الإحـتــراف

عارفين الإحتراف؟؟

تــحـديـــــث

4/7/2007

أنا إنطلقت في كلامي على لسان خرّيج جامعة أمريكية

وبعدها ومن تعليقات جت لي من

~ Bato0ot ~

lemonada

قومى الى الأبد

لقيت إني كنت غلطانة في ربط الفكرة اللي قصدتها عن الجمود في المشاعر و الإتجاه العملي البحت في تفسير الحياه و التعامل معها لخريجوا الجامعة الأمريكية

وعشان كده حطيت التحديث ده
عشان أقول إ،ي كان كل قصدي إني أخد منهم نموذج الوعي الحقيقي و التعلّم الصحيح اللي مش بتوفره معظم الجامعات التانية وخصوصا الجامعات والمعاهد الخاصة و اللي أنا أحد خرّيجيها

كمان قصدت أتكلم عن نموذج يتصف بالتأثر بالفكر الغربي من ناحية كشف كل الوانب العميقة لكل شيء بشكل واضح و أحيانا صادم و التعامل معاه بشكل محترف أكتر

لكن ما قصدتش أي إساءة ولا تعميم

وبعتذر عن إختياري اللي إتسبب في الفهم الخاطئ لقصدي

فأنا ما بنتقدش حد معيّن

أنا بنتقد الإحتراف في (كل شيء) لإنه آه مفيد في بعض المجالات العملية

وللأسف.. نقدي فيه منه كتير موجه لنفسي


نقرا البوست بقى؟؟

يلاّ..... مع الإعتذار

عارفين لما شاب متعلم في الجامعة الأمريكية وعلام على حق؟.. لما يكلمك بلسان معووج و بسرعة وبنفعلات بسيييطة بدرجة ما تتناسبش أبدا مع الموضوعات اللي بيكلمك فيها

عارف لما تبقى سقعان؟؟
وإبتسامتك متشنّجة؟

ثواني ثواني

عشان نفهم بس أنا عاوزة أقول إيه

تعالى فكر معاي بالطريقة ده.. إعتبر نفسك خريج جامعة أمريكية شاطر جدا و متفوق و مثقف و وواعى وروش وعصري Freeو مقتنع بسياسة الإحتراف في كل شيء

مع الإعتبار.. أنا بتكلم عن شاب عاوز رضا ربنا و عارف ايه اللي ليه و ايه اللي عليه

استحضر الشكل العام للشخصية في الكلام و طريقة الشرح و التفكير
وتخيل نفسك بالشخصية ده وبتشرح علاقة الإنسان بالله

والله ربنا خلق الإنسان و هو عارف تماماً مدى قوته و ضعفة وقادر على ايه و مش قادر على ايه
و الإنسان كل اللي هو مكلف بيه متساوى جدّا مع قدراته طبقا لعدل ربنا..ه
يبقى اللّي عليك لازم حتعمله لأنك قادر تعمله وده أكيد 100%

وربنا

إدالك بعض العناصر اللي قادرة تتسبب في ضعفك و عصيانك، و على أساسه عرّفك إزاي تتوب و ترجع
وإدانا أيام و وإجراءات تقدر بيها تعوّض خسارتك من الذنوب اللي سببها ضعفك زي رمضان و العمرة و الحج على سبيل المثال مش الحصر

ده أسهل تلخيص يخلّيك بقى ما تقولش انا معذور و لا يخلّيك تسوّف و لا تحط آمالك على بكرة .. إنت بإيدك كل حاجة

وتخيل نفسك و إنت بتشرح علاقتك بأبوك و أمك

دول ناس أوجدونا في الحياه.. في سنين نموّك إنت بتاخد منهم .. وهم مايملكوش غير التفاني في تربيتك

قدّامك على المبدأ ده حوالي 16 ولاّ 17 سنة .. بعد كده المواقع بتتغير و تبقى إنت اللي بتدّي و همّ ياخدوا بحكم السن و تأثيره عليهم جسمانيا و نفسيا ده غير إنك حتتوفر وقتها عندك مقومات الاعتماد على النفس و تحمل المسئولية

والأخلاق الكريمة مفروغ منها ما هي مكتوبه في دياناتنا ومعروفة من أقدم العصور وهمّ أولى الناس بيها... بس

أما الناس..ه

فهمّ رفقاء في الحياه.. كل حد تعرفه هو مش أكتر من إنسان حايرافقك لفترة و يمشي.. مهما زادت فترة رفقته فخلّيك عامل حسابك دايما إنه ماشي وغيره جاي.. و الله أنا مش شايف أي ميزة تفرق بينه و بين غيره عشان أتعب قلبي على حد.. اللي يفرق مع الإنسان بس هو سلامة رفيقه من صفات الأذى و الانتفاع بصفات النفع اللي فبه

