آه و انت قتلتيني بحبك
لا أخدتيني و لا سبتيني أعيش في بعدك
بشوفه كتير في منامي بيعاتبني على حبك
ياما سمعتها منه.. كده توحشك أكتر مني
كده بعدها يوجعك اكتر من فراقي
كنت فاكرة ان كده أحسن
قلت لما انت اللي توجعيني أحسن من ان اللي يوجعني انسان
قلت على الاقل مهما بعدت عنك مش حارجع الاقيكي اتغيرتي
مش حارجع الاقيكي مسحتيلي ذكرياتي و كل ممتلكاتي اللي مخبياها في شوارعك و زقايقك
يوسعوا الكورنيش ولا يطلعوا بسانستيفانوا في قلبك ولا يخصصوا الشلالات
ماشي فيه غيرهم
وحتى لو سرقوا غيرهم يعني حايعرفوا يسرقوا ريحة هواكي؟.. ولا يمسحوا معالم سماكي؟.. ولا يطفوا شمسك اللي أقدر أروح بلونها على وشي لأبعد بلاد الارض؟؟
قلت انت الوحيدة المضمونه.. أكتر حاجة في الدنيا اقدر اقول عنها بتاعتي
فيها رحتي مش حاتروح
ولاعمرها حاتوجعني
بدور انا على رفيق ما يوجعش.. مايخوفش
استسهال ده ولا ايه ماعرفش..!!
بس اللي بقى بيخوفني دلوقتي هي أنا
عندي وسواس قهري بيزن فدماغي طول الوقت
إوعي تتغيري و تبردي و تنسيها
إوعي يوم ترجعي تلاقيها شيلالك كل اللي لكي عندها وتلاقي ان المفاجأة ان كل الحاجات ضاعت من جواكي انت
وتبقى انت اللي اتمسحتي مش هي
وبقيت عايشة بعيد عنك مشغولة بيكي و باللي فيكي
مابقتش شايفة حولي
ولما بجيلك كمان مابشوفش حولي
ولا شايفة جواي
قلق.. قلق.. قلق
ده مابقاش حنين ولا حب
ده بقى جنون
جنون عازلني عن أي محيط أنا جواه
بقيت قاعدة وسط الناس افرد حديثهم قدامي و أدور على حبك فيه
ولو مالقيتهوش امسك فرشة و أرسمه جوة الكلام
و ابروز الرسمة و اعلقها فسماكي و اتفرج و املي عيني و أقول أهم ناس بتحبها
واسمع وجعهم و أفرشه و أعمل نفس الحكاية و أدور على وجعك فيه
و إن لقيته افرح و إن لأ أرسمه بفرشتي
عارفة؟.. اللي عرّفني على حبك اللي جواي هي غربتي
و غربتي علمتني كتير
عيب قوي افضل أهاجمها و انتقدها من غير ما أقول ايه استفدت منها
بس لحظة
مهما استفدت منك يا غربة حاتفضلي في حالك و أنا فحالي
مش حايوصل جنوني لدرجة اني أصاحب غربة
علمتني
علمتي دبل ما أقول عمري ما حاعمل كذا..
أقول يا رب عمري ما أعمل كذا
علمتي أحب الحياه مهما خنقتني
علمتني ان اللي خانقنا من الحياه هي البقعة اللي محصورين فيها بس
و البقعة دي هي مجرد نقطة فقلب الحياه الواسع
لو عرفنا نخرج منها لمنطقة تانية ساعتها حانعرف ان الحياه مش وحشة ولا قاسية
الصعوبة في قلوبنا ومش فيها..
ده اللي فهمته
و ده اللي عرفني انك انت مصدر همي مش الحياه
الحياه فيها غيرك كتير
أسهل و أحلى
بس غيرك أنا مش عارفة أدخّله قلبي
ويارب ما يدخل قلبي فيوم غيرك
تعب؟
جنون؟
توتر؟
ماشي.. موافقة و ماحدش يلومني
مانيش عاوزة أطلع من منطقتي في الحياه
مع احترامي البالغ لباقي الحياه و كل مافيها
ومع كل حبي ليها و تقديري
مصر عندي حياه كلها عيوب و هموم
بس فيها ملامحي و تاريخي
و الغربة علمتني ان مافيش روح من غير تاريخ
وبلدنا فيها روح بيتكلم عنها كتير قوي من الناس
شعوب كتير بتجيلنا بانبهار بالغ بتنطق بيه عيونهم و ملامح وشوشهم
منبهرين بايه؟؟
أكيد الروح
الروح اللي ربّاها تاريخ و جذور ماحدش فينا عاملها حساب
رغم انها مرسومة فملامحنا و انفعالاتنا و تصرفاتتنا و طباعنا
أنا بنزل اتفرج على تفاصيل الروح دي في الناس .. الناس اللي عايشين مع بعض من غير ما يفهموا كل الجمال اللي جواهم و اللي شايل معنى الحياه فقلبه
معنى ما يعرفهوش غير اللي بيفقده
مابيعرفهوش غير اللي عرف طعم الغربة
غير اللي داق طعم البرد في ارض مالهاش روح
و أنا ما عنديش استعداد أعيش بقلب مرتاح من غير روح
حتى لو عمره ما حايرتاح
حتى لو عمري ما حاطولك
بس من قلبي مش راح اشيلك
وان كان ع القلق و الهموم
صدقيني بحاول قوي افتش و ادور في قلب الحياه على حاجة ارتاح جنبها
اربط نفسي بيها للابد و استقر
فكرة بقى او انسان او مكان أو ذكرى
حافضل أدور
أدور على ربي لحد ما أسكن رحابه
وافضل معاه اتمناكي لحد ما يرجعني ليكي
شايلة فقلبي كل اللي دفعت عشان خاطرة من اعصابي و عمري واستقراري
واديني بعافر
يا ارجعلك يا تقتليني بحبك ويخلص نصيبي من الحياه
قلب الحياه جواه بنورة مسحورة
قلب الحياه جواه احلام صغيـورة
منيـــــــــــر
