هاني انهارده خطوبيته يا جماعة
هاني ده ابن عمتي
وحبيبي جدا.. فيه كمية طيابة و براءة غريبة.. ولا كإنه عنده 33 سنة
لما كنت في مصر في الصيف رحنا وزرنا العروسة كلنا
و كان مهم عنده قوي اشوفها وأقوله رأيي
و كان مبسوط و سعيد لدرجة تفرح
ولكنا فرحنا بيها و بأسرتها
وانهارده أهم كلهم زمانهم دلوقت ملمومين و بيجهزوا لكل حاجة
العروسة من القاهرة
يعني حايبقالنا بيت في القاهرة
هو بيت هاني
يعني العائلة الكريمة((حبيبه قلبي)) أخدوا بعضهم انهاردة و على القاهرة
كلهم
يعني عماتي و خلاتي و خلاني
أساسا إحنا كلنا قرايب في بعض
يعني عمي و خالي أساسا ولاد خالة
ماعندناش حاجة اسمها قرايب بابا و قرايب ماما
كلهم قرايب أساسا من غير لا بابا و لا ماما
أنا متخيلة كمية اللسعان و التهيييس اللي هم فيه انهارده
وخصوصا لإن في مجموعة كده نزلت من الكويت مخصوص و دول مشكلة أساسا
متخيلة كمية الضحك
وكمية التقليس الي حاتنزل على هاني انهارده
الناس ده ووحشوني
و ما خبيش عليكوا... أنا متغاظة عشان مش معاهم في يوم زي ده
أنا بموت في لمتنا
بفتكر كتير يوم الخميس لما كنا نتجمعوا في بيت سيدي بشر
ويكون عددنا كتيييير
كبار و صغيرين كله بيتكلم في وقت واحد و في موضوع واحد
ويبدأ الموضوع يتفرع
كل اتنين مع بعض
و كل تلاتة مع بعض
و كله في نفس الوقت
فتلاقي الصوت عالي
و تلاقي شلة من الصغيرين شغلانتهم مراقبة الحوارات و القليس على الأخطاء العفوية لحد ما تركبهم هيسترية ضحك رهيبة
ولما الكبار ياخدوا بالهم انهم حايتحولوا لمقلسة فيهزّأوهم
وتعلى الأصوات .. وتعلى .. وتعلى
لحد ماتلاقي حد فينا طلع مرة وحده
بس يا برابرة
وحشووووني
هاني حايخطب
فرحانة جدا
يا رب أحضر فرحه و أشوف أولاده بسرعة و نكون إحنا الشباب عييلة جديده
معلش بقى
حايكون ساعتها فيه عيلة ماما و عيلة بابا
بس المهم نشوف عيال بعض
ونلم بعض و مانتفرقش
ونسيبش ا لخلافات تهوّنا على بعض
و الله و كبرنا
كلنا
نفسي عيلتنا ترجع زي عهدها زمان
لمه كل خميس و جمعة
الكل في بيت واحد و كله على مائده غداء واحدة
ماحدش زعلان من حد
ولا حد مقاطع حد
ولا حد في الكويت و حد في قطرو حد في الدنمارك و حد في ليبيا
كنت أنا من قريب واحدة من اللي قاعدين فيها
و أستنى الصيف عشان ينزلوا كل المسافرين
و يبدأ اللسعان
و كنت بحزن مع الكل بيحزنوا في آخر الصيف
وتفضى العيلة
ويتبقى اللي قاعدين
مدفيين ببعضهم
و باسكندرية و بيوتها
دلوقت بقيت مع السقعانين
المتغربين
اللي قلوبهم متقطعة من هنا لهناك
مش وقته
مش وقت غلاسة
انهارده خطوبة هاني
وأنا فرحانة جدا
وقلبي هناك معاهم
الرنات شغالة من الصبح
و المكالمات
وأنا حاتجن
وقلبي عمال يدق جامد
مش مكفيه أنا
حاساه حايسيبني و يهرب على القاهرة
مبروك يا هانّوووو
لما يبعتوا الصور حاوريهالكوا عشان تفرحوله معايا
على فكرة
أنا مابقتش بعرف أحس بفرحتي بتكمل الا أما آجي هنا و أقسمها معاكوا
وحتى الحزن(مالناش دعوة بيه انهارده) برضه ما بيهونش الا أما آجي و أقسمه معاكوا
ربنا يخليكوا لي
و يخليني ليكوا
قلب الحياه مليان
حاجات و بتفرح
هناك 41 تعليقًا:
في اول تعليق ليا في اول مرة ادخل مدونتك
اسلوبك سلس و رائع
الف مبروك لابن عمك
و عقبالك لو ما كنتيش نتجوزة
تحياتي
موجة
استفتاح جميل بزيارة جديده
يا رب تدوم
بس عل شرط
أول تعليق برضه
لا و الله بهزر
انت تيجي من غير أي شروط
الله يبارك فيكي و عقبالي و عقبالك لو ما كنتيش متجوزة
:)
تحياتي ليك
نورتيني
ألف ألف ألف مبرووووووووووووووك
و عقبال أي حد مدخلش دنيا ومنهم انا طبعا و ربنا يديم الفرح عليكم و يسعد هاني و خطيبته0
الف الف مبروك لهاني
وعقبال الجميع
مش عارفه انا بعيط ليه ؟
يمكن عشان فرحانالك .. و زعلانالك برضه .. ان شاء الله خطوبة بنت عمتى قريبو بدل ما انبسط فضلت اعيط انى مش هبقى هناك .. حاسه ان الايام بتتسرسب منى و انا قاعده هنا .. و خايفه كل حاجه تحصل و احنا مش فيها ..
