مبروك يا مصـــر

مبروك لمصر كلها

مبروك على المنتخب الفوز

ومبرك علينا الفرحة

و مبروك على كل المتغربين الحضن اللي أخدوه إمبارح

نزلت إمبارح وحضرت الماتش في تجمع كبير قوي و إكتشفت إن قطر مليانة مصريين

كلنا جمعنا حبها و جمعنا شوقنا

الفرحة خلت وشوش الناس الكبار في براءة و بساطة و لهفة الأطفال

سمعت ضحكات طالعة من عمق القلوب

و غنينا لمصر

أول مرة فحياتي أحضر ماتش في الشارع و أشجع

أول مرة أتلف بمصريين في الغربة و تتلاحم مشاعري بكل قوتها مع قوة مشاعرهم ونوصل لاحساس بنشوة وصلت للجنون

الناس اتجنت امبارح

مبروك يا مصر

ملحقتش أنزل أي فيديو عن اللي حصل هنا إمبارح

مافيش غير الصورة ده اللي معايا دلوقت

بس كان لازم آحط البوست ده و أبلغ كل المهتمين إن بابا وافق اننا ننزل الشارع نتفرج ع الماتش

آه ما جاش معانا عشان شغله

بس كان لازم أفيدكم بالخبر ده اللي سألتني عنه مصر كلها

:)

الحمد لله على الفوز

و الحمد لله ع الفرحة اللي بتيجي كده معرفش منين

فتملى العنين دموع

و تملى القلب حياه

وتمسح كل حاجة صعبة

و حتى اللي مابيتمسحش بتخليه جميل و طيب وعزيز

الحمد لله