عاوزة أقول لاسكندرية حاجة
حاجة واحدة بس
.
.
بصي بقى
لو أنا ما جتلكيش
و رضيت فغيرك أعيش
ونسيت ان لي فيك قوضة بشباك بشيش
وقلتلك هي كلها كام سنة
ماتخافيش
يبقى أنا كده ناوية تاخدني الغربة و ما ترجعنيش
ساعتها
إعرفي إني ما استاهلكيش
بصي بقى
لو أنا ما جتلكيش
و رضيت فغيرك أعيش
ونسيت ان لي فيك قوضة بشباك بشيش
وقلتلك هي كلها كام سنة
ماتخافيش
يبقى أنا كده ناوية تاخدني الغربة و ما ترجعنيش
ساعتها
إعرفي إني ما استاهلكيش
بس
*
*
--------------------------------------------
تحديث
بعد ما حطيت البوست و مع نفسي كده فكرت
فخفت لا البوست ده يجرح ناس كتير متغربة
فطبيعتنا لما الكلام يلمس جرح جوانا- لإن الغربة أكيد جرح- بنقوم واخدين الكلام وحاطين نفسنا قصاده
و كلمة "ماتستاهلنيش" جامده.. لما حطيت نفسي مكان حد متغرب و بيقراها لقيتها وجعتني
عشان كده حبيت أوضح اني ماأقصدش ان كل حد لقى حياته و ارتاحلها برة بلده يبقى بلده ما تستاهلهوش
أبدا
كل اللي قصدته ان اللي يحلم حلم غالي قوي
و ماهلكش نفسه عذاب لحد ما يوصله يبقى فعلا مايستاهلهوش
وأنا حلمي هو اسكندرية
وبشهّدكوا
لو استسهلت و استسلمت و ماعملتش كل اللي يستاهله حلمي
يبقى أنا ما استاهلهاش
و آسفة بجد لو كلامي وجع حد
هناك 33 تعليقًا:
إيه ده؟ أمال فين البوست بتاع زحل اللي قلتي عليه وفضلت مستنيه؟
:-D
إنتي تستاهلي إسكندرية وإسكندرية تستاهلك حتى لو الغربة طالت .. كل وقت وله أذان
يااااااااااااااااااااااااااااااااااااااااااااااااااااااااااااااااه حرام عليكي
احنا مش ناقصين غربه
اسكندرية حبيبتي هتفضلي احلي بلاد الدنيا يا اسكندرية
ربنا يكرمك وترجعي من غربتك قريب ان شاء الله
ربنا ييسر لك الحال ويخفف عنك اللي انتي فيه
:)
لا ان شاء الله هترجعى يا هنوده بالسلامه
وهتعزمينى على ايس كريم فى بحرى كمان
ولا ناويه تاكليه علينا
بصى يا هنووووده
انتى حتى لو مش كنتى قلتى ى المدونه انك اسكندرانيه
كنت قلت اان انك اسكندرانيه او على الاقل سواحليه
احساسك يا هنووده احساسك بجد له علاقه بالبحر اوى
ما ينعش مهما بعدتى ومهما طالت المسافات والازمنه انك تبعدى عن اسكندريه لانه مش انتى اللى عايشه بس هناك اسكندريه كمان عايشه جواكى وعايشه بين سطورك وجوا حروفك
ربنا يسعدك ويا رب ترجعى تانى لبيتك اللى بتحبيه اوى فى اقرب وقت
ربنا يكتب لك كل ما فيه الخير ليكى
:)
يا مراكبي
لا بوست زحل ده كان كلام عيال بس لزوم العند معك
هههههههه
تفتكر لو عملت عبيطو و قلت .أصل الظروف حكمت.. برضه تبقى تستاهلني؟
يارب ما اطلع عيلة ي نظر نفسي يا مراكبي عشان حازعل منها قوي
آلام و آمال
بد شكرا على دوتعك المهمة جدددا ده
يا رب أرجعلها تاني بسرعة من غير ما أندل معاها و مع حلمي
فينك بقالك زمان
:)
تحياتي
alexandrany
ايه كل ا لحب.. و الله ما أنا فاهمة اسكندرية عاملة فينا ايه
بس اللي عملاه حاجة جميلة قوي
مالية صدورنا بإحساس مميز
مابيروحش
شرفتني زيارتك و صداقتك
:)
لماضة
مين ده اللي ياكلة عليكي بس؟؟
:)
انشاء الله أرجعلها و أنسى بقى كل يوم عدى ف بعدها
ياااارب
يا بنت الحلال يا بخت الاسكندريه بيكي
تعالي هنا قوليلي
ازاي تتصالحي مع القمر من ورايا
وقعت بيضه
عشان كدا يهانم مختفيه ومش بشوفك
ايوه يا عم
الله يسهلك مع القمر
عارفه عارفه متزقيش
انا خارجه بكرامتي من غير ضرب اهه
بحبك يا هنوده
بحبك يا بنتي اوي
تحياتي يا عسل
كلنا سنعود يوما ما
سنتخذ القرار
وسنعود متحملين كل النتايج
وقادرين اننا نسحق الغربه تحت رجلينا
حنرجع اكييييييييييييييد
الإسكندرية
.....
