كرهت و قوفك قصادي بتتفرج عليّ من بعيد
كرهت كل نظراتك ليّ
كرهت وحدتي اللي قدام عنيك
كرهت حبي ليك و كرهت كل ذكرياتي معاك
كرهت كل ده و مش قادرة اقولك امشي
اياك تيجي يوم و تمشي
بتعذب انا ولا مستمتعة؟
بموت كل يوم انا ولا عايشة معاك ايامي
مش عارفة
مش عارفة غير اني لو صحيت يوم مالقيتك هناك واقف قصادي زي كل يوم بتجنن
بتطفي
بكبر سنين واعجّز
بنفر من الناس و بيخافوا مني
بستغرب الدنيا من غيرك
لونها و ريحتها غير اللي عرفته عمري كله
رغم انك ماكنت معاي عمري كله
انا بقيت بقيس الدنيا بتاريخ رحيلك
بقيم الاحداث على حسب ان حصلت فوجودك ولا بعدك
ساعات بسال نفسي انا كان شكلي ازاي فايامي معاك
شكلها ايه الدنيا ايام ما كنت موجود فيها
سؤال بحس ناحيته بفضول مش عادي
حاجة غريبة
حاسة اني نسيت
نسيت انت مين
و تفاصيل الدنيا و الكون اللي كنت اعرفهم و انت فيهم
حاسة ان اللي عايشينها دي دنيا تانية اللي انت مش فيها دي
ساعات ببقى عاوزة اسال الناس .. فاكرين الدنيا التانية اللي رحلت معاه
فاكرين كان لونها ايه و شكلها
فاكرين خطوات ايامها كان ايقاعها ايه
فاكرين ريحتها و جوها
نفسي حد يحكيلي عنها
بس مابسألش
مش عاوزة اسمع اجابة باردة مالهاش روح.. اجابة بتقول ان هي هي الدنيا ما اتغيرتش
لأ مش هي
ولا هي دي انا
كله اتغير فجأة وبقى غريب
حاجة كده شبه حلم و صحيت منه ومش قادرة انساه
حلم خرجت انت منه و زرعت نفسك قدام عيوني
ومش عارفة اقنع نفسي انك ماكنتش حلم انما حقيقة
انا شفتك بجد فيوم؟
كلمتك و كلمتني؟.. حسيتك بيك بجد .. سمعتك و لمستك؟
أنا؟.. ياااااااااه صعب قوي عقلي يستوعب الحقايق دي
بيكدبها بشكل بيوجعلي عقلي
وارجع و اقولك
ماعرش وجودك بيعذبني ولا بيسعدني
بس واجعني
انت اللي واجعني بقى ولا نفسي اللي معانداني
ماعرفش
كرهت وجعك لكن عمري ماكرهتك
ومابشتكيش انا
وعمري ما اشتكي منك
انت و بس
انت وبس اللي ممكن احبه بالصفاء ده
انت و بس اللي ممكن اقبل وجعي عشانه
انت وبعد كده اي حاجة عادي ترحل او تفضل
.
.
,
محتجااااااااااااالك
هناك 3 تعليقات:
موجود
ياااااااااااااااه
على الفضفضة لما تبقى طالعة من القلب كده وتقول كل اللي نفسها فيه من غير اي حواجز او شروط او خوف او صح او غلط
النفس كل ما بتقعد تفضفض تفضفض كأنها بتنزل بحيرة صافية الميه فيها دوا للهموم فتغسل كتير قوي من هموم النفس وتحسي بعدها ان النفس هديت وارتاحت شوية
الكلام كان باين فيه الوجع وازاي مايبانش والكلام أصلاً موجوع لدرجة اني اتلخبط واحترت هو مين فيكم اللي موجوع
لكن ماشغلنيش الموضوع قد ما كنت مبسوط انك هديتي شويه من جبل الهموم اللي شايلاه على راسك وجواكي
ربنا يهدي بالك زي ماكانت ستي بتقول
تحياتي ياهنوده
حسنأرابيسك
ان شاء الله قصاقيص الحلم هتتجمع وتبقى نسيج حقيقي واللي انتي محتاجاله ده هتلاقيه معاكي ان شاء الله
:-)
ابقي بس وريله انتي كنتي بتكتبي عنه ايه هنا
:-)
إرسال تعليق