حاتجن خلاص
وحشتني مدونتي و وحشتني العيلة الكبيرة اللي فجأه لقيت نفسي متحوطة بيهم طول يومي
وبما أن يومي شغل و طريق فقط فمستغربة جداّ انهم طاغيين على الطريق والشغل بلا ثانية من التوقف
للأسف بسبب الشغل الخانق الأيام ده بسبب ضغط الإمتحانات هنا فأنا مش لاقية و قت أعيش فأجمل أجواء بحس إنها أخدتني في حضن مصر ... وحضنها غالي قوي
بس تعدّي الموجه و راجعة تاني
ولحد ما أرجع ساية الأغنية ده تونس مدونتي زي ما هي مونساني و مهونه عليّ بعدي
وأنا مهما خدتني المدن .......وخدتني ناس المدن
دايما صورتك في قلبي .. دليلي في المدن
أطوي المدن و أجيك.. عطشان لنور عنيك
وأرمي روحي عليك تطبطبي و تضمي
ما بحسش بالبراح ده إلاّ فقلبك يا أمي
***********
أمي يا حبيبتي انت....طول عمرك طايرة بي
أمي .. وكإنك اتخلقت عشان تخافي عليّ
طول ما انت عايشة ليّ يا نبع من الحنان
لو ضاق الكون عليّ ليّ فقلبك مكان
بحهب أوي ووحشتني قوي.. ووحشني دفاها
الدفى اللي بيلف القلب و اللي مايعرفهوش الجلد
وحشتني شوارعها و ملامح ناسها
قطر سيدي جابر
سوق زنانيري
كوبري محرم بيه
بلوكات الكورنيش
يـاااااه ع اللي جواي
هناك 12 تعليقًا:
البوست جميل جدا وفعلاا لما حاجه بتوحشنا بنفكر فيها كتير وممكن نكتب فيها شعر تحياتي ليكي اوي ومتغبيش علينا كده وابقي تعالي عندي
عارفه؟
عارفه الشمس لما تبقى طالعه وسخنه
وعارفه لما يكون فى نفس الوقت الهواء صاقع ونسيمه منعش
عارفه لما تتمشى فى الجو ده على البحر وعينك على الميه
عارفه لما تشوفى الميه وهى بتتحرك بهدوء وبساطه وعامل خرير رقيق كانه موسيقى ربانيه
عارفه لما الضوء ينعكس فجاه على حته من الميه فيشع فى عينك جزء من الثانيه فى ومضه سريعه
عارفه لما تبصى بعيد وتلاقى الضوء متكسر على سطح الميه ومتقسم لالوان رائعه صافيه واشعاعاته منطلقه زى خيوط الدهب فى كل اتجاه
عارفه لما تبصى على الميه القريبه وتشوفى الصخور نايمه تحتها منها جزء عالى ومنها جزء واطى والسمك الصغير بيجرى حواليها والنبات الاخضر البسيط طالع من حواليها
عارفه لما تبصى قدام شوية تلاقى طائر النورس الابيض باسراب هنا وهناك وهى بتلعب وتهزر وتتمشى على سطح الميه وبتصطاد سمك
عارفه لما ترفعى عينك شوية للافق وتلاقى الميه مالهاش نهايه والوانها كذا درجه من الازرق وتحسى بمتعه النظر فى الاتساع اللانهائى اللى مش بيقف قدامه حاجز
عارفه لما تقفى تشمى الهوا اللى محدش شمه قبلك وتحسى اد ايه هو نقى وصافى وبيخش الصدر يتشط الجسم ويحيى الطاقه
عارفه لما رجليكى تاخدك فى تمشيه وانتى سرحانه لغايه بحرى وتلاقى مراكب الصيد وراها القلعه فى لوحه فنيه لا نهايه لجمالها
عارفه؟
انا فى الاسكندرية
و
فاكرك
ان شاء الله ضغط الامتحانات يعدى
وترجعى تانى للجو اللى بتحبيه
ربنا يوفقك
تحياتى :)
ازيك هنوده حمدلله علي السلامه ابقي طمنينا عليكي علي طول
ديما الغربه بتطلع فينا مشاعر حنين مكناش نعرفها قبل كده عن نفسنا
بوست رقيق و مستنينك يارب تعدي الامتحانات بسرعه
تحياتي
ربنا يعينك على الغياب ده بس عموما ليكى عذرك بسبب الشغل
ربنا يوفقك واما تفضى شوية متحرميناش من بوستاتك الجميلة
مستنينكن
ربنا يعينك ع الشغل
طب هو ايه!! ياعني انت بره مصر ولا بره اسكندرية؟؟ عموما الأغنية ده من اجمل الأغاني الي اتعملت عن الغربة..مع اني مبحبش عماد عبد الحليم ده بس الاغنية جامدة....و فعلا اوحش حاجة الغربة و البعد عن الاهلوالاصحاب بالذات....ربنا معاكي
ازيك يا هند
الغربة صعبة قوي ، لكن أحسن حاجة انك متخليهاش تاخد من نفسك..متخليهاش تاخد من ذكرياتك
البعد بيأسي..لكن خلي انت دايما قبك قاسي
الأغنية دي بحبها قوي على فكرة
ايه ده
تصدقي
الاغنية دي
انا
انا
انا معرفهاش
انا كنت في مصر يا هنود ولسة جاي
وحاسس اني واخد بنج ومش مصدق
وحشتني مواضيعك
اتاخرت عليك عارف
يا هند .. انتى خلتينى النهاردة بس اقتنع ان المشاعر اللى جوايا مش بتاعتى لوحدي
احساسي اننا عيلة كبيرة و اخوات كتير في بعض
شئ جميل اوي
اميلي في البروفيل
ابعتيلي عليه اسم اي ايميل ليكي
وانا ابعتلك دعوة عضوية في المدونة بتاعة منير
بجد انت اول حد جه في دماغي بس مش انا اللي عامل المدونة
ثانيا
اتحرجت اطلب ايميلك
:)
إرسال تعليق