كلمة قوية
لها سحر خاص
وجميلة كمارية
في القلب دوما
ولو بعدت الأميال
حقك أن تقولي لها ما قلت
لا يلومك أحد في ذلك
ولا يلوم أحد غريبا على ما قلت أنت
:)
تحياتي من ماناساس البلد
يا بخت اسكندرية بيك
عارفة كل ما اكون في مصر وقبل السفر بشوف كل الاماكن المرتبطة معي
الارض والجناين والشجرة الي كنت برسم تحتها زمان وكنت اتعمد ازرع جنبي نعناع
وملامح الشوارع من بعيد
وانا وجاي ورايح وفي كل وقت بيكون لها ملامح شكل اقول انا اكيد واحد معذب علشان اسيب كل دة وامشي
بس اكتشفت ان اي بقعه في الارض ممكن اخليها شاهد علي يوم القيامة
وكل ما تكون اماكن مختلفة كمان هيكون جميل حكي لي واحد قصة واقعية كان في رحلة غطس تحت البحر وكان لاهي والدنيا وخداة واتعرض تحت خالص لموقف ان فية حاجة حصلت في الخرطوم دة بتاع الاوكسجين
وكان علي وشك انة يموت وكل محاولاتة فشلت والعنترية بتاعتة الي فوق تلاشت
وفي اخر لحظة لقي الفرج حد انقذة وطلع
وبعد ما فاق وبعدها بكام يوم اخد عدة الغطس وراح نفس المكان متعمد وغطس تحت خالص وتقريبا في نفس المكان
سجد شكر لله ونوي انة لما يخرج هيكون انسان جديد
ارتبط بمكان تاني خالص مش موجود علي الارض الجنة لما ارتبط بالجنة ومني نفسة بيها نسي كل شئ
وبقت افعالة واقوالة بتمنية بيها
يارب يا هند يكون الجنة مكان لينا
حتي لو علي الدنيا اتنزعنا من احلي الاماكن المحببة الي قلوبنا
قولي امين
سمراء الأسكندرية المغتربة
ايه الكلام الأدبي الجميل ده
ايه العشق والغرام اللي يبكي ده
وليه الإحساس بالخوف من عدم الرجوع
عاوزك تقوليلها
راجعالك ياأم العيون عشقاني
راجعالك وأنا ليا مين غيرك تاني
راجعالك رغم اللي خدني وبعيد هناك وداني
راجعالك ومالناش غير بعض عاوزاكي وعوزاني
ساعه الغروب
أثرت في قوي كلمة **بيتك** نفسي في بيتي قوي يا رودي
عارفة؟
لما برجع البيت في كل أجازة ما بعرفش أحسه
كل شوية خروج و فسح و بيات عند قرايبي و بيات قرايبي عندي
بببقى حاتجنن عليه
ببقى نفسي يعدي يوم و اتنين و تلاتة من غير ما أخرج منه و لا يشاركني فيه حد
ولا يكون ورايا حاجة شغلاني
مستحيييل ده يحصل في الاجازة
ومستحييييل أحس اني رجعت البيت غير لما ده يحصل
يعني أنا مارجعتش بيتنا من أربع سنين
يااااه
من زمان قوي
شفتي كلمة في تعليقك فتحتني ازاي
:))
يارب يتقبل دعواتك يا رودي
بابا كمان كان دايما يقولي لازم السواحلية كلهم تلاقي جزء كبير جواهم مرتبط بالبحر و خط الأفق جوة البحر
فعلا .. أصل احنا لسة برضه جوانا من الفطرة حاجات
و الطبيعة بتشطل وجدان الناس بشكل هم مايحسهوش
gohayna
ازيك يا جيجي
واحشاني قوي يا بنتي
مين قال تخرجي بس .. ده أنا أما صدقت أمسك فيك هنا
شفتي عملناهاأنا و القمر من وراك.. عشان ماتبقيش انت بس اللي بتعملي حاجات من ورايا
;)
:(
