صفحة بيضا و فتحتها عشان اتكلم
لاني لو ما اتكلمتش حانفجر من الضغط اللي بتضغطه علي افكاري
من اتهاماتي لنفسي
من وجودك فيها
طول الوقت انت موجود في افكاري بشكل غريب
وجودك الأول كان بيونسني.. بيطمني.. بيدفيني
دلوقتي وجودك بينرفزني .. بيشتتني... بيخليني أضعف و استعدادي اكبر للحزن و الجرح و الوحدة
عشان خاطري ما تبتدي بالزعل من كلامي بدري كده .. انا لسة عندي كلام كتير يزعل
وماقدميش غيرك اقولهولك.. او بمعنى اصح ماقدميش غير الصفحة اللي قدامي دلوقتي
زمان كان كلامي فيه شوية جمال.. شياكة
دلوقتي ما عنديش
بقول الحمد لله لو طلعت مني كلمة وتطلع زي كا تطلع حتى لو طوب
الحمد لله انك مش موجود معاي لحد انهاردة ولحد الحال اللي انا بقيت فيها دلوقتي
وعلى العموم لو كنت موجود انا كان زماني بعدت عنك و اختفيت
زي ما بعدت عن ناس تانيين غاليين
كنت حاتحس انك قصاد انسانة غريبة جدا غير اللي تعرفها
اللي جواها يخوف ومش فاهم ايه مكانك انت فحياتها
زي ما فيه ناس واقفين دلوقتي قصادي مستغربين
تعرف؟
انا نفسي اتولد من جديد في مكان تاني جديد.. أو اختفي خالص
بسأل نفسي هو ليه انت بس اللي فضلت جواي؟.. اناكف فيك فيك و تناكفني
ايه الي بيمزك يعني عن باقي الناس كلها
على فكرة انا بطلت اتخض عليك
بس فجأة دلوقتي تخيلت لو انت واقف قدامي فعلا و بقولك كل ده و انا شايفة تعبيرات وشك قدامي
زي ما انا شافية حد غالي علي دلوقتي و بعامله باسلوب قاسي جدا هو مش فاهمله سبب
مش عارفة بعمل كده ليه
وحتى لو فيه سبب.. طيب مش بعاتبهم ليه و اريحهم و ارتاح
حتى انت ماعاتبتكش
لما جيت علي انا سكت و فضلت اتعذب و انا مدارية.. لحد ما اختفيت انت فجأة
كنت على امل اني حاييجي يوم و اعاتبك بس انت فاجئتني باختفاء ماينفعش معاه عتاب ولا حتى بيني و بين نفسي
اختفاء سببه ممنوع معاه العتاب
فبلعت عتابي وافتكرت انه اتمسح.. وزعلانة من نفسي قوي انه ما اتمسحش
بيقولوا عن اللي زي قلبهم اسود.. ياخوفي لاكون فعلا مخبية جواي قلب اسود مغطياه بابتسامة انا اكتر حد مش داري ايه اللي وراها
تعبت انا و عاوزة حد يرد علي
حد ياخدني من نفسي عشان بقت وحشه قوي
وتعبتني قوي
خلتني بقيت حاسة اني عايشة حياه حد تاني مش انا
كل ده وانت موجود في خلفية كل الاحداث
انا مابقتش اعرفك
مش عارفة انت مين وامتى قابلتك و ايه اللي حصل بينا
انا نسيت شكلك و صوتك و طباعك
ونسيت حلمت بايه معاك
انا آسفة على كلامي البايخ ده .. بس أهو على قد الوجع اعمل ايه
انا عاوزة ابعد عنك بس المشكلة انك بتتحرك معاي كل ما ابعد
لحد ما بعدت عن كل حاجة عرفتها و عرفتني و برضه انت لسة بتتحرك معاي
ابعد بقى
ابـــعـد
هناك 4 تعليقات:
يمكن البعد عن الغاليين احسن كتير بدل منجرحهم..يمكن لاننا عارفين انهم مش هيحسوا بينا..او هنتعبهم معانا..او عايزين نخرج برا الصورة ونتفرج من برا..مينفع نلومهم انهم هما كمان بعدوا...القسي بيبعدهم..بس للاسف لما نرجع هنلاقي كتير ناس ملت الانتظار ومشت..اعتقد ديه اعراض انسحاب ...بدء هو كمان يغيب عيكي ويبعد وانتي تبعدي
كل سنة و انتى طيبة
اه الحكاية بقا
تفتكري الحالة اللى انتى فيها من كتر اكل الفتة؟؟؟
يا حبيبة قلبي
واضح انك مطرح ما بتروحي بتاخدى الافكار معاكي
كوني قوية و سيبيها على عتبة اي باب بتعدى عليه
و صدقيني انتى الكسبانه
عتاب ايه اللى انتى بتتكلمي عنه
ده فيه ناس ما بتفهمشي العتاب اصلا
ريحي نفسك
و سيبي الافكار و ما تستحضريهاش
تحياتي ليكي
اديكي فتحتيها صفحه بيضه ومليتيها بحبر اسود وحزن والم وعتاب لا يقدم ولا يأخر
خلاص لو في جرح ميره يدبل ولو في خنقه مسيرها تفرج
ولو في بعد فالغاليين مهما بعدتي عنهم بيفضلوا شايلين جواهم مكان حبايبهم حتى لو قل مش هيختفي ابدا
مفيش ذكرى بتتمحي بسهوله لازم تاخد وقتها لحد ما تبهت تديجيا وترووووح
بس انت متفضليش تلمعي اللوحه من التراب لانها كده عمرها ما تبهت
اديكي مليتي الصفحه خلاص وقلتلي اللي جواكي واللي بيحب بيسامح وبيلاقي 100 عذر فمتخافيش
يلايلا اقلبي الصفحه وابدأي واحده بيضه حلوه لونيها الوان فرح وامل وحب وطموح وقوه
خلي الضعف لحظات ترفيهيه ويلا اقلبي الصفحه
اديكي فتحتيها صفحه بيضه ومليتيها بحبر اسود وحزن والم وعتاب لا يقدم ولا يأخر
خلاص لو في جرح ميره يدبل ولو في خنقه مسيرها تفرج
ولو في بعد فالغاليين مهما بعدتي عنهم بيفضلوا شايلين جواهم مكان حبايبهم حتى لو قل مش هيختفي ابدا
مفيش ذكرى بتتمحي بسهوله لازم تاخد وقتها لحد ما تبهت تديجيا وترووووح
بس انت متفضليش تلمعي اللوحه من التراب لانها كده عمرها ما تبهت
اديكي مليتي الصفحه خلاص وقلتلي اللي جواكي واللي بيحب بيسامح وبيلاقي 100 عذر فمتخافيش
يلايلا اقلبي الصفحه وابدأي واحده بيضه حلوه لونيها الوان فرح وامل وحب وطموح وقوه
خلي الضعف لحظات ترفيهيه ويلا اقلبي الصفحه
إرسال تعليق