وليه تدّي أكتر من المطلوب.. المطلوب المعاملة الحسنة و الضمير و إن الله يحب المحسنين.. مع كل الناس

الحب.. حب ايه ياعم.. إكبر بقى و خلينا في المهم

السنين و العمر... ه ه

و الله ده فترة إختبارك .. "شغلك".. وليك فيها إمتياز المتعة بنعم ربّك.. وليك الحق فإنك ترعى نفسك بالعلم و الشغل و التقدم في الحياه

ده من حقوقك اللي بتاخدها جنب دورك الرئيسي فإنك تعبد ربّك و تشتغل على حسناتك و تكليفاتك و كله محسوب عليك بالساعة.. و إنت و شطارتك.. الأزمات إمتحانات..... و الفرح تجارب ربنا بيجرّبك فيها أو حافز عشان تشتغل أكتر.. و ساعات فيه حاجات بتحصل فيك بس مش ليك .. دِه لناس تانية و إنت سبب فيها

من الآخر كله سكة للآخرة .. فامتحطش في بالك و إشتغل بهمة بس إنت و إحتراف

آدي الدنيا

آدي الإحتراف

ايه؟؟

سقعان؟

قرفان؟

إتخنقت منّي؟؟

طب عارف لما تروح تزور الهرم و تلاقي الأرض حويليه إتعملت سيراميك؟؟

وجنبه على شمالك قرية سياحية على أعلى مستوى.. شاليهات و حمامات سباحة.. و من ورى مجموعة فنادق أعلى منه و أضخم.. و تلفريك و بيتش باجي و حاجات في منتهى الرفاهية في المواصلات . وكله بسعر الجمل و الحصان.. عادي يعني

عارف لما تدخل جامع تلاقي إنه بقى صالة مجهزة بأحدث أجهزة الصوت وإن الأذان مسجّل على سيديهات بتشتغل بالكمبيوتر في مواعيد الأدان المضبوطة بالثانية.. والإمام بيصلي في مكتبه اللي حيطانه عازلة للصوت و إنت عندك بس سماعات .. كل مصلّي يظبط الصوت و الإيكولايزر على حسب رغبته قبل الصلاه

و لما ترفع عينك لفوق وانت بتدعي عينك تقع على أحدث الاضاءات المبنية على دراسات اللي تمنع الكسل و و الشرود و تحفز دايما للإنتباه و اليقظة

عارف لما القهوة تبقى من غير قهوجية؟.. و مكينات القهوة و النسكافي على أحدث طراز (Help your self ).. و الشاي باكتات مع خزانات مية سخنة و الطاولة بكارت إشتراك و الكوتشية مش يدوي إنما على الكمبيوتر هي و الدومينو.. و الكراسي إتقلبت بارات عالية وركن تاني أنتريهات

سقعان صح؟

عاوز تروّح؟

ما تيجو نروّح

طب ثواني بس

فاكرين أغاني حميد الشاعري بتاعت زمان هو وهشام عباس.. فاكرين الله يسلم حالك .. ومراسيل.. وأوصف بإيه؟

فاكرين لما عند بداية رمضان عيال الحتة يلمّوا من بعض و يزيّنوا العمارات

فاكرين الشارع ليلة راس السنة ولمة الجيران في بلكوانات العمارات؟

فاكرين لمّة العيلة في بيت كبير أو كبيرة العيلة يوم الجمعة و الغداء و البنات اللي بتحضر الأكل مع الستّات و الشباب بيتفرّجوا على اللفيلم الأجنبي

آه بالحق.. فاكرين عالم الحيوان و سر الأرض بعده؟.. بعدين الفيلم الأجنيي.. و حديث الروح بعد مسلسل السعة 7.30.. فاكرين نادي السينما يوم الحد و إختارنا لك يوم الأربع و فكر ثواني و تكسب دقايق و يسرّ مشيخة الأزهر الكريم أن تعلن عن ........ بالدرّاسة؟؟

فاكرين المشورة من البيت للفرن و من الفرن للبيت بصيجان الكحك قبل العيد و خناقات أمك على الكحك اللي عمّال تلّقطه و حاتخلّصه من قبل ما يدخل العيد؟

فاكرين أول يوم رجوع للمدرسة بعد الصيف

طب فاكرين حالة الشراء اللي قبلها؟ .. الجزمة السوده و الشرابات البيضة و الشنطة المربعة أم سستتين؟

