مش فاكرة قوي كنت عاوزة اتكلم عن ايه
بس اللي اعرفه ان جواي كتير قوي.. وغامض جدا بالنسبة لي
حاسة اني في مرحلة انتقاليةمن ايه لايه مش عارفة
لسة مش عارفة اركز
من افضل لأسوأ ولا للعكس
من ابعد لاقرب ولا العكس
لاستقرار ولا لتشتت .. مش عارفة
اعرف عن مواليد برج الميزان انهم مابيقبلوش غير يا ابيض أو اسود
وانا فعلا عندي التمسك الشديد بالموضوع ده
بتعب لما تكون فيه حاجة فحياتي بين البينين
مابحبش ابقى وواقفة على العتبة
يا جوة يا برة
واديني دلوقتي على العتبة
و من جواي لأول مرة أحس ان أأمن مكان هو العتبة دي
مش عارفة ايه اللي غيرني
الغربة؟؟.. ولا السن
لما بنكون صغيرين بنكون اوضح و أجرأ ساعات؟؟
لما بنكون في بلدنا كمان بنبقى أوضح و أجرأ؟
مش بتكلم عن السياسة ولا المواقف الاجتماعية
بتكلم عن الاحساس الداخلي.. وعن مشاعرنا
انا بلف و أدور حولين حاجة مش عاوزة اتكلم عنها
عشان خايفة
خايفة تكون مش حقيقة ووهم .. وكلامي عنها يوجعني بعدين
أصلي مابحبش نفسي لما اصدق اوهام
بدأت أحس اني متمسكة بحاجات مالهاش قيمة و مش مهمة
وكتير بقف لنفسي و اسألها .. انت متمسكة بيها ليه؟
ايه المبرر.. ايه السبب الحقيقي ورا اصرارك ده؟
انت على حق ولا باطل
صريحة مع نفسك ولا مجرد انك عاوزة تتمسكي وخلاص
انا بقيت بين البنين في كل حاجة بشكل مستفز
خلاني بقيت مش عارفة ايه اللي ليه معنى و ايه اللي مالوش
ايه غالي و ايه رخيص
ايه اللي مني و ايه الغريب
فيه جواي إحساس مسيطر علي بقاله فترة طويلة قوي
بدعي ياااااارب يكون غلط
الاحساس هو اني مش منتمية لأي حاجة في الدنيا
حاجة تخض قوي
لما تيجي تفكر في بلدك .. تحس انك مش منتمي ليها
تيجي تفكر في اصحابك.. تحس انك مش منتمي ليهم
أهلك..
أخواتك..
شغلك..
وحاجة تانية مش عاوزة اقول هي ايه
وتحس انك واقف على عتبة كل دول
لا برة ولا جوة
نفسي يطلع احساسي ده مجرد حالة مؤقتة نتيجة لاي حاجة في الدنيا و تخلص و ماترجعش تاني
هناك تعليقان (2):
ربنا يرسيك على بر
اذيك ياهنودة
وحشاني واللهي الحقيقة انتي من اوائل الناس اللي بعزهم وبحبهم ولذلك بعد فترة انقطاع طويلة وعندما عدت كنتي من أوائل من تذكرتهم وخصتهم بالتعليق لان ذلك يسعدني هنا
ثم بشأن تدوينتك دائماً فترات الانتقال تحدث بعض التوترات وعدم الاستقرار وبهتان الرؤية وده شيئ طبيعي لان الانتقال من طولا لأخر ليس سهلاً عموما ادعو لكي براحة البال وبكل التوفيق
تحياتي
إرسال تعليق