بما إني غايبة بقالي فترة
و بما إني يا دوب بلحق ساعة واحده كل كام يوم أزوركم فيها و أطل على ناسي اللي بيخلّوني حاسة زي ما منير بيقول
سارح في غربة بس مش مغترب
و بما إن غيبتي طالت على تعليقاتكم و مدوناتكم
فأنا بعتذر
الشغل لسة ضاغط علي كتير
و شكلي مش عارفة آخد وقتي اللي متعودة عليه دايما
عشان كده قلت أسيب البوست ده أصالحكم بيه
و أعتذر لو كنت دايقت حد
وكمان لأن نبع المشاعر جاف بقاله فترة
الكلام كل مايطلع يطلع واخد لون مش بتاعي
عشان كده إستنوني لحد ما ضغط الشغل يخف
ودماغي ترجعلي تاني
و من هنا لحد ما يحصل حاخدلي جولة كل ما أعرف أخطفلي وقت في حضنكوا
على فكرة انهاردة 18 ابريل.. ده يوم بحبه جدا
ولما إكتشفت دلوقت التاريخ فرحت جدا جدا
زمان البحر في إسكندرية الشهر ده صافي و لونه مخضرّ
وزمان اللي قاعدين على البلوكات شايفين الكابوريا الصغيرة و هي طالعة من بين الصخور بتقطع من الطحالب و تاكل
الوقت ده بالذات بتبقى الكائنات البحرية كتير عند الشاطئ و الصخور و صفاء المية يخليك قادر تشوف القاع و إنت بعيد
أما حبات الرمل وسط المية بتبقى عاملة زي حبات ذهب بتبرق من الشمس
إجمل أيام إسكندرية هي بداية الصيف و آخر الصيف
لو حد فيكوا في اسكندرية دلوقت و النبي يسلملي عليها
و يقولها بحبها في شهر إبريل
وكإن حبها في إبريل أكبر من أي شهر تاني
بس أما بييجي الشهر التاني
ألاقيني بحبها أكتر
*****
تحياتي لأغلى قلوب عرفتها
تحياتي لصفحات واحشاني و اصدقاء حِرماني من وقتي معاهم مجنني
بس إنتوا دايما معاي
دايما دايما
تحياتي
هناك 19 تعليقًا:
هنودتي
العنوان فكرني باغنيةدياب قصاد عيني
وبينا معاد لو احنا بعاد اكيد راجع ولو حتى ما بينا بلاد
والله البوست ده حسسنى بالغربه فعلا
بس ارجع واقولك على راي عم عمرو بقية الاغنيه
ومن تاني اكيد راجعين
ان شاء الله
ربنا يعيينك وفي أنتظار جديدك
يا هنودة
ربنا يقصر الأيام و يقرب البعيد و ترجعى للحضن الكبير الدافى
و اتمنى أقابلك هناك لما اروح اسكندرية و تكونى رجعتى من السفر و كمان أشوف لماضة الطعامة و كل حبابيبى فى اسكندرية الجميلة اللى كل بناتها قمرات
و فى انتظار البوست الجديد بعد ما المووود يتظبط
تحياتى يا حبيبتى
ربنا معاكي ويوفقك للخير
في انتظار مشاركاتك
البوست كله كووووم
والكلمتين اللي قولتيهم في بحر اسكندريه كووووم تاني
دول يشفعولك ولا كأن في اي حاجه حصلت
مش ممكن بجد ايه الكلام الجميل الرقيق ده
احييكي بشششششششششششششششششده
وفي انتظار جديدك
كلنا مقدرين .. ماحدش بياكلها بالساهل
هههههه
ابريل الان بيفكرني ان الاجازة قربت
يعني مود الانتظار
الغربة بتغير كل حاجة حتي طعم الشهور
عجبني العنوان
تحياتي
انا هحجز وارجع جرررررررري
وحشتينا وبتوحشينا
هنوود
يا سلام على الكلام لما يبقى طالع من القلب من جوه ، بياخد تأشيرة للقلب برده فورااً.
:)
والله على المصرى اللى بجد،
لما ياخد حبايبه وناسه وذكرايته معاه و جواه منين مايروح،
عمره مايتوه ... ولا يتقلع من جذوره.