طب فاكرين فرخ الجلاد؟؟ أنا كنت بقول عليه "فخ" و لحد انهاردة أنا مش عارفة إسمه الصح

كان ألوانه زرق وأخضر ز بيج.. كلهم ألولن كئيبة .. بس دلوقت بحبها قوي

وبعد كده طلع البلاستيك و كان أشيك

دافيان دلوقت؟؟

حاسس إنك روّحت

ما تيجوا نرّوح بقى

بعد ما إدّي و بعد ما خد
شد لحاف الشتا من البرد
حط الدبلة و حط الساعة
حط سجايره و الولاّعة
علّق حلمه ع الشّماعة

أنا بس زهقـــان

ده أنا كنت زمان
إنسان .. بس إنسان
الناس عطاشا وعمري ما كنت عطشان

ده أنا .. ياه عليّ زمان!!ه
كنت عاشق ولهان
وكنت بملى الليل ألحان
كنت أعمل من دموعي ألوان
وأشوف من وراهم السما.. فتبـان

أنا كنت فنّان
بعمل من الشعر أوزان

وكان يطلع منّي ألحان جنان

وقلوب الناس كانت فإيدي أسهل بيبان
تتفتّح فكله يبان

أنا كنت صاحب الطرقان
وديدان الأرض و الكلاب كمان

كنت أبص فعين العصفور يعرفني.. آه .. و الحصان
إيه مش مصدّقني؟؟

لا و الله كنت إنسان
طب أقولك؟؟.. أنا ماكانش ليّ لسان
ولا فإيدي قرش ولا سكتّي سهلة و برّي أمان

بس كان ليّ أرض على قد قدمي و شويّة حيطان
ومفرش على السفرة و سجّادة جنان

وقطة تستنّاني فبلكونتي ودبدوب بودان
وكان وش حبيبي ساكن وش القمر وساعات فأفق البحر الغضبان

ده أنا بالذات دون أي إنسان
كان السحاب بيمشي وراي فكل مكان

مش مصدّقني
ليه طيب؟؟.. إنت مش عارفني؟؟.. أنا اللي كنت إنسان

يوووه .. هو إنت كل مرّة تنسى؟؟. .يادي النسيان
خلاص بقى براحتك .. أنا أساساً دلوقت زهقان

مـع أوراق السوليـتيــر

جلست كالعادة إذا كان هناك وقت ما
أقلد عادة كنت اعتدت عليها في وقت ما
ألعب السوليتير و أسمع أغاني أعرفها و تعرف مني ما كان لي
أخذ كل ما في يتراقص معها .. ومع بعض الذكريات التي تملأني بإحساس ما

لن أبكى

هكذا قلت .. هكذا قررت
******

وأخذت أتراقص.. ياه ما أجمل صفاء البال ووقت لاينتظرني فيه عمل
يااا.....ه

**لقد إنقطعت التنهيده**

انقطعت بغصة أخافها كثيراً..... كتمتها بشده.. حاولت..
ولكنها أصرت .. و سالت دموعي بثقل و سخونه . . كم إستفزّتني تلك الغصة التي أنجبتها كلمات تلك الأغنية
أليس هذا وقتي؟!! ... أليست هذه سعادتي للحظات و قد نجحت في استراقها؟؟

وبكل سخط سكبت كل ما بعيني باستسلام
ومع بكائي أخذت أفكر في تلك الذكرى الموجعة التي تفرض نفسها عليّ..

أين يختفي النسيان عنّي؟؟ ألن يجاورني أبداً؟؟

وبكيت ... ويداي لازالت تنقل ورق السوليتير ... ودموعي لازالت مع الكلمات تنهمر ... وتنــهــ....ه

**لقد انقطعت الدموع**

انقطعت بابتسامة عميقة جعلتني أستشعرها في كل نسيج أحتويه
إبتسامة لذكرى أخرى أنجبتها تلك الكلمات التي أتت بها الأغنية التالية لما سبقتها
وفي وسط إبتسامتي أخذت أفكر في تلك الذكرى الغالية التى بكل عناد للزمن لازالت عميقة و لازالت دافئة وواضحة.. رقيقة .. قريبة
تساألت..

