الواد العسل ده عيد ميلاده بكرة2/2
عيد ميلاده العاشر
وأنا عمري ما جبتله هدية لعيد ميلاده
ويمكن مرة واحده بس أو مرتين كنت موجوده معاهه في عيد ميلاده
رغم إني بموت فيه و رغم إنه قريب من قلبي بشكل كبير جدا
هو عارف قد ايه انا وهو بنندمج مع بعض
ممكن نقضي يوم كامل أنا وهو ويبقى يوم مليان فرح و ضحك و هزار و جد
ده حسن ابن خالي
وصاحبي
وإبني
لينا مواقف كده نعرفها أنا وهو و أما برجع بفكّره بيها و نضحك
يوم ما وصلت من المطار و طلعت البيت في الأجازة اللي فاتت لقيته نايم في سريري
وكانت الساعة 5 الفجر ورحت أصحيه ففتح عينه في عز نومه و قالي باندهاش
هند!!
وقام واخد راسي تحت دراعه و نايم تاني
أنا بعدت عنه كتير بعد سفري
لما بشوفه في الأجازات ما بقضيش معاه وقت طويل زي زمان
وحسن من النوع اللي عشان تقرب منه لازم تعدي عليكم أيام في البيت
ما ينفعش زيارة كده وسط الزحمة
بس أنا قضيت معاه يوم من أجمل أيام الأجازة اللي فاتت
كان يوم شبه أيامنا أنا وهو أما كان عايش معانا فترة في بيتنا قبل ما أسافر
فاكر يا أبو علي أيام ماكنا ننزل سوق زنانيري نشتري العيش و الفول و البيض و اللبن و كنت تشيلي الكياس و تعدي على أصحاب المحلات و تسلم عليهم وتمسك ايدي و تعديني الشارع
عارفين؟
مرة دخلت أشتري حاجات من اللبان و سبته برة على الباب عشان الزحمة الي جوّة وسمعت زعيقه من جوة و خناقة لرب السما
طلعت لقيته ماسك في خناق راجل كبير
ليه؟؟
عشان قاله إزيك وهو بيلاعبه بصبعه في خده
وكان مبرره لما زعقتله هو
"هو أنا صغير عشان يعملي بصبعه كده؟"
كان أيامها ما كملش 6 سنين
حسن ده ممكن يدخل معاك في مناقشة لمده ربع ساعة عشان تقنعه يسيب حاجة هو عاوزة يعملها
و خلال المناقشة لا انت تزهق و لا هو يززهق
ومش بس كده
ده كمان يفضل فاكرهالك طول عمره انك ناقشته ما جبرتهوش
وكان يستغرب قوي لو خلصت المناقشة و كانت النتيجة لصالحه و إن أنا اللي سمعت كلامه
ويحكي لكل الناس إني سمعت كلامه
وهو صغير أكتر كان فاكر إن ماحدش يقدر يخوفني أو ما يسمعش كلامي
وكان دايما يقوللي
عارفة أنا بحبك ليه وبسمع كلامك؟
فأقوله ليه؟
يقوللي عشان إنت بتتكلمي معاي و بتسمعي كلامي
عنده خفة ده مش عادية وحمقي جدا
هو نجح إنه يجبر خالتي و عمي على قبول رفضه للجبنه التركي فحذفها فعلا من قائمة الفطار تماما
و بقى البيت كله عارف كويس جدا انه ما بيحبش الجبنة التركي
فمرة كنت عندهم وهو بيفطر
فقلتله أعملك ساندويتش جبنة تركي؟
قاللي لأ
سألته ليه
قاللي بصوت عالي .. أنا ما بحبش الجبنة التركي
فقلتله
إنت حاتستعبط .. ما أنا طول عمري بعمله ساندويتشات جبنة تركي و بتاكلها
فقرب مني و بصوت واطي قاللي
أنا أساسا ما بحبش الجبنة التركي و كنت بسمع كلامك عشان ما أزعلكيش
مش عشان أكلت جبنة تركي في بيتك يبقى بحبها .. خلاص؟؟؟
فحافظت على صورته و خفضت صوتي أنا كمان عشان ماحدش من البيت يعرف إنه كسر القاعده يوم و يستغلوا المعلومة و يجبروه على الجبنة التركي
بصّوا
أنا لو حكيت عن حسن مش حاسكت
بس بجد
هو طفل مش عادي
واجه أحزان تهد جبل
عاش مشاعر كتيرة بدري قوي على سنه
ورغم ده
تلاقيه عارف يحس كويس قوي مين اللي بيحيه
وعارف يحس قوي بالخير جوة الناس
يا رب تكون سنة سعيده عليه
ويارب أشوفه شاب ناجح و عارف هو عاوز ايه
ويا رب يفضل يحبني و قريب مني مهما الغربة بعدتني عنه و قربت ناس تانيين
يارب يفضل فاكر أيامنا أنا وهو وقاعدتنا في شباك بيتنا و حواديتنا اللي كنت بحكيهاله و يحكيهالي
يا رب يحميه من كل اللي بيحاوطه
ويهديه ويجعله من الصالحين
كل سنة و هو طيب
