انهاردة 30 ديسمبر
بكرة راس السنة
.
.
ومش حاتكلم عنه خااالص
ولاحاقول بيفكرني بايه و مين
وحاكتم دموعي و اطنش خالص
وحاقفل بقي و أسكت خالص
بقالي كتير ساكتة و حافضل ساكتة
عاوزة اليوم ده يعدي بسرعة
من غير ما آخد بالي
.
انهاردة 30 ديسمبر
.
آه لسة ماحجزتش التذكرة بس عموما المفروض اني خلاص حاحجز أول الشهر
و انشاااء الله حاتكون أول فبراير
يعني فاضل بس شهر
بس شهر
شهر
يــاااه
كل ده
شهر 8 و 9 كانوا ميثاليين قوي اني انزل فواحد فيهم
كنت مليانة طاقة أكتر
كتر مطنشة أكتر
كنت مش فاهمة حاجات كان أحسن لو فضلت مش فاهماها
دلوقتي ماعنديش حاجة أنزل أعملها
مش نازلة غير عشان بس بيتنا وحشني
وعشان تعبت من هنا
لكن ماعنديش اي فكرة حانزل أعمل ايه
حاحس بايه في البيت
أنا مش قلت حاسكت
مش عارفة مابسكتش ليه
بس انا نفسي اعيط في حضن حد يكون قريب
نفسي اشوف ملامح قدامي حنينة معاي
نفسي ماحسش اني جامدة و كل اللي حولي جامد وبارد
مين اللي قالهم اني قوية قوي كده
أنا مش قوية للدرجة دي
والله فاهمني غلط الناس ده
وأنا نفسي فحد يفهمني صح
ونفسي آخد قطتي معاي مصر
ونفسي أكون في مصر فراس السنة وهي معاي
وأكون فقوضتي واقفة فالبلكونة بالكوفية البيج
.
أديني حاسكت تانى أهو
وحاحاول
حاحاول أفضل ساكتة
وملامحي جامدة
وحاحوش كل حاجة لبيتنا
بعد شهر
.
ده مش بوست
ومش عارفة ده ايه
وحاسة اني عاوزة أقول آسفة
ومش عارفة على ايه
هناك 32 تعليقًا:
مين اللي قالهم اني قوية قوي كده
..............................
مين صحيح
يمكن الظروف والزمن حكمو علينا لازم نبان كدا والا هننكسر ونموت
تماسكي
والله ما عارفة اعلق اقول ايه بالضبط
انا كمان هسكت
ونفسي التعليق ده يتضاف باسمي الحقيقي مش بنيكنيم وماتسألنيش ده ايه علاقته بالبوست
ولا اقولك عايزة اعلق على كام حاجة
منكن ؟؟
مش هعرف اسكت بردو
بصي
مفيش حاجة بتمر اسرع من الايام
تانى حاجة
ليه عايزة تسكتي وماتتكلميش
طب انا عايزة اعرف طيب
اقولك اتكلمى وماتبصيش لكلامك ... انا هشوفه ومش هقولك عليه
انا مش بهزر
طيب خلاص خدي قطتك معاكى
واعملى راس السنة فى فبراير ايه المشكلة :)
ماتخليش حاجة فى نفسك ممكنة وماتعمليهاش
ممكن؟
Mona
:)
ماتقوليش اسفة
انا حاسة بيكي
و عيني دمعت معاكي
نازلة كمان شهر ؟
سلملنا عليها
احنا قدامنا 6 شهور
بس هي هتضمك و تنسيكي همك ..
صدقيني ..
انا بنزل بحس ان كل حاجة ردت فيها الروح بالرغم من كل حاجة وحشة تانية..