..
اسفه عالغلاسة و مبروك لهانى
مبرووووووك
وعقباااااااااالي
:)
========
انا فعلا بشوف ان الانسان ف الفرح بيحب يشارك الناس وف الحزن بيحب يختفي عن كل الناس الا القريبين قوي
ربنا يكتر من افراحك دايما
:)
مبروووووووووك يا هانى
لو بعرف ازرغت
عقبالك انتى كمان يا قمر
اياكى يا هنوده متعزمنيش
هطب عليكى يومها واخد الشمع غصب عنك فى الزفه
ان شاء الله يا ست الكل ترجعى وتحضرى السبوع معاه كمان
الف مبرووك لهاني يا هنودا وعقبال يا ستي ما تكمل فرحتك بإذن الله وتنزلي مصر تحضري معاهم الفرح وكلو يبقى تمام وتقلسوا وتهيصو وتزعقو وتزهقو منكو الجيران كمان
:D
نفسي والله يا هنودا افتح مدونتك ف يوم الاقيكي كاتبة وبتقولي انا ف اسكندرية يا بشششششر
عشان تفرحي ونفرح كلنا معاكي
:)
-----
عفوا حصل خطأ في االتعليق السابق
:)
آآآآآآآآآآآه ياقلبي
وحشني لسعانك
كنت هتجنن لحبه منه الاسبوع اللي فات
واكيد دايما بس ساعات بنشتاق للجنان مع اغلى الناس
إيييييه ده مش ده الموضوع
معلش آآخر الليل بعد يوم مرهق مووت
مبرووووووووك لهاني والله فرحتيني جدا
متقلقيش ان شاء الله في الفرح هتهيصي وتلسعي براحتك وروشي يا ستي بس بلاش الحزن
طمنيني يا توته
غمزه
تخيلي لو لحظه اللمه دي في قطر
مش كنت هتبقي مبسوطه
العبره بأهل المكان
مش بالمكان
نفس المكان يحمل فرح وحزن
سبحان الله
سلام يا هنودتي
جميل اوي احساس اللمه
شعور جمييييل اوي ان الكل يبقى مع بعضه
الف مبروك للسيد هاني وعقبال الليله الكبيره
وعقبال اللي في بالي
وش بيضحك
فين التورته والحاجه الساقعه
وعاوزين كمان الكركديه الساقع
والدوم
يلا عقبال ما نفرح بالحبايب كلهم
هاى هنودة
الف الف مبروك لهانى ابن عمتك على فكرة اية الخبطة بتعاتكم دى انا مش عارف اجيب أول العالة و آخرها يعنى انتى و اختك ولاد عم ولا ولاد خالة ولا انتى بنت خالتك
بصى كبرى دماغك علشان اللخبطة و اللسعان
المهم الف الف مبروك لهانى ولو كنت اعرف هو منين فى اسكندريى كنت رحتلة و بركتلة بنفسى
و عقبالك و عقبالى
قولى يارب
مبرووووووووك لية
وعقبالك يا احلي هند
انتي روحك شفافة جداا لدرجة انك بتزوري الناس في الاحلام والناس بتزورك
وخاصة في المناسبات اكيد شافوك في الحلم
اسئليني انا
هههههههههههههه