مش قادرة اقول حاجه دلوقتى
مجربتش الغربة خالص الحمدلله
ومش عهارفة أتخيل هي عاملة ازاي ، لكن متاكدةانها بتوجع ، لأن انا وانا هنا مش قادرة أتخيل اني اقدر أعيش في أي مكان تاني
ربنا يكون في عونك يا هند وترجعي اسكندرية قريب وعلى طول
وانا عارف ومتأكد انك مش هتستسلمي
وهترجعي انتي وكل ولاد مصر لبلدكم مرفوعين الراس وسالمين وغانمين
ان شاء الله
سلاموووووووز
اية العشق و الحب دة كلة يا بخت اسكندرية انا كدة ححسد اسكندرية على حبك ليها بس بجد انتى انسانة رائعة فى كل شيئ احساس و مشاعر و كلام و كتابة كمان يا اصحابك و الناس القريبين منك بيكى اكيد بتحبيهم زى ما بتحبى اسكندرية و اكيد هما كمان بيحبوكى زى ما اسكندرية بتحبك اتمنى من الله انة يرجعك ليهم و لسكندرية فى اسرع و قت و ان الغربة ما تطولش اكتر من كدة قولى يارب
ممكن اسأل سؤال
ديمآ بحس فى كلامك انك على غير طبعتك يعنى الغربة مخلياكى تتعملى مع الناس مش بطبعتك ولما حترجعى لسكندرية و استقرارك فيها حترجى لشخصيتك و طبيعتك تانى مش عارف هل الأحساس و التحليل دة صح ولا غلط ؟ ممكن تقليلى
يمكن اكون لسة بحس باللى جوة الناس و بفسرة صح اصلى حاسس انى بدقت اخلص من اللى فاضل فية فعاوز اتأكد هل صح ولا غلط
يا عروسة بحر اسكندرية يا سمرة علشان تعرفى ان السمار مش حاجة وحشة الناس بيبعدوا عنها و ميتحبوش
السمار نصف الجمال يا هنودة
اكيد اسكندرية تستاهلك ومش هتلاقي حد ارق عشان تستاهلة
وكلامك مفيهوش حاجة تجرح الا لو كان حد العلاقة بينه وبين اسكندرية كانت زيك انتي
ومع ذلك اختار يسيبها
سلامي اليكي
تحياتى لكى
انتى عارفة اننا بره اسكندرية مش عايشين
واحنا ماشين بناخد اسكندرية معانا
وبنرجع بيها
يا بنتى هى جوانا ممزوجة فينا
فى تكوينا
ربنا يرجعنا كلنا بالسلامة
ا لبوست موجع
لكى منى تحية كبيرة
واه يا حبيبتى يا اسكندرية
اسكندراني اوي
لمست اصرارك الشديد في كلمة أكييييييد
بس عيبنا ان كل ما غربتنا بتطول بنلاقي الاصرار ده بيخفت
رغم ألم الغربة و شوقنا لبلدنا
يارب نكون قد كلامنا و نرجع أكيييييد
:)
تحياتي
----------------------
The Groom
بالفعل..الاسكندرية و غيرها
طالما حسيت انها بلدي و مكاني
لازم حاتفضل دايما في قلبي
مهما بعدت حاتناديك بقوة
أشكرك على تشجيعي بكلماتك
:)
تحياتي
-----------------------------
صدقت يا هند
الإسكندرية
لا يقيم بها إلا محظوظ
ولا يخرج منها إلا محروم
ولا ينكر قداستها إلا أعمى القلب
تحياتي لك في الغربة
السلام عليكم
شرفتيني اوي وهفهمك كل اللي انت عايزاه
وش بغمز غمزه جامده جدا
اخيييييييييييرا زورتي صفحتي وكمان كومنت لذيذ
ايه الرضا ده كله
شكلك خفتي اهرب من المدونه ومتلاقينيش
*********************
مهما بعدت واخدتك الغربه فبرضه مينفعش تتغربي عن اسكندريه
ده انت نايمه صاحيه بيها