أين يختفي النسيان عني؟؟؟ ليته لا يجاورني أبداً

واتسعت إبتسامتي وأخذتني الذكرى فتخيلت كل شيء كان بها.. وتخيلت
ثم توقفت

وها أنا أسرد هذا التدخل الذي يشعرنى أنني مجبرة إجبار جميل
مجبرة أن أبكي في وسط لهوي.. وأبتسم في وسط بكائي .. وأحزن فأهوّن على نفسي و أداعبها.. وقد أمازحها .. فأضحك له ومنها.. ولا ألبث أن أبكي عليها ومنها .. وكأني أنا عدوّي و صديقي .. ه

لحظــــــة

ولكني لا أتمني أن أكون أنا عدوّي و صديقي و حبيبي وكإني أنا أهل الأرض وحدي
لا أريد أن تمضي السنين و يزورني كل أحبائي .. فقط .. مع .. أوراق ... السولتير
فيبكي على بعضي بعضي.. و أعيش كعصفور مدلل بقلبه حكايات بتولّع...ه
لست مغرمة أنا بورق السوليتير.. إنها مجرد لُعبة .. مهما أحيت بداخلي من الذكريات فهي لُعبة

لعبة

وحشتوني

فعز شغلي و إنشغالي .. بسرق دقايق وأقول لما أزور شوية مدونات.. و يا إما أزوركم و ما ألحقش أسيب تعليق
يا إما ما لحقش أكمل البوست اللي بقراه

بس هانت.. كلها إسبوع أو اتنين و زحمة الكورسات اللي هاجت فجأة تخلص بعد ما كل الناس اللي خلّصت إمتحانات تبدأ تسيب قطر و تسافر

أنا في شوق شديد لكم.. و لمدونتي.. و للعيلة اللي بزور روحي وسطها

طبعا البوستات اتكومت عندي كتيييير.. أروق بس و أبدأ أحطها واحدة واحدة

و الله ما حد صعبان عليّ غيركوا من اللي ف البوستات الجاية

تخيلوها حايكون شكلها ايه بعد حرمان 3 أسابيع من المدونات

تحياتي لكم
وحشتوووووني

إشتقت إلى المعــاني

كان لكل شيء معنى

حتى ظلّي.. كان له عندي معني.. المعنى ده إكتشفته الصيف اللي فات لما كنت فاسكندرية

ببساطة جدا كنت ماشية مع صاحبتي في زقاق يوصل من الكورنيش للترام... زقاق بحبه بشكل خاص لإن مرسوم على كل سور و رصيف و عمارة فيه مجموعة ذكريات أقل ما توصف بيها إنها رائعة

اللي حصل يومها إني شفت ظلّي.. وكإني لأول مرة أشوفه فحياتي

قلبي إتّاخد و عيني دمعت وصاحبتي سألتني" فيه إيه؟؟"ه

خفت أقولها إني لاحظت ظلّي

مستحيل أقولها كده.. يمكن لو كانت حد تاني كنت قلت لكن هي مش حاتفهم

معرفتش أقولها إن لأول مرة أحس بقيمة لظلّي

ظلّي اللي خلقته شمس إسكندرية على أسفلت شارعها

ركزت بعيني عليه و ركزت بإحساسي على سخونه شمس آخر وقت في العصر قبل بداية لطف حرارة المغرب... لمّا الشمس تكسي كل الحاجات بلون برتقالي زاهي وجميل

وركزت بخيالي على أيام إستقراري فالبلد ده قبل ما أسافر و أطلع منها و أطلع من مكاني و من دفاه

فجأة حسيت إن مكاني اللي طلعت منه لسة محتفظ بدفى جسمي أيام ما كان فيه..

ياااه

وحشني ظلّي على شوارع إسكندرية اللي كنت بستمتع بكل خطوة فيها

وحشتني اللعبة اللي كنت بتسلّى بيها و أنا ماشية ع الكورنيش من سيدي جابر لسيدي بشر وهي إني أركز على واحد بيمد قدّام لحد ما أحصله بتحدي فيبقى و راي و ساعتها أركز على اللي بعده وهكذا لحد ما سيدي بشر تيجي فجأه

***وحشتني المعاني ***

كل حاجة كان ليها معاني

حيطان بيتنا كانت لها معاني

وقت الضيق كنت بحسهم حضن

ووقت الفرح كنت بحس بلونها بقى فاتح أكتر من العاده

وكنت بحب قوي البيت لمات يتزحم بالناس.. كنت بخطفلي نظرة سريعة للحيطان و البراويز اللي عليها و أبتسم بخباثة

لإني بحسهم حاسين قد ايه أنا متنرفزة دلوقت و نفسي أقعد أنا وهمّ نسمع منير لوحدنا

ليه هنا ما فيش معاني؟؟

V

V

V

عشان المعاني بتتولد مع الإستقرار ؟

ولاّ عشان هي بتهرب من القلوب لما تجف؟؟

ولاّ المعاني ما بتخرجش زي البني آدمين من بيوتها؟

أعتقد السبب الثالث هو الصحيح.. المعاني ساكنة بيوتها و بس.. إنت تطلع من البيوت؟ .. ماشي