لولولولولولولولولولولولولولولولولوييي
الف الف الف مبروك يا هاني
وعقبال مانفرح بولادك وولاد ولادك يارب
والف مبروك يا هنوده
وربنا يرجعك بالسلامه ويجمع شملك بعيلتك وتفرحي وتضحكي من قلبك يارب
سلامووووووووووز
الف الف مبروك يا قمر على الخطوبه وعقبال الفرح إن شاء الله وتكوني معاهم وتكون لمة العيله زي ماهي وتزيد كل يوم بأولادكم
وأحلى حاجه في الدنيا الأقارب لما يكونوا كتيييييييير
وأولادهم أكتر
الف مبروك مره تانيه وعقبال الباااااااااااقي
ألف مبروك ل هانى
و يا رب قريبا تحضرى وسط أهلك كلهم فرحه
وتسعدى بلمتهم يا رب
وربنا يجمعكم على خير دائما
و فرحتك حلوة اوى
أنا كمان من سيدى بشر يعنى جيران هيييه
ومش عايزة حاجة من إسكندرية حبيبتى
واشارك لماضة فيما تقول إحنا اول ناس
حتتعزم ها
لكى تحياتى
وكل سنة وانتى طيبة وسعيدة
الف الف مبروك لهاني
ومبروك للعائلة
ومبروك للعروسة
ومبروك لأسكندرية والقاهرة
ومبروك ليكي عشان انت فرحانة
وعقبال الي عايزين
:)
اولا الف مبروك لابن عمتك ثانيا كلامك عن العائله ولمة العيله صدقى انا كمان وحشتنى قووووووووى العيله ولة العيله
تحياتى لك
أحمد المصري
الله يبارك فيك و عقبالك انشاء الله
:)
---------------------
كنت زمان بعيط.. في فرح صاحبتي كانوا عمالين يتصلوا بي من الفرح و يكلموني و يسمعوني الزغاريد
كنت حاتجن
فرحانة و قهرانة في نفس الوقت
دلوقت اتعودت خلاص
واستسلمت لكل اللي بيتسرب ورضيت.. يمكن لما تفوتني خطوبة هاني أعرف أحضر فرحه
ويمكن لما يفوتني الفرح أحضر الولاده
اتعلمت كل ما تفوتني حاجة أتمنى غيرها فاتشغل باللي بتمناه عن اللي فاتني
اللي قلتيه مش غلاسة
ده تسلسل الأفكار الطبيعي جددددا
بس احنا بنعمل نفسنا مش واخدين بالنا منه و نعمل من فرحتنا حاجة كبيييييرة عشان تغطي على حزننا
الله يبارك فيكي يا ايثار و عقبالك
:)
الكلية الأول
:)
---------------------------
شادي فايد
عقبالك انت لوحدك؟؟؟
وأنا يعني ماليش نفس؟؟
ههههههههههه
عقبال كل الناس .. يااارب
ماهي الرفحة يا شادي لما تتقسم بتزيد و تكبر
و الحزن لما يتقسم بيبقى أتفه و أصغر
عشان كده الحياه من غير ناس مالهاش قيمة
-------------------------
لماضة
مين ده اللي ما يعزمكيش؟!!!!
