لتنتهى سريعا وتعودى
أبعد الله عنك أى شعور بالألم وخفف عنكى
تحياتى هنودة الطيبة
esmat
فعلا فيه حاجة متغيرة .. نفسي اعرف ايه هي؟؟
التعب مش هو الجديد يا عصمت
الجديد هو الاستسلام للتعب
يارب تعدي الحالة بسرعة وتروح.. أصلي لقيت ان اللي بينفع معاي هو اني اسيبني خالص لحد ما أمل من وجعي و يمل مني عشان أفوق تاني
لما بعاتد نفسي بتعاندني وبنقف لبعض ولا واحدة فينا بتسيب التانية تتعدي
يسلملي مرورك و دعائك الغالي
:))
تحياتي
إرسال تعليق