خلاص بقى يا هنودة فكيها عشان السنة الجديدة تبقى كلها فرح وسعادة
ربنا يدخل الفرحة فى قلبك ويزيح همك ويفرج كربك عن قريب بإذن الله
هنود انسى اى حاجة حزينة ممكن تنكد عليك وافرحى وخلى عندك امل انك خلاص قربتى تنزلى لبيتكم ولاسكندرية حبيبتك ومعشوقتك
عارفة حتى لو هتلاقى الحبايب اتفرقوا والدنيا ماخلتش حد فى مكانة كفاية انك لما تدخلى بيتكم وتدخلى اوضتك هتفتكرى ايامك الجميلة ولما تقفى فى عز المطرة وهى نازلة وتلبس الكوفية بتاعتك والا شكل البحر وريحتة ولما تزورى اى مكان ليكى ذكرة فية حتى ولو لوحدك هتحسى بطعم السعادة
تعرفى انى لما بلاقى الحزن محاصرنى من كل حتة ومش بلاقى حد اشكى وافضفض معة ولا حضن حنين يطبطب عليا بقعد وافتكر الايام الجميلة الاى عديت من عمرى وساعتة بحس بفرح
وادعى ربنا انة يحقق كل الاى نفسك فية
وماتسمحيش للحزن انة يكون لية مكان لان صدقينى الفرصة مابتجيش كذا مرة
و اوقات الفرح مسروقة من عمرنا لية باة نسمح انها تعدى من غير ما نتمسك بية
وكل سنة وانتى طيبة يا اجمل هنودة
معلش رغيت كتير بس بحبك ومش بحب اشوفك حزينة وكنت بتمنا انى اعرف اشوفك لما تنزلى اجازة
يارب تكون اجازة سعيدة عليكى
بغض النظر عن الكلام اللى كتبتيه
بس الكلام نفسه بيريحك
وحتى لو كان مالوش معنى
وبلاش اسف دى مدونتك :D
سلام عليكي يا هنودة
و انتي و الله وحشاني جدا
اولا كل سنة و انتي طيبة و يا رب السنة دي يكون جواك حب و دفا و امان يطمنوا قبلك الجميل
ثانيا انا مستنياكي و مستنية تقوليلي انك وصلتي بالسلامة و اني هشوفك قريب
ثالثا
مدام الاه وجعاكي و تعباكي ليه تسكتي؟؟؟
لا متسكتيش و اتكلمي
قولي اللي جواكي و اتكلمي بحرية
ربنا يفرحك السنة دي اوي يااااارب
سلام يا جميلة النفس و الروح
مها
عارفة غحساسك دا قوى
ربنا يقويكى
و ميجيلكيش إحباط من نفسك
و من اللى حواليكى
أحسن حاجة أنك نازلة مصر
يعنى لو إتجمنا فى يناير ممكن تيجى نشوفك
صحيح مصر بينها و بين إسكندرية شوية
بس لو جيتى هتبقى اجمل حاجة حصلت
تيجى الف سلامة
و ربنا يخيب كل الظنون و تبقى احسن ايام تقضيها
كل نة و إنتى طيبة يا قمراية
إسكندرية هتحلو اكتر ما حلوة
ألف مرة بمجييك
و معلش خلى هانم هناك لأن الحجر الصحى بهدلة عشانها قوى
صحابي وحبايبي
أنا آسفة اني متأخرة بقالي كتير و بقالي كتير ما اتونستش بمدوناتكم وبالقرب منكم
بس فترة وتعدي و ألاقيني وسطكم تاني
وحشتوني قوي قوي
سلام عليكم
كل سنة وحضرتك طيبة يا أستاذة
مبروك نزولك القريب
يارب تلاقى كل اللى بتحبيه واللى ربنا يخترهولك كمان وربنا يحببك فيه
عيشى الحقيقة ياهنودة ... يمكن ييجى وقت منلاقيهاش أو ننساها
انزلى مصر واتكلمى واتصرفى زى ما عاوزة على طبيعتك ولما ترجعى برضه خليكى زى ما انت ..