لكن ماتعرفش تاخد المعاني معاك..أصل ايه اللي حايرجعك غيرها؟

ماينفعش تاخد الدفى معاك.. ما ينفعش تاخد الألفة معاك.. ما ينفعش تاخد حنية بلدك و حنية ناسها معاك

ده إنت تبقى جدع لو عرفت تاخد حنيّتك إنت نفسك.. ولاّ عرفت تاخد إحساسك و رومانسيّتك

أنا ما طلعتش جدعة و لاحاجة

أنا ما عرفتش آخد مشاعري معاي ولا قدرتي على الألفة السريعة مع الأشياء قبل الأشخاص

ولا عرفت أحتفظ بدفى قلبى

إتمحّكت في شوية هدايا و صور و حبّة تذاكر ترام وورق شيكولاته فاضي

قلت دول ذكرى بقالهم عندي فوق الـ 7 سنين

بس وأنا فمصر كنت كل ما أفتحهم كنت بقرا فيهم الأحداث وكإنها بتحصل دلوقت حالاَّ

بس الكلام ده فمصر

إفتكرت بمنتهى البساطة إني لما آخدهم معاي فغربتي حايحكولي نفس الأحداث و يرسمولي نفس الناس و يصحّوا نفس المعاني

لكن لاقيتهم ميتين

بفتحهم وألاقيهم ساكتين

وأبذل مجهود عشان أستحضر كل اللي محتجاه منهم وأقنع نفسي بإني نجحت

لكن جمودي و جمودهم بيأكد في كل مرة إنّي ما نجحتش

و الغرييييب

إني أول ما أوصل مطار إسكندرية بفتح الجزء الصغير منهم اللي شايلاه فمحفظتي

بلاقيه بينطق... وبسلم عليه بدموعي و بفرحتي

-إخس عليكوا خضّتوني .. إفتكرتكوا ميّتين ولاّ أنا اللي قلبي مات

ده إحنا صاحيين أهو وآخر جمال

الحمد لله

الحمد لله إني كل ما رجع لها بلاقي ظلّي عارفني و عارفاه

وحيطان بيتنا لا نسيتني و لا زعلت منّي

بس كل المعاني دايما بتنبّهني

بتقوللي " ما تطوّليش عندك و تتطمني إن الميت بيصحى"ه

آه أصل ما فيش ميت بيصحى

أه لما تحوشي الهوا و المية بيغرق في الغيبوبة و يفوق

بس الغيبوبة لو طولّت بتموّت

و الميت ما بيصحاااااش

يا رب عدّي الغيبوبه دِه على خير

وبسرررررعة

.....كف فــارغ.....

أتعلم من الحياه.. ؟؟؟؟؟؟؟؟؟؟؟

هل الحياه مكان صحي للتعلّم

أتعلم من الناس..؟؟؟؟

هل الناس مصدر موثوق منه للتعلّم؟؟؟؟


رأيت الحياه بكل جمالها و براءتها و رقتها و سهولتتها و رومانسيتها

ورأيتها بكل جمودها وواقعيتها و سطحيتها

رأيت الحب.. بأوجه رائعة حالمة تملأ الدنيا متعة و نشوة و جمال

ورأيته هدّام مؤلم جارح خائن.. يخون أول من يخون هو صاحبه

رأيت الصداقة ... وما أقساها عندما تخذلك

رأيت الكثير
ورأيتني أصارع لأجل الكثير

وأنظر في يديّ الأن

أيسط كفي و أدقق النظر

ولا أجد شيئا

حتى أنا لا أذكر .. فيم كنت أصارع

مين اللي عاقل فينا .. مين مجنون؟؟
مين اللي مدبوح من الألم؟؟
مين اللي ظالم فينا.. مين مظلوم؟؟
مين اللي مايعرفش غير كلمة نعم؟؟

منيــر

مصريين في الخارج و الداخل

اسمهامعلش أنا حاطول عليكم في البوست ده.. بس بجد أنا عاوزة أسأل ... مين همّ المصريين فكل دول؟؟

إحساس صعب جدا لما تلاقي حد بيقطع من لحمك و مالكش أي حق فإنك تدافع أو تنطق حتى

ده لسة حاصل حالا

أنا شغّالة في معهد تعليمي بدرس فيه كمبيوتر

زمايلي هم عبارة عن 6 موظفين 2 منهم سوريين و فلسطسنية و مغربي و 2 أردنيين و المدير أردني

علاقتي بيهم كلهم سطحية تماما ماعدا السكرتيرة الفلسطينية فهي قريبة مني كتير وأستاذ سورى..

