بفتح كتير في كتاباتي القديمة عنك
بلاقيني رايحالهم لما بيوحشني اني أدخل في حوار معاك
نفسي اتكلم معاك
بقاوم وجودك جواي كتير والله
بس بقاوم مش عشان مش عاوزاك تفضل موجود
لأ انا اساسا لو حادور كده في الحيقية اللي قاعدة جواي و متدارية ومكسوفة تكشف عن نفسها
حلاقيني عاوزاك تفضل معاي كل دقيقة
مع كل نفس ..في كل تجربة بمر بيها
ومع كل فرحة بفرحها و فكل وجع بتوجعه
بس انا بحاول أخرجك من جواي.. ساعات
عشان كل حاجة و كل الناس بتقولي كفاية
كفاية كده.. وعيشي
مع اني بعيش لما احساسي بيك بيعلى
بحس اكتر ..بحب كل حاجة حولي
بحس بالناس و افراحهم و احزانهم
بقرب منهم و بيروح عني جمودي
لما بعيش بروحك حولي بترد في الروح
وكاني خلاص مابقاش من روحي حاجة غير اللي بتجيني منك
بيقولوا ان لسة في روح .. وعارفة انهم صح
بسسسسس.. بس دي اللي حاتجنني
لما بتوحشني قوي كمان بتجنن
بحتاج قوي لنظرة لملامحك.. و لما بعصر تفكيري في تخيلهم وماعرفش قلبي بيوجعني
و يفضل يوجع قوي
واحس ان الدنيا كلها بكل ما فيها مش مكفياني
ومش بتاعتي.. وخنقاني
عاتبة عليكي انا
عاتبة عليك في وضع مالكش ذنب فيه
عاتبة على بعد ما اخترتهوش.. بس ماقداميش غيرك اعاتبه
تعرف؟
لما بعاتبك بفتكر حنيتك.. وطبطبتك و عنيك اللي بتعاندني لما أحتاج اني ارسمها
بسمع صوتك وهو بيقول اسمي
فافضل اعاتبك
و اسمعك اكتر و احس بيك اكتر
واعاتب .. و اعيط... بهوس
وكان الاكثار حايرجعك.. و يخلي الوهم حقيقة
على طول بحلم انك رجعت على فكرة.. في الحلم بتبقى عادية جدا فكرة رجوعك و كانك في مكان ينفع ترجع منه
و بفضل احكيلك قد ايه كانت صعبة السنين من غيرك
و بتقولي انسيها بقى خلاص مرحلة و عدت
حلم متكرر ابقى هبلة قوي لو قلت يارب يتحقق
بس الدعوة على لساني .. بزقها زق عشان ما تطلعش.. لاني مش عارفة ربي يحاسبني عليها ولا لأ
عشان كده بكلمك ساعتها على طول
وأحكيلك ..وادخل في حوارات معاك
بس خلاااااص.. مابقتش بصدق
للاسف اللعبة دي مابقتش بتنفع
ولا حاجة بقت بتنفع
كل الحيل خلصت يا أحمد و باظت و بقى ساذجة فنظري قوي
وبقيت بتعصب من وجودك و اقاومه فلحظات قوتي او استعجالي و اندماجي فمشاغل الحياة
عارف
انا عشان اعرف الغيك من حياتي بلغي نفسي الاول
بنساها.. شكلها ايه .. بتحب ايه .. نفسها فايه.. بتمنالها ايه..
ساعتها بسهى عنها و عنك.. و اعيش من غيركوا انتوا الاتنين
و افتكر نفسي خلاااااص اتخلصت منك
و اقول بقى زي ما بيقولولي.. أدور علي نفسي
بلاقيك بتجيني معاها
تعرف.. مرتاحة انا دلوقتي.. بقالي زمااان ما اتكلمتش معاك و استرسلت
وكان امتناعي عن الحوار معاك معناه اني خلاص عديت
وكان مخاصمتي لذكرياتك و صورك معناهم اني نجحت و نسيت
واتاريني كل الفترة دي مستنية لحظة صدق مع نفسي اعترف فيها اني لسة جواك
مش انت اللي جواي
وساعتها بفرح
هناك تعليقان (2):
وكاني خلاص مابقاش من روحي حاجة غير اللي بتجيني منك
بجد ربنا معاكى
ايه الفضفضة دي كلها ياهنودة
دي فضفضة في شكل قطعةادبية
دي فضفضة في شكل منحوتة حجر او قطعة نحاسية فيها حفر غائر وبارز
الغائر بلا شك هي مشاعرك الدفينة والجميلة
والبارز هي ايضا بلا شك شكل الحياة معاكي
قطعة ادبية في شكل منحوتة كانت فيها ادواتك مشاعرك التي استجمعت كل قواها وطاقتها التي قد بلغت ذروتها لتتجلى في تلك المنحوتة تلك الفضفضة الانسانية في المقام الأول والأدبية في المقام الثاني وتلك الجملة مثال على ذلك في منحوتتك
بس الدعوة على لساني .. بزقها زق عشان ما تطلعش
هنودة السمراء الرقيقة
ادعو لكي براحة البال والتوفيق
تحياتي
حسن أرابيسك
إرسال تعليق