كنت بحضر بوست عن راس السنة و ذكرياتي معها
ومحضرة تهاني لينا كلنا
لكن الحدث انهاردة مش سايب ولا أي مساحى للتهاني
بقالي ساعات حاسة بان قلبي بيقطر دم
وحزن
قلبي مع غزة و مع كل عربي خرج من بيته بيصرخ صرخات طالعة من عمق جرح
حاسة بعجز
حاسة بخيبة
حاسة بذل
وحاسة بظلم
بقالي 3 ساعات بتفرج على الأخبار و التحليلات
شوية الاقي ناس بتتكلم عن الفلسطينين اللي بيموتوا بشكل مالهوش اي علاقة بالانسانية
وشوية ألاقي ناس بتتكلم عن حاجات تانية خالص و خلافات تانية خالص
***
وخايفة دلوقتي اكون مع اللي سايب الكارثة و بيفكر في نفسه و الدفاع عن بلده و موقفها و مهاجمة الآخرين دفاعا عن نفسه
صفحات كتير اتجولت فيها على النت ولقيت حاجات كتير وجعتني
لقيت جرحين جوايا بينزفوا
جرح اسمه غزة
وجرح اسمه مصر
جوايا احساسين حايواجهوني بكرة أدام زمايلي الفلسطينيين و غيرهم من جنسيات عربية تانية
احساس الأسف و التعازي
واحساس الخزي و الخجل
كل التعازي لغزة
وكل الدعوات ليهم بالصبر و الصمود
اللهم ارحم شهداءهم و أدخلهم جنتك
لكن
لكن
هو اسرائيل محتاجة من مصر ضوء أخضر؟
هو بقى لمصر كلمة اساسا؟
وان كان فيه تواطؤ حايكون سريع للدرجة ده فيتنفذ خلال يوم واحد بس
اختيار اسرائل يوم القصف بعد اللقاء في القاهرة مش بيلقي الضوء على أي مؤشرات
***
أنا لا أناقش
ولا أريد الدخول في هذا البوست في أي مناقشات تبتعد عن أرواح غالية على كل العرب
راحت بشكل مهين و ظالم
لا أريد إلا ان اشاركهم ولو بكلمات التعزية
وأتأسف إن استدرجتني مشاعري لنقاط أخرى
ولكن الجرح واحد في قلوبنا كلنا
****
عندي أمل بتسلل جوايا على استحياء
ان الكارثة ده حاتجر وراها مواقف مختلفة و ردود أفعال أقوى و تكاثف أضخم مما شفناه قبل كده
مش عارفة أقول كلام مناسب و بحجم الكارثة
لكن كل حتة جوايا بتبكي من الحزن
الحزن على غزة و الحزن من مصر
وعليها
آسفة لكل إخواني العرب
لكن ماقدرش ما أبوحش عن حزني عليها حتى في موقف زي ده
التعازي لغزة
هناك 3 تعليقات:
عزائى ياهنودة
مش لاقى كلام .. بس متفرطيش فى الأمل فى تحرك سريع أو تأثير سريع
مفيش تغيير هييجى إلا من إصلاح داخل البلاد العربية يمكن ياخد سنين ومش هييجى على طبق دهب
للأسف مجرد مجزرة زى كتير من اللى فاتوا
أكرر عزائى
حقيقى مش لاقية كلام
حسبى الله ونعم الوكيل وربنا يرحم الشهداء جميعاً
إقرأوا لهم الفاتحة ولأموات المسلمين جميعاً
بجد والله مفيش كلام متهيقلي خلص الكلام
مكسوفه وزعلانه ومضايقه ومشاعر كتير ومش انا لوحدي كلنا
مواقف صعبه وردود افعال اصعب وحجات مخزيه وتحزن ومش عارفه بجد هنفضل لحد امتي كده
بس بردو لابد من وجود امل
حسبنا الله ونعم الوكيل
إرسال تعليق