كل ده مش مهم.. المهم هو إن دار الحوار ده إنهاردة

أستاذ حسام السوري: يااه ع المصريين .. و الله يا رب نفسي أشوف مصري كويس فحياتي مرة

رشا الفلسطينية: اطمن يا حسام.. عمرك ما حاتنولها

طبع أنا حسيت بالدم فار في دماغي .. لكن بما إن الجو العام هزار و مزاولات فابتسمت إبتسامتي المعهوده
أنا: طيب إستنّى لما أكون مش معاكم يا حسام.. ولا إنت بتتكلم عى أساس إني فلبينية معاكم؟؟

حس أستاذ حسام بالزعل فكلامي.. ورشا كمان إتكسفت وقالت
رشا: زمان هند عاوزة ترمينا بحاجة إحنا الإتنين
حسام: لابس مالكيش حق في الزعل يا هند.. طب أنا بحكيلك
وفضل يسترسل في حكاياته و خبراته مع المصريين في قطر أو سوريا أيام ما كان في بلده

الصراحة... كان بيحكي حكايات و أنا فخيالي شايفة أمثلة كتيييرة عدّت عليّ فعلا في مصر.. فتخرست

الحكاية الأولى على لسانه

كان ساكن معاي مصري في نفس الغرفة و أنا ضيعت مفتاحي فاتصلت بيه عشان أروح أخد منه المفتاح عشان مروح الأول.. وفضل يذلني طول اليوم إنه إداني المفتاح كإنه إداني راتب شهر.. كل ساعة مكالمة.. "هاياحسام... دلوقت مفتاحي معاك والساعة بقت عشرة بالليل أروح إزاي أنا" .. طب ما أنا في الغرفة وحافتحله.. لكن لازم كل ساعة يبلغني إن الوقت اتأخر و إنه تفضّل علي و إداني مفتاحه.. ولاكإنه مفتاح خزنة.. ومن يومها وهو معتبر كل حاجتي مسخّرة ليه بداية من الجل و معجون الحلاقة و الموبايل

الحكاية التانية

لما كنت شغال في مدرسة وكان كل المدرسين هناك مصريين و أنا السوري الوحيد.. وجه محمد صاحبي.. كنا صحاب جدا.. قاللي في ناس عاوزين درس خاص في البيت يمشي معاك النظام؟؟ فقلتله ..آه
قال : طب على كام
رديت:100 ريال في الساعة
قال: وأنا نسبتي كام
قلتله باندهاش: يعني لما تجيب لصاحبك شغل تاخد منه نسبة؟؟
قال: آه معلش ده شغل
رديت : خالص يا سيدي شوف عاوز كام
قال: 50 في المية
رديت بغيظ: ماشي الحال.. مش حاختلف معاك
قال: بس ماتحاسبش الناس انت أنا حاحاسبهم كله مرة واحدة عشان أنا كمان بدرس لهم وبعدين أديلك حسابك
رديت: تمام

وعدت الفترة و خلصت الحصص و الطالب إتصل بيّ وقاللي إنه عاوز يقابلني عشان يدّيني حسابي فقلتله لأ لما تحاسب محمد إدّيه حسابي و أنا وهو بنتحاسب بعدين
ده حسب الإتفاق
عدّى اسبوع على مكالمة الولد فسألت محمد عن الحساب فقال لأ ده ماحاسبنيش.. قلتله إنه إتصل وقال كذا.. فثار و قال ده بيسرح بيك .. تلاقيه إتكسف منك ... أصله حكالي على إنه خسران في البورصة و ..... وسلسلة إختلاقات طبعا
رديت: أنا ماليش علاقة بكل ده .. الولد إتصل بيّ من نفسه يعني ماكانش مضطر إنه يكذب أساسا.. بص يا محمد أنا عاوز حقى
محمد: خلاص يا سيدي أنا لما أقبض المرتب حاديهملك من فلوسي أنا بس ما تزعلش و أنا حاتصرف معاه بعد كده

ولحد إنهاردة عدّت سنة وخلال السنه محمد المصري لسة صاحبه و كل يوم يتصل بيه و يسلم عليه و يعرض عليه دروس و حسام يرفض طبعا بعد الواقعة

و اللي مستغرب منه حسام.. إنه مش بس حرامي و سرق صاحبه .. لأ كمان بجح و له نفس يتصل بيه و يقوله "إزيك يا باشا"....ه