بس انت ادعي بس و انت تشوفي
:)
آآآه يا لماضة.. حاتجنن لو ماحضرتش الفرح
بس لو ماحضرتش الفرح انشاء الله أحضر المولود
ولو ماحضرتش الملود الأول .. يبقى انشاء الله التاني
كده يعني
المهم اني حاحضر أي حاجة
ههههههههه
ربنا يهنيه يا رب
---------------------------
آلام وآمال
آه فكرتني بالجيران كمان
:(
أنا ناقصة ناس توحشني
:(
هههههههههههههه
أنا بهزر معاك بس .. أصل واضح ان قلبك رقيق جدا وعارفة انك حاتتخض بسرعة
:)
أسعدتني جدا امنيتك و حسيت فيها بطيابة وتقدير للي بحسه هنا
بجد شكرا على امنيتك
:)
وبيسعدني قوي وجودك
--------------------------
زُمُردتي
آه يا بنتي .. فاكرة اللسعان بتاعنا؟؟؟
وحشني أنا كمان
الله يبارك فيك.. عقبالك . أنا و انت فوقت واحد
عشان نخربها
ههههههههههههههه
كلامك فيه كتير من الصح.. العبرة بأهل المكان
و الأماكن من غير أهلها بتبقى موحشة
بس لما تخيلتها و لقيتهم هنا معاي في البتاعة اللي انا فيها ده
لقيت ان صح
دحايهونوا كتير
حايملوا الأيام أحداث حلو ومرة
وحايملوا الاحداث قيمة
لكن حاتفضل اسكندرية تغز فقلبي
وترسملي شوارعها و ترسملي بيتنا و تقولي .. ماتيجي نروّح؟
أنا عاوزة أروّوّوّح
بس برضه فرحانة
-------------------------------
اسكندراني اوي
الله يبارك فيك
مش عقبالي انا لوحدي
انتم السابقون و نحن اللاحقون
:)
دوم؟؟
هههههههه
آخر حاجة لحقتها ان فرج الله عملت الدوت سلايزس و حاطته في كياس
ماعرفش انه بقى بيتوزع كمان في الأفراح
هههههههههههههه
يا رب نفرح بكل حبايبنا
آمين
----------------------
الصديق المخلص
أنا وأختي صحاب أساسا
هههههههههههه
----------------------------
كراكيب عادل
يا سلااااااااااااام !!!
:)
و الله العظيم فرحت جدا
الله يبارك فيك و عقبال ابنك لما تشوفه عريس
:)
طبعا انت حاتجنن و تشوفه بيبي الاول
ربنا يحفظهولك
بس .. ايه المفاجأه ده
أنا فرحانة
:)
--------------------------
Soooo
أيوة كده
ماحدش سمعني زغروده لحد دلوقت
:))
حتى لماضة طلعت ما بتعرفش
الله يبارك فيك يا سووو
عقبالك انت كمان لما نفرح (فيك).. بما انك بتعتبر الجوار آفة
ههههه
يارب أرجع بسرعة يا سووو قبل ما يفوتني أكتر من اللي فاتني
:)
شكرا على دعواتك
---------------------------
cinderella
الله يبارك فيك و قبالك انت كمان
يا رب يحصل كل اللي قلتي عليه و ادفى بيهم قريب
بجد شكرا
:)
---------------------------
Esmat
يا رب يا عصمت
طلعنا جيران؟؟
انت كده جارة قرايبي.. بس انا عشت معاهم سنين كتيرة
يعني أنا مشهورة جدا هناك
ههههههه
يارب نتلاقي و نعيش المشاعر الجميلة اللي بينا ده على أرض الواقع
و اللي تعملها الأول حاتعزمنا
كده عافية
:)
--------------------
Lemonada
الله يبارك فيكي يا ليمو
فعلا بجد أنا فرحانة جدا لأني متخيلة فرحتهم اللي كانوا مستنينها من زمان
زمتخيلة فرحة هنّوا بقلبه الطيب وروحه الجميلة
عقبالنا
;)
----------------------
walaa
فرحتني أول زيارة ليك و بالذات لأنك على اسم أختي الصغيرة
:)
الله يبارك فيك يا رب
يارب يقرب من كل حاجة واحشاكي ومهما غابت
الغيبة تنتهي باللقا
فننسى أيام الغياب بكل اللي فيها
ياااارب
أتمنى دوام التواصل معاك
:)
ألف ألف ألف مبروك لهانى
جميله قوى اللحظات اللى العيله كلها بتتلم فيها
يتكلموا ويضحكوا
ممكن يبقى فيه تهزيق بس النفوس كلها صافيه
