انا حطيت بوست من غير ما أرد علي التعليقات اللي فاتت عشان جواي إحساس قوي جواي مقدرتش ما أقول
أنا دلوقت بكتب من علي الكورنيش.. كنت اتعودت بقالي كام إسبوع إني أنزل الجمعة وأمشي كتيير زي ما كنت بعمل فاسكندرية.. بس كنت بعلق عيني علي مية الخليج الميتة وألاقيني بقولها تيجي انت ايه جنب موج اسكندريه والحياه اللي فيه.. أما أشوف الأبراج العالية بحس بحنين قوي لمنظر كافتريات وقهاوي بلدي
فتوحشني إسكندرية أكتر
بس انهاردة الجو تلج والهوا جاامد جدا ولأول مرة أشوف المية بتتحرك.. مش عارفة أقول أنا حاسه بإيه ولا بكام إحساس .. بس أنا مليانه دلوقت باحاسيس .. منها بيضحكني ومنها بيبكيني.. حاجات كتير قربت فجأة وحاجات كتير وحشاني قوي.. بس أنا فرحانة قوي.. وإكتشفت إني شبه موج إسكندرية.. شوية عالي قوي وشوية هادي وشوية ميت
آآآه يا اسكندريه
آه من وعودك
زي السحاب
وشايفك قصادي وجنني طول البعاد
.....
أنا قايمة بقى أكمل مشي قبل ما الشمس تمشي
ومن قلبي لاسكندرية سلام
هناك 25 تعليقًا:
موج اسكندريه
ياااااه
طب والله وحشتني اسكندريه في الشتا
وحشني جو البحر وريحته
يااااااه
انتي سخنتيني لدرجة اني عايز اسافر اسكندريه حالاااااان
سلاموووووووووووز
إنتي متأكده إن مية الخليج بتتحرك قدامك دلوقت زي بحر إسكندرية بالظبط؟ مش معقول! ممكن تصوريه فيديو وتبعتيهولنا؟
المهم الروح .. علشان كده هو "شبه" إسكندرية .. لكن مش ممكن يكون زي إسكندرية
أنا مش عارف إمتى هأشوف إسكندرية تاني؟
والله انا مبسوطه انك خرجتى وفرحانه كمان
اسكندريه بعتالك سلام جامد قوى يا هنودتى
بتقولك الجو تلج
شمت ريحة البحر و حسي لسعة البرد على وشي و ايدي
فرحااااااااااااانه قوي بفرحك
ووصل قلبي
:)
ربنا يفرحك دايما يا رب
انتى بجد فظيعه
حساسه اوى
حنونه اوى
طيبه اوى
فنانه اوى
بحسك بجد فى كلمه بتقوليها اوى اوى اوى
ربنا يديم عليكى احساسك دا بجد
صدقينى انا عن نفسى بحس انه كل مكان فى بورسعيد بيحبنى اوى زى ما انا بحبه
وانا واثقه انه كل حته فى اسكندريه حباكى بجنون زيك انتى كمان ما بتحبيها
اما البحر دا فحكايه تانيه خالص بجد
ربنا يديم احساسك بيه بجد
اقفى قدام البحر عندك وغمضى عينك وشمى ريحه بحرك انتى وشوفى موجه واسمعيه وكلميه هيرد عليكى بموجه كعادته معاكى
وموجه هيحوطك بحنانه ودفاه مهما كان الجو بارد
اعملى بس انتى زى ما بقولك وانتى هتحسى دا
وابقى ابعتيلى وانتى قدام البحر عندك اسمعك صوت بحرنا هنا واهى تصبيره على ما ترجعى "ليكى"تانى بالسلامه
بجد حاسه اوى بيكى و بكل كلمه بتقوليها
يعنى انا بالرغم من انى مش اسكندرانيه واه عندى هنا بحرى واللى بيحسنى اوى بس برضو بيوحشنى اوى الكلام مع بحر اسكندريه وبتوحشنى اسكندريه ككل بناسها وصوت موجهاوشوارعها
مش عارفه بتاخدنى ليها حاله حنين غريبه جدا
بجد ربنا معاكى
ويفرح قلبك اوى اوى اوى
انا مشفتش حد مبيحبش اسكندرية
حتي احنا اللي مش اسكندرانية بنستني الاسبوع اللي بنروح فيه اسكندرية كل سنة
ربنا يسعدك اينما كنتي يا هنودة
soooo
و أنا كمان وحشتني قوي في الشتا و الحر و الخماسين و الخريف و فكل وقت
