الكتابة هنا خلتني اقلع عن الكتابة في اجندة واحطها في درج مكتبي كده احسن كتير لاسباب منها اني سبت غرفتي .. ومبقاش لي مكتب و بالتالي ولا درج و ده كان عاملي قلق قلق من ان اللي بكتبه يتقرا بس اتعلمت هنا اكتب اللي ينفع يتقرا وبس و من ساعتها مابقتش بعرف اكتب اللي ماينفعش حد يقراه .. أنا بقيت بنسى كتير قوي في الاجازة كلهم علقوا على ده أخرج و انسى موبايلي في البيت.. و اعد في كافيه و انسى شنطتي فيها و امشي وانزل اشتري من البقال حاجتين ارجع بواحدة و انسى التانية واقولك جملة و ماتسمعهاش .. فتسألني "قلتي ايه" اقولك نسيت.. وانسى الاسماء و المكالمات و اللي مخططاله اول اليوم انسى معظمه لما اوصل لنص اليوم وطول الاجازة بسألهم .. هو انا ليه بقيت كده.. وهو ده طبيعي يعني ولا ايه ونضحك .. بس انا فكرت دلوقتي انا اصلي قررت ماعرفش امتى اني ما اركزش.. و اتعامل مع كل الحاجات طياري قررت مامسكش حاجة في دماغي أحسن تتعبني قرار يناسب حياة الغربة و روتينها تقريبا القرار ده كان يخص موضوع معين او اتنين او تلاتة وفجأة نسيت انه قرار "خاص" بجوانب معينة فحياتي .. فتحول لنمط "عام" اتبعته من غير ما احس .... حاجة غريبة انا بقيت بروح مصر من غير اي تفكير وارجع هنا افهم ايه الي كان بيحصل هناك .. أهي اجازة و عدت و أديني حاستنى الأجازة الجاية
خلاص حرمت .. ماعدتش أحب تاني .. أحب إزاي من بعد ما فهمت أنا حرمت ايه .. هو إنت زعلت؟ طب وإيه يعني ما بقتش أخاف على زعلك ما أنا إتعلمت و العلام مش بالساهل .. ماتقولش إنك عليّ هنت والله الدنيا مامستحملة عتاب ولوم أديك شايف الشهر بيعدي فكام يوم وإن كان نهار ولا ليل بيجي برضه النوم .. كلنا نايمين وأدينا ماشيين بص حوليك و إنت ماشي وشوف حاتلاقي كل العيون بالدمع ماليانين وماشيين عادي وحدك ولا معاك ناس تانيين ماتخافش مش حاتقف ومتخافش على السنين الخوف مش حايثبتها.. عادي إنها تهرب معانا زي ما إحنا هربانين .. ما تعاتبنيش.. أنا ماليش دعوة أنا حرمت أقرب من كل اللي حبيته هو إنت مين
مش أنا ربيت عصفور سكنته قفص شياكة و حطيتله جواه نور عملتله فيه مراجيح وملتهوله ورق شجر وزهور ونوعتله أكله مابين حبوب و بذور حبيته قوي و حميته وعملته صاحبي وشلته في عني و بقى هو شغلانتي كنت أحكيله كل ما أتعبى هموم وأدمع قدامه عادي لحد ما ياخده النوم أبصله كده و أقول ... الحمد لله كان زمانك نايم قلقان لاتهبشك حداية و ياكلك فار جعان مين قدك انت عايش ولا ملك الزمان تاكل و تلعب وتتمرجح وتنام في أمان ويادوب عدت شهور ولقيته فأرض القفص من غير أنفاس بقى كده العصافير عمرها قصير مش زي باقي الناس؟؟ قلبي وجعني و احترت اعمل فيه ايه ولقيت تحته جواب قلت ابص عليه لقيته كاتبلي: كتبتلك و انا عارف انه حاييجي اليوم اللي حاتقتلني فيه الوحدة و أرقد ولا أقوم بلاش توجعك كلمة وحدة وترمي علي اللوم بقى بذمتك صدقتي نفسك اني فهمتك يوم؟ ولا انت عمرك عرفتي لزقزقتي معنى مفهوم نهايته.. بأمنك امانة تكرميني و تدفنيني في الغابة
من فترة مش عارفة قد ايه ظهر فجأة صديق عرفته من التدوين غالي عليّ جدددا .. أقلع عن التدوين باين فاتقطعت صلتي بيه
الصديق ده ياما وجعنا بعض ببوستات و تعليقات عن الغربة
يوم ما ظهر فجاة و مسكت فيه على الماسنجر اللي ما بعتبوش غير كل سنة مرة كان بيحكي كعادته عن أي حاجة
عادته انه يطلق حكاياته ولا عارف بيحكيها ليه ولا عارف حايوقفها امتى ولا في دماغه بيحكيها لمين
وكعادتي دايما بستمتع بكل حاجة بيحكيها لان لكل كلمة بيقولها لها معنى
قالي الاجازة اللي فاتت حصل موقف غريب قوي
كنت راكب العربية و ماشي في الشارع و شفت بالصدفة واحد صاحبي غالي عندي قوي و اتقطعت أخباره من زمااان قوي و مابقتش عارفله لارقم بيت و لا موبايل من زمان جدا.. وكان المفروض انزل من العربية و اروح اسلم عليه و ناخد تليفونات بعض
