بقالي زمان ماكلمتكيش ولا اتغزلت فيكي
وكان مافيكي حاجة وحشاني
فعلا بقالك زمان ماوحشتنيش و كاني بطلت احبك
تصدقي اني بطلت احب حاجات كتير قوي
و بطلت اشتاق خلاص
قلبي بقى جامد قوي شبه الدوم اللي ماعرفش الناس فيكي بتثقل على نفسها و تاكله ليه
يمكن لايق مع قسوة الحياه اللي عايشينها فيكي
بشوفهم بياكلوه و كانه عادي ولا قاسي ولا حاجة
زي ماهم عايشينك عادي برضه و كانك ولا طاحناهم ولا حاجة
شفتيني لما غيرت مكاني و بقيت واقفة على شط الغاضبانين عليكي
شفتيني لما فجأة حطيت كل همي فيكي
سالت نفسي دلوقتي
هو انا بطلت اشوفك مسكينة خلاص
فجأة غيرت كل افكاري؟
تفتكري ليه التحول المفاجئ ده
انا عارفة ليه
بس تعبانة
مش قادرة اقول
زي عادتي في الايام الأخيرة
ماعنديش خلق اتكلم
بسرعة بمل من حوار يمكن انا بدأت فيه
ومن فكرة اتحايلت عليها عشان اجمعها
ومن حاجات كتير مش لسة حاعد اقولها
تفتكري دي حالة موترة الجو ما بينا بشكل مؤقت و حاتزول؟
ولا احنا علاقتنا اتصدعت خلاص؟
فاكرة حالة الحنين بيني و بينك؟
فاكرة كل الجميل اللي كان بينا؟
تفتكري معنى الدمعة دي دلوقتي انك لسة جواي؟
وتفتكري ممكن اللي كان يرجع؟
تصدقي واحشاني؟؟
هناك 3 تعليقات:
مااحنا شايفين منها المرار وبرضه بنحبها
سبحان الله مفيش حد يقدر يكره امه مهما قست عليه وهى ام الكل ياهند وبنحن لها واحنا جواها فمابالك باللى بعيد عنها
يارب تكون فكرة البوست وصلتنى صح
بحبك وحشتينى
ابقى اسمعى الغنوه دى اهداء خاص ليكى ولها
بحبك وبجد وحشتينى ياهند
ارجوكى ما تبطليش تكتبى حتى لو مش قادره تعبرى
حاولى تانى وتالت لانى لما استسلمت للاحساس دا بقى جوايا حاجه بتقتلنى الف مره لما احس بالكلام جوايا
بحسه مخنوق وخانقنى
بحسه متلخبط ومشوش ومشوه وقاسى اووووووووى
وما بقاش عندى اى افكار ايجابيه
كل اللى بييجى على بالى افكار سلبيه وبس ايا كان الموضوع اللى بفكر فيه
ارجوكى حررى افكارك مهما كانت غريبه او مش منظمه
ما تعمليش زيى لما موتت الكلام جوايا وفى جندتى وفى مدونتى وعلى سن قلمى
كل ما بفتح الاجنده وامسك القلم بحس منهم بلوم وعتاب وبحس الكلام بيقولى انتى فاكره انى هعرف اترتبواتضاغ تاىن زى زمان ؟؟
سورى اذا كان فى كلامى طاقه سلبيه بس صعب عليا اوى انك مش قادره تانى تحكى وتسترسلى زى زمان دا انا كنت بلاقى عندك اللى مش عارفه اكتبه ولا اصيغه من جوايا
هدعيلك دايما تكونى بخير
على فكره عمرى ما حبيت الدوم لانى عمرى ما حبيت القسوه
بحبك
طمنينى عليكى
فضفضة حلوة ياهانودا
واصلى ياحبيبتى واحنا هنا عشان نسمع بعض
وحشتينى والله
وكل ما أعدى على ستانلى افتكرك ياقمراية
ربنا يجعل لينا لقاء قريب ان شاء الله
إرسال تعليق