الإحـتــراف

عارفين الإحتراف؟؟

تــحـديـــــث

4/7/2007

أنا إنطلقت في كلامي على لسان خرّيج جامعة أمريكية

وبعدها ومن تعليقات جت لي من

~ Bato0ot ~

lemonada

قومى الى الأبد

لقيت إني كنت غلطانة في ربط الفكرة اللي قصدتها عن الجمود في المشاعر و الإتجاه العملي البحت في تفسير الحياه و التعامل معها لخريجوا الجامعة الأمريكية

وعشان كده حطيت التحديث ده
عشان أقول إ،ي كان كل قصدي إني أخد منهم نموذج الوعي الحقيقي و التعلّم الصحيح اللي مش بتوفره معظم الجامعات التانية وخصوصا الجامعات والمعاهد الخاصة و اللي أنا أحد خرّيجيها

كمان قصدت أتكلم عن نموذج يتصف بالتأثر بالفكر الغربي من ناحية كشف كل الوانب العميقة لكل شيء بشكل واضح و أحيانا صادم و التعامل معاه بشكل محترف أكتر

لكن ما قصدتش أي إساءة ولا تعميم

وبعتذر عن إختياري اللي إتسبب في الفهم الخاطئ لقصدي

فأنا ما بنتقدش حد معيّن

أنا بنتقد الإحتراف في (كل شيء) لإنه آه مفيد في بعض المجالات العملية

وللأسف.. نقدي فيه منه كتير موجه لنفسي


نقرا البوست بقى؟؟

يلاّ..... مع الإعتذار

عارفين لما شاب متعلم في الجامعة الأمريكية وعلام على حق؟.. لما يكلمك بلسان معووج و بسرعة وبنفعلات بسيييطة بدرجة ما تتناسبش أبدا مع الموضوعات اللي بيكلمك فيها

عارف لما تبقى سقعان؟؟
وإبتسامتك متشنّجة؟

ثواني ثواني

عشان نفهم بس أنا عاوزة أقول إيه

تعالى فكر معاي بالطريقة ده.. إعتبر نفسك خريج جامعة أمريكية شاطر جدا و متفوق و مثقف و وواعى وروش وعصري Freeو مقتنع بسياسة الإحتراف في كل شيء

مع الإعتبار.. أنا بتكلم عن شاب عاوز رضا ربنا و عارف ايه اللي ليه و ايه اللي عليه

استحضر الشكل العام للشخصية في الكلام و طريقة الشرح و التفكير
وتخيل نفسك بالشخصية ده وبتشرح علاقة الإنسان بالله

والله ربنا خلق الإنسان و هو عارف تماماً مدى قوته و ضعفة وقادر على ايه و مش قادر على ايه
و الإنسان كل اللي هو مكلف بيه متساوى جدّا مع قدراته طبقا لعدل ربنا..ه
يبقى اللّي عليك لازم حتعمله لأنك قادر تعمله وده أكيد 100%

وربنا

إدالك بعض العناصر اللي قادرة تتسبب في ضعفك و عصيانك، و على أساسه عرّفك إزاي تتوب و ترجع
وإدانا أيام و وإجراءات تقدر بيها تعوّض خسارتك من الذنوب اللي سببها ضعفك زي رمضان و العمرة و الحج على سبيل المثال مش الحصر

ده أسهل تلخيص يخلّيك بقى ما تقولش انا معذور و لا يخلّيك تسوّف و لا تحط آمالك على بكرة .. إنت بإيدك كل حاجة

وتخيل نفسك و إنت بتشرح علاقتك بأبوك و أمك

دول ناس أوجدونا في الحياه.. في سنين نموّك إنت بتاخد منهم .. وهم مايملكوش غير التفاني في تربيتك

قدّامك على المبدأ ده حوالي 16 ولاّ 17 سنة .. بعد كده المواقع بتتغير و تبقى إنت اللي بتدّي و همّ ياخدوا بحكم السن و تأثيره عليهم جسمانيا و نفسيا ده غير إنك حتتوفر وقتها عندك مقومات الاعتماد على النفس و تحمل المسئولية

والأخلاق الكريمة مفروغ منها ما هي مكتوبه في دياناتنا ومعروفة من أقدم العصور وهمّ أولى الناس بيها... بس

أما الناس..ه

فهمّ رفقاء في الحياه.. كل حد تعرفه هو مش أكتر من إنسان حايرافقك لفترة و يمشي.. مهما زادت فترة رفقته فخلّيك عامل حسابك دايما إنه ماشي وغيره جاي.. و الله أنا مش شايف أي ميزة تفرق بينه و بين غيره عشان أتعب قلبي على حد.. اللي يفرق مع الإنسان بس هو سلامة رفيقه من صفات الأذى و الانتفاع بصفات النفع اللي فبه

وليه تدّي أكتر من المطلوب.. المطلوب المعاملة الحسنة و الضمير و إن الله يحب المحسنين.. مع كل الناس