ان شاء الله تكونى بخير
تحياتى
ازيك يا عروسة بحر اسكندرية و شطها اللى مامفيش فى جمالة اتنين
كل سنة و انتى طيبة و انشاء الله تكون سنة جميلة عليكى و تحققى فيها كل امانيكى و تقربى من كل اللى بيحبوكى و تحبيهم
على فكرة انا حاسس ان فى حاجة حلوة حتحصل السنه دى
انتى قوية بس على نفسك مش على حد تانى و اللى تعبك ان ده مش على طبيعتك
حولى السنة دى تفتحى صفحة جديدة مع نفسك و حلى المشاكل بواقعية و حب متظلميش نفسك و تحمليها فوق طاقتها عيشى و حبى و اتحبى حتى لو مش قدرة تحبى حد لو فى حد بيحبك بجد سبية يحبك اكيد هو الكسبان كفاية انة بيحب بنت عندها كل الأحاسيس و المشاعر و القلب الكبير زى اللى بنحسة فى كلامك سدقينى انتى بردة الكسبناة وعلى راى منير
الدنيا لو جرحة هون لها و فرحة خلينا نفرح صح و نحس بطعم الفرحة بجد و نحب ما تكرهش اللى جى مش اد اللى راح و لو بقدينا كنا قلنا قول للزمان ارجع يا زمان و كل سنة و انتى طيبة
متهيألى عرفت ليه اربيسك بيجد تشابه بيني وبينك
يمكن علشان الغربة وجعانا
يمكن علشان اتفرض علينا نبان اقويا
يمكن علشان اللي بيسيطر علينا هو احساسنا
وهو اللي بنعبر عنه
لما تيجي هتلاقي حاجات كتير تعمليها
البحر يحضنك وانت تحضنية بعنيك
امشي في وسط الناس وهم هيدفوكي
اسمعي صوت مصر حتي لو كان صراخ
حوشيه جواك يمكن يسندك بكرة
دبي رجليك في الارض علشان تثبت جذورك فيها
وترجعي ليها
استمتعي بانك راجعة
سمراء
طبعا ده مش بوست .. دي فضفضة
وياترى التذكرة إتحجزت؟
انا حره
دوامة
والله ماعارفة لما بتهيج و تعصف بكون أنا اللي مزوداها و لا الدوامة هي اللي مزوداها معايا
ولما بتهدى و تبرد ونصحى الصبح نلاقي المية ساكتة و نايمة زي مراية ولا لوح ازاز
ساعتها ما بنعرفش هو احنا مش طبيعيين و لا هو ده الطبيعي جدا
فاهمة مني حاجة؟
-----------------------------
آلام وآمال
ازيك يا محمود
بفرح جدا لما ألاقي تعليقك رغم تقصيري الفظيع
ما تقلقش علي كل ما أفكر و واتخيل اني نازلة بجمد قوي:)
تحياتي
-----------------------
كفاية طيبة
واحشاااااااااااااني
ههههههه
عافة بضحك على ايه
تخيلت اني عاملة راس اتلسنة في فبراير و قمت طالعة البلكونة و أخدت كام ازازة و طبق و حدفتهم من البلكونة على الشارع الساعة 12
الناس حايطلعوا يشتموني و يقولوا علي مجنونة
رؤغم المشهد ده بيحصل في كل البلكونات يوم راس السنة و ماحدش بيقول أي حاجة
عارفة حاسكت ليه
عشان كل ما بس يبان علي اني نفسي اتكلم بلاقي اللي جاي جري يترمي على صدري و يشكي و يبكي عشان أنا اتكسف و أسكت
وبشوف في عنيه تكبير الدماغ و بتعب
و بزعل من ناس ماينفعش ازعل منها
ونفسي أنا اللي اختار اني ماينفعش ازعل منهم
لكن المشكلة ان ده ماينفعش برضعه غصب عني
عاجبك كده
اديني اتكلمت بس انا مش حابص على اللي كتبته
ماشي
ممكن أطيب منك طلب؟
منكن؟
عاوزة دايما أقولك نونا
عارفة امتى بحس ان حد مني أكييييد قريب و أكيد ما بيتهيقليش؟
لما بلاقيني دايما مرسوم على وشي ارتسامة مليانة راحة كل ما بتجيني حاجة منه
حتى لو الحاجة ده نقطة بس
زي ده كده--> .
ريم
الله يسلمك.. أكيد حاسلملك عشان حاجتين
الحاجة الاولي اني أما بصدق حد يقولي سلميلي عليها
الحاجة التانية اني عارفة كوييس جدا بدون أدنى شك انها بتحس بالسلام و بيوصلها و بتبعت الرد كمان
تراهني؟!