--------------------
مين قااال (بالضبط)؟؟ أنا قلت كده؟؟
أنا قلت بتتحرك.. يعني ماجبتش سيرة موج
بس لو جيت للحق
عند أول الشط كده في خطر صغنووووون قال يعني يعني موجة
ربنا يصبرناااا
إنت ما عارف امتى حاتشوف اسكندرية تاني
وأنا مش عارفة امتى حاشوفني تاني
يارب
-------------------
لماضة
و الله العظيم أنا مكسوفة منك
واحشاني
أطلعي في يوم تلج قوي بجاكيت تقيل وكوفية و كوتشي وروحي للبحر وسلميلي عليه و شوفي حايحكيلك عنّي ايه
--------------------------
روزا
ماهو دايما القلوب الحساسة كده تلقط بسرعة و من بعيد وكمان بتبعت حاجات غالية و عالية
روحي شوفي سايبالك كومنت في البوست اللي فات
-------------------
ساعة الغروب
رووودي
عيطني كلامك .. ومش حاقولك ليه عشان اللي جواي صعب و بخاف عليكي منه
بس بجد بجد ... قربك عزيز و بتفرج عليه و استغرب ... معقولة الدنيا لسة فيها كده
يارب تيجي أيام نعمل فيها ذكريات في اسكندرية و بورسعيد .. نفسي قوي
ومين مش بيحب اسكندرية
ومين مش بيعشق هواها وشطها
فكرتينا بأيام جميلة
ربنا يرجعك بالسلامة
دمت بكل الخير
واه يا اسكندريه بحرك عجايب
ياريت ينوبني من الحب جانب
انا كنت لسه في اسكندريه من حوالى 10 أيام وقعدت على مقهي على الكورنيش وانا في ايدي كوز درة مشوي لاني بحبه جدا ومكملكيش بقى على الجو والهوى وعمايله بس انا واللهي افتكرتك انتي وصاحب مدونة اسكندراني وكان الجو دافي
تحياتي
اسكندرية وجمالها....حين كنت مقيما بمصر كنت أحب زيارتها في شهر مارس...جميلة جميلة فعلا بمعني الكلمه....
تحياتي و تقديري
سعدت جدا بزيارتك لمدونتى وسعدت اكثر بزيارتى لمدونتك الممتعة جدا وارجو ان نتواصل
أحمد مصطفى
آآآآآآآآآآآه
من إسكندرية وبحر إسكندرية
وموج إسكندرية
أيام وأحلى أيام
يارب يسعدك وتفضلي مبسوطة على طول
تقبلي تحياتي
هننننننننننننننوده يا حجه يا جميله
انت يا بت
وربنا انا هكسر المدونه علي البوستات الي فيها
وهدشدش التعليقات
عارفه لو اتاخرتي بعد كدا هعمل فيكي ايه
المهم
بعد الخبط والرزع والشخيط نكلم بهدوء شويه
ازيك عامله ايه
يارب تكوني بالف خير
اما اسكندريه بقي وحلاوتها
فانا عارفه ان كل الاسكندرنيه ليهم حب كبير اوي لارضهم
متعلقين بيها بشكل غريب اوي
فعلا بجد
انا نفسي اروح هناك
نفسي اوي يا هنوده ارجع انا خلاص علي اخري
ادعيلي يا قمر والنبي
والكلام الي بصوت عالي دا
شخيط ولن اتراجع
طمنيني عليكي يا بنتي
تحياتي ليكي اوي اوي اوي
ااااااااااااااااه
تعرفي وحشتيني جدا
ساعات بحس اسكندريه زعلانه ع بعدك
اه والله
الجو السنه دي محسسني بغربه جواها
المطر مش زي زمااان
ايام وايام
بقت فين لما تمطر
ولما بتعملها بطلعلك ع البحر واقعد في عز المطر ع البلوكات او اتمشي
واقووووووول فينك
---------------
انا معنديش دم انا عارفه
هبعتلك ميل
---------------
I really Miss U
V. V. V. Much
قول عليا مجنون
هنودتي
الاماكن بتسيب فينا اثر طول العمر
عارفة ، انا بحس فيكي حلاوة ودفء اسكندرية
وشعبيتها
واحشاني جدا
(Y)
مصراوي أوي
بتروحوا اسبوع واحد بس؟!!!
