بعد الشر

انا قلبي مش حزين

وماهواش مسكين

أديه قاعد هنا جنبي بقاله سنين

يغزل حلم و تتفك خيوطه و تطير

طيب ما تطير

انا قلبي ماهواش بير

تتجمع أحزانه فيه وتفيض

انا قلبي حديد

كل ما بيخسر حلم يحلم حلم جديد

بيضحك و يزقطط و مهما حصل سعيد

انا قلبي ماهواش مكسور

ولا عمر حد طفاله نور

تيجي الناس عليه و تروح عادي

ولا عمره بعد فراق غالي قعدلي مقهور

انا قلبي ماهواش عبيط

يجري على الحب بفرح و تنطيط

وتحييه كلمتين وتجرّيه عليّ يقولي حبيت

لا عمره حايحب حد ولا حايقرب للحياه

ولاعمري عاوزة أكلمه ولا أبص جواه

ولا حاتلكم عنه تاني ولا معبراه

بعد ما بهدلني خليه بقى لوحده مع بكاه