حبيت بس افكرني و افكركم معاي
يوم السبت أول ذو الحجة انشاء الله
و بما ان ربنا بيدّينا أيام يقربنا فيها منه خلال السنة و يزيد فيها الثواب
فانا نفسي نستغلها ونتهز الفرصة لقطع المسافات اللي ممكن نكون بعدناها من بعد ما خلص رمضان
مع اني دايماً بتهم نفسي بالنفاق لما بفكر كده
بس انا محتاجة اني اقرب قوي من ربنا و احس انه راضي عني
الاحساس ده بيريحني و يخليني قادرة اتجاهل أي حاجة واجعاني و قلقاني من جوة
التقرب من ربنا المفروض مايكونش بدافع غير رضاه و حبه و الخوف منه
بس بابا زمان قاللي لما كنت بشتكيله من نفسي عشان ما بهتمش بالصلاه غير أيام الامتحانات
ساعتها بابا قالي ليه بتعتبري نفسك كده منافقة
ربنا بيحب اللي بيفتكره و يلجأه في الشدة
لإن ده معناه حب ودليل على احساسك القوي بيه
المهم ما نكونش ناوين نبعد بعدها
***
صيام أول عشرة أيام من ذو الحجة عبادة بحبها جدا و نفسي اعملها كاملة و حاكون فرحانة و إحنا بنعملها مع بعض
كنت قريت قبل كده ان فيه خلط في فهم الليالي العشر اللي اقسم بيهم ربنا في القرآن ان كانوا العشر ليالي لذوالحجة ولاّ أول عشر من محرم
ومن ساعتها وانا بتلخبط في المعلومة جدّا
المهم اني سعيده باقترابهم و اتمنى لي و ليكم تقرب وصيام مقبولين
يارب يغفرلنا و يقربنا و يتقبل منّا و يوصلنا بيه
****
كنا في مصر العيلة كلها بتفطر أول يوم من و الحجة في بيت حد فينا
كنت بفرح بينا قوي وبحس اننا كلنا مشتركين في عبادة و ثواب غاليين
كنت بحب تجمع خالاتي و عماتي و عمي و خالي و أولادهم على سفرة واحدة أو اتنين كبار قوي
بحب الدوشة و الضحك والقرب
يمكن عيلتنا مابقيتش قوي كده دلوقت
و يمكن بقت فاضية كتير من كتر اللي سافروا
بس انا متأكده اننا يوم ماحنتجمع كلنا في اسكندرية و تصدف ان الكل ينزل اجازات في نفس التوقيت
حانتجمع تاني
و حايكون احساسنا و التحامنا و عشمنا زي ماهو
ناس تبص لوشوشهم تحس انك باصص في مراية أجمل بكتير من مراية بيتنا اللي بشوف فيها نفسي
****
كل سنة و كلنا طيبين
ومن ربنا قريبين
وعلى أحزانا و همومنا قادرين
و بكل نعم ربنا في الكون حاسين
يارب يجعلنا كلنا مخلصين النية له وحده من غير ولا شائبة نفاق
يارب يطهر نفوسنا و يبعدنا عن التناقد و التلاعب على النفس
بحبكم جدا كلكم كلكم
يامــــا نفسي تحبّينــــي
وتبطلي يا شيــخة تهاجمينــــي
وكل ما اقرب ترفضينــي
ماتيجي تجربي مرة تصاحبيني
و تقربي منـي و تقبليني
وابص في الصورة إيّاهها يوم
فألاقيكــــي و ألاقينــــي
كلام ليّ
هناك 6 تعليقات:
هيييييييييييي
انا هناااااااا
الاولــــــــــــــى
كطل عام وانت بخير يا عسل
ايوه نصوم وندعي
لينا ولحبايبنا
ياااااااااااااااارب
حجات كتيييييييييير جوايا تتحقق
بحبك ووحشتيييييييييييني
جزاك الله خيرا كثيييييييييييييرا
وجعله في ميزان حسناتك
وحشتيييييييييييييييييييييييييني
ربنا يكرمك ويعزك يارب
شكرا للتذكرة الطيبة دي ويبارك فيكي ويحفظك
كل التحية
كل سنه وانتى طيبه ياقمر
انا لسه امبارح والله بسال هوا اول ذو الحجه امتى
متنسينيش بقى من صالح دعائك
كل سنة وانتى بكل خير وصحة ونحاح وأمل وقرب من ربنا ومن نفسك
عجبنى أوى الكلام اللى فى الآخر
ربنا يحقق لك كل أحلامك
تحياتى وربنا يتقبل ويبارك يارب ... هتدعيلى طبعاً
كل سنه و انت طيب يا جميل وان شاء الله تكون ايام جميله نتزود فيها بطاعة ربنا
وا ن شاء الله السنه الي جايه يكون الحج بقي
تحياتي
إرسال تعليق