بيحس بحنين جارف ايوه،
وده بيوجع ساعات كتيير
بس هو ده اللى بيشده تانى للرجوع .
وبيحافظ على أصالته.
ربنا معاكى
وترجعى بالسلامه
تحياتى
وحشتييييييييييييييييني
كل ذره رمل اسكندرانيه
بتسلم عليكي
كل رشة موجه بتبوس خديك
كل يوم شمسه بتناديك
وفكل مغربيه بشوف عينيك
بتعاكسني على كل بلوك
واسرح ويا ضحكاتك
اجفف دموع ريحالك
واصاحب القمر في انتظارك
يصبرني على غيابك
ومهما غبت مستنياك
جميل بوستك كله احساس مدفيني اوي
وحشتييييني
فاكره لما سمعنا منير وهشام كل واحد بسماعه ومكناش سامعين بعض
الموقف افتكرته وانا بتمشى ع البحر
وضكحت وحسيتك كمان زيي
هنوده الإنسانه
دايما بين المحبين معاد
ربنا معاك
وإن شاء الله ينتهى الضغط
وتلاقي وقت لكل الحاجات
إللي نفسك تعمليها
تحياتي يا قمر
ازيك هنود
اخبارك اية
فى انتظار رجوعك بكل قوة
تحياتى
هنوده الجميله
:)
كل 18 ابريل و انتي طيبه يا قمر
ودايما فاكره و مبسوطه
مرسي على الحاله الجميله الي عيشتينا فيها مع يوم 18 في اسكندريه
مرسي قوي قوي قوي
و مرسي عشان حاجات تانيه كتيــــــــــــــــــــــر
:) :)
و ترجعي لينا بألف سلامه يا قمر
و السنه الجايه ان شاء الله تكوني هنا في اسكندريه بترسملنا الصوره دي برده
:)
و كل كابزريايا و نسمة بحر و رمله دهبيه و انتي طيبه و بخير و سعاده
:) :)
هنودة الجميلة
كل سنة وانتى طيبة
وزى ما قالت لماضة لانك فكرتينا فعلا بأغنية عمر دياب
ان شاء الله اكيد راجعين
ودوام الحال من المحال
ترجعى بالسلامة يا قمرة احنا مستنينك
تحياتى
وأنا أقول ياربى انا جيت هنا وعلقت قبل كدة طب فين التعليق
أتارينى يومها عم بلوجر مرضاش ينزل التعليق وكان مهنج
بس انا شلت التعليق اهه:
هنودة الأسكندرانية الجميلة اللى بتدوبلى قلبى بكلماتها
أولا وقبل كل شىء البوست اللى فات كان جامد اوى اوى مقدرتش احوش دمعه لاقتها واقفة واستأذنت النزول
من اسكندرية بقولك انها مستنياكى وهسلملك عليها كتير
بس على فكرة الجو اتغير اوى وبقى غريب الصيف بادى عندنا جامد بالحر أولا يعنى
هههههههه
يمكن دة عشان انتى مش فبها
فى انتظارك يا قمرة
تحياتى معطرة بهوا ويود البحر
كل سنة وانتى طيب يا هانودا
ومتنسيش تاكلى الفسيخ والرنجة بقة
تحياتى يا قمراية
لماضة
وحشتيني يابنتي ووحشتي المدونة
أنا فعلا قصدت الأغنية ده
كل سنة و انت طيبة يا جميل و أجازة شم نسيم سعيدة
:)
ماتغبيش علي تاني .. آه ده بجاحة مني عشان أنا أم التأخير أساسا.. بس هو النظام كده
:))
بجد واحشاني
---------------------------
محمد مفيد
أشكرك على دعاءك و مرورك علي الدائم
بجد شكرا ليك
-------------------------
فاتيما
انشاء الله أرجع ونعمل تجمع جميل .. ياااه نفسي في اليوم ده
الحمد لله المود اتظبط بس الشغ سة خانق لحد ما
واحشاني موت و بالذات بسبب غيابك انتي كمان
----------------------
صاحب المضيفة
شكرا على الدعاء الغالي أديني أهو حانزل بوست شم النسيم
ك سنة و حضرتك طيب
