ربنا يخلّيــكِ ليّ

البوست اللي فات أنا عارفة إني غلست عليكم فيه قوي وكمان لسة ما ردتش على التعليقات

بس كان لازم أنزل البوست ده انهاردة

اولا عشان اللي حصل امبارح حاجة كبيرة قوي

ثانيا عشان لازم أفرح هنا و سطكم

ثالثا عشان أطمنكم عليّ

و يوم الاتنين حارد على التعليقات اللي قريتها كلها بالموبايل و فرحتني وهونت علي كتيييير

البوست الجديد

مبروك يا أهلي و صحابي و ناسي الغاليين و بعرف غلاوتهم أكتر في الحزن و أكتر و أكتر في الفرح
لو تعرفوا أنا دلوقت فرحانة قد ايه
لو تعرفوا زعقت و صرخت وضحكت قد ايه و أنا بتفرج ع الماتش
وبعدها فكرت فيكم واحد واحد و تخيلتكوا كلكم و إنتوا قدام الماتش و قمت جري أباركلكم بالبوست ده .. وطبعا حانزله بكرة (اللي هو انهاردة)عشان ما عنديش نت في البيت
ايه ده!!!!
إنهارده يوم جميل قوي
قوي قوي
قوي قوي قوي
بجد
حاجات كتير اتسببت فانه يبقى من أجمل أيامي الحلوة في قطر
حاجا صغيرة بس كبيرة
وعلى راسهم الماتش
ربنا يخليكي ليّ يا مصر
يا أكتر حاجة في الدنيا بتفرحني
وبتوحشني
و بتطبطب علي
وتحضنّي حضن جميييل قوي
عارفين؟؟
لما جه الجول التاني سمعنا هيجان عجيب في القهوة اللي جنب بيتنا
و فتحنا باب البيت عشان نسمعوا الصوت كويس
كنت حاتجنن و أطلع للقهوة و أتحشر في وسط الناس و أصرّخ
و أما جه الجول التالت حسيت إن الصوت على أكتر لدرجة الجنون
وقطر مش متعوده على كده أساسا
ناس بالهبل إتحدتني إننا مغلوبين مغلوبين و بالذات زميلي السوري اللي ما بيحبش مصر و المصريين

وجه بقى الجول الرابع
أنا كنت حاتجنن.. لأ كنت حاتهبل

عيطت في وسط الضحك ولقيتنا أنا و ماما و بابا وولاء بنط على الكنبة و بنصرخ
وقمنا أنا وولاء جري على باب البيت نسمع هيجان الناس اللي في القهوة ونتحايل على بابا يطلعنا بالعربية وسط الناس
وهو مش راضي
ليه بس يا بابا
ليييييه
و الماسجات و الرنات اشتغلت
عمتي و صحابي
والزن على بابا اشتغل مني أنا وولاء بس صمم تصميم عجيب اننا مش طالعين للهيجان اللي برة
ماشي
بس اخدنا منه وعد اننا نطلع في الماتش النهائي
يا جماعة أنا مش فارقة معاي نكسبوا النهائي
والنبي ما حد يزعل لو خسرنا النهائي
عشان إحنا فعلا جامدين و لعبنا بقلبنا و اثبتنا اننا نستاهل البطولة
شفتوا الجول الرابع


شفتوا اللاعيبة و حبهم لمصر؟
طيب شفتوا اصرارهم..
شفتوا تعبهم
شفتوا ايمانهم
أنا فضلت أدعي في سري
ياااارب يارب يارب
نبقى كلنا كلنا بالروح ده وإحنا بنخدم البلد ده
قولوا معاي من قلوبكم
يا رب إحفظها من اللي مايستاهلوهاش
يارب إجعلنا كلنا مخلصين ليها فعرقنا و علمنا و تعبنا
أنا فرحانة فرحة مش عارفة أتكلم عنها
و اللي مفرحني أكتر من اللي حصل
هو إن مصر هي اللي فرحتني

يارب يخليهالي دايما تفرحني و تملاني حياه
وترد في الروح كل ما الروح تتسحب مني
شفتوا أنا كنت قبلها عاملة إزاي
شفتوا ما هنتش عليها إزاي
حبيبتي يا بلدي يا أمي يا حتة من قلبي و ساكنة روحي
يا أقربلي من أهلي و حبيبي و صحابي و حتى نفسي

عارفة إن فيه ناس كتير ما بتحبش اللي يباهي بحبه ليها و يبالغ و يبتذل
لكن أنا اللي حاساه كبير
و جميل
و مش حاينفع ما أقولهوش
عشان الكلام عنها جميل
وعن حبها اأجمل
كلام بيملاني سكون و أمان و فرحة
مبروووك يا جماعة