يمكن مشاغل حياتنا دلوقتى منعت اللمه دى او على الأقل خلت طعمها ماسخ متسربع
لكن كل واحد شايل عيلته جوا قلبه زيك كده عشان يحس بالدفا وقت الحاجه
ربنا يخليلك كل أحبابك ويخليكى ليهم
حاسة بيكي جدا...لاني كنت في زيك
الحنين..هي دي الكلمة الي ممكن تعبر عن الي انتي حاسة بيه وعن الي كنت بحسه وقتها
ربنا يديم عليكي الفرح دايما
هنوده يا اللى قلبك زى بحر اسكندريه بيتحمل كل احزان البشر وولا بينطق
ربنا يسعد قلبك دايما وصدقينى هما اكيداسيينك بينهم لانك حاسه اوى بفرحتهم
ربنا يحقق لك كل الى بتتمنيه ما دام فيه الخير ليكى
بحبك اوى عشان قلبك ابيض اوى
يا رب تكونى بخير
:)
واحشانى اوى
هنودة الف الف الف مبروك لهانى وعقبالى
والله فعلا انا بحب المناسبات كلها حتى لو كانت
مش عزا طبعا
بس بجد مفيش احلى من لمة العيلة
الف مبرووووووووووووووووووووووووك
غريب امرك يا هانوده
كل كلامك من القلب
كل مشاعرك صادقه
كل احاسيسك راقيه
باحس ان قلبك بيسع كل الناس
وبيحب كل الناس
وبينقل المحبه لكل الناس
باحب شقاوتك وطفولتك ونضوجك وعقلك
باحب افكارك ومشاعرك وخيالك وواقعك
دايما لما اقرالك اقول من قلبى
الدنيا لسه بخير
الف مبروك وعقبالك
الفرح بيقى حلو في لمته للناس من تاني سواء قريب أو غريب
وبتكون فيه فرصة أحيانا لتلاقي متخاصمين وفرصة للتصالح وصفاء النفوس
والانسان لما بيفرح للناس من قلبه بتبقى فرحة حلوة وبيحس بيها صاحب المناسبة المفرحة
وان شاء الله تتلموا تاني وتتجمعوا على خير
حلوة لما الفرحة بتلمنا
حلوة الفرحه وهي بتضمنا
تشتاق لينا الفرحة
واحنا كمان نشتاقلها
تندهنا من بعيد
واحنا نندهلها
ماتنسوش تعزموانا في الأراجيل
ويوه يايوه يوه يايوه
تتشرف اسرة يالانفضحهم
بدعوة سيادتكم لافتتاح مقرها بالاسكندرية
مركز ضحايا
للاستشارات القانونية والتأهيل النفسى
محاضرة بعنوان مبادىء واساسيات حقوق الانسان
وورشه عمل لتقسيم فريق الاسكندرية وذلك يوم الجمعة اوافق 14/12/2007 فى تمام الساعة الواحدة ظهرا
العنوان :- 9ش مسجد الايمان متفرع من شارع اسكندر ابراهيم خلف جزارة الزهيرى - ميامى - الاسكندرية
ت:- 5484897 - 0166885063
مبرووك يا حبيبتي الف الف مبروك
و عقبال ما تشاركينا فرحتك بفرحهم بس تكوني في مصر ساعتها
و غقبالك يا قمره و كل المدونين يجوا يحضروا الفرح بالعافيه , اه هيا غلاسه بقى
:D
مبوووك لهاني
ومبرووك ليكي فرحتك بفرحة
و يا رب نفرح فيكي قريب و يجيلك كل حبايبك من كل انحاء الدنيا
بس ساعتها متنسيش تعزمينا علشان نفرحلك
تحياتي
هييييه
بوستين متفائلين ورا بعض على طول
شكرا لهاني بجد
وألف مبروك ليكم كلكم .. عقبالك إن شاء الله
يابنتى ما كان هانى عاقل وكافى خيرة شره
على العموم قوليله كل سنة وهو طيب اقصد الف مبروك وعقبال 100 سنة
Miss U v.v.v.v.much
احببت اول واحد في البلوجرية يقول لسمراء النيل كل سنة وانتي طيبة بمناسبة العيد الأضحى المبارك
حسن
الف مبروك ربنا يبارك لهما وعليهما ويجمعهما بالخير باذن الله
تحياتي
ههههههههههههه
طب والله ضحكتيني لما قلتي اني باعتبر الزواج آفه
هههههههههههههه
لكن والله انا معذور .. كل صحابي اللي اتجوزو واعرفهم من زمان واعرف اسلوب حياتهم .. يا اما في مشاكل كبيره قوي
يا اما منفصلين لحد ماتهدى النفوس
يا اما اتطلقو رسمي
انا مالي بقى