ولما بتحلمي بتحلمي بيها
ومش شايفه غيرها
فلو غصبتك الظروف مش هنلومك
ولا تلومي نفسك
كله مقدر ومكتوب
ولية الاعتذار احنا بجد منستهلهاش
تظل الاماكن التى نحبها والاشخاص حيه بداخلنا مهما كان بعدنا عنه او عنهم
ستعودين يوما للمكان و ولكن دوما فلنحافظ عليهم احياء داخلنا
كراكيب عادل
ياااه يا عادل.. اخدتني لحتة تانية خالص.. و جميل جدا المعنى اللي بتتكلم عنه ده
جربته فترة ما كنت في مصر.. بصراحة اللي لفت نظري ليه طنط مامت رحاب صاحبتي
قالتلي ان كل أرض بتسجدي عليها بتشهد عليك يوم القيامة
و قالتلي حتى لما تدخلي جامع حاولي تصلي في أتر من بقعة فيه
و فعلا.. لفيت جوامع اسكندرية الأجازة ده... وحسيت اني برتبط بكل واحد فيهم.. واني بحوش رصيد
تصدق ان الحياه مليانا حولينا بمعاني رائعة قادرة انها تخلينا عايشين راضيين جدا و مستمتعين جدا
لكن للأسف قلوبنا بتتحبس جوة همومها لدرجة العمى
تحياتي
:)
حسن ارابيسك
:)
يتحسسني ان الكلمات عجينة فايدك.. بتشكلها بسهولة و مهارة غريبة
و كأن شرح المعاني وصوغها بموسيقة جميلة حاجة سهلة جدا و عادية جدا
وليتها كذلك
بجد بحييك على موهبتك الجميلة ده
ده أنا بلف على تعليقاتك فكل حتة و اتجنن من جمالها
و في الآخر تقول على كلامي
كلام أدبي جميل؟؟؟
وعجبي
:)
-------------------------
emz
طيب ليه بس؟؟.. ماتخافيش هي مش عدوة في قطر... أنا بس اللي خايفة أندل مع نفسي و أضعف و أبطل مقاوحة.. إوعي تجيلك العدوة.. أديني قلتلك أهو
:)
------------------------
متغيرة شوية
كنت زيك كده بالضبط يا سلمى.. رغم اني و أنا طفلة كنا في الكويت.. بس بعد ما رجعنا مصر و عشت فيها 12 سنة .. قررت أنسى اني عشت يوم واحد برة
وفضلت أقول زيك
عمري ما جربت الغربة ولا ناوية أجربها أبدا
عمريس ما تخيلت اني حابعد عنها شبر
بس ربنا كتبها و أنا رضيت باللي كتبه ربنا.. ولعله يقدرني أغير واقع و أرجع و أنسى أيامها وأقول تاني
أنا عمري ما جربت الغربة
واحشاني يا سلمى ى ى ى ى
:)
Soooo
يارب انشاء الله
حسستني بروح تحدي و اصرار
:)
يا رب أرجع بسرعة يا سووو
---------------------
الصديق المخلص
دايما تعليقك مليان أسئلة
الارتباط بالناس شيء رائع طبعا ماحدش يختلف عليه
لكن أنارارتباطي بالأماكن أقوي بكتر من ارتباطي بالناس
يعني للأسف لما سافر افتكرت ان أول حاجة حاتوجعني الناس اللي منى
لكن اللي وجعني أكتر بيتي ومكاني
ومع اني مش فاهمة ايه اللي حسسك اني مابتعاملش بطبيعتي لكن عموما أنا حاليا انسان ماعرفوش و لاأعرف ناوي على ايه
لما أرجع بلدي و بيتي و دنيتي ساعتها يمكن يحل عني و يسيبني أفهم أي حاجة
وبعدين ايه علاقة السمار بالبوست و مين اساسا قال اني عندي مشكلة مع السمار
حسستني انك بترد على حاجة تانية غير البوست اللي أنا كاتباه