تعرفي ؟
ساعات أهاجم نفسي لما بكتب كلمات معينة في بوست و أقولها انتي بتكتبي ده عشان تستدرجي التعليقات لكلام انتي عاوزاه يتقال و عاوزة تسمعيه عشان يغطى على حاجة بتهربي منها
وبزعل من اللي كتبته و أتعب من التعليقات
بس في وسطها كده بلاقي كلام بيطبطب قوي
و يحسني اني بفتري على نفسي
و الاقيه بيفرحني فرحة كان ايه حايفرحهالي لو ماكنش الكلام ده اتكتب
اهو كلمتك "ماتقوليش آسفة"
عملت معاي الفيلم ده كله
يارب الست شهور يعدوا بسرعة تنزلي وترد الرح و تعملي مخزون كمان يكفي اللي حاييجي تاني بعد الاجازة
أكيييد سعيدة بمرورك
وآسفة على التاخير
--------------------------
صدى الصمت
تسلملي دعوتك يا رب
يارب تكون السنة الجديدة كلها فرح علينا كلنا يااارب
تحياتي
------------------------
غير معرف
حاموت و اعرف مين
يوم بفرح و يوم أخاف و يوم تيجي حاجة تكربها على راسي
ويرجع تاني ييجي يوم الاقيني فرحت كده لوحدي تاني
و اهو كده لحد ما الميعاد ييجي
هي كده ايام ما قبل السفر على طول
وماتقلقيش علي في الحتة ده بالذات عشان انا هناك بعرف أعمل من حبة الفرح قبةو افرح بيها فرحة أكبر منها بكتير و بعرف اتونس بالشارع و ملامح الناس و ظل البيوت و الشجر و طلة الشمس و نقط المطر
عندي هناك صحاب كتير
صحاب من اللي مابيتشغلوش و لا مابيزهقوش و لا ينسوش
لا بيكبروا و لا بيبعدوا ولا بطلعلهم صحاب تانيين غيري
آه ياني
الكلام خلاني عاوزة أنزل بكرة الصبح
بالعكس كلامك جميل قوي و قريب قوي و لما لقيت السطور بتقل كان نفسي ما تخلصش
قوليلي مين
أعرف ازاي يعني بس
باة مش عارفنى يا هنود كدة ازعل والا انتى عايزة تزوغى وماتعزمنيش على اكل سمك اسكندرانى طالع من الماية بيلعب ههههههههههههه
بس انا بحبة مشوى على فكرة
عايزة تعرفينى دورى عليا عندك فى احضان دفى واكيد هتعرفينى
تعرفى كان نفسى اقابلك لما تنزلى هناك لان بعشق الاسكندرية فى الشتاء بس حبايبى الاى بنزل عندهم مش هيكونوا موجودين فى الوقت دة
فابدعى ربنا انها تكون اجازة جميلة عليكى وابقى ادخلى اكتبى حتى وانتى هناك واوصفى كل حاجة عشان احلم انى معكى واتفسح على حسك شوية ما انتى هتبقى المرشدة بتاعتى باة
ربنا يرجعك لينا بالسلامة
انا جاية اطمنك عليا
لانى مش قادرة ارد على التعليقات كلها عندي
عندي برد مبهدلنى يا هند :(
وغبت من الشغل نص يوم .. المدير عمل ازمة والناس اللى بتحب تصطاد فى المية اللى مش نضيفة ظهرت بقي وكدة .. اكيد عارفة النوعية دي :)
المصيبة انهم مصريين زينا :)
ماعلينا
هو فعلا الناس بتكسر اطباق فى راس السنة D:
فكرتيني بتوم وجيري لما كانوا بيكسروا اطباق على راس بعض
الغريب انها كانت بتتكسر بسهولة اوى
D:
----
عشان كل ما بس يبان علي اني نفسي اتكلم بلاقي اللي جاي جري يترمي على صدري و يشكي و يبكي عشان أنا اتكسف و أسكت
----
طيب بلاش تشكي لحد
بس على الاقل اكتبي
والله الكتابة بتفرق جامد :)
انا بقعد بالكمبيوتر كتير على السرير بتاعى هنا وافتح صفحة وورد واسيب ايدي تمشي عالكيبورد
حتى ماما تستغرب لان مش موصلة النت
وتعرف انى بكتب اى حاجة خاصة بيا
ده فى حالة ان مليش مزاج اكتب بالورقة والقلم اللى هم احب لنفسي من الكمبيوتر
بس هنا مش عندي مكتب زي مصر ولا اباجورة اكتب على نورها الدافى
فبكتب عالكمبيوتر
رغاية رغاية انا عارفة
بس عايزة اقولك مش تكتمي حاجة فى نفسك وتخليها تزعلك بعد كدة
-----
ممكن أطيب منك طلب؟
منكن؟
عاوزة دايما أقولك نونا
------
اى حاجة منك هتبقي حلوة :)
----
عارفة امتى بحس ان حد مني أكييييد قريب و أكيد ما بيتهيقليش؟
لما بلاقيني دايما مرسوم على وشي ارتسامة مليانة راحة كل ما بتجيني حاجة منه
حتى لو الحاجة ده نقطة بس
زي ده كده--> .