عموما ربنا يكرمنا دنيا واخره
سلاموووووووووز
وينكي
الله يبارك فيك
آآآآآه .. ده أجمل اللحظات بجد.. لما أكون وسط قلوب مني.. فاهمني و حافظني
و الحب هو كل اللي ما بينا
بجد بشكرك على الدعوات العزيزة جدا جدا
:)
وكل سنة و انت بخير
------------------------
بيسوو
يا رب يديم الفرح و يقرب المسافات
بس ما عرفلتس ككنت ولا زلت؟
ولاكنت بس؟؟
بس يا رب يقربك من كل اللي تحبيه و تحسي بحنين ليه
كل سنة و انت بخير
-----------------------
ساعه الغروب
انت اللي واحشاني أكتر بكتير .. و الله بجد واحشاني
عارفة؟؟.. من يوم ما سافرت و انا بتمنى اني ما غيبش من أيامهم في ولا يوم
ولا هم يغيبوا من أيامي فولا يوم
و الحمد لله .. في فرحتهم بطلوا علي بمكالمة أو ماسج و ياخدوني فيها
و أنا كمان
بس يا خسارة
في ألمي بطل عليهم و اتمسح فيهم
لكنهم ما بيعملوهاش خوفا عليّ
ربنا ما يحرمني منهم أبدا
ولا منك يا رودي
كل سنة و انت بخير و عيد سعيد يا رب
:)
-----------------------
doha
الله يبارك فيك و يارب يملى الحياه عندك كلها مناسبات جميلة يا رب
و عقبالنا كلنا لما نلاقي اللي نسيب الدنيا باللي فيها عشانه(ها) و نسكن حياته(ها) و بيته(ها) و قلبه(ها)
:)
كل سنة و انت طيب
--------------------------
harmless
:)
بحب كلامك جدا.. بيديني ثقة في اني يمكن ما كونش زي ما أنا فاكرة
وعشان كده بستناه .. عشان اقولها شفت بقى؟؟
كل سنة و انت طيب يا أستاذي و صديقي و جاري العزيز
--------------------------
حسن ارابيسك
الله يبارك فيك و يباركلك
ياااارب نتلموا تاني و نتدفى بعض و تخلص بقى أيام الغربة و الفرقة عشان أنا عارفة قد ايه احنا محتاجين بعضنا
كالعاده كلمات جميلة بتنشرها و كإنها أسهل ما في الدنيا ولو حاولت أجرب أعمل زيك ألاقيها هيهات اني استرسل بمثلها
فأكتفي يأخذ كوبي منها و أضمها لما قبلها
:)
و شكرا ع الزغروده
ههههههههه
كده؟؟؟.. كل الناس عرفت اني سمراء .. و انا كنت كتبتها متدارية كده في بوست
هههههههههههه
لكنن أسعدني اللقب بجد
بجد أشكرك
:)
كل سنة و انت طيب يا راجل يا طيب
-----------------------
عروس البحر
كان نفسي أكون فعلا في اسكندرية و آجي و أشارككم
بس محتاجة بجد أشكرك على نشاطاتكم ده و دعوتكم اللي بتتيح لناس كتير انها تفكر في التغيير و الاتجاه لحاجات بجد تفيدهم و تفيد بلدنا
تحياتي
------------------------
rosa aaaaa
الله يبارك فيكي و عقبالنا كلنا لما نفرح لبعض
قال تكوني في مصر قال.. هو أنا مجنونة عشان ما كونش في مصر لو عملتها
:)
وانا اللي حاجيبكوا بالعافية أساسا
:)
و الله بعتز بمعرفتك يا روزا أكتر و أكتر كل يوم
كل سنة و انت بخير و عيد سعيد ياااارب
----------------------------
اسكندراني في الغربة
الله يبارك ليك يا ابو اسكندر.. عقبالنا كلنا انشاء الله و اللي مش حايعزم حد حانفضحوه في المدونات كلها
:)
حسيت قوي جملتك
مبروك ليكي فرحتك
وبجد فرحتني
كل سنة و انت بخير يا رب و عيد سعيد انشاء الله
----------------------
يا مراكبي
الله يبارك فيك يا حاج
توصل مصر بالسلامة
وو النبي سلملي عليها قوي.. وأول ما تتنزل كده من الطيارة
مش تأجل السلام بعد ما تطلع من المطار و تحاوطك المدام و الاولاد فينسوك
ماتنساش
لمصر سلااااام
كل سنة و انت طيب و عيد سعيد ياااارب
-----------------------------
ياسر شمس الدين
