مليت
الالم اللي ولا بيأثر فيه حكاويّ عنه
ولا في حضن من اللي لفيت عليهم قدر يسكنه
اتهديت
من الم بيضخ جواي بكى محبوس بين حدود وجداني
بكى بيدور عليك
حالف ما يخرج الا ليك
لاراضي يهدى و ينام
ولا راضي يخرج و يخلصني من شوقي ليك
كل مااقول اديني هديت
و اديها بهتت ملامحك و بطلت تلاحقني نظرات عنييك
الاقيني صحيت يوم بعد ماحلمت بيك
وافضل صاحية عايشة جوة حلم شفتها فيه عنيك
عنيك .. اللي فجأة بتمسح كل سنين البعد عنك
وكانك ماشي من لحظات.. وولا كان قلبي ياما تعب لحد مانسيك
ده لو كان صحيح فيوم نسيك
اتقابلت الصيف ده مع قريبة لي اتعودت اقابلها في السنة لمدة اسبوعين او اقل و مش ضروري كل سنة وفقا للظروف
اتربينا في صغرنا قريب من بعض وكانت اوقاتنا دايما مقسمة بين بيتنا و بيتهم لكني رغم ذلك كنت بعيدة عنها
المهم اني كبرت و كبرت من غير ما اعرفها كويس
وياادوب لما كبرت و بدأت اقرب من الناس كانت هي اخدت قرار السفر لاروبا
مابقتش موجودة عشان اعرفها بنفسي وبقيت بسمع عن طباعها و شخصيتها من باقي قرايبنا وبس
مافهمتش منها ايه اللي خلاها تاخد قرار الزواج من اجنبي و الانتقال للحياه في بلد اوروبي بعيد عننا بمسافات طويلة
بعيد في عاداته في لغته وفكل شيء
ما انتقدتش لكن عرفت من جواي جددا اني لو مكانها عمري ما كنت حاخد قرار زي ده.. و الله اعلم التجربة العملية دايما ليها مفاجآتها.. ده اللي اتعلمته مؤخرا
طول السنين اللي مرت بعدها كانت بالنسبة لي قريبة أكبر مني بسنين مش كتير بس خلتني ماعرفش عنها الكثير لكن أكيد بحبها جددا.. ده الأكثر: انها كانت بالنسبة لي نموذج للفتاه اللي كان بيبهرني لامور كتير
المهم
اتقابلنا الاجازة دي زي سنين كتير فاتت
بس السنة دي بالذات قربت منها زيادة شوية عن العادي
فكينا كتير من الأغلفة اللي الناس بتلف نفسها بيها
من غير قصد ولا تعمد و مش هدفي دلوقتي اركز في ايه اللي خلانا نفكها
المهم اني شفتها من غير غلاف الزينة
شفتها بطبيعتها لمرة او اتنين
شفت فيها حاجات استوقفتني
شفت حساسية مفرطة من تجاهل اي حد ليها
شفت تردد شديد جدا جواها مابين احساسين
انها مش محتاجة لحد .. وانها محتاجة لينا كأهل
تردد بين التلقائية و البساطة في التعامل و بين الحرص الشديد من ان تعاملها يكون فيه شيء يضايق الناس او ان يكون فيه شيء في تعاملات الناس ممكن يكون هدفه مضايقتها
لاحظت انها زي ما تكون معتبرة نفسها واقفة لوحدها باولادها على ارض غير الأرض اللي عليها كل أهلنا و بما فيهم اقرب ناسها ومعتبرة ان ماحدش شايف معاها الحقيقة دي
اللي لاحظته ده مش واضح جدا
انما لحظات كده لما بركز في تعبيرات وشها بلاحظه و بسرعة بتطير تعبيرات التردد و تحل محلها تعبيرات الثقة و الثبات اللي هي مشهورة بيهم من قبل حتى زواجها او سفرها
حسيت ان جواها كلام كتير قوي حاترتاح لو حكيته و مش عارفة هي نفسها تحكيه ولا لأ
وياترى ممكن انا أكون في يوم من الأيام الشخص اللي ممكن تقولهوله
كلام عن غربة اتملكتها
غربة بتتخلق جوة النفس بغض النظر عن كونك لوحدك ولا مع ناس
غربة بتعلمك ماتحتاجش لحد مهما آلمك الاحساس ده و مهما كان فيه ناس كتير قدامك بيتمنوا لو تحتاجلهم ويلبوا بمحبة
غربة بتعلمك تتألم قوي من الوحده بس ماتشوفش غيرها كنمط حياه يناسبك
شغلتني قوي قريبتنا دي
اول مرة احس ناحيتها الاحساس بالقرب ده رغم اني طول عمري بحبها جدددا
اول مرة احس اني حاسة بيها في امور يمكن ناس اققرب مني ليها مش حاسسها
اول مرة احس ان فيه حاجة مشتركة بينا
كرهت و قوفك قصادي بتتفرج عليّ من بعيد
