يــوم مختلف

قعدنا انهاردة بعبد الرحمن ابن صاحبتي في حديقة الاطفال

وقفت بيه عند المراجيح و الزحليقات.. كنت واقفة آخد بالي منه بس و قلت اسيب أمه ترتاح شوية من حمله و تاخد و تدي مع ماما في حكاياتهم

شوية شوية اندمجت معاه

لعب و تنطيط و ضحك بصوت عالي و جري ووقوع ع الارض

لفتنا نظر أطفال تانيين .. فبدأوا ينضموا لينا

أخ و اخت سوريين وواد سوداني صغنون و كام بنت قطريين

لعب وزعيق على حاجات غلط و زعل و عياط و مصالحة و حيل مني عشان ابعد بعضهم عن اصرارهم على العنف

اتعلقت بحمود سوري مش عارفة ولا لبناني

وشفت نظرات محبة جواهم و استغراب

بقت حولي حلقة كبيرة من أطفال جمال.. اللي جمعهم استغرابهم ازاي دي كبيرة و بتلعب مش بس واقفة بتراقب وتدي التعليمات

فضول جميل شفته في عنيهم و استمتاع أجمل شفته فعبد الرحمن اللي نادر مابيلاقي صحبة

ياااااااااه جريت كتير

ودراعاتي اتكسروا من شيل عبد الرحمن و اطفال تانيين

عندي صداع من التخبيط في الارض و شد عبودي لدماغي

راجعة متدغدغة

بس مبسووووووطة قوي ومرتاحة

وعندي حنين لذكريات كتير

وعندي حنين لكل طفل صغير عشت معاه زمان اوقات من أجمل ما يمكن

حنين لولاء ايام ماكانت صغيرة

وداليا بنت خالتي

وطبعا حسن حبيب قلبي

وعندي حنين قوي لأحمد.. مش عارفة ليه بس حتى الحنين ده فرحانة بيه

كان نفسي اقوله شفت ازاي الاطفال بيحبوني

شفت ازاي طلعت عندي القدرة على جذبهم لي و الاستمتاع معاي

مشتاقة قوي لنظرة اعجابه بحاجة بعملها .. كان بيبقى فيها مسحة حنية و فرحة

بيخلوني اتمنى لو أكون أحسن حد في الدنيا عشان بس افضل اشوف النظرة دي فعنيه

سبحان الله اللي سخر أم عبد الرحمن لينا و سخرنا ليها في الغربة دي

كانت حاتبقى صعبة قوي الحياه هنا من غيرهم هي و ابنها.. واكيد بالنسبة ليها برضه

مين كان يتصور ان في غربة ماحدش فيها فاضي لانه يشيل هم حد

تقوم تجيله فرصه انه يلازم حد زي عبودي من لحظة ميلاده لحد عمر السنتين

ربنا يحميه لأمه و يبارك فيه

ويارب يزرع محبتنا فقلبه أكتر و أكتر

محبة تخليه يوم ما يكبر في بلده تونس يقعد يوم مع حبيبته و يحكيلها

"كان فيه زمان بنيّة اسمها هند.. كنت متعلق بيها بارشا و بحبها بارشا

ياترى وينها الحين و كيفاش عايشة و ياترى ليها وِلد و قديش عمره

وترى متذكراني ولا تراها نسيتني" .. و ساعتها قلبه يجاوبه و يهديه للحقيقة

يارب يحصل ده

تسوى ايه مناصب الدنيا و متاعها قصاد احساس بحب يعيش عمر بحاله بين قلوب تبعد عن بعضها بلاد و سنين

يااارب ماتحرم حد ابدا من نعمة الاحساس

ويارب نكسب الماتش بكرة

:)