انا ما بعرفش اتكلم عن نفسي بصراحة مطلقة الا نادرا
وده من زمان
وبسبب حاجات كتير
منها اني
من الناس اللي تلاقيهم مع صحابهم بشكل و شخصية غير مع كل الناس التانية
بدرجة تفاجأك و كانك بتشوف الانسان ده
لاول مرة
ومنها اني من الناس اللي لو صحابهم شافوهم مع
الناس التانية حايحسوا انهم بيشوفوني فتوب تاني
ومنها اني من الناس اللي بتقيد نفسها بحاجات
كتير بشكل تلقائي و من غير تعمد
حاجات زي الاصول و المراعاة والمجاملة و
القلق من المبالغة وبكلمة مستفزة قوي اللي هي "مش وقته"
و منها اني لو لقيت نفسي حاتكلم قدام مع اللي
مش حايفهمني بقفل و ما بتكلمش
وكل ده غلط
غلط ماكانش تاعبني و انا وسط صحابي
بس فجأة في الغربة بقى مشكلة كبيرة قوي بتكسر
أجزار كبيرة من كياني .. و بدأت تخرج من جواي عشان تكسر فحياتي نفسها
**ده موضوع**
و الموضوع التاني هو اني قدامي قرار
الدنيا كلها بتقولي لازم تاخديه
والدنيا دي عبارة عن ناس بتحبني و عارفاني
كويس وبتتمناللي السعادة باخلاص مالوش حد
وانا مش لاقية اي سبب يخليني آخد القرار ده
غير كلامهم
و غير كده مافيش
ليه بقى ما عرفش
يمكن عشان جي في وقت انا مش موجودة فيه
يمكن عشان فعلا مافهوش حاجة تخليني امسك فيه
يمكن عشان فتحلي بيبان الم كتير كنت قفلاها
شفت كل الـ "يمكن" دول
دول اي كلام فأي كلام
"الصراحة" ... انا مش لاقية نفسي فيه
وانا الهاجس الاكبر جواي هو اني الاقي نفسي
و واضح اني حافضل عاجزة تماما اني آخد اي
قرار في الدنيا لحد ما الاقيها
وعقلي وقلبي بيقولي اني مش حالاقيها غير فصر
مش عشان مصر
انما عشاني انا
انا لسة هناك
انا متأكدة مليووون في المية اني لسة هناك
مهما قلتولي بيتهيألك.. مهما قلتولي لو نزلتي
مش حاتستحملي.. و حتلاقي كل الدنيا اللي تعرفيها اتغيرت و بقت غريبة عنك ومش
حاتلاقي صحابك زي ما كانوا
كلام مقنع جدا و قادرة افهمه
بس مش واصلني
بسمعه و افكر فيه و اعيده ميييت مرة على نفسي
و في الآخر بلاقي نوووور قوي بيغطي على اي
حاجة تانية فعقلي و يقولي "انت لسة هناك"
عاوزة انزل مصر.. يمكن لما انزل و اعد فيها
اكتشف اللي يريحني .. و يخليني آخد القرارات المتجمده فحياتي و مش عارفة اقربلها
يمكن افهم ان انا فعلا مش هناك.. وافهم انها
ماتت .. و ساعتها استعد لاني اولد جواي غيرها و اعيش
او الاقيها فعلا لسة هناك .. لسة عايشة
ومستنياني ارجع اعيش بيها.. و اعيش
والله انا كنت فاكرة اني حاقدر آخد قراري
بسهولة.. و الم حاجاتي كلها وأخرج.. و اتنقل لحياة تانية أحسن واسعد.. كنت فاكرة
اني حاقد ارمي ورا ظهري سنين وحدة وغربة وسكوت و استسلام عادي كده بسهولة و اودعهم
بس المشكلة اني مالقتش في القرار ده نفسي
دورت وعجزت
وماعنديش اي شجاعة اني أجازف باني أدخل في
غربة أكبر من اللي عشت فيها سنين
قلبي بيقولي غربة عاشرتها أحسن من غربة
مجهولة
انا محتاجة وطن