الحكاية التالتة
عن نفس المدرسة اللي كان شغال فيها و الإستاف كله مصريين
حسام: المدير بتاعنا كان أردني.. كان كل يوم يمسح بكرامتهم الأرض و ماكانش عند حد فيهم أدنى مشكلة.. بل بالعكس .. ماحدش فيهم بيقوله غير يا بيه و باشا.. وصباح الفل

حسام: أساسا لازم أول ماتشوف واحد معرفتك مصري أول حاجة بعد إزيك يا باشا..ولازم يسألك.. "مش حاتعزمني ع الغدا ولاّ ايه" ه

و إسترسل بعدها في صفات المصريين.. "النفاق، المادية الشديده، المصلحة فوق كل شيء، قبول الإهانة مقابل المصالح، الذل أمام أي حد حاستفيد منه، إختلاق الحكايات و حب فضح الإسرار و الترييل ع الفلوس

كل ده وأنا حاسة إن وشي أتحول لفرن... وحسيت بغصة فحلقي وكنت على وشك العياط..

وحاليا أنا بجد مش عارفة أبص في وش حد منهم .. مش مكسوفة من اللي إتقال لكن غضب منهم و من قلة ذوقهم

عدّى على الحكايات دلوقت حوالي نص ساعة.. خلالها جيت أكتب البوست .. وخلالها رشا نادتني كالعادة عشان أساعدها في حاجات ع الكمبيوتر.. لكن مش قادرة أبص في وشها

لأول مرة أحس إن موقفي ضعيف جدا للدرجة ده.. لأول مرة أحس بإهانة و ما عنديش أي حق في الرد

حسام ما حكاش عشان يهينّي أو يدايقني فعلاقتنا كزمايل مافهاش اللي يرغمه على كده ولا هو ده طبعه لكن هو حكى عن خبرات مر بيها
اللي حارقني إني حاولت أنفي كل ده .. لقيت إني مش حاكون منطقية

للإن هي ده الخبرة اللي جوه كل الناس هنا .. وأعذرهم فيها.. ونفسي أقول للمصريين كلهم

إحنا كان جوانا الخير

و الخير و الأخلاق مطلقين

يعني أنا جدع لما أكون جدع مع إبن بلدي و مع الغريب ومع الندل .. ومع كل إنسان.. أنا جدع عشان أنا كده مش عشان اللي قدامي كذا
أنا عزيزالنفس.. مع البواب و حضرة الضابط و صاحب الشغل و الكفيل ومع أتخن تخين

أنا متواضع .. قدام الغلبان و المحتاج و المتشرد و اللي معاه ملايين

طيب ما أنا بقابل مصريين هنا

مرة إتأخرت قوي في الشغل لحد الساعة 11 بالليل و والوقت ده في قطر يرعب أي بنت لوحدها.. وطبعا مستحيل أركب تاكسي

فماما إتصلت بواحد تعرف رقمه و بيوصل لناس.. وده شغلانة هنا معروفه.. إن يكون واحد عنده عربية و شغله فترة النهار بس فينزّل إعلان في الجرنان برقمه عشان أي حد عنده مشوار يتصل بيه و يوصله والدفع بالمشوار

المهم.. الراجل ده كان مصري .. وماكانش فاضي ساعتها... فإداها رقم واحد معرفة عشان ما يخسرش ماما كزبون

واتصلت ماما بيه ووصفتله مكان شغلي و جالي

ركبت معاه.. ماإتكلمش حرف لحد ما قرب البيت ساعتها سألني انت منين فمصر فقلتله إسكندرية.. فقال انه هو كمان عايش فيها لكنه صعيدي أساسا.. كان في منتهى الإحترام و الذوق.. لما وصلت وبطلع الفلوس رفض و كإني بهينه.. فقلتله لأ ده حقك ..إنت عطلت نفسك و عملت مشوارين لحد شغلي و بعدين للبيت و الوقت متأخر

قاللي عيب يا أبلة.. هو يعني لما أوصل أختي و بت بلدي أخد فلوس؟؟.. إتكسفت منه و نزلت و أنا عندس أحساس بالفخر الشديد

ده مثال

مثال تاني هي أم أسماء... وده فلاحة بسيطة جت تبيعلنا خضررة أيام ما كنا في إسكندرية.. ودخلت البيت وفضلت تحكي مع ماما عن حالها و حال بناتها الستة

فماما عرضت عليها إنها تيجيلنا البيت مرتين في الأسبوع.. لإن ماما كانت دائمة السفر للكويت و أنا و أختي و بابا بنحتاج لحد يساعدنا في شغل البيت.. غسيل و طبخ وكده يعني

ساعتها أم أسماء كانت على وشك العياط على حالنا و كإننا أنا و أختي يتامي.. وكإنها هي اللي عايشة فالخير و إحنا محرومين

وعاهدت ماما إننا فعنيها طول ماهي مسافرة

وواظبت على اتفاقها مع ماما.. وماما واظبت على إرسال فلوسها كل شهر

وفمرة قولتلها .. ياام أسماء خلاص من أول الشهر الجاي إرتاحي وأنا حاخد بالي من البيت.. لإن ماما كانت سابت شغلها في الكويت و مش حاينفع تبعت مرتبك كل شهر زي الأول..

