الواد العسل ده عيد ميلاده بكرة2/2
عيد ميلاده العاشر
وأنا عمري ما جبتله هدية لعيد ميلاده
ويمكن مرة واحده بس أو مرتين كنت موجوده معاهه في عيد ميلاده
رغم إني بموت فيه و رغم إنه قريب من قلبي بشكل كبير جدا
هو عارف قد ايه انا وهو بنندمج مع بعض
ممكن نقضي يوم كامل أنا وهو ويبقى يوم مليان فرح و ضحك و هزار و جد
ده حسن ابن خالي
وصاحبي
وإبني
لينا مواقف كده نعرفها أنا وهو و أما برجع بفكّره بيها و نضحك
يوم ما وصلت من المطار و طلعت البيت في الأجازة اللي فاتت لقيته نايم في سريري
وكانت الساعة 5 الفجر ورحت أصحيه ففتح عينه في عز نومه و قالي باندهاش
هند!!
وقام واخد راسي تحت دراعه و نايم تاني
أنا بعدت عنه كتير بعد سفري
لما بشوفه في الأجازات ما بقضيش معاه وقت طويل زي زمان
وحسن من النوع اللي عشان تقرب منه لازم تعدي عليكم أيام في البيت
ما ينفعش زيارة كده وسط الزحمة
بس أنا قضيت معاه يوم من أجمل أيام الأجازة اللي فاتت
كان يوم شبه أيامنا أنا وهو أما كان عايش معانا فترة في بيتنا قبل ما أسافر
فاكر يا أبو علي أيام ماكنا ننزل سوق زنانيري نشتري العيش و الفول و البيض و اللبن و كنت تشيلي الكياس و تعدي على أصحاب المحلات و تسلم عليهم وتمسك ايدي و تعديني الشارع
عارفين؟
مرة دخلت أشتري حاجات من اللبان و سبته برة على الباب عشان الزحمة الي جوّة وسمعت زعيقه من جوة و خناقة لرب السما
طلعت لقيته ماسك في خناق راجل كبير
ليه؟؟
عشان قاله إزيك وهو بيلاعبه بصبعه في خده
وكان مبرره لما زعقتله هو
"هو أنا صغير عشان يعملي بصبعه كده؟"
كان أيامها ما كملش 6 سنين
حسن ده ممكن يدخل معاك في مناقشة لمده ربع ساعة عشان تقنعه يسيب حاجة هو عاوزة يعملها
و خلال المناقشة لا انت تزهق و لا هو يززهق
ومش بس كده
ده كمان يفضل فاكرهالك طول عمره انك ناقشته ما جبرتهوش
وكان يستغرب قوي لو خلصت المناقشة و كانت النتيجة لصالحه و إن أنا اللي سمعت كلامه
ويحكي لكل الناس إني سمعت كلامه
وهو صغير أكتر كان فاكر إن ماحدش يقدر يخوفني أو ما يسمعش كلامي
وكان دايما يقوللي
عارفة أنا بحبك ليه وبسمع كلامك؟
فأقوله ليه؟
يقوللي عشان إنت بتتكلمي معاي و بتسمعي كلامي
عنده خفة ده مش عادية وحمقي جدا
هو نجح إنه يجبر خالتي و عمي على قبول رفضه للجبنه التركي فحذفها فعلا من قائمة الفطار تماما
و بقى البيت كله عارف كويس جدا انه ما بيحبش الجبنة التركي
فمرة كنت عندهم وهو بيفطر
فقلتله أعملك ساندويتش جبنة تركي؟
قاللي لأ
سألته ليه
قاللي بصوت عالي .. أنا ما بحبش الجبنة التركي
فقلتله
إنت حاتستعبط .. ما أنا طول عمري بعمله ساندويتشات جبنة تركي و بتاكلها
فقرب مني و بصوت واطي قاللي
أنا أساسا ما بحبش الجبنة التركي و كنت بسمع كلامك عشان ما أزعلكيش
مش عشان أكلت جبنة تركي في بيتك يبقى بحبها .. خلاص؟؟؟
فحافظت على صورته و خفضت صوتي أنا كمان عشان ماحدش من البيت يعرف إنه كسر القاعده يوم و يستغلوا المعلومة و يجبروه على الجبنة التركي
بصّوا
أنا لو حكيت عن حسن مش حاسكت
بس بجد
هو طفل مش عادي
واجه أحزان تهد جبل
عاش مشاعر كتيرة بدري قوي على سنه
ورغم ده
تلاقيه عارف يحس كويس قوي مين اللي بيحيه
وعارف يحس قوي بالخير جوة الناس
يا رب تكون سنة سعيده عليه
ويارب أشوفه شاب ناجح و عارف هو عاوز ايه
ويا رب يفضل يحبني و قريب مني مهما الغربة بعدتني عنه و قربت ناس تانيين
يارب يفضل فاكر أيامنا أنا وهو وقاعدتنا في شباك بيتنا و حواديتنا اللي كنت بحكيهاله و يحكيهالي
يا رب يحميه من كل اللي بيحاوطه
ويهديه ويجعله من الصالحين
كل سنة و هو طيب
هناك 14 تعليقًا:
كل سنه وهو بخير وربنا يخليهولك يارب ويحميه
هند
يعنى اسكندرانيه زى بعض
متغربين زى بعض
بنات زى بعض
مبننساش ومخلصين زى بعض
وكل ده ومنعرفش بعض ازاى يعنى
ينفع كده
انا فرحانه بيكي
:)
ما شاء الله
كل ده عن حسن؟
واضح انك بتموتي فيه فعلا
ربنا يبارك فيه وينجحه في كل حياته وتشوفيه من أحسن الناس
انا بفرح اوي لما اشوف ان لسة فيه مشاعر كده وحب جميل بالشكل ده
مش عارف
حاجات كتير اوي جميلة حسيتها ف البوست ده
مش مجرد تهنئة بيوم ميلاد حسن وبس
بس يمكن مش بعرف احكي كويس
صدقيني يا هنودة
لو انتي حاسة بالغربة عشان انتي بعيد عن اهلك وناسك وده شيء تاعبك
تأكدي انك احسن من غيرك اللي عايش وسط الناس ووسط أهله وبردو حاسس بغربة فظيعة
يمكن يكون كلامي مش مرتبط اوي بموضوع البوست
بس فعلا ده اللي بيجي ف بالي وانا ف مدونتك دايما
كل سنة و هو طيب وقريب منك
بقاليك كتير حزينة و بتعقبي نفسك على حاجة مش ذنبك .
