آخر يوم

اشتريت قلم من أقلام مصر
من ست فارشة في شارع في أبوقير
وكراسة تعبانة من كراسات التلامذة .. ورميتهم في الشنطة

.............

ولا رحت للدكتور ولا قابلت ايمان ولا نزلت محطة الرمل اشتري الجزمة اللي بابا عاوزها
أنا بس لقيتني بوقف تاكسي و بقوله يوديني لبيتنا
غلبتني دموعي اول ما حطيت المفتاح في الباب
واترميت لما دخلت على فحضن سريري و بقينا انا و صوتي و بيتنا بنقول حاجات كتير
أنين عالي سمعت معاه حاجات كتير
وشفت في ظلام المخدة صور و ايام
لقيتني مستخبية هنا .. يااااااه ..كان فيني من زمان
مانيش مبسوطة ان الحضن الوحيد اللي ببكي فيه يبقى بس من جدران بيت
ولا يمكن مبسوطة؟؟
ماعرفش!!

بس هو مش المفروض ان الاحضان تكون من روح و دم
ليها نبض و روح
ليه هرببت منها كلها و هجرتها ؟؟
ماعرفش!!
يمكن كده أحسن؟؟
ويمكن لأ
.....

مانيش عارفة ولا فيه وقت اعرف أو أفهم
خلصت أجازتي و خلصت مصر السنة دي على كده
وأديني بقفل دواليبي على كل حاجة تخصني و لي فيها حتة من روحي
قفلت كل حاجة من غير ولا نظرة واحدة
قلتلهم سلام مقتضب سريع
وأديني ببص لبيتي بآخر نظرة
وأديها نفسي شايفاها ساكنة أوضتي و بتستعد لوضع البيات الطويل
لا أنا عاوزة أحايلها تيجي معاي ولا عمرها حاتوافق لو اتحايلت
ودعتها و مشيت

حتى القلم و الكراسة مانيش واخداهم في الشنطة
خليهم هنا على أي رف وياعالم راجعالهم بعد قد ايه
ولما هاشوفهم هافتكر حافتكر جبتهم منين و امتى و ليه ؟... ولاّ لأ؟؟
وياعالم هارجع الاقيني قاعدة هنا فأوضتي؟؟
وروحي قادرة تحافظ على آخر نفس فيها؟
وياعالم بيتي حايفضل بيتي
وحايعرف يحضني و يخرج مخزون الدموع اللي متحوش طول السنة؟؟
ولا لأ؟؟؟
...

المدونة كانت زمان صفحة برمي فيها كل حاجة من غير خوف
ووحش .. حلو .. قاسي.. مش مهم
دلوقت بخاف ارمي فييها الوحش زي ماهو بالضبط عشان بقى فيه قلوب بخاف على قلقها عليّ
بس اللي شقته من نفسي بقالي كام سنة بيقول اني بعرف أكون كويسة
وان الايام بتعدي

أكيد لما اوصل قطر حاكون كويسة
ويارب اعرف امسك نفسي و ما أنزلش اجازة غير بعد فترة طويلة قوي أعرف أتداوى فيها

يارب