----
انا شاكة اصلا انك قطعة منّى انفصلت عنى من مدة وطلع ليها رجلين وايدين منفصلين عنى كدة
بجد سبحان الله انى قدرت اكتب التعليق الطويل ده
انا مش قادرة اتنفس اصلا
بس جيت عشان اقولك انى كويسة ولسة عايشة :)
ادعيلي كتير ياهنودة :)
معلش تعليق طويلون اوى
سامحيني D:
وحشتييييييني يا هنوده يارب تكوني بالف خير وصحه وسعاده
ربنا يحققلك كل امالك في السنه الجديده وتبقي اسعد سنه عليكي يارب العالمين
ابقي طمنيني عليكي يا حبيبتي
سلام عليكي يا هند
وحشاني اوي
يا رب تكوني بخير
يا رب تكوني مبسوطة و في قلبك امان
طمنيني عليكي
سلام
مها
لو كنت في مصر ساعتها ماكنش حاجه في الدنيا منعتني اتي اجيلك و اديكي الحضن ده .. حتى لة كنتي هتقلي بفرض نفسي عليكي ماليش دعوه بقى
---
هنوده افضلي دايما انتي
ماتزعليش منك .. يا بختك بقلبك الرقيق ده اصلا
---
و بعدين انا بحملك امانه لما تنزلي في فبراير استمتعيلي معاكي بيها و اتبسطي و افرحي عشان هتعملي حاجه مستنياها من زمان :)
و كمان لسه الفرصه مارحاتش على الوقوف بالكوفيه البيج في البلكونه :)
---
:)
هنوووده
اذيك
ومش هاقولك عامله ايه
باين طبعاً من اللي قرأته عامله ايه
ساعات بحس في كلامك غُنا بس غُنا موجوع
بيوجع
كتير بحسك طائر الكروان بدعائه
صوته جميل بس مليان وجع وحزن وحكايات
بحس دايماً فيصوت الكروان لما اسمعه بالليل انه قبل ايروح على بيته عاوز يحكي للناس ويفضفض على اللي في قلبه على اللي تعبه من الدنا ومش عارف هي الدنيا عايزه منه ايه وحكمة ده كله ايه وعاوزه منه ايه وأخرتها ايه في رحلته الطويلة البعيده
تدوينتك واللهي المره دي مقاطعها زي أغنية قعدت اردد فيها بشكل غنائي خصوصاً المقطع الأخير
أديني حاسكت تانى أهو
وأحاول أفضل ساكتة
وملامحي جامدة
وحاحوش كل حاجة
لبيتنابعد شهر
أديني حاسكت تانى أهو
هنوده هاكتب لك كلمات اغنيه لي في تعليق بعد ده لكنر رجاء بعد قراءتها تحذفي هذا التعليق الخاص بالأغنية
ولكي تحياتي
حسن ارابيسك
MoLOTof
فعلا الكلام بيريح
و التدوين نفسه شابل كتر من اللي جوانا و اللي كنا قبل كده مش لايقيين له مكان
أسعدني جدا مرورك
تحياتي
----------------------------
Maha
سلام عليكي يا مها
انشااااء الله حاكون عندكم قريب و اشوفك بقى
:)
أما ليه السكات
مش عارفة
مابقتش قادرة اتكلم و مالقيش لكلامي معني و لا قيمة
أديني حابدأ السنة ده بنزولة مصر و أكيد حاتكون سنة جميلة - انشاء الله طبعاً
وحشني اسمي اللي انت مسمياني بيه
:)
---------------------------
فاتيما
أولا واحشاني جدددا جددددا
وآسفة على التأخير
أنا حانزل باذن الله اول فبراير
بس اكيد حاتعملوا تجمع خلال الشهرين اللي حاقعدهم
يااارب يحصل و اكون وسطكم قريب
كل سنة و انت طيبة وقريبة مننا كلنا يا فاتيما
هانم بتسلم عليكي
:))
----------------------
