بعد سنين كتير شفت فيها استغراب ماما و بابا وولاء اختي مني و من علاقتي بمصر اللي حاولوا يداروا رايهم فيها بانها رومانسية و غير واقعة و حالمة اكتر من اللازم
بعد سنين استشعرت خلالها بانهم اقتنعوا اني مسيطر عليّ مشاعر غير طبيعية أدت لانعزالي عن محيط الغربة اللي حاولوا كتير يقنعوني انها المفروض خلاص ما تبقاش غربة بحكم استقرارنا فيها و مرور السنين علينا فيها
حالة من الاستغراب المستمرة دامت بيني و بينهم مع ظهور ومضات تفهم كل فين و فين و تتلاشى بسرعة سواء من تجاهي او من تجاههم
انا مستغربة اندماجهم معاها و تصديقهم لأوهام بالتأقلم
وهم مستغربين ارتباطي المبالغ فيه ووتصديقي لوهم الحياه الافضل في مصر
بعد كل السنين دي ارهقتني في النهاية
وخلتني ابطل كلام و ابطل احلام
وخلتني اقرب من التأقلم و التعايش اللي عندي قناعة سببتلي مايشبه الفوبيا .. ان التأقلم معناه انتهاء مصر من حياتي و يمكن هي قناعة خاطئة عشان كده شبهتها بالفوبيا أو يمكن هي فعلا وصلت للفوبيا
المهم ان بعد سنين عدة من الوضع ده.. توصل ولاء لمرحلة الجامعة
و تنزل مصر
وتستقر هناك في بيتنا اللي بحلم بيه ليالي كتير
وترجعلنا في اجازات متكررة
3 اجازات
الاولي جتلنا هنا بدموع الفرحة ان أخييييرا مشت من مصر و رجعت لبيتها و لسريرهاوذكرياتها و مكانها الطبيعي ॥ وودعتنا بعد انتهاءها بدموع الم و حزن لرجوعها تااااني لمصر و لبعدها تاااني عن حياتها اللي بتحبها.. وفضلت اراقب بصمت.. لاني اتعلمت الصمت.. وخفت للفوبيا هي اللي تتحكم في مشاعري و بالتالي كلامي
الثانية.. رجعت باحضان ودموع الفرحة تشبه بالضبط اللفرحةالاولى..لكن الاحساس ده كان في المطار و بس
تاه لما رجعنا البيت॥و سيطر عليها تشتت و توتر.. و سمعتها منها كتير.. "انا مش عارفة عاوزة ايه" .. و فهمت منها على استحياء.. انها رغم انها سعيدة قوي بسفرها لينا و لقطر.. الا انها حاسة انها عاوزة ترجع عشان تستقر.. و بسرعة فسرتلي.. يمكن عشان استقريت هناك مع البيت و الحاجات اللي فيه.. وفضلت اراقب التغيرات بصمت برضه.. وخوف مرة اخرى من تلك الفوبيا اللي جواي امل دائم انها ماتكونش فوبيا انما حقيقة
الثالثة.. بكت في مطار اسكندرية و انا معاها ع التليفون وكمان مرة في مطار الدوحة عند استقبالنا ليها و لما سالتها ليه البكا قالتلي مش عارفة .. و الله ماعارفة.. و سكت
وأديني من يومها وانا بسمع عن حكاياتها العفوية و اللي زال عنها التحفظ بتاع الاجازة اللي فاتت
تحفظ كنت فاهمة انها بتداري بيه تحول مشاعرها عننا و عن نفسها لانها مش ماكانتش عاوزة تصدقه.. كنت فاهمة ده و حاساه بس مارضيتش اصدقه لتطلع حجج بتخلقهالي "الفوبيا" وتقنعني بيها
حكاياتها كلها عن مصر و احداثها ومتعة الحياه فيها.. اللي هي غير هنا
عن اليبت وكم المشاعر الجميييلةاللي جواه.. اللي هي غيرالبيت ده
عن الناس اللي فيهم حاجة غيييير خالص الناس هنا
عن حاجة مش مفهومة في مصر بتخلي الحياه ليها معنى مختلف تماااااما॥ عن هنا
فرحت انا .. وفرحتي خلتني اتخلى شوية عن صمتي و بقيت احكي معاها و استشد بيها و تحكي و انا أحكي معاها .. و أسألها.. صح؟
فألمح فعنيها انها افتكرت استغرابها لي زمان ॥ فأحس بومضة تراجع فاسكت و اسيبها تتكلم.. ويفتر الكلام و يخلص
دلوقتي حالا .. الي حرك جوايا لكلام و خلاني اكتب بوست في مدونة ما انشأتهاش غير عشان افرغ فيها هموم الغربة.. وما بعدتش عنها غير لماحسيت بيأس من تحقق حلمي بالرجوع
اللي حركني هو مشهد أهو قدام عيني لولاء
فاتحة الفيس و بتقلب في صور اسكندرية
وببتفرج عليها صورة صورة
صور صحابها
باندماج تام
فكرني بي
لما كنت لسة بفتح صور اسكندرية و اتفرج عليها
صورة صورة
كنت بقول كلمة لسة سامعاها منها حالا
بنفس الشوق
هو انا كنت هنا فيوم من الايام؟
تفتكروا ده معناه انها ماكنتش "فوبيا" ولا وهم