وطول ما القرار مرتبط بحد مش قادر يكون وطني
مش حاخده
مش عِند
بس عجز
والحمد لله ان لسة لاقية هنا صاحب اتكلم
قدامه بصراحة
حتى لو كانت هبل و غير مقنعة
هناك 3 تعليقات:
رمضان كريم
وكل عا وانتي بخير
اولاً الفضفضة مريحة جداً والبوح حالة صحية ايجابية
ثانياً
الموضوع ده شاغلك من زمان جداً ولا زال عالق بكي عارفة ليه لأنكي ما زالتي بعيدة عن أرض الوطن
كل حواسك وعاطفتك مع ذكرياتك ( بحلوها ومرها ) في وطنك بينما الجسد يحيا هناك على ارض غريبة في بلاد بعيدة
والحقيقة هذا التمزق وتلك الحيرة طبيعية جداً لا تنتهي الا باستقرارك في موطنك
وبلا شك يجب ان تتيقني ان هذا سيحدث اجلاً أم عاجلاً ولو أنني أفضل ان يكون عاجلاً من وجهة نظري اي يكون في سن مبكر على أن يكون أجلاً بعد مضي قطار العمر
العزيزة هنودة
كل من ينأى بنفسه بعيدا عن الوطن يحمل كلا منهما للأخر مخزونا انسانيا وعاطفياً بكل افراحه واحزانه وهذا طبيعي
وطبيعي جداً ان الحياة على مكان مختلف في وطنك او غيره شيئ طبيعي الحياة تصنع لكي اصدقاء جدد وعشرة جديدة
فلم الخوف من العودة وبداية حياة جديدة مع تكوين علاقات جديدة مع اصدقاء جدد وجيران جدد واحياء العلاقات القديمة على مستوى العلاقات العائلية او الأصدقاء القدامى
هنودة
لو كل انسان يتملكه كل هذا الخوف في اتخاذ قراراته بلا شك لن يتحرك خطوة واحدة
اقول لكي توكل على الله وصلي صلاة استخارة طالما في عودتك ستستقرين نسبياً مادياً لكن أوكد لكي دائما الاحساس بأنك على ارض الوطن وانتي بداخله احساس جميل وعميق أنا جربته من قبل كثيراً
توكلي على الله
تحياتي
حسن أرابيسك
استاذي و صديقي العزيز جدا
اولا .. و حضراك طيب و بألف خير دايما
وثانيا.. انا رغم اني عارفة ان مدونتي هوّت خلاااص بسبب تقصيري الا اني دايما بدخل و ادور على التعليقات اللي دايما بلاقيكانت و المراكبي و كفاية طيبة مداومين عليها..
وبسسسسسعد جدا باحساسي ان اصدقاء زمان لسة فاهميني و عندهم القدرة على لمس المعني اللي بقى بيغلبني جدا كل ما بحاول اجبره على الاستسلام لكلماتي
القرار المرة دي مش متعلق بالعودة او الاستمرار في الغربة. القرار متعلق بخطوة اهم في الحياة ولو اني فقدت التمييز بين ايه هو المهم و ايه الاهم.. يارب يساعدني
بس الاهم من البوست و كل ما فيه اني لازم اشكرك بعمق على كلماتك اللي ما بتمرش علي ابدا بدون تأثير ايجابي.. ومهما شكرت متأكدة ان امتناني حايوصلك ناقص من واقعه كتييير
:)
تحياتي
هنوده
ربنا يوفقك
المهم ان الانسان كل ما كان مستقر نفسياً بيستقر ذهنياً وبيتحسن صحياً وعندما يجتمع له ما سبق وذكرته تصبح الرؤية واضحة له تماماً لإتخاذ القرار السليم
ربنا يوفقك وان شاء الله نسمع عنك دايما كده سمع خير على رأي ستي الله يرحمها
وان شاء الله ربنا يوفقك لما فيه الخير ويكون كل شيئ عند حسن ظنك وخليها على الله
تحياتي
حسن ارابيسك
إرسال تعليق