أحمد عبد العدل
اولا آسفة لغيابي جدا عن مدونتك و عن الرد كمان على التعليقك ده بس اكيد غصب عني طبعا
كل سنة وانت طيب
أهو ده اللي نازلة مخصوص علشانه
عشان أزورني هناك
وارجع افتكرني تاني
و اقنعني اني اسافر معاي
ونفسي ما توافقش
عشان لو طلعت معاي أكيد مش حاترجع زي ماهي
ماتقلقش الفرحة أنا ناوية عليها
انت ماشفتنيش قبل كده و انتا في مصر و ماشفتش بوستاتي وانا هناك
حاتشوف وجه تاني خاااالص
يارب يقرب البعيد
يشكرك من العمق على تعليقاتك الطيبة
تحياتي
---------------------
الصديق المخلص
كل سنة و انت طيب و يارب السنة ده تكون جميلة على كلنا يااارب
وأكيد مادمت نازلة مصر يبقى اكيد فيه حاجات كتييير حلوة حاتحصل السنة ده
الحمد لله اللي بيحبوني كتير و ده نعمة اأنا حاسة بيها و بشكر ربنا عليها كل يوم
واما بتضيق قوي و احس ان خلاص مابقتش قادرة اتحمل مابيوقفنيش ويمنعني عن الاستسلام غير القلوب اللي عارفة ان تعبي بيتعبها
الحمد لله
-------------------------
سمراء
مش قادرة اقولك قد ايه اسعدني تعليقك و التعرف عليكي و على مدونتك
الغربة احساس صعب
واصعب لما تكون مش بالاختيار و انها تكون قرار مش طالع منك انتي
كل كلمة كتبتيها حسيتها و حانوي عليها و الحمد لله قلبي بيعرف يحسها و يغوص في دفاها
يمكن فضل الغربة الوحيد انها علمتني ازاي استمتع لوحدي و اعرف اشوف الدفى و الجمال اللي جوة الحاجات
حاحكيلك عن حاجات كتير و انا هناك
وانشاء الله ترجعي اجازة أو على طول قريب و اقرى حكاياتك انا كمان
ممتنة جدا لحسن ارابيسك انه عرفني بيكي وبجد فرحت بمرورك علىّ
:)
تحياتي
يا مراكبي
يااه بقالي كتير ما اتكلمتش معاك معلش اعذرني على تأخيري الاضراري
التذكرة لسة ما اتحجزتش
:(
بس فيه اخبار تمام ربنا يسهل ربنا يخليلنا طيران الجزيرة
:)
اشتقت للتواصل
شايف مين سايبلي تعليق تحت
جهينة
انا فرحانة على الآخر
---------------------
Rodi
طبعا عرفت و كنت حاسة انه انتي بس قلت ما قولش احسن اقع في شر اعمالي و يطلع حد تاني
ههههههه
لا العزومة لا مفر منها
بس انا حاكل رز اسمر و حاكتفي بكده عشان ماليش في السمك
ما تقوليش- امال اسكندرانية ازاي؟؟ - و الله ماعرف
أنا حاشوفك حاشوفك
ياتيجي يا انا اللي حاجيلك.. باذن الله لازم ما افوتهاش المرة ده بقى
وحشتيني
----------------------
كفاية طيبة
ألف سلامة عليكي يا جميل
المرض مهما كان بسيط بيصاحبه دايما احساس بالحزن و حنين شديد لأحبابنا و عتاب عليهم حتى لو ماقصروش اصلا
صح؟
ده اللي بحسه و بحاول اطرده من جوايا دايما كل ما يجيلي برد
سلامتك يا جميل
للأسف معظم المصريين اللي برة مصر متغربين بتطلع منهم حاجات تكسف
تعرفي
واحدة تونسية صاحبتي قالتلي المصريين دول رغم كل عيوبهم اللي فيهم لكن قلبهم طيب
بيخافوا من ربنا و فاكرينه حتى وهم بعملوا الغلط
