عارف تشابه الارواح؟
ده حاجة تانية غير تشابه الملامح
ده حاجة اقوى بكتير و تخلي الواحد يتاخد قوي و يقول سبحان الله في خلقه و ملكه اللي بيحركه كما يشاء
لما تقف قدام شخص شبه شخص تاني
في طبعه
انفعالات وشه
حركات جسمه
تعبيراته في الكلام
درجات صوته في بعض الانفعالات
مش بس ده
لما تركز أكتر تلاقي التشابه في اهتماماته
في انتماءاته
في احساسه بيّ.. في تعامله معاي
طيب ده ايه علاقة الاول بالتاني
ولا اي شيء
انا لقيت حد شبهك قوي
قوي
وتعبت قوي
و لما جريت عليه
وجرحت نفسي بايدي
واتمنيتك لو انت معاي دلوقتي
و تغنيني عن العالم كله اللي بجد بقى جواي احساس قوي جدا انه مش بتاعي
مش لاقيالي فيه حلم
ولا كتف اتسند عليه
باين كده الدنيا بتعلميني شوية شوية
اني ما ارميش احلامي في حضن حد
باين بتجهزني لحياه انا كل وقودها مش اي حد تاني
والله ما مدايقاني الفكرة لو هي دي الحقيقة
انا اللي مدايقني اني مابتعلمش بسرعة
مش عارفة ليه دورت على أمل انا عرفت أتعايش من غيره
مش عارفة ليه وافقت أسيب مكاني جنبك
؟بس احلى مافيك انك بتسامحني