كرهت كل نظراتك ليّ
كرهت وحدتي اللي قدام عنيك
كرهت حبي ليك و كرهت كل ذكرياتي معاك
كرهت كل ده و مش قادرة اقولك امشي
اياك تيجي يوم و تمشي
بتعذب انا ولا مستمتعة؟
بموت كل يوم انا ولا عايشة معاك ايامي
مش عارفة
مش عارفة غير اني لو صحيت يوم مالقيتك هناك واقف قصادي زي كل يوم بتجنن
بتطفي
بكبر سنين واعجّز
بنفر من الناس و بيخافوا مني
بستغرب الدنيا من غيرك
لونها و ريحتها غير اللي عرفته عمري كله
رغم انك ماكنت معاي عمري كله
انا بقيت بقيس الدنيا بتاريخ رحيلك
بقيم الاحداث على حسب ان حصلت فوجودك ولا بعدك
ساعات بسال نفسي انا كان شكلي ازاي فايامي معاك
شكلها ايه الدنيا ايام ما كنت موجود فيها
سؤال بحس ناحيته بفضول مش عادي
حاجة غريبة
حاسة اني نسيت
نسيت انت مين
و تفاصيل الدنيا و الكون اللي كنت اعرفهم و انت فيهم
حاسة ان اللي عايشينها دي دنيا تانية اللي انت مش فيها دي
ساعات ببقى عاوزة اسال الناس .. فاكرين الدنيا التانية اللي رحلت معاه
فاكرين كان لونها ايه و شكلها
فاكرين خطوات ايامها كان ايقاعها ايه
فاكرين ريحتها و جوها
نفسي حد يحكيلي عنها
بس مابسألش
مش عاوزة اسمع اجابة باردة مالهاش روح.. اجابة بتقول ان هي هي الدنيا ما اتغيرتش
لأ مش هي
ولا هي دي انا
كله اتغير فجأة وبقى غريب
حاجة كده شبه حلم و صحيت منه ومش قادرة انساه
حلم خرجت انت منه و زرعت نفسك قدام عيوني
ومش عارفة اقنع نفسي انك ماكنتش حلم انما حقيقة
انا شفتك بجد فيوم؟
كلمتك و كلمتني؟.. حسيتك بيك بجد .. سمعتك و لمستك؟
أنا؟.. ياااااااااه صعب قوي عقلي يستوعب الحقايق دي
بيكدبها بشكل بيوجعلي عقلي
وارجع و اقولك
ماعرش وجودك بيعذبني ولا بيسعدني
بس واجعني
انت اللي واجعني بقى ولا نفسي اللي معانداني
ماعرفش
كرهت وجعك لكن عمري ماكرهتك
ومابشتكيش انا
وعمري ما اشتكي منك
انت و بس
انت وبس اللي ممكن احبه بالصفاء ده
انت و بس اللي ممكن اقبل وجعي عشانه
انت وبعد كده اي حاجة عادي ترحل او تفضل
.
.
,
محتجااااااااااااالك
مشهد من الذاكرة
.
.
.
.يمكن بانت انها فرحانة .. اتعودت دايما تغمض عن اللي جواها و تاخد من تعبيرات اللي حوليها و ترسم منها ملامحها
فقالوا فرحانة
شافت ابوها ايده فايد الغريب وبيبكي متأثر
وبيقروا الفاتحة
شافت كيان ابوها بيهتز,, على ايه ماتعرفش
شكلهم كلهم مصدقين الموقف
ميهمهاش غير ابوها.. ياريتها تعرف تروح و تهمس في ودنه.. ماتصدقش .. الموقف ده مش حقيقي يا بابا
دارت بعنيها بينهم لقيتهم بيتمتموا بالفاتحة و رافعين كفوفهم قدام وشوشهم
طول عمرها مابتحبش ترفع ايديها كده و هي بتقرأ الفاتحة
بس المرة دي ولا رفعت ايديها ولا قرت فتحتها معاهم
بعدت عنيها عن المشهد كله و القت بنظرها بعيييد من الشرفة اللي كانوا قاعدين فيها
و شافته هناك على رصيف بعيد
بنفس اللبس اللي بتحبه
بوشه الابيض اللي بيملاها نور
حست و كان ستارة غيوم اتفرقت و اتفتحت السما كلها
الجو احلو فجأة و نسيم بارد حسسها و كإنه شالها
شافت اسكندرية بسماها و كل الوانها
حست انها عاوزة تضحك قوي.. بس كتمت ضحكها
سألها .. الناس دي بتعمل ايه؟؟
ردت بسخرية و ضحكة مرح مكتومة: والله ماعارفة
سألها : يعني هم مصدقين
رجعت بصتلهم و بالاخص الللي قاعد هناك جنب ابوها بيتلقى التهاني
حست بوخز الحقيقة بيألمها
بصيتله تاني و سالته : مش حاتيجي بقى
ماردش
مش حاتيجي
ماردش
ساعتها ماقدرتش تغلب البكا
ولحسن الحظ قامت واحدة من القاعدين حضنتها و هي بتبكي لفرحتها
الحمد لله.. لقت حضن ما تنزل فيه دموعها
قالتلها ألف ألف مبروك
ماردتش
وقرت الفاتحة على روحه
