تاج جديد

بما إن أشقى لمضة في اسكندرية - لماضة- بعتتلي التاج ده من بدري

قلت وليه أغلس و ما اجاوبشي عليه
وخصوصا و أنا واجعة قلب الناس كلها و زمانهم اتخنقوا مني

خليني أديهم شوية تفاؤل ولو انها مش جاية معاي اليومين دول تفاؤل بس حافتكر أهو

بحس بتفاؤل

لما أصحي من النوم على نسمة داخلة من شباك قوضتي في مصر و أسمع صوت القطر و الناس و العيال بدل صوت المكيف الخنييييق

بحس بتفاؤل

لما أفتكر صحابي وقرايبي فألاقي روحهم لسة قريبة مني وأعرف أحسهم كانهم كانوا معاي امبارح و كإني ما اتغربتش و لا حاجة و كإني ولا قسيت ولاقلبي اتخشب ولا حاجة

بحس بتفاؤل

لما ألاقي ناس مصريين في الغربة عاليين بعلمهم و علاقاتهم و كفائتهم مش بصوتهم و بلطجتهم وفهلوتهم فيرفعوا راسي و يفرحوني بمصر حبيبة قلبي

بحس بتفاؤل

لما ألف في المدونات فألاقي ناس كتير قوي بتحب مصر وهي همهم و شاغلهم .. وناس بتسعى على تغيير أحوالها و سلبيات ناسها.. وبحس ساعتها إني صغيرة قوي و مقصرة قوي.. بس بتفاءل برضه

بحس بتفاؤل

لما ألاقي قلبي بين ايدين ربنا هادي و متواصل معاه و مش زايغ ولا غفلان

بحس بتفاؤل
لما ماما تقولي أنا و أختي خلاص أنا زهقت.. أخرنا السنة دي و نرجع أنا و انتوا مصر

بحس بتفاؤل

لما تحصل حاجة أحس فيها إن ربنا لسة صابر عليّ ومش غاضب مني رغم كل أخطائي و ذنوبي

بحس بتفاؤل

لما بلاقي السحاب سايب بينه فتحة صغيرة ويفلت منها كام شعاع من الشمس مكسيين بلون أصفر ضعيف قوي فيقوموا راسمين على المية دايرة نور فتحسسك بإنها دايرة نور فلتت من وسط الغيوم زي طاقة تفاؤل في وسط البحر

بحس بتفاؤل

لما أفتح جوجل و أدور على صور لإسكندرية فألاقي صور جديده أول مرة أشوفها فأحس بهواها طالعلي من الصورة و داخل صدري دغري وألاقي شمسها ماليا عيني و حبها مالي وشي ابتسام

بحس بتفاؤل

لما أحط بوست و ألاقي بسرعة كل اللي بحبهم وبستناهم بالذات جم وماحدش منهم ما ردش.. و ردوا رد متفصل على قد اللي محتاجاه و اللي تاعبني فأفرح بالطبطبة الغالية

بحس بتفاؤل

لما أشرح و ألاقي الناس فاهمة قوي وماحدش مخه مقفل معاي و المحاضرة ماشية معاي تمام و فآخرها ييجي حد من الطلاب و يسلم علي بإمتنان قوي و يقولي (يعطيك العافية.. و الله ما قصرتي)

بحس بتفاؤل

لما أعرف حد جديد فألاقيه حبني رغم ترددي و سكوتي فأقول الحمد لله.. باين كده لسة فيّ حاجات كويسة من اللي بتخلي القلوب تتواصل

بحس بتفاؤل

يوم راس السنة مع بداية شهر يناير.. فأحس ان شهوري المفضلة.. فبراير و مارس و ابريل قرّبوا

بحس بتفاؤل

لما قطة جديدة ماعرفهاش-غير جارتنا القديمة - تيجي تقف قدام باب الشقة اللي بنسيبوه مفتوح عشان يهوي .. وتبصلنا قوي بانتباه شديد وحذر و جوع فأقعدلها ع الأرض و أكلمها و أمدلها ايدي فتوافق و تكسر خوفها و تدخل .. وتبقى بكده زودت جيرانا القطط واحدة

بحس بتفاؤل

لما ألاقي معني جديد في الحياه دق بابي كده فجأه فيعلمني جمال الكون و رحمة خالقة اللي حاضن عباده حضن أمين و رحيم قوي

وأنا انهارده حاسة بتفاؤل

أصله عيد ميلاد أحمد الله يرحمه 29/11 يارب يكون مرتاح وسعيد زي ما أنا انهارده سعيده بحبي ليه وقربي منه

ايه ده

ده أنا طلعت بحس بتفاؤل بحاجات كتير أهو

الحمد لله ..

التاج ده عاجبني جدا.. غيرلي مودي (مودي مين؟) وحسسني بتفاؤل و أجواء جميلة بتحوطني

يا رب دايما

وحاحدفه لشادي فايد اللي فرحنا برجوعه

ولمى وعصفورها لما نشوف التفاؤل عندهم سببه ايه

وروزا كما اعتادت أن تكون

وايثار صديقة الغربة

المراكبي بما انه متفائل دايما

وعادل وكراكيبه الجميلة

فان جوخ اللي غايب و غايظني

ومها الرومانسية جدا

وليمونادة المنعنشة و على تكملة(احساس غريب) مطنشة

ورودي أم قلب جميل

شكرا يا لماااضة على الفرحة اللي أنا فيها دلوقت

أديني خرجت من المود أهو بس ماتاخدوش على كده