الحب.. حب ايه ياعم.. إكبر بقى و خلينا في المهم

السنين و العمر... ه ه

و الله ده فترة إختبارك .. "شغلك".. وليك فيها إمتياز المتعة بنعم ربّك.. وليك الحق فإنك ترعى نفسك بالعلم و الشغل و التقدم في الحياه

ده من حقوقك اللي بتاخدها جنب دورك الرئيسي فإنك تعبد ربّك و تشتغل على حسناتك و تكليفاتك و كله محسوب عليك بالساعة.. و إنت و شطارتك.. الأزمات إمتحانات..... و الفرح تجارب ربنا بيجرّبك فيها أو حافز عشان تشتغل أكتر.. و ساعات فيه حاجات بتحصل فيك بس مش ليك .. دِه لناس تانية و إنت سبب فيها

من الآخر كله سكة للآخرة .. فامتحطش في بالك و إشتغل بهمة بس إنت و إحتراف

آدي الدنيا

آدي الإحتراف

ايه؟؟

سقعان؟

قرفان؟

إتخنقت منّي؟؟

طب عارف لما تروح تزور الهرم و تلاقي الأرض حويليه إتعملت سيراميك؟؟

وجنبه على شمالك قرية سياحية على أعلى مستوى.. شاليهات و حمامات سباحة.. و من ورى مجموعة فنادق أعلى منه و أضخم.. و تلفريك و بيتش باجي و حاجات في منتهى الرفاهية في المواصلات . وكله بسعر الجمل و الحصان.. عادي يعني

عارف لما تدخل جامع تلاقي إنه بقى صالة مجهزة بأحدث أجهزة الصوت وإن الأذان مسجّل على سيديهات بتشتغل بالكمبيوتر في مواعيد الأدان المضبوطة بالثانية.. والإمام بيصلي في مكتبه اللي حيطانه عازلة للصوت و إنت عندك بس سماعات .. كل مصلّي يظبط الصوت و الإيكولايزر على حسب رغبته قبل الصلاه

و لما ترفع عينك لفوق وانت بتدعي عينك تقع على أحدث الاضاءات المبنية على دراسات اللي تمنع الكسل و و الشرود و تحفز دايما للإنتباه و اليقظة

عارف لما القهوة تبقى من غير قهوجية؟.. و مكينات القهوة و النسكافي على أحدث طراز (Help your self ).. و الشاي باكتات مع خزانات مية سخنة و الطاولة بكارت إشتراك و الكوتشية مش يدوي إنما على الكمبيوتر هي و الدومينو.. و الكراسي إتقلبت بارات عالية وركن تاني أنتريهات

سقعان صح؟

عاوز تروّح؟

ما تيجو نروّح

طب ثواني بس

فاكرين أغاني حميد الشاعري بتاعت زمان هو وهشام عباس.. فاكرين الله يسلم حالك .. ومراسيل.. وأوصف بإيه؟

فاكرين لما عند بداية رمضان عيال الحتة يلمّوا من بعض و يزيّنوا العمارات

فاكرين الشارع ليلة راس السنة ولمة الجيران في بلكوانات العمارات؟

فاكرين لمّة العيلة في بيت كبير أو كبيرة العيلة يوم الجمعة و الغداء و البنات اللي بتحضر الأكل مع الستّات و الشباب بيتفرّجوا على اللفيلم الأجنبي

آه بالحق.. فاكرين عالم الحيوان و سر الأرض بعده؟.. بعدين الفيلم الأجنيي.. و حديث الروح بعد مسلسل السعة 7.30.. فاكرين نادي السينما يوم الحد و إختارنا لك يوم الأربع و فكر ثواني و تكسب دقايق و يسرّ مشيخة الأزهر الكريم أن تعلن عن ........ بالدرّاسة؟؟

فاكرين المشورة من البيت للفرن و من الفرن للبيت بصيجان الكحك قبل العيد و خناقات أمك على الكحك اللي عمّال تلّقطه و حاتخلّصه من قبل ما يدخل العيد؟

فاكرين أول يوم رجوع للمدرسة بعد الصيف

طب فاكرين حالة الشراء اللي قبلها؟ .. الجزمة السوده و الشرابات البيضة و الشنطة المربعة أم سستتين؟

طب فاكرين فرخ الجلاد؟؟ أنا كنت بقول عليه "فخ" و لحد انهاردة أنا مش عارفة إسمه الصح

كان ألوانه زرق وأخضر ز بيج.. كلهم ألولن كئيبة .. بس دلوقت بحبها قوي

وبعد كده طلع البلاستيك و كان أشيك

دافيان دلوقت؟؟

حاسس إنك روّحت

ما تيجوا نرّوح بقى

بعد ما إدّي و بعد ما خد
شد لحاف الشتا من البرد
حط الدبلة و حط الساعة
حط سجايره و الولاّعة
علّق حلمه ع الشّماعة