يا واد يا تقيل

و النبي لا تقروا مقاطع الأغنية واسمعوا بودانكوا و تخيلوا معايي عوجان حسين فهمي تخيلوا حب سعاد حسني لبروده و جبروته

يا واد يا تقيل يا مشيبي
ده أنا بالي طويل وإنت عاجبني
*********
عنده برود أعصاب اسمالله ولا جراح بريطاني
ويبص ازاي كدا هو
ويمشي ازاي؟؟ ... كدا كدا هو
و الضحكة إزاي؟؟.... كدا هو
ويقف و يقول أنا هو تمثال رمسيس التاني
********
ما تقولش أمين شرطة اسمالله ولاّ دبلوماسي
وايديه ازاي .. أهو كدا هو
وحواجبه ازاي ؟؟.. كدا كدا هو
ودقنه ازاي ؟؟... كداهو
و يقف و يقول أنا هو و الكون مش قد مقاسي
**********
الرجل الغامض بسلامته متخفي بنضارة
ويحييّ ازاي؟... كدا كدا هو
وينادي ازاي.... أهو كدا هو
ويعادي إزاي؟.. كدا هو
أطول واحد في الحارة

كإن سعاد بتحكي عليه.. حركاته و نظراته وحتى طوله.. كان أطول و أرفع واحد في الكلية
.. يييييه على عوجانه اللي مش لايق على شكله.. على الأقل حسين فهمي كان قمر وحقه.. بس ده بقى كان ما بيعرفش يلبس و مغرور.. بس كان غرور اللي مش واثق في نفسه فقام حاطط نفسه علبة ازاز عشان يخوفك منه
بس كنت بموت فيه.. بموت في عوجانه اللي كان بيحسسني بضعفه اللي مداريه و رى الدردحة و الصياعة اللي بيخوف بيها الناس...كلهم كانوا بيقولوا "علي" ده مشكلة.. ده أذى متحرك ع الأرض.. وهو كان عندي مش أكتر من بيبي مجروح عمال يخبّط و عاملّنا فيها وحش عشان نعامله من بعيد لبعيد..
كان بيحب فيّ اللي بيحبه أي سي السيد في أي ست.. بيحب فيّ حاضر.. ونعم. واللي تشوفه
ما كانش بيحبني أنا ... بس كان بيحب يتعامل معاي.. وكان ده عندي كفاية جدا

بس الغبي..(( أنا بس اللي أقول عليه كده)) ... لما حس بحبي اللي كبر لدرجة المبالغة.. إعتبرني فرصة لازم يجربها.. وافتكر إني بجد مطيعة و ماقدرش غير على حاضر و نعم و اللي تشوفه.. وكان مستحيل يقبل مني غيرهم.. فلما قرر انه يجرّبني (في الحب مش أكتر) قلتله لأ.. أصل حبي مش للتجربة..... وقلبى كنت معتبراه من البضاعة التي لاترد ولا تستبدل.... أصلي كنت متأكده إنها تجربة هاتعدي بسرعة وتخلص و هاكرهه بعد ما يجرحني و يسيبني.. و أنا اخترت إني أفضل أحبه طول عمري
فقلت لأ. و لما سمعها مني لأول مرة مشى.. عاقبني عقاب جامد قوي.. عاقبي بانه مبقاش موجود ..رد فعله كان غبي زيه.. كان بالقوة اللي خلتني أشك.. الواد ده كان بيحبني ولاّ ايه؟؟ حد يعاقب حد ببعد يطول لسبع سنين؟؟ ليه؟؟

دلوقت هو بقى أبو نوران..وولا يعرف عني أي حاجة.. يمكن مش فاكر اسمي ايه .. ولو شفته صدفة احتمال كبير يقوللي ازيك يا..... " سوري انت اسمك ايه؟؟" ... بس والله ما هازعل .. ده أنا نفسي أشوفه صدفة .. أمنية عمرها سبع سنين.. يبقى يوم ما أشوفه اتلهي في انه نسى أنا مين؟؟ .. طب ما طبيعي.. مين فايق يفتكر واحدة عرفها لمده سنة في كلية
أنا كل الناس اللي حوليّ عارفين مين "علي" عندي.. وانتوا عرفتوا مين علي عندي..ونفسي تحبوه .. والنبي حاولوا تحبوه...على فكرة حبي ليه مش لسة زي ماهو.. مابقاش حب عشق يعني لأ .. قى حاجة تانية أجمل و أخف... حاجة بتخفف عني جرح تاني ما كانش ليه لازمة.. جرح ما عرفش ينسيني لولو حبيبي..
وكل ما أسمع سعاد بيتغني يا واد يا تقيل أفتكر طفلي المعووج عوجان بيداري بيه قلب زي العسل .. بتفكرني بواد بيئة ولبط مداري راجل روعة مليان حب و حنية...
أنا مش بيئة و الله.. وهو مش بالصورة اللي كانوا بيقولوا عليها
أنا أجمل أغنية ممكن تطيرني من الفرح هي يا واد ياتقيل.. وأكتر حيوان بحبه هي الزرافة عشان طويلة زيه .. و أكتر اسم رجالي بحبه هو "علي" و أكتر منطقة بحبها هي محرم بيهالحاجات ده بقت عواميد فحياتي بمووووت فيها ...

مش كل شيء بيفوت فعمرنا بيجرح

قلب الحياه مليان حاجات و بتفرح