وأكيد طبعا في الصيف
نصيحة بقى من أختك هنوده
روح زور اسكندرية في اسبوع شتا زي اليومينن دول و بالذات أما يكون فيه نوة وابقى شوف مواعيد النوات من عند اسكندراني أوي
حاتشوف اسكندرية بشكل تااااني خالص مليان دفى في عز البرد و مليان ونس في عز الفضى
بشكرك ع الدعاء اللي آمنت عليه ليّ و لينا كلنا
تحياتي
-------------------------
صاحب المضيفة
أجمل ما في الأيام الجميلة هو اللي بتحسسنا بيه أما نفتكرها
ربنا يجعل كل أيامنا جميلة
أو أقلك
ربنا يجعلنا من الناس اللي قلوبها قادرة تشوف الجمال اللي في الأيام
كده أحسن
صح؟؟
تحياتي
------------------------
حسن أرابيسك
أهلا بصديقي العزيز
:)
نقلتلي صورة كانت واحشاني بس كان ناقص تقوللي اسم المقهى عشان تكمل الصورة كلها
:)
فرحت قوي انك افتكرتني.. دمت بخير يارب
تحياتي
-------------------------
الربان
أصبت فعلا.. مارس.. من أجمل شهور السنة و بالذات في اسكندرية.. بتبقى غيوم الشتا لسة سايبة في السما بواقي متفرقة صغيرة فبتبقى كمجسمات في السما
وفي نفس الوقت الشمس بتكون مشرقة قوي و لونها قوي بس من غير حر ولا رطوبة
آآآآه
لو حاوصف للصبح مش حاخلص
أشكرك على تقديرك
:)
تحياتي
-------------------------
يا مراكبي
سبتلك رد من بدري موجود في تاني تعليق فوووووق ... بس نسيت أكتب انه ليك
:)
تحياتي
أحمد مصطفى
أكيد باذن الله نتواصل وأسعدني جدا ان مدونتي الضغنونة عجبتك
أهلا بيك في أي وقت
:)
تحياتي
--------------------------
أمير القلوب
آه ده طالعة قوية ؟؟؟؟
بطلّع زيها في الغربة ميت مرة في اليوم
بس عارف؟
بوصل و بيجيني ردها ويفرحني
أشكرك ع الدعاء الغالي
وعلى الزيارة العزيزة اللي اتشرفت بها
تحياتي
جهينة
بصي انت نزعقي و تخبطي و ترزعي برااااحتك
عشان بجد أنا مكسوفة منك جدا و عارفة اني مقصر ع الآخر..ز بس أقولك ايه؟؟
أهي حالة و انزاحت الحمد لله
انت على آخرك؟؟؟
ومين سمعك.. أنا كل يوم اصحى و أسأل أختي
مش كفاية بقى؟؟؟
بس انت بقالك كتير قوي فعلا.. يارب ترجعي بالسلامة و بسرعة مش عشان خاطر عيونك و بس
عشان كمان نفسي فأخبار حلوة
;)
واحشاني
زمردتي
احنا بقى هنا الجو عندنا تلج بجد بجد.. الحرارة و صلت لخمسة بس
و مطر بقالها كام يوم و سقف البيت بيمطر جوة البيت و عيشة زي الفل
هههههههههه
عارفة... الجمعة اللي فاتت قعدت في عز التلج ع البحر هنا.. كنت قاعده على سلم ع الكورنيش واسع كده و جميل و منه للميّة
ساعتها تخيلتك انت و كلهم حولي
شفت أيامنا على اليلوكات .. شفت تنطيطنا و لعبنا بالزلط في المية
يااااه
الغربة فينا
جوانا أو برانا فينا
تنده علينا
تجاوبها أيامنا الحزينة
قصدي يعني الغربة من جوة ,, وده أصعب من غربتي أنا .. مايهونش علي احساسك بيها
يا رب يجمعنا على خير يا بنتي
متغيرة شوية
تصدقي اني ولا كنت أعرف انها محتلاني بالشكل ده أيام ما كنت هناك!!!
بس ده أجمل احتلال عمري ما اتمنى منه إستقلال
:)
أيوة كده .. تعالي كتير
:)
مساء الخير هنودة الاسكندرانية في الغربة؛
اسكندرية والحنين لبحرها يعمر القلب بالذكريات بما فيها من حلو ومُر
ربنا يجعل أيامك سعيده وتعدي الغربة بدون إغتراب عنها
تحيات إسكندراني في بلاد الله الواسعة
سلام وسؤال اخبارك اية؟
Iskanderai
آمين يا رب العالمين
عارف؟؟
أنا ولا كنت أعرف انها بالغلاوة ده
ولا كنت أعرف ان البعد عنها له التأثير ده
كنت فاكرة إن الناس اللي بحبها هم أكتر حاجة حاتوجعني في البعد
بس طلعت مش عارفة حاجة
:)
تحياتي
اسكندراني في الغربة
السلام و السؤال وصلوا وسمّعوا
:)
أنا تماااام.. وكل ما (تمام) تطول يبقى إتأكد أكتر
:)
تحياتي
لست وحدك من شعر بهذا الاحساس
كل واحد بيحب البحر حساه
لكن هيهات
اين مياه كورنيش الدوحه
جنب بحر اسكندريه اللي لما بيغضب
بنضحكله كلنا
اه يااااااني
إرسال تعليق