من يومها و أم أسماء بقت بتجيلنا 3 أيام في الأسبوع.. من البحيره لإسكندرية.. وكل مرة معاها محشي أو ملوخية أو كشري وماتنزلش إلا لما تخلص الغسيل كله على إيدها بعد ما باظط الغسالة

ولو تشوف كمية الخجل اللي جواها عشان المحشي من غير لحمة ولا لما ما تحلقش تنشر كل الغسيل و تتضطر تسيبلي جزء عشان تلحق معاد القطر

وماكانتش ترضى تاخد مني ملّيم.. رغم إن حالها صعب جدا و بناتها الستة مصاريفهم ربنا اللي يعلم بيها

خدمتنا لمدة سنة لوجه الله.. إحنا اللي أمنا في الكويت.. و ساكنين في شقة واسعة وبنلبس ع الموضة و بنتعلم في الجامعة

وهي ساكنة في أوضة مع بناتها اللي كتر خير الدنيا إنها عرفت تدخّلهم ثانوي صنايع و تجاري بشوية الخضرة اللي بتسافر كل يوم من البحيرة لإسكندرية عشان تبيعهم

ده مصرية أنا عرفتها

**************************

لكن زي ماقال هارملس... هناك قاعدة.. وهناك شواذ.. و الناس ما بتدّيش أي أهمية للشواذ في حكمها على القاعدة

و القاعدة في المصريين اللي شفتهم في قطر هي الصفات اللي قالها أستاذ حسام

وبكل ألم بقول ده

وبكل صدق بتمنى لو نحط مصر فعنينا أكتر من كده و إحنا طالعين منها.. ونعتبر نفسنا شبابيك الناس تطل منها على مصر فيعرفوا إن أهلها كلهم خير و كرامة

رحــــــاب

دلوقت بكلم رحاب حبيبتي.. واشتغلت أغنية ياحبيبي تعالى لفضل شاكر

وياااه ع اللي صحى جواي

ويااه عاللي نفسي أفكرها بيه

أصل الأغنية ده ليها ذكريات بينا هي عارفاها كويس

نفسي أقولها فاكرة شارع الكلية ولمة الناس فأيام الإمتحانات.. فاكرة فلان و فلانة.. يااااه الناس كتير و كلهم بموت فيهم

فاكرة أيام رحلات المنتزه و المشاريع السبعة راكب؟؟.. وسطوح بيتها و غرفتي فأيام الشتا

فاكرة فضل شاكر بيفكرنا بمين؟؟

و

.

.

.

فاكرة أحمد لما كان بيحبها؟؟

بس .. هنا إضطريت أسكت و أكتم كله جواي.. مش حاينفع أصحي الألم جواها

خايفة من دموعنا....ه

حتى أختي لما نزلت مصر بتقول انها خايفة تشوف صحابنا و ماتلاقيهوش وسطهم

خايفة تصدق انه مش موجود.. خايفة تصحّي أحزانهم لما يشوفوها

واضح إننا كلنا خايفين من بعض و على بعض من يومها

أنا آسفة إني بفتح موضوع حسيت إنه بيتعبكوا و فرحت لما تعبكوا.. طبعا مافرحتش عشان غاوية أتعبكم لكن فرحت انكم تعبانين عشاني

فرحت عشان حسيت ان اللي عايشينه هنا ده حقيقي

بجد آسفة .. بس أنا من يوم ما لقيت طريقة أقول بيها اللي أنا حاسة بيه في لحظة ما أحس بيه و زي ماأنا حاساه .. من ساعتها قررت إني ما أكتمش حاجة

آه كتمته مع رحاب.. لكن مش عاوزة أكتمه هنا

أنا كده خلاص مش زعلانة

الحمد لله اللّي قادر يصالحنا على أحزاننا و قدرنا ويحول جوانا الألم لأفكار رقيقة تهونه

الحمد لله رب العالمين

اللهم إني أحمدك كما ينبغي لجلال و جهك و عظيم سلطانك