ههههههههه
كل سنة و هو طيب و ألف مبروك و عقبال 100 سنة؟؟
أنا نسيت هو جواز ولا خطوبة ولا عيد ميلاد
:)
الله يبارك فيك و عقبالك لو كنت ما اتجوزتش
معلش مصير كل عاقل انه يتجنن.. بس ما تنكرش انه جنان جميل و لو ماكناش نسعاله بنفسنا
كل سنة و انت طيب
عشاااان العيد
ركز
:)
شرفتني زيارك و بجد أسعدتني روحك خفيفة الظل
:)
تحياتي
-------------------------
زمردتي
وحشتيني ي ي ي ي ي ي ي ي ي ي ي ي ي ي ي
من هنا لمصر
روحي كده عند البلوكات ايها في سيدي جابر و انت تسمعي صوتي وهو واصل هناك بيقولك وحشتيني
أكيد عارفة ان ما بيحوشنيش عنك غير الصعب
ضغط الشغل خنيييييق اليومين دول
بس الغياب ساعات بيخلي في الرجوع احساس روعة
كل سنة و انت طيبة يا أجمل زمردة.. وأغلى صديقة في الدنيا
-------------------------
sedbad
الله يبارك فيك
اللهم تقبل .. بجد شكرا على دعواتك الغالية
و عقبالكم يا رب لما نفرح بيكم كلنا كلنا
كل سنة و انت طيب
--------------------------
soooo
لا مش معذور .. قال انا مالي قال
:)
التجارب الفاشلة اللي قدمك مش جو صالح أبدا لاستنتاج قواعد
هي آه الحياه اساسا مليانة تجارب فاشلة في الجواز
بس هو يستاهل نحلم بيه و نشوقله ونمارس فيه انسانيتنا و نحقق فيه كل الخير اللي يمكن متوحوش جوانا و مش ؤاضي يخرج
ربنا يكرمك يا سووو و نشوفك (عريس)
ههههههه
متخيلاك متغاظ من الكلمة
بس برضه حادعيلك
كل سنة و انت طيب
ربنا يجمعك بيهم على خير ومبروك لقريبك
عقبالك
وكل سنه وانتي طيبه
سلاااااااااااااااااااااام
كل سنة و انتى طيبة
يا عروسة النيل يا سمرة
و عروسة بحر اسكندرية
انا مش مصدق ان لسه فى انسانه بالقلب و البساطه دى
ارق تحياتى
كل سنه و انت طيبه
الشنكوتي الكبير
الله يبارك فيك
وعقبالك انت كمان اذا كنت لسة
:)
كل سنة و انت طيب و بألف خير
تحياتي
--------------------------------
الصديق المخلص
كل سنة و انت طيب و عيد سعييييد
:)
تحياتي
----------------------------
Blank-Socrate
شكرا على رأيك.. فعلا الحياه مش سايبانا نحافظ على بساطتنا.. تعرف ان بقت حاجة مجهدة جدا انك تمسك في اللي جواك عشان ما يهربش منك؟
كل سنة و انت طيب
أسعدني مرورك و أتمنى دوامه
:)
تحياتي
ويكون عددنا كتيييير
كبار و صغيرين كله بيتكلم في وقت واحد و في موضوع واحد
ويبدأ الموضوع يتفرع
كل اتنين مع بعض
و كل تلاتة مع بعض
و كله في نفس الوقت
فتلاقي الصوت عالي
و تلاقي شلة من الصغيرين شغلانتهم مراقبة الحوارات و القليس على الأخطاء العفوية لحد ما تركبهم هيسترية ضحك رهيبة
ولما الكبار ياخدوا بالهم انهم حايتحولوا لمقلسة فيهزّأوهم
وتعلى الأصوات .. وتعلى .. وتعلى
لحد ماتلاقي حد فينا طلع مرة وحده
بس يا برابرة
-----
انتى بتتكلمى عن عيلتنا اكيد
شكلك من بقية اهلى ياهند
لازم اضحك واعيط لازم
مفيش فايدة فيكي
بفرح قوي لما ألاقيكي سايبة تعليقك في مكان بعيد مستخبي
برجع اقرى البوست كله و بعدين اقرى تعليقك تاني و بعدين ارد
اجمل ذكريات بتاخدني هنا هي لمتنا ده زمان
دلوقتي في الاجازات بنحاول نعملها تاني
بس بحس اني بعيده قوي
من برة بس
ومن جواي قلبي بيقولهم عشان خاطري و النبي ماتصدقوا الجمود اللي انا فيه ولا تصدقوا ان سكوني وراه فراغ
بس أكيد بيكونوا حاسين
اديني كمان عيطت
بس فرحانة اننا بنتجول مع بعض جوة بعض
إرسال تعليق