:)
-------------------------
اسكندراني أوي
:)
ايه رأيك في الكلمتين.. أكيد خلوك نفسك تاخد غطس في المية
صح؟
شكرا على كلامك اللي يفرح
تحياتي:)
وكل سنة و انت طيب
------------------------
يا مراكبي
آه صحيح ... قطيعة
هههههه
ربنا يقوينا كلنا ويقرب الأجازة و يعدي الشهور كده بسرعة
قول آمييين
يلاّ سمّعني
:)
----------------------
اسكندراني في الغربة
آآه ومين سمعك.. البلد خلاص اتزحمت و ك الناس في الاسواق و التنزيلات اشتغلت و كل اللي يشوفني يقوللي "ها.. نازلة إمتى".. و أنا أقول لسة بدري ي ي :(
إنت مع دول
:)
ولاّ دول
:(
شكك كده مع الناس التانيين
زمردتي
ايه بس الكلام الجميل ده.. أناعارفةكويس جدا انه مش كلام و عارفه كويس جدا جدا انه محوش وراه معاني أكبر من جماله و رقته
تعرفي؟؟
رغم صعوبة الغربة إلا إ،س ساعات بكون ممتنة إني أنا اللي برة اسكندرية و انت اللي فيها مش العكس
لإن العكس أصعب.. هي أنانية اني ممتنة اني بدوق الاسهل
بس أعمل ايه.. الانانية من ضرائب الغربة
بس أنا عارفة قلبك الرحب
واحشاني
--------------------------
loumi
ياااه لو تعرفي قد ايه واحشاني
إنهاردة عندي ساعة فاضية من 3.5 حد 4.5 و أجمل حاجة انت توقيتنا بقى زي بعض... حاجة أخد نفس من مدونتك و أوريكي قد ايه واحشاني
استنيني لحد الساعة 3.5
:)
-----------------------
tamer nabil
بقانا زمااان ما اتواصناش و ده كان تقصير مني بعتذر عنه ني فعلا بحب مدونتك
تحياتي ليك
-------------------------
rosa حبيبتي
و انت طيبة يا روزا و انتكمان بخير و مبسوطة و فرحانة و بتعملي كل اللي نفسك فيه
حاكون في اسكندرية قبل سنة انشاء الله.. مش عارفة لسةامتى
ميرسي ليكي نت على التواصل الطيب الرقيق اللي بينا يا روزا
:)
تحياتي يكي
-------------------------
سهر الليالي
كل سنة و انت كمان طيبة و يارب الاعياد تعدي عليكم بخير و فرح و تجديد
بشكرك من قلبي على كلامك اللي بيفرحني جدا
تحياتي
:)
--------------------------
سهر الليالي تاني
:)
آسفة على دمعتك ولو اني مؤمنة دايما ان القوب ما تحس ببعضها فده حاجة كبيرة قوي بتحسسنا بنشوة جميلة حتى لو الاحساس جر وراه دموع برضه بتبقى دموع عزيزة
لكن برده آسفة عليها
و أحلى حاجة هي السلام اللي بفرح قوي أما حد يوصلهولي
:)
ماتقلقيش يومين الحر حايروحوا لحالهم و تلاقي يوم جمعةكده جه ومسح موجه الحر ملا الدنيا بهجة وروح و حاتقولي هند قالت
:)
تحياتي يكي من القلب
---------------------------
نبض اسكندرية
بنت بلدي الغالية
كل سنة و انت كمان طيبة و بخير يا سوسو
ماما و بابا انهاردة حايتغدوا فسيخ عشان أنا حافضل في الشغل و مش راجعة وقت الغدا
لولا كده كنت غلست عليهم و خليتهم يعملوا غداء تاني
:)
ماليش في الفسيخ و الرنجة
:(
بس بحب حب الناس ليهم و تجمعهم حويهم في شم النسيم و ده اللي زمانه بيحصل انهاردة
:)
كل سنة و انت طيبو ومصر كلها طيبة
إرسال تعليق