أنا ولا بحاول أفكر في حل.. ولا بسوّدها في عنينا
أنا بس لسة متفرجة على شوية أخبار عن همي الكبير (مصر) اللي فجأه لقيته محتل 80% من التجويف اللي جواي و اللي مش عارفة له اسم و التجويف ده موضوع تاني مش وقته
المهم دلوقت مش أنا.. همّي ولاّ مش همّي .. ه
المهم دلوقت مصر
إيه اللي حاصل فيها ده!!! .. أنا مش عارفة أنا اللي الصورة متضخمة في عيني ولاّ هي متضخمة فعلاً
أنا بعد مارجعت متكسرة من الشغل قلت أفتح القنوات المصرية عشان آخد جرعة قرب من مصر... حاموت ع اللهجة المصري و حاموت على الروح اللي مايعرفهاش غير اللي يبعد عنها (( وده مش إحتكار للإحساس))
فتخبطت في برنامج ((هالة سرحان)) ولأول مرة مايكونش الموضوع فارغ و مليان إستفزاز
بس كان مليان ألم.. الموضوع كان عن بنات الليل في مصر... لقيت نفسي بعيط عليهم كإنهم حد من إخواتي.. و عيطت من حسرتي على بلدي... أنا مبقاليش كتير بعيد عن مصر .. همّ كلهم سنتين متقطعين.. بس بجد حاسة إن التغير بيجري على 200 كيلو في الساعة
بعد البرنامج لقيت نفسي قدام برناج كلام و السلام ومش عارفة مقدمه إسمه ايه.. المهم إنه قرى أخبار تحزن بطريقة ساخرة
عارفين الإسلوب اللي يخليك تموت من الضحك و بعدها بثانية تتفلق من العياط؟؟
إتكلم عن السفاح و عن رغيف العيش و معدل الفقر و الديون اللي بتزيد علينا و......... حسيت إني عاوزة أصرخ
وجه الفاصل فضحكت على خفة دم ماشوفتهاش على شعب أول ما سمعت (صبرتوا و مولتو)
فقمت هربانة من قدام التلفزيون و من همي الكبير و قلت أنا حالعب جيم ع الكمبيوتر
بس لقيت نفسي بشتكيلكم من همي وولا لعبت جيم ولا حاجة
يا رب يكرمنا بنص عبد الناصر.. طب ربعه... طب عشره.. طب يكرمنا بس بأي طريقة
ما كدبش منير
قلب الوطن مجروح لايحتمل أكتر
نهرب و فين حانروح لما الهموم تكتر
آه يا حبيبة الروح.. قلب الوطن مجروح
لو قلبي ضميه...إديه حنان وداديه
ده الصمت مش لينا
فين الولد مايروح .. لازم يعود أسمر
لو ينطق الموال .. لازم يروق الحال
محتاجة ليّ دراع...وشراع وراحة بال
محتاج ليك نجوم هايمة فحضن هلال
لو بحري نام اسقيه..صحيه و بوسي عنيه
ياما بكرة يسقينا
قلب الوطن مجروح لايحتمل أكتر
نهرب و فين حانروح لما الهموم تكتر
آه يا حبيبة الروح.. قلب الوطن مجروح
لو قلبي ضميه...إديه حنان وداديه
ده الصمت مش لينا
فين الولد مايروح .. لازم يعود أسمر
لو ينطق الموال .. لازم يروق الحال
محتاجة ليّ دراع...وشراع وراحة بال
محتاج ليك نجوم هايمة فحضن هلال
لو بحري نام اسقيه..صحيه و بوسي عنيه
ياما بكرة يسقينا
هناك 4 تعليقات:
يسعدنا تشريفك
www.blogs4arab.com
وبالمناسبة
هتلاقى فى قسم تطوير المدونات
الحل الأمثل لكتابة موضوع
بدون ما يكون السطور لازقة فى بعض والكلام مش واضح
أحمدي ربنا انك عايشة بعيد عن القرف اللي شايفينة في مصر الايام دي من كلة
كل حاجة بقت تقرف بجد
الشوارع العربيات البيوت الشغل الناس الاكل المياة و الاسعار و التعليم والاهم الاخلاق في كل شيء
اخلاق الناس اللي بتتعاملي معاهم في الشارع وانتي بتشتري
وانتي ماشية وانتي سايقة
اخلاق الناس اللي بتطلع في التليفزيون تغني ولا ترقص
اخلاق الناس اللي بتغني وترقص في الافراح
اخلاق الناس اللي بتتعاملي معاها في الشغل
والألعن أخلاق الناس اللي بتحكم
الناس اللي بتحدد الاكل اللي يجيلك و يتزرعلك
والمياة اللي بتشربيها
اخلاق الناس اللي بتحدد مستقبلك في شغلك و بتحدد تعليمك
حتى الناس اللي بتحدد مخالفات عربيتك لما تروحي تجديي الرخصة
بكرة ترجعي و بعد تلات او اربع ايام لما تروح زهوة العودة لبلدك حاتشوفي وتحسي باللي باقولك علية وتلعني الساعه السودة اللي رجعتي فيها و يمكن تعلنى ابو الساعه السودة اللي اتولدتي فيها مصرية
بس المصيبة اننا بنحبها لسة برغم البلاوي اللي عايشين فيها
ربنا يتوب علينا بقى من القرف و يصلح حالها يارب
الحصان الأسود
أنا بحلف دايما إني عمري ماحرتاح فغيرها مهما وصل بيها الحال
بس مين يقدر يعرف مشاعره و تأثير الظروف فيه؟؟
عشان كده إدعيلي انها تفضل أجمل و أقرب الأماكن مهما ساءت فيها الأوضاع
وربنا يهونها علينا و يقدرنا اننا نعمل أي تغيير ولو بولادنا اللي حانجيبهم ان شاء الله
وشكرا على زيارتك
على فكرة الإحساس بالرفض أول مؤشر للتغيير
إرسال تعليق