وفي مالهمش في الشر الجامد
آخرهم توقيع او ندالة لكن أذية و خراب مابقدروش عليهم زي ناس تانية كتير
استغربت كلامها و فرحت بيه وقلت يارب يكون كلامها صح
أما الأطباق فآه ده بيحصل فعلا و ماحدش عاقل بينزل يمشي في الشارع الساعة 12 عشان اللي بيحصل
فكرتني بكلامك عن أطباق توم و جيري بفيلم الليمبي
عارفة المشهد بتاع الشارع لما جه البوليش و شال عربية الكبدة و كان فيه واحد بيبيع أطباق صيني و رزع الطبقين في بعض و هو بينادي على اطباق الصيني اللي مابتتكسرش؟؟
انا بهيس على فكرة و جتلي حالة الرغي اللي مابتخلصش
وانت تعبانة اساسا و مش ناقصة
:)
تعرفي اني بعمل نفس اللي قلتي عليه ده و بكتب على الوورد حاجات كتير و بخبيها في فولدرات بعيده عشان ماطولهاش تاني و اضعف و احطها على المدونة
كنت كمان بكتب في اجنداتي بس بقالي زماااان مابعملش كده
الكمبيوتر أخد العادة ده مني و كمان مش حاسة ان الاجندات اللي بشتريها من هنا انها بتاعتي
وانا لازم احس ان الحاجة بتاعتي عشان احبها و افضفض معاها
حاجيبلي واحدة من مصر السنة دي
رغم اني مفتقدة زيك بالضبط المكتب و الابجورة و الأوضة كلها بشبابكها و ستايرها و صبرها عليّ
لما بنلاقي حد اللي جواه شبه اللي جوانا
و اللي بيوجعه شبة اللي بيوجعنا
و عالمه فيه كتير من تفاصيل عالمنا
وكمان تقوم تيجي الظروف اللي عايشها تبقى شبه ظروفنا
بنفرح قوي
و بنرتاح قوي
ويزيد العشم و القرب قوي
وهو ده اللي بحسه كل ماقريى أي كلمة منك يانونا
:)
سلامتك
وماتقوليش معلش على طول التعليق عشان لو على الاطالة أنا ما اتوصاش
:)
-------------------
gohayna
ما تتخيليش الفرحة اللي انا فيها دلوقتي و من ساعة ماشفت اسمك في التعليقات
يااااااه يا جيجي
و الله زمان
بجد بتوحشيني بشكل غريب
بسال نفسي يارتى اخبارها ايه و ياترى حانشوفها على المدونات تاني ولاّ ايه؟؟
تعرفي؟؟
ساعات اسمع اغاني معينة و تفركني بيكي و كاني سمعتها مثلا في موقف له علاقة بيكي
واسال نفسي ازاي كده اذا كنت اساسا ما اتقابلناش قبل كده
وحشتيني قوي قوي
كل سنة و انت طيبة
والنبي ارجعي باني تاني بجد مفتقداكي
----------------------------
maha
سلام عليكي يا مها
انا كويسة الحمد لله
وكل اللي فقلبي دلوقتي هو الشوق الشديد جدا
وكل الللي فبالي هو تخيل الايام الجاية و امنيات كتير قوي
الامان حاروح اتزود بيه من هناك اشاء الله و آخد منه كمية تكفيني
انت واحشاني اكتر و بفرح باهتمامك الغالي ده يا مها
ماتتخيليش بيفرق معاي قد ايه
Rosa
ياااه
حبيبتي
واحشاني على الآخر
حضنك وصل و حسيت بحنيته يا روزا
فيه حاجات ما بتحتاجش غير اننا بس نحس بيها عشان توصل وتتحس.. و انا حسيت
-----
حتى لو كنتي هتقولي بفرض نفسي عليكي ماليش دعوه بقى
-----
عارفة لو ما كنتيش واحشاني كنت زعقتلك و بهدلت الدنيا و فرجت علينا كل الناس على الجملة ده