تفتكروا انا ماكنتش غلط ولا حاجة
تفتكروا لو رجعت دلوقتي وصدقت اني ماكنتش غلط ده ممكن يزيل الجمود و التبلد اللي سيطرواعلي في السنين الاخيرة دي؟؟؟؟؟؟؟؟؟؟؟
هناك 4 تعليقات:
اما عني فانا نبت الغربة
تعليمي ودراستي كانت في غربتي
عامي الجامعي الاول في وطني كان لا يطاق
استشعرت غربة في وطني وغربة في غربتهم حيث ازورهم كل شتاء
الان وبعد ستة اعوام
اصبح الوضع مختلفا
احببت وطني كثيرا
وتماما كما قالت
فيه حاجة غريبة وطعم غريب
ما اعتقده الان
اننا نعيش في غربة من صنع انفسنا فينا
غربة نفسية ليس لها علاقة بغرتنا عن اوطاننا
تبقينا في استقرار وامان من طوفان الحنين والشوق
تجعل عملنا اكبر وطاقتنا اضخم
غربة حواجز وتبلد وجمود
اذا تحررنا منها
جاز لنا ان نتوطن اوطاننا
بقلوب اهلينا واحبتنا
التدوينة القادمة في مدونتي "غربة"
ربما تثريكي 5/3
كأنك بتتكلمي بمشاعر كل واحد عاش واتغرب عن بلده
اتولدت واتربيت واتعلمت فالغربه يا هنوده
ونزلت مصر علي الجامعه
وقضيت فيها احلي ايام عمري
ورجعت تاني الكويت
بعد التخرج وكنت فاهمه ان وجودي في مصر فتره الدراسه مؤقت
وان مكاني زي ما اتعودت هيكون هنا فالكويت
كل ما حد كان يشوفي في مصر مكنش بيقول عني مصريه
وكنت ببقي مبسوطه علي فكره
ولما رجع بيا الزمن هنا تاني
مبقتش عارفه ازا كان هو دا الي عايزاه ولا لا
منساش اول مره انزل المطار بعد 10 سنين في مصر
مكنتش طايقه الهوا الي في الكويت
رافضه يدخل صدري واتنفسه
شويه شويه اتعودت ابقي زي المكن والاله
الحياه فالغربه بتسحب منك كل جميل كنتي بتبني علي مر السنين
وتكتشفي في الاخر ان روحك راحت معاه
حاليا انا مبقتش فارقه معايا وجودي في اي مكان
لان وجودي اصلا بقالوش معني بعد ما والدي اتوفي وسابني لوحدي
صدقني لو قولتلك مبقتش فارقه الكويت من مصر
واكتشفت اننا من جوانا بالناس الي بنحبهم احنا الي بنعمل الفرق دا
يعني وجود اهلي معايا كاملين في اي مكان صدقيني ممكن يغنيني عن اني اروح اي مكان
انا بكتب من وجهه نظري يا هنوده متزعليش مني
بس المشكله مبقتش في المكان الي عايشه فيه
بقت في الناس الي حواليكي والوقت الي بتقضيه
ورغبتك انك تعيشي سعيده ولا روحك راحت ودبلت مع دقات سعات الغربه الرتيبه الممله
انا خلصت تعليقي بس عايزه اقولك انك بجد وحشاني
ومنستش اي حد اتعرفت عليه في المدونات
بالعكس يمكن الذكريات دي هي الي مخلياني عايشه لحد دلوقتي
دا ايميلي يا هنوده negem7@hotmail.com
او بالاحري دا ايميل والدي الله يرحمه لاني ايميلي قفلته من زمان
ياريت اكلمك عليه وتضيفيني عندك
وبجد مره تانيه فعلا وحشاني وواحشني الكلام معاكي اوي
دمتي بالف مليون خير يا عزيزتي
اخنك جيهان
سالوني لما تكرهين نظام مبارك رددت لانه السبب في غربتي صمتوا كلهم كانوا جميعا كويتين حولي ونظروا لي نظره لشخص ناكر الجميل وقلت لفينا العالم كله وسبناها لوحدها في ايديهم الملاعين الي خربوها وروحنا وحياتنا فيها احنا هنا اغراب مهما عيشنا بنحبها لانها حته مننا ومحدش يقدر يزايد على حبها في قلبنا ولا ينافسه استغربوا فهم يجدون حب المصريين لمصر غريب وغير منطقي حسب قولهم بلاد فقيرة وظروفها صعبه ليه بتحبوها قوي كده ميعرفوش ان ريحه هواها عليل صوت شوارعها جميل طعم الميه فيها سلسبيل يا حبيبتي يا مصر نفسي ارجع لها تاني انا كمان وحشاني ونفسي احضن شوارعها وابوسها واقولها حيتي تاني يامصر حيتي تاني السرطان الفاسد في عروقك ولادك بيشيلوه حتقومي تاني يا مصر يا حبيبتي حتخفي وتتعافي وحنكون كلنا حواليك يا امي يا حبيبتي يا مصر
لما تحبي تكتبي في الموضوع ده ابقي خلي البوست مخفي أو انشريه واعمليله باس وورد عشان أنا بالذات ما أقراهوش
أنا بكتبلك التعليق ده قبل ساعات من رحلتي الدولية رقم 174 ومش عايز أي حاجة تفكرني بعنوان البوست ده .. خليني كده مش واخد بالي أحسن
إرسال تعليق