وليه أنسى

و الله باينلي ماراح أنسى.. ولا أنا عايزة أنسى
وأنسى ليه وعشان مين؟.. وايه أغلى من اللي كان فيخليني ألبي

ده أنا كل ما ألاقي سكة .. تُشرط علي النسيان لجل ما أخطّيها
وأقول بالعقل كده أنا لازم ألبيها
وأنسى
ألاقيه يقوللي .. وأهون عليكي؟
هو أنا رخيص كده عشان تزيحيني و تعدّي
ويسألني
جه اليوم اللي أبقى فيه ممنوع على قلبك
فأرد عليه

لا و الله
ولا فيه أغلى منك في الدنيا
ولا حتى عمري و أحلامي

******


وبعدين تيجي الفرحة من تاني
وتقوللي تعالي
وتنبهني.. إنها مش طيبة قوي كده
ولا بتعرف تزور اللي يفرط فيها و يسيبها
ده كله لجل عيوني بس
وترمي في وشي الشرط
يا أنا .. يا هو
فأقولها انتِ
فأشوفني أنانية و جامده و قاسية
وألاقي صورتي قدام نفسي تخزي
وأشوف ملامحه مطفيّة
وفعينه عتاب بيكويني
******
فأهرب و أفرح بهروب جميل
هروب أسرح فيه بمزاجي
ولا حد يقوللي ممنوع ولا إنسي

ويشوفوني كلهم على إني غلطانة
وأنا ولا على بالي

وعمري يسألني لحد إمتى؟؟

مايسأل زي يسأل
ولا يضيع ولا يتفلق
أنا فرحانة كده
فرحانة بشرود أشوفه فيه
وبحلم قصير يطل عليّ بيه
وبوحده مافهاش ممنوع
حاتألم بعدين
ماشي
وبعدين؟؟

ماعرفش