بس كملت طريقي و مانزلتش و انا متأكد اني حاندم جدا لما ارجع من الاجازة على التصرف ده
فهمته قوي و عرفت كويس قوي هو حس بايه لما شاف صاحبه و حس بايه لما صاحبه عدي و خلص الموقف و حس بايه لما رجع للغربة و افتكر ان صاحبه كان قدام عينه وسابه يمشي
ساعات انا كمان بسيب الاجازة كلها تمشي بعد ما كنت بموت عليها طول السنة
وبرجع وأقول مش عاوزة اجازات تاني
واما أتعب.. اتمنى اجازة جديدة واقول مش حاتكون زي اللي قبلها .. وافرح قوي قبل ما انزل مصر .. واما انزل بسيبها تعدي
واسيب كل المهم هناك يعدي
وارجع
وتقريبا وصلت لمرحلة اني بتمنى الاجازة و انا عارفة كويس انها حاتعدي و السنة اللي ورا السنة دي حاتعدي
ومستعدة العمر كله يعدي.. عشان ايه في الآخر .. ماعرفش؟؟
حلو اللبس الغالي و الاكسسوارات والبرفانات.. حلو التحرك بسيارة.. حلو الأكل برة البيت في أماكن شيك.. حلو ان يكون معاك أحدث موديلات في أجهزة الكمبيوتر و الموبايل و الام بي تري وغيرهم.. حلو انك تقدر تتفسحوتروح مكان ماتحب
كل ده جميل
بس ماينفعش غير هنا.. ماينفعش في مصر.. ولا اللي اقل منه كمان بشوية.. لازم اقل بكتييييير
وانا مايهمنيش يبقى عندي كل ده
ولا عمري اتمنيته ولا سعيت وراه
انا اتمنيت اعيش في استقرار و بس
بيت .. وناس .. واستقرار مستمر
ليه ما عندكيش طموح؟؟.. مين اللي قال ماعنديش طموح
انا عندي
طموحي مصر.. وبيت .. وناس .. واستقرار
طموحي زوج .. وابن وامومة
طموحي اصحى الصبح أفكر في الناس اللي مسئولين مني و مسئولة منهم
والاقيني شاغلني بيت لاممنا
طموحي حياه اجتماعية طبيعية... فيها عمق.. عشم ... روح
في مصر... بيئتي الطبيعية
يتحقق طموحي في مستوى متوسط ماشي.. عالي ماشي.. تحت المتوسط ماشي
لحد دلوقتي عندي قدرة استغنى عن اللبس الغالي و السيارة المريحة والاكل برة البيت و كل اكسسوارات الحياه.. اللي مالهاش معنى من غير اساسيات الحياه .. على الاقل بالنسبة لي
لحد دلوقتي لسة قادرة
لكن قربت اتعود .. قربت اتحبس جواهم زي ما اتحبس ناس كتير بتسمع منهم جملة مشهورة قوي
بحب مصر بس مستحيل اقدر ارجع اعيش فيه لمدة اكتر من الاجازة
ناس عندهم حق جدددا يقولوا الكلمة دي و ماينفعش حد بكل سهولة يجي ينتقدهم
بس الحمد لله اني لسة مابقتش منهم
لسة مابقتش واحدة من أفراد الغربة
لسة عايشة في الغربة غريبة
مش مسموح لحد يقولي ده مش طموح و ده مش حلم
لأ طموح و لأ حلم
حد يحلم يرجع لورا؟
مين اللي قال ان ده ورا؟
حاتستحملي ما تاكليش لانشون و لاتعرفي طريق العيش الفينو وتيجي عليكي شتواية و اتنين و انت مش قادرة تشتري طقم واحد جديد؟
يمكن أقدر و يمكن لأ
ولو ما قدرتيش
حاتعب
ولما حاتتعبي
حاستحمل برضه و ارضى
عشان ايه ده كله
عشان مصر؟؟
لأ عشاني
عشان الاستقرار.. عشان الناس.. عشان اكون موجودة و بحس و مش جامدة.. عشان مابقاش و حيدة وغريبة.. عشان مافضلش رايحة جاية
عشان مابقاش بحب مصر و عايشة فغيرها
وبحب اهلي و عايشة بين غيرهم
وابقى طيبة و بتصرف على اني قاسية
وابقى كلي إحساس من جوة و ملمسي زي الحجر
وشكلي مبهر قوي من برة وجواي متكسر
ومعاي موبايل مش لاقية اكلم بيه حد
ومعاي كاميرا بصور بيها ضحكتي فمصر و ارجع اتفرج ع الصور و ابكي
ولابسة لبس مابسمعش بعده اني زي القمر انهاردة
وبكسب فلوس بصرفها على كل ده و هومالوش معنى عندي
واديها لحظة و حاتعدي و اصحى الصبح اغوص في دوامة شغل أخرج منها بعد شهرين الاقيني بعدهم في مصر سايبة كل حاحة تعدي لحدما ارجع
فأبدأ اهاتي هنا.. عاوزة ارجع مصر..
ليه؟..
عشان..
وده طموح ده .. دي منطق ده؟.. دي دماغ دي؟.. ده عقل ده.. حد في الدنيا بيفكر كده؟
أقوم أختفي
ويختفي معاي عقلي و طموحي .. واغمض عني و عقلي و قلبي و اشتغل
لحد ما تيجي لحظة زي دي تفرحني بنفسي و تديني شوية امل اني يمكن الامل ما ضاعش لسة
وكان فيه مرة كلب
سرق حتة لحمة
جم صحاب اللحمة ضربوه و موتوه
جم صحاب الكلب.. دفنوا الكلب و كتبوا على تربته .. كان فيه مرة كلب