تحياتي
أحمد سلامــه
أشكرك على كلمك اللي يفرح.. بس أنا بتوعد لنفسي لما لاحظتها بتطاطي كده شوية و تنسى ايه اللي واجعها
أشكرك بجد على زيارت
:)
تحياتي
-----------------------------
Esmat
أولا يا مرحب بيكي فأول زيارة لي
نورتيني
ثانيا.. نفسي اللي بتقولي -و أشهد انه حقيقي- يجبرني بالفعل على الرجوع مهما أخدتني الغربة
بشوف أمثلة كتيرة اتخذت من الغربة حياه لا مرحلة
وأنا بترعب لما ألاقيني بدأت أعهد هذه الحياه
فأنا لا أقبلها سوى مرحلة
تحياتي لك في الغربة
:)
--------------------------
Alexandrian far away
أصبت و لك كل الحق فيهاقلت
لمستني جدا كلمة محروم
بحسها لما فجأة وبدون مناسبة و في عز وقفي بين طلابي و في عز الشرح
ألاقي مشهد للشارع الصغير قدام مدرسة النصر للبنين في شارع أبوقير اللي بتهرب منه العربيات لما تطول الاشارة
ألاقيني بتخيله و بتخيل ظلال شجره
و الاقيني مش عارفة أهرب من دمعة
ساحتها بحس بجد اني محرومة
وأسال
ايه يستاهل عشان أتحمل احساس زي ده بالحرمان
الحمد لله
يارب.. رجعنا ليه سريعا
------------------------------
زُمُردتي
أنا بدخلهاكتير يا بنتي بس ماكنتش عارفة منين أحط الكومنت لحد ما عرفت أخيرا
:)
مستنية الميل بقالي سنتين يا هانم
فينو؟؟؟
أما اسكندرية لو غصبتني الظروف على بعدها مش ذنبي آه
لكن لو اتمحكت في الظروف و عملت منها حجة تعديني لوجعي اللي مش عارفة بنجذبله ليه رغم اني عاوز أهرب منه
ساعتها يبقى اللوم و كل اللوم علي أنا
صح؟؟
أخبار البرد و المطر ايه؟؟ احنا هنا لسة مصيفيين .. نفسي في سما رمادي و سحاب متكدس زي القطن و بينه خروم صغير يطل منها شعاع الشمس عشان يرسم دايرة صفرة على صفحة البحر الهايج المادي
نفسي في رشة موجه عالية باردة أشد بعدها الجاكت قوي و أتكلفت في دراعك و نضحك قوي
ونقول...و يا لهوي.. مال صوتنا عالي كده ليه؟؟
اتلمي يا بت شوية
:)
آآآآآآآآآآآآآآآآآآآآآآآه
------------------------
اسكندراني في الغربة
سبت جملة واحده بس.. قريتها و ضربت في قلبي ضربة جامده جدا..
أخشى عليك من المود اللي انت فيه حاليا فكلنا في الغربة نعرفه تماما..
لا تستاهلنا يا اسكندراني.. و الشاهد على كده مكانها اللي مش سايب ولا حتة فاضية جوانا
تستاهلنااااااااااا
-----------------------
west
أصبت جدا في قولك
**ولكن دوما فلنحافظ عليهم احياء داخلنا**
فالغربة لا تترك شيئا حي إلا ما قاومت أنت لتحييه
تحياتي لك
:)
يا حبيبتي يا هنودة
عارفة بحب اصرارك وتصميمك على الامور
ربنا ما يحرمك من الصبر ويقويكي كمان وكمان
خلي ايمانك بربنا كبير
وان شاء الله تنولي كل الي عايزاه
هنوده الإنسانه
أنا معك في إن إللي ما يتعبش عشان يوصل للي هو عاوزه يبقا ما يستاهلوش
بس عارفه برضه
إنك تستاهليها وهي تستاهلك
تحياتي
إرسال تعليق