:)
بحاول افضل يا روزا زي ما انا
بحاول ما اصدقش اني غلط في كل حاجة بحسها و بتمناها
وميتة من الخوف أحسن ييجي يوم وماقدرش اقاوم أكتر
بس انا نازلة أخد من مصر الشحنة اللي انا عارفة كويس قوي انها حاتقويني تاني
و عارفة انها حاتصالحني و تحضني و تسيبني افضفض و حاتفهمني و تطميني وتفكرني انا كنت مين و جواي ايه و ملامحي شكلها ايه
حاستمتعلك يا روزا و اخدك معاي فكل الفسح و حاتحسي
مش بقولك فيه حاجات كفاية ان الواحد يحسها قوي عشان التاني يحسها
حانجرب .. ماشي؟
-----------------------
حسن ارابيسك
انا تمام الحمد لله
قادرة امسك نفسي لحد ما انزل و هناك بقى حاكون تمام جدا جدا
كلامك اسعدني جدا يا حسن .. تعرف ليه
لإن الوجع بهون لما بيلاقي الناس مستوعباه و حاساه
لو الناس تعرف قد ايه مجرد فتح القلوب على بعضيها بيهون جبال هموم ماكنش حد سد ودانه عن حد
مافهمتش ليه عاوزني امسح الاغنية
بس ياترى تسمحلي أخد منها كوبي الاول و اضمها للمجموعت بتاعتك اللي عندي و اللي اما بصدق الاقيك حاطط حاجة في التعليقات أقوم ضماها ليهم
حسيت الكلمات قوي
واتمنيت كل اللي فيها من قلبي
شكرا ... من العمق
ماشي :)
أهم شئ تفكرى فى الحاجات الحلوة والحاجات اللى عاوزة تعمليها وخايفه الوقت ميكفيش
بس على فكرة وانت فى غربتك هتلاقى حاجات تعمليها أحلى بكتيير ىمن الحاجات اللى عاوة تعمليها هنا
مثلا
حفظ القرآن..زدارسه علوم شرعيه
هتلاقى وقت تعملى حاجات مش هتعرفى تعمليها هنا
قد ما للغربه من عيوب قد ما ليها من حسنات
اجمل شئء فيها بتلاقى وقت لنفسك..اعملى شئ لنفسك وحولى الضيق لفرح والزهق لفايده
ماما أم البنات
الفقيرة إلى الله أم البنات
يتسعدني جدا زيارتك رغم تقصيري
هنا مع الشغل و مواعيده انسي ي ي
اني الاقي وقت أعمل اي حاجة
لكن اللي بتقولي عليه ده حلاقيله كل الوقت في مصر عشان حاتكون أجازة مش معاي فيها اي حد
انا و اسكندرية و بس
يارب مضيعش الشهرين على الفاضي و اشبع روحي باللي بيتسحب منها طول السنة
تحياتي
عايزة شوية بحر من اسكندرية معاكى
منكن؟
وشوية رملة وموج
وشوية بسبوسة وهريسة
وشوية هوا بتوع الصيف
وكام نسمة باردة
وحبة سمك وجمبرى (مع انى مش بحبهم)
بس مجرد انى اعرف انهم من هناك ده هيبقي كويس اوى
وشوية ناس حلوين
وحبة طيبة منهم
على حنية منهم بردو
وشوية الهدوء مع صوت لعب العيال تحت شباكنا ساعة العصارى
والناس العواجيز اللى بتشرب الشاي فى بلكوناتها
بصي ابقي جيبي دول وكلميني من هناك اقولك عالباقي
D:
خلاص انا هطلع من البلوج من غير زق يا هند عيب كدة ادام الناس
D:
وعايزة ايس كريم عزة
قصدي جيلاتى على رأى الناس بتوع اسكندرية
بس مش يسيح بقي منك فى الطيارة وتقوليلي معلش وحاجات كدة
مش هسامح
يارب تبقي اجازة حلوة :)
يلا احجزى بقي وتعالى قولى انك حجزتى عشان انا ارتاح
إرسال تعليق