عارف حتردي تقولي اية علشان قريت كل ردودك على الي بينصحوكي بالنسيان
مسبتيش لينا حاجة غير انا ندعي
يا رب كل الي بتحبيهم يكون عيد ميلادهم قريب علشان تفضلي سعيدة كدة
اييييييييه..بقالي كتير نفسي اقرالك بس اللينك ضايع والنت قطه بقاله كم يوم..المهم إني رجعت اقرالك تاني..وأ؛لى هدية عملتيها للواد إنك كتبتي عنه النهاردة..كل سنة و هوا وانتي طبيبين..وعقبال ألف سنة0
كل سنة وهو طيب
واكيد طيب عارفة لي
عشان هو قريب ليكي و من العائلة وكمان والاهم هو برج الدلو
يعني زي البرج بتاعي
ونولد بيوم ابن اختي ما اتولد
الي هو نسخة عني بطريقة مش طبيعية
كل سنة يا رب هو كدة
بس على فكرة هو حساس جدا
حاولي يخفف الموضوع دة
عشان انا عارفة طيبة القلب دي والحساسية مشكلة في الحياة الي احنا فيها دلوقتي
ودي من احدى مشاكلي في الحياة
بس انا زعلانة منك يا هنودة
كدة مش بتزوري المدونة بتاعتي
ولا بتعيدي عليا في عيدي وانت من اقرب الناس عليا
:(
كدة وانا بعتبرك اختي يا اسكندرانية
سلام يا جميل
ربنا يفرحك دايما
ويخليه ليك
كل سنه وانت طيب يا ابو علــــــــــي
ويارب اشوفك دكتور قد الدنيا
:)
نسرين بسيوني
آه .. يارب يحميه
وأنا بقى فرحانة أكتر بكل أوجه التشابه و بالذات تشابه الغربة
على قد ما الغربة حاجة وحشة جدا على قد ما هي بخلينا نحس ببعض قوي و قلوبنا تبقى حساسة قوي قوي
لا يا سيتي
ما ينفعش ما نعرفوووش بعض
أنا جاية أهو على طول أتشرف بمعرفتك اللي بجد بجد
فرحتني
:)
آلام و آمال
آمين يا رب
كلامك أنا فاهماه كويس لإني في فترة من حياتي و أ،ا في مصر حسيت بالغربة اللي بتحكي عنها و فعلا أذتني قوي
وأما بقارنها بدلوقتي بحس ان رغم اقسوة الغربة بره لكنها أهون
أهون إنك تبعد عن ناسك تماما من إنك تعيش وسطهم وإنت بعيد عنهم
تحياتي ليك
هند
فين البوست الي أنا علقت عليه أمبارح؟
شيلتيه ليه؟
ولا انا كنت بأحلم مثلا ومتهيالي؟!!!!!
Alexandrian far away
أنهي بوست؟؟؟
هههههه
ايه اللخبطة ده
أنا ما حطتش بوست و شيلته
آخر بوست حطيته هو الكئيب اللي فوق و لسة محطوط ما شلتهوش
أنا عندي مشكلة كبيرة جدا في التركيز و بتوه بسرعة و ممكن بسهولة جدا حد يقنعني باني عملت حاجات معملتهاش
فايه النظاااام؟؟
:)
تحياتي
اسكندراني في الغربة
آسفة بجد إني بتأخر في الردود
وكمان ايه.. ببجاحة شديده بنزل ببوست جديد
:(
عارف؟
مزاج البني آدم ده حاجة غريبة جدا
ممكن حاجة صغيرة جدا تبوظه .. وحاجة صغيرة برضه تفرحه لأقصى درجة
تخيل بقى لما تكون الحاجة ده كبيرة؟
أنا بقى عندي حاجة كبيرة قوي أما ألاقي حد يتمنالي الفرحة من قلبه
:)
تحياتي ليك
أحمد المصري
و إنت طيب
:)
و الحمد لله ان النت رجع و شوفناك
:)
تحياتي
ما شاء الله ربنا يبارك فيه
ويسعده دايما ويديم المحبة اللي بينكم
وتكبروا وتفتكروا دايما
إرسال تعليق